ಇಂದಿನ ಕಾಲದಲ್ಲಿ ಐಷಾರಾಮಿ ಎಂದರೆ ಕೇವಲ ದುಬಾರಿ ವಸ್ತುಗಳು ಅಥವಾ ಬ್ರ್ಯಾಂಡ್‌ಗಳಷ್ಟೇ ಅಲ್ಲ; ಹಳೆಯ ನೆನಪುಗಳನ್ನು ಹಾಗೂ ಪಾರಂಪರಿಕ ವಸ್ತುಗಳನ್ನು ಕಾಪಾಡಿಕೊಳ್ಳುವುದು ಕೂಡ ಒಂದು ರೀತಿಯ ಶ್ರೀಮಂತಿಕೆ ಎಂಬ ಭಾವನೆ ಜನರಲ್ಲಿ ಮೂಡುತ್ತಿದೆ. ಹೊಸ ಬಟ್ಟೆ ಅಥವಾ ಫ್ಯಾಕ್ಟರಿಯಲ್ಲಿ ತಯಾರಿಸಿದ ಪೀಠೋಪಕರಣಗಳ ಬದಲಿಗೆ, ಹಿರಿಯರು ಬಳಸುತ್ತಿದ್ದ ವಸ್ತುಗಳಿಗೆ ಮರುಜೀವ ನೀಡುವುದೇ ಈಗಿನ ಹೊಸ ಟ್ರೆಂಡ್ ಆಗಿದೆ. ಮುಂಬೈ ಮೂಲದ ಖ್ಯಾತ ಪೀಠೋಪಕರಣ ಚಿತ್ರಕಲೆ ಕಲಾವಿದೆ ಡಾ. ಆಶ್ನಾ ಖೋಸ್ಲಾ ಮೊಂಗಾ ಅವರು ಈ ವಿಭಿನ್ನ ಆಂದೋಲನದ ಮುಂಚೂನಿಯಲ್ಲಿದ್ದಾರೆ.
ಸಾಮಾಜಿಕ ಜಾಲತಾಣಗಳಲ್ಲಿ ಹಳೆಯ ಹಾಗೂ ಹರಿದುಹೋದ ಪೀಠೋಪಕರಣಗಳನ್ನು ಅತ್ಯಾಕರ್ಷಕವಾಗಿ ಬದಲಾಯಿಸುವ ವೀಡಿಯೊಗಳು ಸಾಕಷ್ಟು ವೈರಲ್ ಆಗುತ್ತಿರುತ್ತವೆ. ‘ಪೈಂಟ್‌ಮಾಮ್ಜಿ’ ಸಂಸ್ಥೆಯ ಸಂಸ್ಥಾಪಕಿಯಾಗಿರುವ ಡಾ. ಆಶ್ನಾ ಅವರು ಶಮಿತಾ ಶೆಟ್ಟಿ, ದ್ರಷ್ಟಿ ಧಾಮಿ, ರಾಹುಲ್ ದುವಾ ಸೇರಿದಂತೆ ಹಲವು ಸೆಲೆಬ್ರಿಟಿಗಳೊಂದಿಗೆ ಕೆಲಸ ಮಾಡಿ, ಅನುಪಯುಕ್ತವಾಗಿದ್ದ ಹಳೆಯ ವಸ್ತುಗಳಿಗೆ ಸುಂದರ ರೂಪ ನೀಡಿದ್ದಾರೆ.
