ಗಿನಿಯಾ ರಾಜಧಾನಿ ಕೊನಾಕ್ರಿಯಲ್ಲಿ ಭೀಕರ ದುರಂತ ಸಂಭವಿಸಿದ್ದು, ಭಾರಿ ಮಳೆಯಿಂದ ನಗರದ ಅತಿದೊಡ್ಡ ಕಸದ ಡಂಪಿಂಗ್ ಯಾರ್ಡ್‌ನಲ್ಲಿದ್ದ ಬೃಹತ್ ಕಸದ ರಾಶಿ ಕುಸಿದು 30 ಮಂದಿ ಮೃತಪಟ್ಟಿದ್ದಾರೆ. ಕಸದ ಗುಡ್ಡ ಕುಸಿದು ಸಮೀಪದಲ್ಲಿದ್ದ ಬಡವರ ಗುಡಿಸಲುಗಳು ಹಾಗೂ ತಾತ್ಕಾಲಿಕ ಮನೆಗಳ ಮೇಲೆ ಬಿದ್ದ ಪರಿಣಾಮ ಈ ದುರಂತ ಸಂಭವಿಸಿದೆ.
ಕೊನಾಕ್ರಿಯ ದಾರ್ ಎಲ್ ಸಲಾಂ ಪ್ರದೇಶದಲ್ಲಿರುವ ಪ್ರಮುಖ ಕಸದ ಡಂಪಿಂಗ್ ಯಾರ್ಡ್‌ನಲ್ಲಿ ಭಾನುವಾರ ರಾತ್ರಿ ಸುಮಾರು 2 ಗಂಟೆ ವೇಳೆಗೆ ಭಾರಿ ಮಳೆ ಆರಂಭವಾಗಿತ್ತು. ಮಳೆಯ ನೀರಿನ ರಭಸಕ್ಕೆ ಹಲವು ವರ್ಷಗಳಿಂದ ಸಂಗ್ರಹವಾಗಿದ್ದ ಬೃಹತ್ ಪ್ರಮಾಣದ ಕಸ ಏಕಾಏಕಿ ಕುಸಿದು, ಸಮೀಪದ ಗುಡಿಸಲುಗಳ ಮೇಲೆ ಬಿದ್ದಿದೆ. ಗಾಢ ನಿದ್ರೆಯಲ್ಲಿದ್ದ ಜನರಿಗೆ ತಪ್ಪಿಸಿಕೊಳ್ಳಲು ಅವಕಾಶವೇ ಸಿಗದೆ ಕಸ ಹಾಗೂ ಮಣ್ಣಿನಡಿ ಸಿಲುಕಿದ್ದಾರೆ.
ರಕ್ಷಣಾ ಕಾರ್ಯಾಚರಣೆ ಚುರುಕು
ಘಟನೆ ಬಗ್ಗೆ ಮಾಹಿತಿ ಸಿಗುತ್ತಿದ್ದಂತೆ ಮಿಲಿಟರಿ ಎಂಜಿನಿಯರಿಂಗ್ ವಿಭಾಗ ಹಾಗೂ ರಕ್ಷಣಾ ತಂಡಗಳು ಸ್ಥಳಕ್ಕೆ ಧಾವಿಸಿವೆ. ಜೆಸಿಬಿ ಹಾಗೂ ಇತರ ಯಂತ್ರಗಳ ನೆರವಿನಿಂದ ಕಸ ಮತ್ತು ಮಣ್ಣಿನಡಿ ಸಿಲುಕಿರುವವರಿಗಾಗಿ ಶೋಧ ಕಾರ್ಯ ನಡೆಸಲಾಗಿದೆ. ಘಟನೆಯಲ್ಲಿ ಆರು ಮಂದಿ ಗಂಭೀರವಾಗಿ ಗಾಯಗೊಂಡಿದ್ದು, ಹಲವು ಮನೆಗಳು ಸಂಪೂರ್ಣವಾಗಿ ಧ್ವಂಸಗೊಂಡಿವೆ.
ಅಚ್ಚರಿಯ ಸಂಗತಿಯೆಂದರೆ, ಈ ಡಂಪಿಂಗ್ ಯಾರ್ಡ್ ಅನ್ನು ಶಾಶ್ವತವಾಗಿ ಮುಚ್ಚಲು ಅಧಿಕಾರಿಗಳು ಸಿದ್ಧತೆ ನಡೆಸುತ್ತಿದ್ದ ಸಂದರ್ಭದಲ್ಲೇ ಈ ದುರಂತ ಸಂಭವಿಸಿದೆ.
