ಬೆಂಗಳೂರು : ಗಾಳಿಪಟದ ದಾರಗಳು, ವಿಶೇಷವಾಗಿ ‘ಚೈನೀಸ್ ಮಾಂಜಾ’ (ನೈಲಾನ್ ದಾರ), ವಾಹನ ಸವಾರರ ಪ್ರಾಣಕ್ಕೆ ಅತ್ಯಂತ ಅಪಾಯಕಾರಿಯಾಗಿ ಪರಿಣಮಿಸಿವೆ. ಇತ್ತೀಚೆಗೆ ಬೆಂಗಳೂರು ಮತ್ತು ಬೀದರ್ ಸೇರಿದಂತೆ ರಾಜ್ಯದ ಹಲವು ಭಾಗಗಳಲ್ಲಿ ನಡೆದ ಘಟನೆಗಳು ಈ ಅಪಾಯದ ತೀವ್ರತೆಯನ್ನು ಎತ್ತಿ ತೋರಿಸಿವೆ.
ಗಾಳಿಪಟದ ದಾರ ಸಿಲುಕಿ ವ್ಯಕ್ತಿಯೋರ್ವನ ಕಾಲಿನ ನರ ಕಟ್ ಆದ ಘಟನೆ ಬೆಂಗಳೂರಿನಲ್ಲಿ ನಡೆದಿದೆ. ಜ.31 ರಂದು ನಡೆದ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ. ಬೆಂಗಳೂರಿನ ಆರ್ ಟಿ ನಗರದಲ್ಲಿ ಈ ಘಟನೆ ನಡೆದಿದೆ. ಮೊದಲಿಗೆ ಬೈಕ್ ಸವಾರನಿಗೆ ಗಾಳಿಪಟದ ದಾರ ಕಾಣಿಸಿಕೊಂಡಿದೆ. ಆತ ಅದನ್ನು ಬಿಡಿಸಿಕೊಂಡು ಮುಂದಕ್ಕೆ ಹೋಗಿದ್ದಾನೆ. ಆದರೆ ಈ ವೇಳೆ ಬೈಕ್ ನ ಹಿಂದ ನಡೆದುಕೊಂಡು ಬರುತ್ತಿದ್ದ ನಾಗಾರ್ಜುನನಿಗೆ ಗಾಳಿಪಟದ ದಾರ ಸಿಲುಕಿಕೊಂಡಿದೆ. ಬೈಕ್ ಸವಾರ ಮುಂದಕ್ಕೆ ಚಲಿಸುತ್ತಿದ್ದಂತೆ ಆ ದಾರ ನಾಗಾರ್ಜುನ ನ ಕಾಲಿಗೆ ಸುತ್ತಿಕೊಂಡಿದೆ. ಪರಿಣಾಮ ಕಾಲಿಗೆ ಗಂಭೀರವಾದ ಗಾಯಗಳಾಗಿದ್ದು, ಕಾಲಿನ ನರಗಳೇ ಕಟ್ ಆಗಿದೆ. ಸದ್ಯ ನಾಗಾರ್ಜುನ ಅವರನ್ನು ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ನೀಡಲಾಗುತ್ತಿದೆ.ಗಾಜಿನ ಪುಡಿ ಸವರಿದ ಈ ದಾರವು ಅತ್ಯಂತ ಹರಿತವಾಗಿದ್ದು, ಎಳೆದ ತಕ್ಷಣ ಚರ್ಮ ಮತ್ತು ನರಗಳನ್ನು ಹಾನಿ ಮಾಡುತ್ತದೆ.
ಮುಂಜಾಗ್ರತಾ ಕ್ರಮಗಳು
ಬೈಕ್ ಸವಾರರು ಎಚ್ಚರ: ಫ್ಲೈಓವರ್ಗಳ ಮೇಲೆ ಹೋಗುವಾಗ ಕುತ್ತಿಗೆಗೆ ಸ್ಕಾರ್ಫ್ (Scarf) ಅಥವಾ ರಕ್ಷಾ ಕವಚ ಧರಿಸುವುದು ಸೂಕ್ತ. ಕೇವಲ ಹತ್ತಿ ದಾರಗಳನ್ನು (Cotton thread) ಬಳಸಿ.ದಾರ ಸಿಕ್ಕರೆ ಸುಟ್ಟು ಹಾಕಿ: ರಸ್ತೆಯಲ್ಲಿ ಬಿದ್ದಿರುವ ದಾರವನ್ನು ಕಂಡರೆ ಅದನ್ನು ಸುರುಳಿ ಸುತ್ತಿ ಸುರಕ್ಷಿತವಾಗಿ ವಿಲೇವಾರಿ ಮಾಡಿ ಅಥವಾ ಸುಟ್ಟು ಹಾಕಿ.
ದಾರವು ಪ್ರಾಣಕ್ಕೆ ಹೇಗೆ ಸಂಚಕಾರ ತರುತ್ತದೆ?
• ಕಾಣದ ಕಿಲ್ಲರ್: ಬೈಕ್ ಸವಾರರು ವೇಗವಾಗಿ ಚಲಿಸುವಾಗ ಗಾಳಿಯಲ್ಲಿ ತೇಲಾಡುವ ಈ ದಾರಗಳು ಕಣ್ಣಿಗೆ ಸುಲಭವಾಗಿ ಕಾಣಿಸುವುದಿಲ್ಲ.
• ತೀವ್ರ ಗಾಯ: ನೈಲಾನ್ ಅಥವಾ ಗಾಜಿನ ಪುಡಿ ಸವರಿದ ದಾರಗಳು ಸವಾರನ ಕುತ್ತಿಗೆ ಅಥವಾ ಮುಖಕ್ಕೆ ತಗುಲಿದಾಗ, ವೇಗದಿಂದಾಗಿ ಅವು ಚಾಕುವಿನಂತೆ ಚರ್ಮ ಮತ್ತು ರಕ್ತನಾಳಗಳನ್ನು (Nerves) ಕತ್ತರಿಸುತ್ತವೆ.
• ರಕ್ತಸ್ರಾವ: ಕುತ್ತಿಗೆಯ ಮುಖ್ಯ ನರಗಳು ಕಟ್ ಆದಾಗ ಅತಿಯಾದ ರಕ್ತಸ್ರಾವವಾಗಿ ಸವಾರ ಸ್ಥಳದಲ್ಲೇ ಸಾವನ್ನಪ್ಪುವ ಸಾಧ್ಯತೆ ಇರುತ್ತದೆ.
• ನಿಯಂತ್ರಣ ತಪ್ಪುವುದು: ದಾರವು ಮೈಗೆ ಅಥವಾ ಚಕ್ರಕ್ಕೆ ಸಿಲುಕಿದಾಗ ಗಾಬರಿಗೊಂಡು ಸವಾರರು ಬೈಕ್ನಿಂದ ಬಿದ್ದು ಅಪಘಾತಕ್ಕೀಡಾಗುತ್ತಾರೆ.
