ಬೆಂಗಳೂರು: ಬೇಸಿಗೆ ಬಂತೆಂದರೆ ಸಾಕು, ನಮಗೆಲ್ಲರಿಗೂ ಮೊದಲು ನೆನಪಾಗುವುದೇ ಎಳನೀರು. ಆದರೆ, ನೂರಾರು ಅಡಿ ಎತ್ತರದಲ್ಲಿರುವ ಆ ಗಟ್ಟಿ ಚಿಪ್ಪಿನ ಒಳಗಡೆ ನೀರು ಹೇಗೆ ತುಂಬಿಕೊಳ್ಳುತ್ತದೆ ಎಂಬ ಕೌತುಕ ಎಲ್ಲರಲ್ಲೂ ಇದ್ದೇ ಇರುತ್ತದೆ. ಯಾವುದೇ ಬಾವಿ ಇಲ್ಲ, ಮೋಟಾರ್ ಪಂಪ್ ಇಲ್ಲ, ಆದರೂ ಎಳನೀರಿನಲ್ಲಿ ಸಿಹಿ ನೀರು ಇರುವುದರ ಹಿಂದೆ ಪ್ರಕೃತಿಯ ಅತಿ ದೊಡ್ಡ ಇಂಜಿನಿಯರಿಂಗ್ ಕೆಲಸ ಮಾಡಿದೆ. ಆ ರೋಚಕ ವಿಜ್ಞಾನದ ವಿವರ ಇಲ್ಲಿದೆ
1.ಬೇರುಗಳಿಂದ ಕಾಯಿಯವರೆಗೆ ನೀರಿನ ಮಹಾಪಯಣ
ತೆಂಗಿನ ಮರದ ಬೇರುಗಳು ಭೂಮಿಯ ಆಳಕ್ಕೆ ಅಂದರೆ ಸುಮಾರು 5 ಮೀಟರ್‌ಗಳಿಗೂ ಹೆಚ್ಚು ಆಳಕ್ಕೆ ಇಳಿದಿರುತ್ತವೆ. ಇವು ಮಣ್ಣಿನಲ್ಲಿರುವ ನೀರು ಮತ್ತು ಅಗತ್ಯ ಖನಿಜಾಂಶಗಳನ್ನು ಹೀರಿಕೊಳ್ಳುತ್ತವೆ. ಮರದ ಕಾಂಡದಲ್ಲಿರುವ ಕ್ಸೈಲಂ ಎಂಬ ವಿಶೇಷ ಅಂಗಾಂಶವು ವಾಟರ್ ಮೋಟಾರ್ ಪಂಪ್‌ನಂತೆ ಕೆಲಸ ಮಾಡುತ್ತದೆ. ಇದು ಭೂಮಿಯ ಆಳದಿಂದ ನೀರನ್ನು ಹೀರಿ, ನೂರಾರು ಅಡಿ ಎತ್ತರದಲ್ಲಿರುವ ತೆಂಗಿನಕಾಯಿಯ ಒಳಗಡೆ ತಲುಪಿಸುತ್ತದೆ. ಅಂದರೆ, ನೀವು ಕುಡಿಯುವ ಎಳನೀರು ವಾಸ್ತವವಾಗಿ ಮರವು ತನ್ನ ಆಹಾರಕ್ಕಾಗಿ ಸಂಗ್ರಹಿಸಿಟ್ಟುಕೊಂಡ ಅತ್ಯಂತ ಪರಿಶುದ್ಧವಾದ ನೀರಾಗಿದೆ
2.ವಿಜ್ಞಾನದ ಭಾಷೆಯಲ್ಲಿ ಎಳನೀರು ಎಂದರೆ ಏನು?
