ಹೊಸ ಮನೆ ಕಟ್ಟುವುದು ಪ್ರತಿಯೊಬ್ಬರ ಜೀವನದ ಒಂದು ದೊಡ್ಡ ಕನಸು. “ಮನೆ ಕಟ್ಟಿ ನೋಡು, ಮದುವೆ ಮಾಡಿ ನೋಡು” ಎಂಬ ಗಾದೆಯಂತೆ, ಅಡಿಪಾಯ ಹಾಕಿದ ದಿನದಿಂದ ಮನೆ ಪೂರ್ಣಗೊಳ್ಳುವವರೆಗೆ ಹಣಕಾಸು, ವಾಸ್ತು, ಕಾರ್ಮಿಕರ ಸಮಸ್ಯೆ ಹೀಗೆ ಹತ್ತು ಹಲವು ಸವಾಲುಗಳನ್ನು ಎದುರಿಸಬೇಕಾಗುತ್ತದೆ. ಇಷ್ಟೆಲ್ಲಾ ಕಷ್ಟಪಟ್ಟು ಕಟ್ಟಿದ ಮನೆಯೊಳಗೆ ಕಾಲಿಡುವಾಗ ಮಾಡುವ ‘ಗೃಹಪ್ರವೇಶ’ ಕೇವಲ ಸಂಭ್ರಮದ ಕಾರ್ಯಕ್ರಮವಲ್ಲ, ಅದರ ಹಿಂದೆ ಬಲವಾದ ಧಾರ್ಮಿಕ ಮತ್ತು ವೈಜ್ಞಾನಿಕ ಕಾರಣಗಳಿವೆ.
ಗೃಹಪ್ರವೇಶದ ಮುಖ್ಯ ಉದ್ದೇಶವೇನು?
ಮನೆ ನಿರ್ಮಾಣದ ಸಮಯದಲ್ಲಿ ಮಣ್ಣು ಅಗೆಯುವುದು ಸೇರಿದಂತೆ ಹಲವು ಕೆಲಸಗಳಿಂದಾಗಿ ಅನೇಕ ಸೂಕ್ಷ್ಮಜೀವಿಗಳು ನಾಶವಾಗಿರುತ್ತವೆ ಎಂದು ನಂಬಲಾಗಿದೆ. ಇದು ವಾಸ್ತು ದೋಷಕ್ಕೆ ಕಾರಣವಾಗಬಹುದು. ಇಂತಹ ನಕಾರಾತ್ಮಕ ಶಕ್ತಿಗಳನ್ನು ಹೋಗಲಾಡಿಸಿ, ಮನೆಯಲ್ಲಿ ಸಕಾರಾತ್ಮಕತೆ ಮತ್ತು ದೈವಿಕ ಕಳೆ ತುಂಬುವುದೇ ಗೃಹಪ್ರವೇಶದ ಮುಖ್ಯ ಉದ್ದೇಶ.
ಪ್ರಮುಖ ಆಚರಣೆಗಳು ಮತ್ತು ಅವುಗಳ ಮಹತ್ವ:
ಹೋಮ-ಹವನ: ಮನೆಯ ಅಷ್ಟದಿಕ್ಪಾಲಕರು ಮತ್ತು ದೇವತೆಗಳ ಆಶೀರ್ವಾದ ಪಡೆಯಲು ಹೋಮ ನಡೆಸಲಾಗುತ್ತದೆ. ಹವನದ ಹೊಗೆ ಮತ್ತು ಮಂತ್ರಗಳ ಪಠಣವು ಮನೆಯ ವಾತಾವರಣದಲ್ಲಿರುವ ಬ್ಯಾಕ್ಟೀರಿಯಾಗಳನ್ನು ನಾಶಪಡಿಸಿ ಗಾಳಿಯನ್ನು ಶುದ್ಧೀಕರಿಸುತ್ತದೆ.
ಗೋಮಾತೆ ಪ್ರವೇಶ: ಹಿಂದೂ ಧರ್ಮದಲ್ಲಿ ಗೋಮಾತೆಯಲ್ಲಿ ಮುಕ್ಕೋಟಿ ದೇವರುಗಳಿದ್ದಾರೆ ಎಂಬ ನಂಬಿಕೆಯಿದೆ. ಮನೆಯಲ್ಲಿ ನೆಮ್ಮದಿ ನೆಲೆಸಲಿ ಎಂಬ ಕಾರಣಕ್ಕೆ ಹಸುವನ್ನು ಮೊದಲು ಮನೆಯೊಳಗೆ ಪ್ರವೇಶ ಮಾಡಿಸಲಾಗುತ್ತದೆ.
