ಸಾಮಾನ್ಯವಾಗಿ ದಕ್ಷಿಣ ಭಾರತದ ಮನೆಗಳಲ್ಲಿ ಅಕ್ಕಿ ಮತ್ತು ಉದ್ದಿನ ಬೇಳೆಯಿಂದ ಮಾಡಿದ ಉತ್ತಪ್ಪಂ ಬಹಳ ಜನಪ್ರಿಯ. ಆದರೆ ಮಕ್ಕಳ ಆರೋಗ್ಯದ ದೃಷ್ಟಿಯಿಂದ ಮತ್ತು ಅವರಿಗೆ ಬೇಳೆಕಾಳು ಹಾಗೂ ಸೊಪ್ಪುಗಳನ್ನು ತಿನ್ನಿಸಲು ಪೋಷಕರು ಹರಸಾಹಸ ಪಡಬೇಕಾಗುತ್ತದೆ. ಇಂತಹ ಸಮಯದಲ್ಲಿ ಪೌಷ್ಟಿಕಾಂಶ ಮತ್ತು ರುಚಿಯನ್ನು ಸಮತೋಲನಗೊಳಿಸುವ ‘ದಾಲ್ ಪಾಲಕ್ ಉತ್ತಪ್ಪಂ’ ಒಂದು ಅತ್ಯುತ್ತಮ ಆಯ್ಕೆಯಾಗಿದೆ.
ಮಕ್ಕಳಿಗೆ ಈ ಉತ್ತಪ್ಪಂ ಏಕೆ ವಿಶೇಷ? ಹೆಸರುಬೇಳೆಯಲ್ಲಿ ಉತ್ತಮ ಗುಣಮಟ್ಟದ ಪ್ರೋಟೀನ್ ಇದ್ದರೆ, ಪಾಲಕ್ ಸೊಪ್ಪು ಕಬ್ಬಿಣದಂಶ ಮತ್ತು ಅಗತ್ಯ ಜೀವಸತ್ವಗಳನ್ನು ಒದಗಿಸುತ್ತದೆ. ಇದರ ಜೊತೆಗೆ ಪನೀರ್ ಮತ್ತು ತರಕಾರಿಗಳನ್ನು ಬಳಸುವುದರಿಂದ ಇದು ಸಂಪೂರ್ಣ ಪೌಷ್ಟಿಕ ಆಹಾರವಾಗಿ ಬದಲಾಗುತ್ತದೆ. ಇದು ಜೀರ್ಣಿಸಿಕೊಳ್ಳಲು ಸುಲಭ ಮತ್ತು ಬೆಳಗ್ಗಿನ ಉಪಹಾರಕ್ಕೆ ಅಥವಾ ಮಕ್ಕಳ ಲಂಚ್ ಬಾಕ್ಸ್‌ಗೆ ಪ್ಯಾಕ್ ಮಾಡಲು ಕೇವಲ ಕೆಲವೇ ನಿಮಿಷಗಳಲ್ಲಿ ತಯಾರಿಸಬಹುದು.
ದಾಲ್ ಪಾಲಕ್ ಉತ್ತಪ್ಪಂಗೆ ಬೇಕಾಗುವ ಪದಾರ್ಥಗಳು:
- ನೆನೆಸಿದ ಹೆಸರುಬೇಳೆ – 1 ಕಪ್
- ಪಾಲಕ್ ಸೊಪ್ಪು – ಅರ್ಧ ಕಪ್ (ಬಿಸಿನೀರಿನಲ್ಲಿ ಹಾಕಿ ತೆಗೆದದ್ದು)
- ಮೊಸರು – 2 ಚಮಚ
- ಹಸಿಮೆಣಸಿನಕಾಯಿ – 2
- ಶುಂಠಿ – ಅರ್ಧ ಇಂಚು
- ರುಚಿಗೆ ತಕ್ಕಷ್ಟು ಉಪ್ಪು
- ಸ್ಟಫಿಂಗ್‌ಗಾಗಿ: ತುರಿದ ಪನೀರ್, ಕ್ಯಾರೆಟ್, ಈರುಳ್ಳಿ ಮತ್ತು ಟೊಮೆಟೊ.
ತಯಾರಿಸುವ ವಿಧಾನ:
- ಮೊದಲು ನೆನೆಸಿದ ಹೆಸರುಬೇಳೆ, ಹಸಿಮೆಣಸಿನಕಾಯಿ, ಶುಂಠಿ, ಮೊಸರು ಮತ್ತು ಪಾಲಕ್ ಸೊಪ್ಪನ್ನು ಮಿಕ್ಸರ್ ಜಾರ್‌ಗೆ ಹಾಕಿ ನುಣ್ಣಗೆ ರುಬ್ಬಿಕೊಳ್ಳಿ.
- ಈ ಮಿಶ್ರಣಕ್ಕೆ ಸ್ವಲ್ಪ ಇಂಗು, ಕೆಂಪು ಮೆಣಸಿನ ಪುಡಿ ಮತ್ತು ಕೊತ್ತಂಬರಿ ಪುಡಿಯನ್ನು ಸೇರಿಸಿ ಚೆನ್ನಾಗಿ ಬೆರೆಸಿ. ಮಕ್ಕಳಿಗೆ ಮಾಡುವುದಾದರೆ ಖಾರ ಕಡಿಮೆ ಇರಲಿ.
- ಈಗ ಕಾವಲಿಯನ್ನು ಕಾಯಿಸಿ ಅದಕ್ಕೆ ಸ್ವಲ್ಪ ಎಣ್ಣೆ ಸವರಿ, ರುಬ್ಬಿದ ಹಿಟ್ಟನ್ನು ದೋಸೆಯಂತೆ ಹರಡಿ.
- ಇದರ ಮೇಲೆ ತುರಿದ ಪನೀರ್, ಈರುಳ್ಳಿ, ಟೊಮೆಟೊ ಮತ್ತು ಕ್ಯಾರೆಟ್ ತುರಿಯನ್ನು ಉದುರಿಸಿ.
- ಕಡಿಮೆ ಉರಿಯಲ್ಲಿ ಎರಡೂ ಬದಿಯಲ್ಲಿ ಹೊಂಬಣ್ಣ ಬರುವವರೆಗೆ ಬೇಯಿಸಿ.
ಬಿಸಿಬಿಸಿಯಾದ ಈ ಉತ್ತಪ್ಪಂ ಅನ್ನು ತೆಂಗಿನಕಾಯಿ ಚಟ್ನಿ ಅಥವಾ ಪುದೀನ ಚಟ್ನಿಯೊಂದಿಗೆ ನೀಡಿದರೆ ಮಕ್ಕಳು ಇಷ್ಟಪಟ್ಟು ಸವಿಯುತ್ತಾರೆ. ಆರೋಗ್ಯಕರ ಜೀವನಶೈಲಿಗೆ ಇಂತಹ ಸತ್ವಯುತ ಉಪಹಾರಗಳು ಅತ್ಯಗತ್ಯ.
