ನವದೆಹಲಿ: ಭಾರತದ ಮೊದಲ ಖಾಸಗಿ ಸಂಸ್ಥೆ ಅಭಿವೃದ್ಧಿಪಡಿಸಿರುವ ‘ವಿಕ್ರಮ್-1’ ಉಡಾವಣಾ ವಾಹನದ ಮೊದಲ ಕಕ್ಷಾ ಉಡಾವಣೆಗೆ ಮುನ್ನ ಪ್ರಧಾನಿ ನರೇಂದ್ರ ಮೋದಿ ಅವರು ಶುಭಾಶಯ ಕೋರಿದ್ದಾರೆ. ಭಾರತದ ಬಾಹ್ಯಾಕಾಶ ಪಯಣದಲ್ಲಿ ಇದು “ಐತಿಹಾಸಿಕ ಹೊಸ ಅಧ್ಯಾಯ” ಎಂದು ಅವರು ಬಣ್ಣಿಸಿದ್ದಾರೆ.
ಎಕ್ಸ್ (X) ಸಾಮಾಜಿಕ ಜಾಲತಾಣದಲ್ಲಿ ಪೋಸ್ಟ್ ಮಾಡಿರುವ ಪ್ರಧಾನಿ ಮೋದಿ, ಬೆಳಗ್ಗೆ 11:30ಕ್ಕೆ ಉಡಾವಣೆ ನಡೆಯಲಿದ್ದು, ಇದು ಭಾರತದ ವೇಗವಾಗಿ ಬೆಳೆಯುತ್ತಿರುವ ಖಾಸಗಿ ಬಾಹ್ಯಾಕಾಶ ಕ್ಷೇತ್ರದ ಮಹತ್ವದ ಮೈಲಿಗಲ್ಲು ಎಂದು ಹೇಳಿದ್ದಾರೆ.”ಇದು ಭಾರತದ ಬಾಹ್ಯಾಕಾಶ ಪಯಣದ ಐತಿಹಾಸಿಕ ಹೊಸ ಗಡಿರೇಖೆಯಾಗಿದೆ” ಎಂದು ಪ್ರಧಾನಿ ಮೋದಿ ಬರೆದುಕೊಂಡಿದ್ದಾರೆ.
ವಿಕ್ರಮ್-1 ಮಿಷನ್ ಭಾರತದ ಯುವಜನರ ಪ್ರತಿಭೆ, ದೃಢಸಂಕಲ್ಪ ಮತ್ತು ಉದ್ಯಮಶೀಲ ಮನೋಭಾವದ ಪ್ರತೀಕವಾಗಿದೆ ಎಂದು ಅವರು ಹೇಳಿದ್ದಾರೆ. ಬಾಹ್ಯಾಕಾಶ ಕ್ಷೇತ್ರದಲ್ಲಿ ಸರ್ಕಾರ ಕೈಗೊಂಡಿರುವ ಸುಧಾರಣೆಗಳು ನವೀನತೆ ಮತ್ತು ಉದ್ಯಮಶೀಲತೆಗೆ ಹೊಸ ಅವಕಾಶಗಳನ್ನು ಸೃಷ್ಟಿಸುತ್ತಿವೆ ಎಂಬುದನ್ನೂ ಅವರು ಉಲ್ಲೇಖಿಸಿದ್ದಾರೆ.
“ವಿಕ್ರಮ್-1 ಯಶಸ್ವಿಯಾಗಿ ಆಕಾಶಕ್ಕೇರಲಿ, ಇತಿಹಾಸ ನಿರ್ಮಿಸಲಿ ಹಾಗೂ ಮುಂದಿನ ಪೀಳಿಗೆಯ ಆವಿಷ್ಕಾರಕರಿಗೆ ಸ್ಫೂರ್ತಿಯಾಗಲಿ” ಎಂದು ಪ್ರಧಾನಿ ಮೋದಿ ಹಾರೈಸಿದ್ದಾರೆ.ಇದೇ ವೇಳೆ, ಈ ಐತಿಹಾಸಿಕ ಕ್ಷಣವನ್ನು ದೇಶದ ಎಲ್ಲರೂ, ವಿಶೇಷವಾಗಿ ಯುವಜನರು ವೀಕ್ಷಿಸಿ, #IndiaWithVikram1 ಹ್ಯಾಶ್‌ಟ್ಯಾಗ್ ಮೂಲಕ ಸ್ಕೈರೂಟ್ ತಂಡಕ್ಕೆ ಶುಭಾಶಯ ತಿಳಿಸುವಂತೆ ಅವರು ಮನವಿ ಮಾಡಿದ್ದಾರೆ.