ಗೋಮೂತ್ರ ಸಿಂಪರಣೆ: ಇದು ಧಾರ್ಮಿಕವಾಗಿ ಮನೆಯನ್ನು ಶುದ್ಧಗೊಳಿಸಿದರೆ, ವೈಜ್ಞಾನಿಕವಾಗಿ ಅತ್ಯುತ್ತಮ ಕ್ರಿಮಿನಾಶಕವಾಗಿ ಕೆಲಸ ಮಾಡುತ್ತದೆ.
ಹಾಲು ಉಕ್ಕಿಸುವುದು: ಹೊಸ ಮನೆಯ ಒಲೆಯ ಮೇಲೆ ಹಾಲು ಉಕ್ಕಿಸುವುದು ಐಶ್ವರ್ಯ ಮತ್ತು ಕೀರ್ತಿಯ ಸಂಕೇತ. ಹಾಲಿನಂತೆ ಮನೆಯಲ್ಲಿ ಸುಖ-ಸಂತೋಷ ಉಕ್ಕಿ ಬರಲಿ ಎಂಬುದು ಇದರ ಆಶಯ.
ಗಮನಿಸಬೇಕಾದ ಕೆಲವು ಮುಖ್ಯ ಸಂಗತಿಗಳು:
ತೋರಣ ಮತ್ತು ಸ್ವಸ್ತಿಕ: ಮುಖ್ಯ ದ್ವಾರಕ್ಕೆ ಮಾವಿನ ಎಲೆಯ ತೋರಣ ಕಟ್ಟುವುದು ಮತ್ತು ಸ್ವಸ್ತಿಕ ಬರೆಯುವುದು ಕಡ್ಡಾಯ. ಇದು ಮಂಗಳಕರ ಸಂಕೇತವಾಗಿದೆ.
ಕಲಶದೊಂದಿಗೆ ಪ್ರವೇಶ: ಮನೆಯ ಗೃಹಿಣಿಯು (ಲಕ್ಷ್ಮಿ) ಬಲಗಾಲನ್ನಿಟ್ಟು, ಮಂಗಳ ಕಲಶದೊಂದಿಗೆ ಮನೆಯೊಳಗೆ ಬರಬೇಕು. ಈ ಸಮಯದಲ್ಲಿ ಶಂಖ ಊದುವುದು ದುಷ್ಟ ಶಕ್ತಿಗಳನ್ನು ದೂರವಿಡುತ್ತದೆ ಎಂದು ನಂಬಲಾಗಿದೆ.
ಶುಭ ಮುಹೂರ್ತ: ಗೃಹಪ್ರವೇಶಕ್ಕೆ ಸರಿಯಾದ ಮುಹೂರ್ತ ಬಹಳ ಮುಖ್ಯ. ಮಾಘ, ವೈಶಾಖ, ಜ್ಯೇಷ್ಠ ಮತ್ತು ಫಾಲ್ಗುಣ ಮಾಸಗಳು ಗೃಹಪ್ರವೇಶಕ್ಕೆ ಅತ್ಯಂತ ಪ್ರಶಸ್ತ. ಆದರೆ ಆಷಾಢ, ಭಾದ್ರಪದ, ಅಶ್ವಿನಿ, ಪುಷ್ಯ ಮತ್ತು ಶ್ರಾವಣ ಮಾಸಗಳನ್ನು ಸಾಮಾನ್ಯವಾಗಿ ಶುಭವೆಂದು ಪರಿಗಣಿಸಲಾಗುವುದಿಲ್ಲ.
ಆಧುನಿಕತೆ ಎಷ್ಟೇ ಬೆಳೆದಿದ್ದರೂ, ಹಿರಿಯರು ಹಾಕಿಕೊಟ್ಟ ಈ ಸಂಪ್ರದಾಯಗಳು ಮನೆಯಲ್ಲಿ ಶಾಂತಿ ಮತ್ತು ಸಾಮರಸ್ಯವನ್ನು ಕಾಪಾಡಲು ಸಹಕಾರಿ. ಜ್ಯೋತಿಷಿಗಳ ಸಲಹೆಯಂತೆ ಸರಿಯಾದ ವಿಧಿ-ವಿಧಾನಗಳೊಂದಿಗೆ ಮನೆಯನ್ನು ಪ್ರವೇಶಿಸುವುದು ಕುಟುಂಬದ ಸುದೀರ್ಘ ನೆಮ್ಮದಿಗೆ ಅಡಿಪಾಯವಾಗಲಿದೆ.
