ಬೆಂಗಳೂರು : ಕರ್ನಾಟಕ ಸರ್ಕಾರದ ನಿಯಮಗಳ ಪ್ರಕಾರ, ಗ್ರಾಮ ಪಂಚಾಯಿತಿ ಸಿಬ್ಬಂದಿಗಳಿಗೆ ಕಾರ್ಮಿಕ ಇಲಾಖೆಯು ಕಾಲಕಾಲಕ್ಕೆ ನಿಗದಿಪಡಿಸುವ ಕನಿಷ್ಠ ವೇತನವನ್ನು (Minimum Wages) ನೀಡಲಾಗುತ್ತದೆ. ಪಂಚಾಯಿತಿಗಳು ತಮ್ಮ ಸ್ವಂತ ಸಂಪನ್ಮೂಲ ಮತ್ತು ಸರ್ಕಾರದ ಶಾಸನಬದ್ಧ ಅನುದಾನದಡಿ ಈ ವೇತನವನ್ನು ಭರಿಸುತ್ತವೆ.
ನೌಕರರಿಗೆ ಸಕಾಲದಲ್ಲಿ ವೇತನ ದೊರಕುವಂತೆ ಮಾಡಲು, ಸರ್ಕಾರವು ನೇರವಾಗಿ ವೇತನ ಪಾವತಿಸುವ ವ್ಯವಸ್ಥೆಯನ್ನು ಜಾರಿಗೆ ತಂದಿದೆ.ಸರ್ಕಾರದ ಆದೇಶದಂತೆ ನೌಕರರಿಗೆ ಇ.ಎಸ್.ಐ (ESI), ಪಿ.ಎಫ್ (PF) ಮುಂತಾದ ಸೌಲಭ್ಯಗಳನ್ನು ನೀಡಲಾಗುತ್ತದೆ.
ಇತರೆ ಪ್ರಮುಖ ಸೌಲಭ್ಯಗಳು:
- ರಜೆ ಸೌಲಭ್ಯ: ನೌಕರರಿಗೆ 10 ದಿನಗಳ ಸಾಂದರ್ಭಿಕ ರಜೆ, 2 ದಿನಗಳ ನಿರ್ಬಂಧಿತ ರಜೆ, ಮಹಿಳಾ ನೌಕರರಿಗೆ 180 ದಿನಗಳ ಪ್ರಸೂತಿ ರಜೆ ಮತ್ತು ಪುರುಷ ನೌಕರರಿಗೆ 15 ದಿನಗಳ ಪಿತೃತ್ವ ರಜೆ ನೀಡಲಾಗುತ್ತದೆ.
- ಅನುಕಂಪದ ನೇಮಕಾತಿ: ಸೇವೆಯಲ್ಲಿದ್ದಾಗ ನೌಕರ ಮರಣ ಹೊಂದಿದಲ್ಲಿ, ಅವರ ಅವಲಂಬಿತರಿಗೆ ಅನುಕಂಪದ ಆಧಾರದ ಮೇಲೆ ನೇಮಕಾತಿ ಪಡೆಯಲು ಅವಕಾಶವಿದೆ.
- ನಿವೃತ್ತಿ ಮತ್ತು ಮರಣೋತ್ತರ ಉಪದಾನ: ಸೇವೆ ಸಲ್ಲಿಸಿದ ಅವಧಿಯ ಆಧಾರದ ಮೇಲೆ 15 ದಿನಗಳ ವೇತನದಂತೆ, ಗರಿಷ್ಠ 20 ತಿಂಗಳ ವೇತನ ಮೀರದಂತೆ ಉಪದಾನ ನೀಡಲಾಗುತ್ತದೆ.
- ಶವಸಂಸ್ಕಾರಕ್ಕೆ ನೆರವು: ಸೇವೆಯಲ್ಲಿದ್ದಾಗ ನೌಕರರು ಮೃತಪಟ್ಟರೆ, ಅವರ ಕುಟುಂಬಕ್ಕೆ ಶವಸಂಸ್ಕಾರಕ್ಕಾಗಿ 10,000 ರೂ.ಗಳನ್ನು ಪಂಚಾಯಿತಿ ಸಂಪನ್ಮೂಲದಿಂದ ಭರಿಸಲು ಅವಕಾಶ ಕಲ್ಪಿಸಲಾಗಿದೆ.
