ಸೌಂದರ್ಯ ಸ್ಪರ್ಧೆಯ ಜಗತ್ತಿನಲ್ಲಿ ಭಾರತದ ಕೀರ್ತಿ ಪತಾಕೆ ಹಾರಿಸಿದ ನಟಿ ಪ್ರಿಯಾಂಕಾ ಚೋಪ್ರಾ, 2000ನೇ ಇಸವಿಯಲ್ಲಿ ಮಿಸ್ ವರ್ಲ್ಡ್ ಕಿರೀಟ ಮುಡಿಗೇರಿಸಿಕೊಂಡಾಗ ಅವರಿಗೆ ಕೇವಲ 18 ವರ್ಷ ವಯಸ್ಸು. ಅಷ್ಟು ಚಿಕ್ಕ ವಯಸ್ಸಿನಲ್ಲಿ ವಿಶ್ವ ವೇದಿಕೆಯಲ್ಲಿ ಅವರು ತೋರಿದ ತಾಳ್ಮೆ ಮತ್ತು ಜಾಣ್ಮೆ ಇಂದಿಗೂ ಅನೇಕರಿಗೆ ಸ್ಪೂರ್ತಿಯಾಗಿದೆ. ಅಂದು ವೇದಿಕೆಯ ಮೇಲೆ ಪ್ರಿಯಾಂಕಾ ಅವರು ಭಾರತೀಯ ಸಂಪ್ರದಾಯದಂತೆ ನಮಸ್ತೆ ಮಾಡಿದ ಭಂಗಿ ಪ್ರತಿಯೊಬ್ಬರ ಗಮನ ಸೆಳೆದಿತ್ತು. ಆದರೆ, ಆ ನಮಸ್ತೆ ಹಿಂದಿರುವುದು ಕೇವಲ ಗೌರವದ ಸೂಚನೆ ಮಾತ್ರವಲ್ಲ, ಒಂದು ದೊಡ್ಡ ಫ್ಯಾಷನ್ ಮುಜುಗರದಿಂದ ತಪ್ಪಿಸಿಕೊಳ್ಳಲು ಅವರು ಮಾಡಿದ ತಂತ್ರ ಎಂಬ ವಿಚಾರ ಈಗ ಮತ್ತೆ ಸುದ್ದಿಯಲ್ಲಿದೆ.
ಟೇಪ್ ಸಡಿಲವಾಗಿ ಎದುರಾಗಿತ್ತು ದೊಡ್ಡ ಸಂಕಷ್ಟ
ಮಿಸ್ ವರ್ಲ್ಡ್ ಪಟ್ಟ ಘೋಷಣೆಯಾಗುವ ಹಂತದಲ್ಲಿ ಪ್ರಿಯಾಂಕಾ ಚೋಪ್ರಾ ಪ್ರಸಿದ್ಧ ಡಿಸೈನರ್ ಹೇಮಂತ್ ತ್ರಿವೇದಿ ವಿನ್ಯಾಸಗೊಳಿಸಿದ್ದ ಸ್ಟ್ರಾಪ್ಲೆಸ್ ಗೌನ್ ಧರಿಸಿದ್ದರು. ಆದರೆ ಕಾರ್ಯಕ್ರಮ ನಡೆಯುತ್ತಿದ್ದಂತೆಯೇ ಗೌನ್ ಅನ್ನು ಶರೀರಕ್ಕೆ ಹಿಡಿದಿಡಲು ಬಳಸಿದ್ದ ಬಾಡಿ ಟೇಪ್ ಸಡಿಲಗೊಂಡಿತ್ತು. ಲಕ್ಷಾಂತರ ಜನರ ಮುಂದೆ ಉಡುಪು ಜಾರಿಬೀಳುವ ಭೀತಿ ಎದುರಾದಾಗ, ಪ್ರಿಯಾಂಕಾ ಎದೆಗುಂದದೆ ತಕ್ಷಣವೇ ಎರಡೂ ಕೈಗಳನ್ನು ಜೋಡಿಸಿ ಎದೆಯ ಭಾಗಕ್ಕೆ ಆಸರೆಯಾಗಿ ಹಿಡಿದು ನಮಸ್ತೆ ಭಂಗಿಯಲ್ಲಿ ನಿಂತರು. ಹೊರಗಿನ ಪ್ರಪಂಚಕ್ಕೆ ಅದು ಸೌಜನ್ಯದ ನಮಸ್ಕಾರದಂತೆ ಕಂಡರೂ, ಪ್ರಿಯಾಂಕಾ ತಮ್ಮ ಉಡುಪು ಜಾರದಂತೆ ತಡೆದು ಅತ್ಯಂತ ಜಾಣ್ಮೆಯಿಂದ ಪರಿಸ್ಥಿತಿಯನ್ನು ನಿಭಾಯಿಸಿದ್ದರು.
