ಇತ್ತೀಚಿನ ದಿನಗಳಲ್ಲಿ ಲಿಪ್ಸ್ಟಿಕ್ ಮಹಿಳೆಯರ ದೈನಂದಿನ ಮೇಕಪ್ನ ಅವಿಭಾಜ್ಯ ಅಂಗವಾಗಿದೆ. ಆದರೆ ಪ್ರತಿದಿನ ರಾಸಾಯನಿಕಯುಕ್ತ ಲಿಪ್ಸ್ಟಿಕ್ ಬಳಸುವುದರಿಂದ ಆರೋಗ್ಯದ ಮೇಲೆ ದುಷ್ಪರಿಣಾಮ ಉಂಟಾಗುವ ಸಾಧ್ಯತೆ ಇದೆ ಎಂದು ವೈದ್ಯರು ಎಚ್ಚರಿಕೆ ನೀಡಿದ್ದಾರೆ. ಹಾಗಾದರೆ ಲಿಪ್ಸ್ಟಿಕ್ ಬಳಕೆಯಿಂದ ನಿಜವಾಗಿಯೂ ಕ್ಯಾನ್ಸರ್ ಅಪಾಯವಿದೆಯೇ? ತಜ್ಞರು ಏನು ಹೇಳುತ್ತಾರೆ ಎಂಬುದನ್ನು ತಿಳಿಯೋಣ.
ಇತ್ತೀಚಿನ ದಿನಗಳಲ್ಲಿ ಮಹಿಳೆಯರ ದೈನಂದಿನ ಜೀವನದಲ್ಲಿ ಸೌಂದರ್ಯವರ್ಧಕಗಳ ಬಳಕೆ ಸಾಮಾನ್ಯವಾಗಿದೆ. ವಿಶೇಷವಾಗಿ ಕಚೇರಿ, ಸಮಾರಂಭ ಅಥವಾ ಇತರೆ ಕಾರ್ಯಕ್ರಮಗಳಿಗೆ ತೆರಳುವಾಗ ತುಟಿಗಳ ಅಂದ ಹೆಚ್ಚಿಸಲು ಲಿಪ್ಸ್ಟಿಕ್ ಬಳಸುವುದು ರೂಢಿಯಾಗಿದೆ. ಆದರೆ ಪ್ರತಿದಿನ ರಾಸಾಯನಿಕಯುಕ್ತ ಲಿಪ್ಸ್ಟಿಕ್ ಬಳಸುವುದರಿಂದ ಆರೋಗ್ಯಕ್ಕೆ ಅಪಾಯ ಉಂಟಾಗುವ ಸಾಧ್ಯತೆ ಇದೆ ಎಂದು ವೈದ್ಯರು ಎಚ್ಚರಿಕೆ ನೀಡಿದ್ದಾರೆ.
ಆರೋಗ್ಯ ತಜ್ಞರ ಪ್ರಕಾರ, ಮಾರುಕಟ್ಟೆಯಲ್ಲಿ ಲಭ್ಯವಿರುವ ಕೆಲವು ಲಿಪ್ಸ್ಟಿಕ್ಗಳಲ್ಲಿ ಬಣ್ಣ, ಸುಗಂಧ ಮತ್ತು ದೀರ್ಘಕಾಲ ತುಟಿಗಳ ಮೇಲೆ ಉಳಿಯುವಂತೆ ಮಾಡಲು ಸೀಸ (Lead), ಕ್ಯಾಡ್ಮಿಯಂ (Cadmium), ಕ್ರೋಮಿಯಂ (Chromium) ಮುಂತಾದ ಭಾರ ಲೋಹಗಳು ಹಾಗೂ ರಾಸಾಯನಿಕಗಳನ್ನು ಬಳಸಲಾಗುತ್ತದೆ. ಲಿಪ್ಸ್ಟಿಕ್ ಬಳಸಿದ ನಂತರ ಆಹಾರ ಸೇವಿಸುವಾಗ ಅಥವಾ ಲಾಲಾರಸದ ಮೂಲಕ ಈ ರಾಸಾಯನಿಕಗಳು ದೇಹದೊಳಗೆ ಸೇರುವ ಸಾಧ್ಯತೆ ಇದೆ.