ಎಚ್ಚರಿಕೆ ನೀಡಿದ್ದರೂ ಜನರು ಅಲ್ಲೇ ವಾಸ
ಡಂಪಿಂಗ್ ಯಾರ್ಡ್ ಅಪಾಯಕಾರಿ ಸ್ಥಿತಿಯಲ್ಲಿದ್ದ ಹಿನ್ನೆಲೆಯಲ್ಲಿ, ಅದರ ಸುತ್ತಮುತ್ತ ವಾಸಿಸುತ್ತಿದ್ದ ಜನರಿಗೆ ಸ್ಥಳ ಖಾಲಿ ಮಾಡುವಂತೆ ಅಧಿಕಾರಿಗಳು ಮೊದಲೇ ಸೂಚನೆ ನೀಡಿದ್ದರು. ಈ ಎಚ್ಚರಿಕೆಯ ಬಳಿಕ ಹಲವು ಕುಟುಂಬಗಳು ಸುರಕ್ಷಿತ ಸ್ಥಳಗಳಿಗೆ ತೆರಳಿದ್ದವು. ಆದರೆ ಕೆಲವು ಬಡ ಕುಟುಂಬಗಳು ಅಲ್ಲೇ ಉಳಿದುಕೊಂಡಿದ್ದರಿಂದ ಭೀಕರ ದುರಂತ ಸಂಭವಿಸಿದೆ.
ಉಳಿದ ಎಲ್ಲ ಕುಟುಂಬಗಳನ್ನೂ ತಕ್ಷಣ ಸುರಕ್ಷಿತ ಪ್ರದೇಶಗಳಿಗೆ ಸ್ಥಳಾಂತರಿಸಲಾಗುವುದು ಎಂದು ಆ ದೇಶದ ಪ್ರಾದೇಶಿಕ ಆಡಳಿತ ಸಚಿವ ಡೀನಾಬೂ ಟುರೇ ತಿಳಿಸಿದ್ದಾರೆ.
ಅಪಾರ ಖನಿಜ ಸಂಪತ್ತಿದ್ದರೂ ಬಡತನದ ಬವಣೆ
ಗಿನಿ ಬಾಕ್ಸೈಟ್‌ನ ಅಪಾರ ನಿಕ್ಷೇಪಗಳನ್ನು ಹೊಂದಿರುವ ದೇಶವಾಗಿದೆ. ಕಬ್ಬಿಣ, ಚಿನ್ನ ಮತ್ತು ವಜ್ರ ಸೇರಿದಂತೆ ಹಲವು ಅಮೂಲ್ಯ ಖನಿಜ ಸಂಪತ್ತು ಇಲ್ಲಿದೆ. ಆದರೂ ವಿಶ್ವ ಬ್ಯಾಂಕ್ ವರದಿಗಳ ಪ್ರಕಾರ, ದೇಶದ ಸುಮಾರು ಶೇ.43.7ರಷ್ಟು ಜನರು ತೀವ್ರ ಬಡತನದಲ್ಲಿ ಜೀವನ ನಡೆಸುತ್ತಿದ್ದಾರೆ.
ಸೂಕ್ತ ವಸತಿ ವ್ಯವಸ್ಥೆಯ ಕೊರತೆಯಿಂದಾಗಿ ಕೆಲವು ಬಡ ಕುಟುಂಬಗಳು ಅಪಾಯಕಾರಿ ಕಸದ ಡಂಪಿಂಗ್ ಯಾರ್ಡ್‌ಗಳ ಸುತ್ತಮುತ್ತ ಗುಡಿಸಲುಗಳಲ್ಲಿ ವಾಸಿಸುತ್ತಿವೆ. ಭಾರಿ ಮಳೆ ಹಾಗೂ ಸೂಕ್ತ ನಿರ್ವಹಣೆಯಿಲ್ಲದ ಕಸದ ರಾಶಿಗಳು ಬಡ ಜನರ ಜೀವಕ್ಕೆ ಹೇಗೆ ಅಪಾಯ ತಂದೊಡ್ಡುತ್ತವೆ ಎಂಬುದಕ್ಕೆ ಈ ದುರಂತ ಮತ್ತೊಂದು ಉದಾಹರಣೆಯಾಗಿದೆ.
ಮೃತರ ಕುಟುಂಬಗಳಿಗೆ ನೆರವು ನೀಡುವುದರ ಜೊತೆಗೆ, ಮನೆ ಕಳೆದುಕೊಂಡವರಿಗೆ ಶಾಶ್ವತ ಪುನರ್ವಸತಿ ಕಲ್ಪಿಸುವ ಅಗತ್ಯವಿದೆ ಎಂದು ಸ್ಥಳೀಯರು ಒತ್ತಾಯಿಸಿದ್ದಾರೆ.