ಪತ್ನಿಯ ಗೆಲುವನ್ನು ಅಂದೇ ಟಿವಿಯಲ್ಲಿ ವೀಕ್ಷಿಸಿದ್ದ ನಿಕ್ ಜೋನಸ್
ಇನ್ನೊಂದು ಕುತೂಹಲಕಾರಿ ಸಂಗತಿಯೆಂದರೆ, ಪ್ರಿಯಾಂಕಾ ಚೋಪ್ರಾ 2000ರಲ್ಲಿ ಮಿಸ್ ವರ್ಲ್ಡ್ ಕಿರೀಟ ಧರಿಸಿದ ಕ್ಷಣವನ್ನು ಅವರ ಪತಿ, ಹಾಲಿವುಡ್ ಗಾಯಕ ನಿಕ್ ಜೋನಸ್ ಬಾಲ್ಯದಲ್ಲೇ ಟಿವಿಯಲ್ಲಿ ನೋಡಿದ್ದರಂತೆ. ಈ ವಿಷಯವನ್ನು ಪ್ರಿಯಾಂಕಾ ಅವರ ಅತ್ತೆ ನೆನಪಿಸಿಕೊಂಡಾಗ ಸ್ವತಃ ಪ್ರಿಯಾಂಕಾಗೆ ಆಶ್ಚರ್ಯವಾಗಿತ್ತು. ಅಂದು ಲಂಡನ್ನಲ್ಲಿ ಪ್ರಿಯಾಂಕಾ ಕಿರೀಟ ಗೆದ್ದಾಗ, ಅಮೆರಿಕದ ಟೆಕ್ಸಾಸ್ನಲ್ಲಿದ್ದ ನಿಕ್ ಕುಟುಂಬ ಈ ಸ್ಪರ್ಧೆಯನ್ನು ವೀಕ್ಷಿಸಿತ್ತು.
2018ರಲ್ಲಿ ನಿಕ್ ಜೋನಸ್ ಅವರನ್ನು ವಿವಾಹವಾದ ಪ್ರಿಯಾಂಕಾ, ಪ್ರಸ್ತುತ ಮಾಲ್ತಿ ಮೇರಿ ಎಂಬ ಹೆಣ್ಣು ಮಗುವಿನ ತಾಯಿಯಾಗಿದ್ದಾರೆ. ಸಿನಿಮಾಗಳ ವಿಷಯಕ್ಕೆ ಬರುವುದಾದರೆ, ಪ್ರಿಯಾಂಕಾ ಚೋಪ್ರಾ ಮುಂದಿನ ದಿನಗಳಲ್ಲಿ ನಿರ್ದೇಶಕ ಎಸ್ಎಸ್ ರಾಜಮೌಳಿ, ಮಹೇಶ್ ಬಾಬು ಹಾಗೂ ಪೃಥ್ವಿರಾಜ್ ಸುಕುಮಾರನ್ ಅಭಿನಯದ ‘ವಾರಣಾಸಿ’ ಚಿತ್ರದಲ್ಲಿ ಕಾಣಿಸಿಕೊಳ್ಳಲಿದ್ದು, ಈ ಸಿನಿಮಾ 2027ರ ಏಪ್ರಿಲ್ನಲ್ಲಿ ತೆರೆಕಾಣಲಿದೆ.