ವಿಶೇಷವಾಗಿ ಕಡಿಮೆ ಬೆಲೆಯ ಹಾಗೂ ಕಳಪೆ ಗುಣಮಟ್ಟದ ಉತ್ಪನ್ನಗಳನ್ನು ನಿರಂತರವಾಗಿ ಬಳಸುವುದರಿಂದ ಆರೋಗ್ಯದ ಮೇಲೆ ದುಷ್ಪರಿಣಾಮ ಉಂಟಾಗಬಹುದು ಎಂದು ವೈದ್ಯರು ಹೇಳುತ್ತಾರೆ. ಇವು ತುಟಿಗಳ ಬಣ್ಣ ಬದಲಾವಣೆ, ಅಲರ್ಜಿ, ಚರ್ಮದ ಸಮಸ್ಯೆಗಳು ಹಾಗೂ ದೀರ್ಘಾವಧಿಯಲ್ಲಿ ಹಾರ್ಮೋನ್ ಅಸಮತೋಲನಕ್ಕೆ ಕಾರಣವಾಗುವ ಸಾಧ್ಯತೆಯೂ ಇದೆ.
ಈ ಅಪಾಯವನ್ನು ತಪ್ಪಿಸಲು ಮಹಿಳೆಯರು ಕೆಲವು ಮುನ್ನೆಚ್ಚರಿಕೆಗಳನ್ನು ಪಾಲಿಸುವಂತೆ ತಜ್ಞರು ಸಲಹೆ ನೀಡುತ್ತಾರೆ. ರಾಸಾಯನಿಕಯುಕ್ತ ಲಿಪ್ಸ್ಟಿಕ್ಗಳ ಬದಲಿಗೆ ಬೀಟ್ರೂಟ್, ಕ್ಯಾರೆಟ್, ವಿವಿಧ ಹೂವುಗಳಿಂದ ತಯಾರಿಸಿದ ನೈಸರ್ಗಿಕ ಲಿಪ್ಕಲರ್ಗಳನ್ನು ಬಳಸಬಹುದು. ಅಲ್ಲದೆ, ವಿಶ್ವಾಸಾರ್ಹ ಬ್ರ್ಯಾಂಡ್ಗಳ ಸುರಕ್ಷತಾ ಮಾನದಂಡಗಳನ್ನು ಪಾಲಿಸುವ, ಗುಣಮಟ್ಟದ ಹಾಗೂ ನೈಸರ್ಗಿಕ ಪದಾರ್ಥಗಳನ್ನು ಒಳಗೊಂಡ ಉತ್ಪನ್ನಗಳನ್ನು ಆಯ್ಕೆ ಮಾಡುವುದು ಉತ್ತಮ.
ಗಮನಿಸಿ: ಲಿಪ್ಸ್ಟಿಕ್ ಬಳಸುವುದರಿಂದಲೇ ಕ್ಯಾನ್ಸರ್ ಬರುತ್ತದೆ ಎಂಬುದಕ್ಕೆ ಸ್ಪಷ್ಟ ವೈಜ್ಞಾನಿಕ ಸಾಕ್ಷ್ಯವಿಲ್ಲ. ಆದರೆ ಕಳಪೆ ಗುಣಮಟ್ಟದ, ಹಾನಿಕಾರಕ ರಾಸಾಯನಿಕಗಳನ್ನು ಒಳಗೊಂಡ ಉತ್ಪನ್ನಗಳ ದೀರ್ಘಕಾಲದ ಬಳಕೆಯನ್ನು ತಪ್ಪಿಸುವುದು ಆರೋಗ್ಯದ ದೃಷ್ಟಿಯಿಂದ ಒಳಿತು.
