ಮುಂಬೈ: ಬಾಲಿವುಡ್‌ನ ಹಿರಿಯ ನಟ ಗೋವಿಂದಾ ಹಾಗೂ ಅವರ ಪತ್ನಿ ಸುನೀತಾ ಅಹುಜಾ ನಡುವಿನ ಕೌಟುಂಬಿಕ ಕಲಹ ಮತ್ತೊಮ್ಮೆ ಬಹಿರಂಗವಾಗಿ ಸುದ್ದಿಯಾಗಿದೆ. ಮುಂಬರುವ ‘ರೂಪಾ’ ಚಿತ್ರದ ಪ್ರಚಾರದ ನೆಪದಲ್ಲಿ ಗೋವಿಂದಾ, ತಮ್ಮ ಹೊಸ ನಟಿ ಕೋಮಲ್ ರಾಣಿ ಸ್ವರ್ಣಕಾರ್ ಜೊತೆ ಪದೇ ಪದೇ ಸಾರ್ವಜನಿಕವಾಗಿ ಕಾಣಿಸಿಕೊಳ್ಳುತ್ತಿರುವುದಕ್ಕೆ ಸುನೀತಾ ಅಹುಜಾ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಶೂಟಿಂಗ್ ಮುಗಿಯುವ ಮುನ್ನವೇ ಪ್ರಚಾರವೇ?: ಗೋವಿಂದಾ ಮತ್ತು ಕೋಮಲ್ ರಾಣಿ ಅವರ ಪ್ರಚಾರದ ಓಡಾಟದ ಬಗ್ಗೆ ಮಾಧ್ಯಮದವರು ಪ್ರಶ್ನಿಸಿದಾಗ ಪ್ರತಿಕ್ರಿಯಿಸಿದ ಸುನೀತಾ, “ಮೊದಲು ಸಿನಿಮಾ ಪೂರ್ಣಗೊಳ್ಳಬೇಕಲ್ಲವೇ? ಸಾಮಾನ್ಯವಾಗಿ ಸಿನಿಮಾ ನಿರ್ಮಾಣವಾದ ಮೇಲಷ್ಟೇ ಪ್ರಚಾರ ಕಾರ್ಯಗಳು ನಡೆಯುತ್ತವೆ. ಆದರೆ ಇಲ್ಲಿ ಸಿನಿಮಾ ಪೂರ್ಣಗೊಳ್ಳುವ ಮುನ್ನವೇ ಪ್ರಚಾರ ನಡೆಯುತ್ತಿದೆ,” ಎಂದು ವ್ಯಂಗ್ಯವಾಡಿದ್ದಾರೆ.
ಮಗಳ ವಯಸ್ಸಿನ ನಟಿ ಜೊತೆ ಓಡಾಟ: ಮುಂದುವರಿದು ತಮ್ಮ ಪತಿಯ ನಡವಳಿಕೆಯನ್ನು ಖಂಡಿಸಿದ ಸುನೀತಾ, “ತಮ್ಮ ಸ್ವಂತ ಮಗಳ ವಯಸ್ಸಿನ ಹುಡುಗಿಯನ್ನು ಜೊತೆಯಲ್ಲಿ ಕರೆದುಕೊಂಡು ತಿರುಗಾಡಲು ಗೋವಿಂದಾಗೆ ಸ್ವಲ್ಪವಾದರೂ ನಾಚಿಕೆಯಾಗಬೇಕು,” ಎಂದು ಖಾರವಾಗಿ ನುಡಿದಿದ್ದಾರೆ.
ಬಟ್ಟೆ ಧರಿಸುವ ಶೈಲಿಗೆ ಕಟು ಟೀಕೆ: ಇಷ್ಟಕ್ಕೇ ನಿಲ್ಲಿಸದ ಸುನೀತಾ, ಕೋಮಲ್ ರಾಣಿ ಅವರ ಬಟ್ಟೆ ಧರಿಸುವ ಶೈಲಿಯನ್ನು ಟೀಕಿಸಿದ್ದಾರೆ. “ಆಕೆಗೆ ಸ್ವಲ್ಪವಾದರೂ ಸಭ್ಯತೆ ಇರಬೇಕು. ನಿನ್ನ ಶುಗರ್ ಡ್ಯಾಡಿ ಅಷ್ಟು ಶ್ರೀಮಂತನಾಗಿದ್ದರೂ ಒಳ್ಳೆಯ ಬಟ್ಟೆಗಳನ್ನು ಧರಿಸಲು ಆಗುವುದಿಲ್ಲವೇ? ನಮ್ಮ ಶೈಲಿಯನ್ನು ನೋಡಿ ಕಲಿಯಿರಿ. ಗೋವಿಂದಾಗೆ ಬುದ್ಧಿ ಭ್ರಮಣೆಯಾಗಿದೆ,” ಎಂದು ನೇರವಾಗಿ ವಾಗ್ದಾಳಿ ನಡೆಸಿದ್ದಾರೆ.
ಈ ಹಿಂದೆ ಕೂಡ ಕೋಮಲ್ ವಿರುದ್ಧ ಬ್ಲ್ಯಾಕ್‌ಮೇಲ್ ಹಾಗೂ ಇತರ ಆರೋಪಗಳನ್ನು ಮಾಡಿದ್ದ ಸುನೀತಾ, ಇತ್ತೀಚೆಗೆ ‘ವಿನಾಶ ಕಾಲೇ ವಿಪರೀತ ಬುದ್ಧಿ’ ಎಂದು ಹೇಳಿಕೆ ನೀಡಿದ್ದರು. ಇದೀಗ ಅವರು ನೀಡಿರುವ ಈ ಬಹಿರಂಗ ಹೇಳಿಕೆ ಬಾಲಿವುಡ್ ಅಂಗಳದಲ್ಲಿ ತೀವ್ರ ಸಂಚಲನ ಮೂಡಿಸಿದೆ.
