ಬೆಂಗಳೂರು: ಖಗೋಳ ಆಸಕ್ತರೇ ಸೂರ್ಯಗ್ರಹಣದ ಬೆನ್ನಲ್ಲೇ ಆಕಾಶದಲ್ಲಿ ಮತ್ತೊಂದು ಅದ್ಭುತ ಕಾದಿದೆ. ಬರೋಬ್ಬರಿ 15 ದಿನಗಳ ಅಂತರದಲ್ಲಿ, ಅಂದರೆ ಮಾರ್ಚ್ 3, 2026 ರಂದು ಈ ವರ್ಷದ ಮೊದಲ ಸಂಪೂರ್ಣ ಚಂದ್ರಗ್ರಹಣ ಸಂಭವಿಸಲಿದೆ. ಈ ದಿನ ಚಂದ್ರನು ಕೆಂಪು ಮಿಶ್ರಿತ ತಾಮ್ರದ ಬಣ್ಣಕ್ಕೆ ತಿರುಗಲಿದ್ದು, ಇದನ್ನು ವಿಜ್ಞಾನಿಗಳು ಬ್ಲಡ್ ಮೂನ್ (Blood Moon) ಎಂದು ಕರೆಯುತ್ತಾರೆ.
ಏನಿದು ಬ್ಲಡ್ ಮೂನ್? ಚಂದ್ರ ಕೆಂಪಾಗುವುದು ಏಕೆ?
ಸೂರ್ಯ, ಭೂಮಿ ಮತ್ತು ಚಂದ್ರ ಒಂದೇ ಸರಳರೇಖೆಯಲ್ಲಿ ಬಂದಾಗ ಭೂಮಿಯ ನೆರಳು ಚಂದ್ರನ ಮೇಲೆ ಬೀಳುತ್ತದೆ. ಈ ಸಮಯದಲ್ಲಿ ಭೂಮಿಯ ವಾತಾವರಣದ ಮೂಲಕ ಹಾದುಹೋಗುವ ಸೂರ್ಯನ ಬೆಳಕು ಚದುರಿ, ಕೇವಲ ಕೆಂಪು ಬಣ್ಣದ ಕಿರಣಗಳು ಮಾತ್ರ ಚಂದ್ರನನ್ನು ತಲುಪುತ್ತವೆ. ಸೂರ್ಯೋದಯ ಮತ್ತು ಸೂರ್ಯಾಸ್ತದ ಸಮಯದಲ್ಲಿ ಆಕಾಶ ಕೆಂಪಾಗುವಂತೆ, ಚಂದ್ರನೂ ಈ ವೇಳೆ ಕೆಂಪು ಬಣ್ಣದಲ್ಲಿ ಕಂಗೊಳಿಸುತ್ತಾನೆ.
ಭಾರತದಲ್ಲಿ ಗ್ರಹಣದ ಸಮಯ (IST):ಕೋಲ್ಕತ್ತಾದ ಪೊಸಿಷನಲ್ ಅಸ್ಟ್ರೋನಾಮಿಕಲ್ ಸೆಂಟರ್ ಮಾಹಿತಿಯಂತೆ ಪ್ರಮುಖ ಸಮಯಗಳು ಇಲ್ಲಿವೆ:
ಭಾರತದಲ್ಲಿ ಚಂದ್ರಗ್ರಹಣದ ಪ್ರಮುಖ ಹಂತಗಳು:
ಮಧ್ಯಾಹ್ನ 3:20: ಚಂದ್ರಗ್ರಹಣದ ಆರಂಭ (ಪಾರ್ಶ್ವ ಗ್ರಹಣ ಆರಂಭ).
ಸಂಜೆ 4:34: ಪೂರ್ಣ ಚಂದ್ರಗ್ರಹಣ (Totality) ಪ್ರಾರಂಭ – ಚಂದ್ರನು ಕೆಂಪು ಬಣ್ಣಕ್ಕೆ ತಿರುಗಲು ಶುರುವಾಗುವ ಸಮಯ.
ಸಂಜೆ 5:10 ರಿಂದ 5:25: ಗ್ರಹಣದ ಗರಿಷ್ಠ ಹಂತ (Peak Time) – ಈ ಸಮಯದಲ್ಲಿ ಚಂದ್ರನು ಅತ್ಯಂತ ಗಾಢವಾದ ಕೆಂಪು ಅಥವಾ ತಾಮ್ರದ ಬಣ್ಣದಲ್ಲಿ ಕಾಣಿಸುತ್ತಾನೆ.
ಸಂಜೆ 5:33: ಪೂರ್ಣ ಚಂದ್ರಗ್ರಹಣದ ಅಂತ್ಯ.
ಸಂಜೆ 6:48: ಗ್ರಹಣದ ಸಂಪೂರ್ಣ ಮುಕ್ತಾಯ.