ವಿಕ್ರಮ್-1 ಬಗ್ಗೆ ಏನು ವಿಶೇಷ?
ಭಾರತದ ಬಾಹ್ಯಾಕಾಶ ಕಾರ್ಯಕ್ರಮದ ಶಿಲ್ಪಿ ಡಾ. ವಿಕ್ರಮ್ ಸಾರಾಭಾಯಿ ಅವರ ಹೆಸರನ್ನು ಈ ಉಡಾವಣಾ ವಾಹನಕ್ಕೆ ಇಡಲಾಗಿದೆ. ಆಂಧ್ರಪ್ರದೇಶದ ಶ್ರೀಹರಿಕೋಟಾದ ಇಸ್ರೋ (ISRO) ಉಡಾವಣಾ ಕೇಂದ್ರದಿಂದ ವಿಕ್ರಮ್-1 ಉಡಾವಣೆಯಾಗಲಿದೆ.ಏಳು ಅಂತಸ್ತಿನ ಎತ್ತರದ ಈ ರಾಕೆಟ್ 450 ಕಿ.ಮೀ. ಎತ್ತರದ ಲೋ ಅರ್ಥ್ ಆರ್ಬಿಟ್ (LEO) ಗೆ ಉಪಗ್ರಹಗಳನ್ನು ಕೊಂಡೊಯ್ಯುವ ಸಾಮರ್ಥ್ಯ ಹೊಂದಿದೆ. ಈ ಉಡಾವಣೆ ಯಶಸ್ವಿಯಾದರೆ, ಖಾಸಗಿ ಕಂಪನಿಯ ಮೂಲಕ ಕಕ್ಷಾ ಉಡಾವಣೆ ನಡೆಸುವ ಸಾಮರ್ಥ್ಯ ಹೊಂದಿರುವ ಅಮೆರಿಕ ಮತ್ತು ಚೀನಾ ನಂತರದ ಮೂರನೇ ದೇಶವಾಗಿ ಭಾರತ ಹೊರಹೊಮ್ಮಲಿದೆ.
‘ಬಾಹ್ಯಾಕಾಶಕ್ಕೆ ಕ್ಯಾಬ್ ಸೇವೆ’ ಗುರಿ
ಸ್ಕೈರೂಟ್ ಏರೋಸ್ಪೇಸ್ ತನ್ನ ಸೇವೆಯನ್ನು “ಬಾಹ್ಯಾಕಾಶಕ್ಕೆ ಕ್ಯಾಬ್ ಸೇವೆ” ಎಂದು ವಿವರಿಸಿದೆ. ಗ್ರಾಹಕರು ತಮ್ಮ ಅಗತ್ಯಕ್ಕೆ ತಕ್ಕಂತೆ ರಾಕೆಟ್ ಬುಕ್ ಮಾಡಿ, ನಿರ್ದಿಷ್ಟ ಕಕ್ಷೆಯಲ್ಲಿ ಉಪಗ್ರಹಗಳನ್ನು ಸ್ಥಾಪಿಸುವ ಅಥವಾ ಬಾಹ್ಯಾಕಾಶ ನಿಲ್ದಾಣಗಳಿಗೆ ತಲುಪುವಂತಹ ಸೇವೆಗಳನ್ನು ಸುಲಭವಾಗಿ ಪಡೆಯುವಂತಾಗುವುದು ಕಂಪನಿಯ ಗುರಿಯಾಗಿದೆ.