ವೈಜ್ಞಾನಿಕವಾಗಿ ಹೇಳುವುದಾದರೆ, ಎಳನೀರಿನ ಒಳಗಿರುವ ದ್ರವವನ್ನು ಎಂಡೋಸ್ಪರ್ಮ್ ಎಂದು ಕರೆಯಲಾಗುತ್ತದೆ. ತೆಂಗಿನಕಾಯಿಯ ಒಳಗಡೆ ಬೆಳೆಯುವ ಭ್ರೂಣಕ್ಕೆ (Embryo) ಪೌಷ್ಟಿಕಾಂಶವನ್ನು ಒದಗಿಸಲು ಪ್ರಕೃತಿ ಸಂಗ್ರಹಿಸುವ ದ್ರವವಿದು. ಮರದಿಂದ ಹೀರಲ್ಪಟ್ಟ ನೀರು ಕಾಯಿಯೊಳಗೆ ಪ್ರವೇಶಿಸಿದಾಗ, ಅಲ್ಲಿರುವ ನೈಸರ್ಗಿಕ ಸಕ್ಕರೆ ಮತ್ತು ಪೋಷಕಾಂಶಗಳೊಂದಿಗೆ ಬೆರೆಯುತ್ತದೆ. ಈ ಮಿಶ್ರಣವೇ ನಮಗೆ ರುಚಿಕರವಾದ ಎಳನೀರಿನ ರೂಪದಲ್ಲಿ ಸಿಗುತ್ತದೆ.
3.ಎಳನೀರು ಸಾಫ್ಟ್ ‘ಗಂಜಿ’ ಅಥವಾ ‘ಕೊಬ್ಬರಿ’ಯಾಗಿ ಬದಲಾಗುವುದು ಹೇಗೆ?
ತೆಂಗಿನಕಾಯಿ ಎಳೆಯದಾಗಿದ್ದಾಗ (Tender Coconut) ಅದರ ತುಂಬಾ ನೀರಿರುತ್ತದೆ. ಆದರೆ ಕಾಯಿ ಪಕ್ವವಾಗುತ್ತಾ ಹೋದಂತೆ, ಒಳಗಿರುವ ದ್ರವ ರೂಪದ ಎಂಡೋಸ್ಪರ್ಮ್ ನಿಧಾನವಾಗಿ ಗಟ್ಟಿಯಾಗಲು ಪ್ರಾರಂಭಿಸುತ್ತದೆ. ಇದು ಕಾಯಿಯ ಒಳಗಿನ ಗೋಡೆಗಳಿಗೆ ಬಿಳಿ ಪದರವಾಗಿ ಅಂಟಿಕೊಳ್ಳುತ್ತದೆ. ಇದನ್ನೇ ನಾವು ಗಂಜಿ’ (Malai) ಅಥವಾ ಕೊಬ್ಬರಿ ಎಂದು ಕರೆಯುತ್ತೇವೆ. ಇದೇ ಕಾರಣಕ್ಕೆ ಹಸಿರು ಎಳನೀರಿನಲ್ಲಿ ನೀರು ಜಾಸ್ತಿ ಇರುತ್ತದೆ ಮತ್ತು ಒಣಗಿದ ಬಲಿತ ಕಾಯಿಗಳಲ್ಲಿ ನೀರು ಕಡಿಮೆಯಾಗಿ ಕೊಬ್ಬರಿ ದಪ್ಪಗಿರುತ್ತದೆ.
4.ಇದು ಪ್ರಕೃತಿಯ ಮಹಾ ವಿಸ್ಮಯ
ಯಾವುದೇ ಬಾಹ್ಯ ಯಂತ್ರೋಪಕರಣಗಳ ಸಹಾಯವಿಲ್ಲದೆ, ಭೂಮಿಯ ಒಳಗಿನ ನೀರನ್ನು ಇಷ್ಟೊಂದು ಪೌಷ್ಟಿಕಾಂಶಯುಕ್ತ ಮತ್ತು ರುಚಿಕರವಾದ ಪಾನೀಯವಾಗಿ ಪರಿವರ್ತಿಸುವ ಈ ಇಡೀ ಪ್ರಕ್ರಿಯೆ ಪ್ರಕೃತಿಯ ಅದ್ಭುತ ಇಂಜಿನಿಯರಿಂಗ್‌ಗೆ ಸಾಕ್ಷಿಯಾಗಿದೆ. ಈ ನೀರು ಕೇವಲ ನಮಗಾಗಿ ಮಾತ್ರವಲ್ಲ, ಭವಿಷ್ಯದಲ್ಲಿ ಆ ತೆಂಗಿನಕಾಯಿ ಭೂಮಿಗೆ ಬಿದ್ದು ಮತ್ತೊಂದು ಹೊಸ ಮರವಾಗಿ ಬೆಳೆಯಲು ಬೇಕಾದ ಶಕ್ತಿಯನ್ನು ಒದಗಿಸಲು ಪ್ರಕೃತಿ ಮಾಡುವ ಮುಂಜಾಗ್ರತೆಯಾಗಿದೆ.