ವೀಕ್ಷಣೆಗೆ ಬೆಸ್ಟ್ ಸ್ಥಳಗಳು ಯಾವುವು?
ಭಾರತದ ಬಹುತೇಕ ಭಾಗಗಳಲ್ಲಿ ಚಂದ್ರೋದಯವಾಗುವ ಮೊದಲೇ ಗ್ರಹಣ ಆರಂಭವಾಗಿರುತ್ತದೆ. ಹಾಗಾಗಿ ನಗರಗಳಿಗೆ ಅನುಗುಣವಾಗಿ ವೀಕ್ಷಣೆ ಹೀಗಿರಲಿದೆ:
ಈಶಾನ್ಯ ಭಾರತ (ಅತ್ಯುತ್ತಮ): ಗುವಾಹಟಿ, ಇಟಾನಗರ ಮತ್ತು ಶಿಲ್ಲಾಂಗ್ನಲ್ಲಿ ಚಂದ್ರನು ಕೆಂಪು ಬಣ್ಣದಲ್ಲೇ ಉದಯಿಸುವುದರಿಂದ ಅದ್ಭುತ ನೋಟ ಸಿಗಲಿದೆ.
ಪೂರ್ವ ಭಾರತ: ಕೋಲ್ಕತ್ತಾ ಮತ್ತು ಪಾಟ್ನಾದಲ್ಲಿ ಪೂರ್ಣ ಗ್ರಹಣದ ಅಂತ್ಯದ ದೃಶ್ಯ ಕಾಣಬಹುದು.
ದಕ್ಷಿಣ ಮತ್ತು ಪಶ್ಚಿಮ ಭಾರತ: ಬೆಂಗಳೂರು, ಮೈಸೂರು, ಚೆನ್ನೈ ಮತ್ತು ಮುಂಬೈನಲ್ಲಿ ಚಂದ್ರೋದಯದ ನಂತರ ಪಾರ್ಶ್ವ ಗ್ರಹಣವು ಸುಮಾರು 15 ರಿಂದ 25 ನಿಮಿಷಗಳ ಕಾಲ ಮಾತ್ರ ಕಾಣಸಿಗಲಿದೆ.
ವೀಕ್ಷಿಸುವುದು ಹೇಗೆ? ಮುನ್ನೆಚ್ಚರಿಕೆಗಳೇನು?
ಬರಿಗಣ್ಣಿನಿಂದ ನೋಡಿ: ಸೂರ್ಯಗ್ರಹಣದಂತಲ್ಲದೆ, ಚಂದ್ರಗ್ರಹಣವನ್ನು ನೋಡಲು ಯಾವುದೇ ವಿಶೇಷ ಕನ್ನಡಕ ಅಥವಾ ಫಿಲ್ಟರ್ಗಳ ಅಗತ್ಯವಿಲ್ಲ. ಇದು ಸಂಪೂರ್ಣ ಸುರಕ್ಷಿತ.
ಸ್ಥಳದ ಆಯ್ಕೆ: ಪೂರ್ವ ದಿಕ್ಕಿನಲ್ಲಿ ಕಟ್ಟಡ ಅಥವಾ ಮರಗಳ ಅಡೆತಡೆ ಇಲ್ಲದ ಎತ್ತರದ ಪ್ರದೇಶ ಅಥವಾ ಬಯಲು ಜಾಗವನ್ನು ಆರಿಸಿಕೊಳ್ಳಿ.
ಉಪಕರಣ: ಬೈನಾಕ್ಯುಲರ್ ಅಥವಾ ಟೆಲಿಸ್ಕೋಪ್ ಬಳಸಿದರೆ ಚಂದ್ರನ ಮೇಲ್ಮೈಯ ಕುಳಿಗಳನ್ನು (Craters) ಸ್ಪಷ್ಟವಾಗಿ ಗಮನಿಸಬಹುದು.
ಆನ್ಲೈನ್ ಲೈವ್: ಮೋಡ ಕವಿದ ವಾತಾವರಣವಿದ್ದರೆ ಅಥವಾ ನೇರ ವೀಕ್ಷಣೆ ಸಾಧ್ಯವಾಗದಿದ್ದರೆ TimeandDate ಯುಟ್ಯೂಬ್ ಚಾನೆಲ್ನಲ್ಲಿ ಲೈವ್ ವೀಕ್ಷಿಸಬಹುದು.ಇದು 2026ರ ಏಕೈಕ ಸಂಪೂರ್ಣ ಚಂದ್ರಗ್ರಹಣ. ಇದರ ನಂತರ ಇಂತಹ ಅಪರೂಪದ ದೃಶ್ಯ ನೋಡಲು ನಾವು ಜುಲೈ 2028ರವರೆಗೆ ಕಾಯಲೇಬೇಕು