- ವಿಮಾ ಯೋಜನೆಗಳು: ನೌಕರರಿಗೆ ಪ್ರಧಾನ ಮಂತ್ರಿ ಜೀವನ್ ಜ್ಯೋತಿ, ಪ್ರಧಾನ ಮಂತ್ರಿ ಸುರಕ್ಷಾ ಜ್ಯೋತಿ ಮತ್ತು ಭಾರತೀಯ ಸ್ಟೇಟ್ ಬ್ಯಾಂಕ್ ಗ್ರೂಪ್ ಪರ್ಸನಲ್ ಆಕ್ಸಿಡೆಂಟ್ ಇನ್ಶೂರೆನ್ಸ್ ಯೋಜನೆಗಳನ್ನು ಕಡ್ಡಾಯವಾಗಿ ಮಾಡಿಸಲು ಸೂಚಿಸಲಾಗಿದೆ.
- ವೈದ್ಯಕೀಯ ನೆರವು: ಕೋವಿಡ್-19 ಅಥವಾ ಇತರೆ ತೀವ್ರ ಸ್ವರೂಪದ ಕಾಯಿಲೆಗಳಾದ ಹೃದಯ ಶಸ್ತ್ರಚಿಕಿತ್ಸೆ, ಕ್ಯಾನ್ಸರ್, ಡಯಾಲಿಸಿಸ್ ಇತ್ಯಾದಿಗಳಿಗೆ ವೈದ್ಯಕೀಯ ವೆಚ್ಚ ಭರಿಸಲು ಆಶ್ವಾಸನೆ ನಿಧಿಯಿಂದ ಗರಿಷ್ಠ 50,000 ರೂ.ಗಳವರೆಗೆ ಪರಿಹಾರ/ವೆಚ್ಚ ನೀಡಲು ಆದೇಶಿಸಲಾಗಿದೆ.
- ಬಡ್ತಿ ಮತ್ತು ನೇಮಕಾತಿ: ಖಾಲಿ ಇರುವ ಹುದ್ದೆಗಳಿಗೆ ಜೇಷ್ಠತಾ ಪಟ್ಟಿ ಆಧಾರದ ಮೇಲೆ ಬಡ್ತಿ ಪಡೆಯಲು ಮತ್ತು ಗ್ರೇಡ್-2 ಕಾರ್ಯದರ್ಶಿ/ದ್ವಿತೀಯ ದರ್ಜೆ ಲೆಕ್ಕ ಸಹಾಯಕ ಹುದ್ದೆಗಳಿಗೆ ನೇರ ನೇಮಕಾತಿ ಕೋಟಾದಡಿ ಭರ್ತಿ ಮಾಡಲು ಅವಕಾಶವಿದೆ.
| ಹುದ್ದೆ | ಮೂಲ ವೇತನ (ರೂ.) | ವ್ಯತ್ಯಾಸವಾಗುವ ತುಟ್ಟಿಭತ್ಯೆ (ರೂ.) | ಒಟ್ಟು ವೇತನ (ರೂ.) |
| ಬಿಲ್ ಕಲೆಕ್ಟರ್ | 15,196.72 | 2,223.60 | 17,420.32 |
| ಕ್ಲರ್ಕ್ ಕಂ ಡಾಟಾ ಎಂಟ್ರಿ ಆಪರೇಟರ್ | 15,196.72 | 2,223.60 | 17,420.32 |
| ವಾಟರ್ ಆಪರೇಟರ್ | 13,509.32 | 2,223.60 | 15,732.92 |
| ಅಟೆಂಡೆಂಟ್ | 12,873.52 | 2,223.60 | 15,097.12 |
| ಕ್ಲೀನರ್ಸ್ | 16,019.52 | 2,223.60 | 18,243.12 |