ಹಳೆಯ ವಸ್ತುಗಳೇ ಅತಿ ಹೆಚ್ಚು ಮೌಲ್ಯಯುತ
ಫ್ಯಾಕ್ಟರಿಯಿಂದ ನೇರವಾಗಿ ಬರುವ ಹೊಸ ಪೀಠೋಪಕರಣಗಳಿಗಿಂತ, ಮನೆಯಲ್ಲಿ ತಲೆಮಾರುಗಳಿಂದ ಬಂದಿರುವ ಹಳೆಯ ವಸ್ತುಗಳಿಗೆ ಭಾವನಾತ್ಮಕ ಬೆಲೆ ಇರುತ್ತದೆ. ಅಜ್ಜಿ ಕಾಲದ ಮರದ ಅಲ್ಮೆರಾ, ಹಳೆಯ ಪೆಟ್ಟಿಗೆ ಅಥವಾ ಕುರ್ಚಿಗಳು ಸಮಯ ಕಳೆದಂತೆ ಮೂಲೆ ಸೇರುತ್ತವೆ. ಆದರೆ ಸ್ವಲ್ಪ ಸೃಜನಶೀಲತೆ ಮತ್ತು ಪ್ರೀತಿಯಿಂದ ಅವಕ್ಕೆ ಹೊಸ ರೂಪ ನೀಡಬಹುದು ಎನ್ನುತ್ತಾರೆ ಆಶ್ನಾ. ದುಬಾರಿ ವಸ್ತುಗಳನ್ನು ಸುಲಭವಾಗಿ ಖರೀದಿಸಬಹುದಾದರೂ, ಹಳೆಯ ವಸ್ತುಗಳೊಂದಿಗೆ ತಳಕುಹಾಕಿಕೊಂಡಿರುವ ನೆನಪುಗಳನ್ನು ಎಂದಿಗೂ ಕೊಳ್ಳಲು ಸಾಧ್ಯವಿಲ್ಲ.
ಸೆಲೆಬ್ರಿಟಿಗಳ ವಿಶೇಷ ಪ್ರಾಜೆಕ್ಟ್‌ಗಳು
ನಟಿ ದ್ರಷ್ಟಿ ಧಾಮಿ ತಮ್ಮ ಮಗುವಿನ ಆಗಮನಕ್ಕಾಗಿ ಅಜ್ಜಿಯ ಕಾಲದ ಸುಮಾರು ೫೦ ವರ್ಷ ಹಳೆಯದಾದ ಅಲ್ಮೆರಾವನ್ನು ಮರುರೂಪಿಸಿದ್ದಾರೆ. ಇದು ತನ್ನ ಮಗುವಿಗೆ ತಾನು ನೀಡಿದ ಮೊದಲ ಉಡುಗೊರೆ ಎಂದು ನಟಿ ಭಾವುಕರಾಗಿದ್ದಾರೆ. ಹಾಗೆಯೇ ಕಾಮಿಡಿಯನ್ ರಾಹುಲ್ ದುವಾ ಅವರ ಅಜ್ಜಿಯ ಮದುವೆಯ ಕಾಲದ ತುಕ್ಕು ಹಿಡಿದ ೭೦ ವರ್ಷ ಹಳೆಯ ಟ್ರಂಕ್‌ಗಳನ್ನು ಅತ್ಯಂತ ಸುಂದರವಾಗಿ ಮರುರೂಪಿಸಿರುವುದಾಗಿ ಕಲಾವಿದೆ ನೆನಪಿಸಿಕೊಳ್ಳುತ್ತಾರೆ. ನಟಿ ಶಮಿತಾ ಶೆಟ್ಟಿ ಕೂಡ ಸ್ವತಃ ತಾವೇ ಹಳೆಯ ಪ್ರಾಚೀನ ವಸ್ತುಗಳನ್ನು ಮರುರೂಪಿಸುವ ತಂತ್ರಗಳನ್ನು ಕಲಾವಿದೆಯಿಂದ ಕಲಿತುಕೊಂಡಿದ್ದಾರೆ.
ವೇಗದ ಜೀವನಶೈಲಿ ಮತ್ತು ಮರುಬಳಕೆಯ ಈ ದಿನಗಳಲ್ಲಿ, ಹಳೆಯ ಪೀಠೋಪಕರಣಗಳನ್ನು ಎಸೆಯುವ ಬದಲು ಅವುಗಳನ್ನು ಸುಂದರವಾಗಿ ಪುನರ್ಸ್ಥಾಪಿಸುವುದು ಹೊಸ ಕಾಲದ ಐಷಾರಾಮದ ಸಂಕೇತವಾಗಿ ಹೊರಹೊಮ್ಮಿದೆ.
