ಚಿನ್ನ ಖರೀದಿಗೆ ಇದೇ ಬೆಸ್ಟ್‌ ಟೈಂ: ಸತತ ಇಳಿಕೆ ಬಳಿಕ ಇಂದು ಬಂಗಾರದ ಬೆಲೆ ಸ್ಥಿರ ಬೆಂಗಳೂರಿನಲ್ಲಿ ಇಂದಿನ ಗೋಲ್ಡ್ ರೇಟ್ ಎಷ್ಟು?

ಬೆಂಗಳೂರು: ಬಂಗಾರ ಹಾಗೂ ಬೆಳ್ಳಿ ಆಭರಣ ಖರೀದಿಸಬೇಕು ಎಂದುಕೊಂಡಿರುವ ಗ್ರಾಹಕರಿಗೆ ಮತ್ತು ಹೂಡಿಕೆದಾರರಿಗೆ ಜೂನ್ ತಿಂಗಳ ಆರಂಭದಲ್ಲೇ ಒಂದು ಬಿಗ್ ರಿಲೀಫ್ ಸಿಕ್ಕಿದೆ. ಕಳೆದ ಎರಡು-ಮೂರು ದಿನಗಳಿಂದ ಸತತವಾಗಿ ಭಾರೀ ಕುಸಿತ ಕಂಡಿದ್ದ ಬಂಗಾರದ ಬೆಲೆ ಇಂದು (ಜೂನ್ 2, 2026) ಬುಲಿಯನ್ ಮಾರುಕಟ್ಟೆಯಲ್ಲಿ ಯಾವುದೇ ಬದಲಾವಣೆಯಾಗದೆ ಸ್ಥಿರವಾಗಿ ಮುಂದುವರಿದಿದೆ. ಜಾಗತಿಕ ರಾಜಕೀಯ ವಿದ್ಯಮಾನಗಳು ಮತ್ತು ಅಮೆರಿಕದ ಫೆಡರಲ್ ರಿಸರ್ವ್ ಸಭೆಯ ಮುಂದಿನ ನಿರ್ಧಾರಗಳ ಹಿನ್ನೆಲೆಯಲ್ಲಿ ಹೂಡಿಕೆದಾರರು ಸದ್ಯ ಕಾದು ನೋಡುವ ತಂತ್ರ ಅನುಸರಿಸುತ್ತಿರುವುದರಿಂದ ಮಾರುಕಟ್ಟೆಯಲ್ಲಿ ಬೆಲೆಗಳು ಸದ್ಯಕ್ಕೆ ಶಾಂತವಾಗಿವೆ.

ಮಧ್ಯಪ್ರಾಚ್ಯದಲ್ಲಿ ಹೆಚ್ಚುತ್ತಿರುವ ಉದ್ವಿಗ್ನತೆ, ಇರಾನ್ ಮೇಲೆ ಇಸ್ರೇಲ್ ದಾಳಿ ಹಾಗೂ ಯುಎಸ್-ಇರಾನ್ ಮಾತುಕತೆಯ ಅನಿಶ್ಚಿತತೆಯ ನಡುವೆಯೂ ಕಚ್ಚಾ ತೈಲ ಬೆಲೆ ಬ್ಯಾರೆಲ್‌ಗೆ 95 ಡಾಲರ್‌ಗೆ ಇಳಿಕೆಯಾಗಿರುವುದು ಭಾರತೀಯ ರೂಪಾಯಿ ಮೌಲ್ಯ ಚೇತರಿಸಿಕೊಳ್ಳಲು ನೆರವಾಗಿದೆ. ಈ ಎಲ್ಲಾ ಜಾಗತಿಕ ಕಾರಣಗಳಿಂದಾಗಿ ಕಳೆದ ಎರಡು ದಿನಗಳಲ್ಲಿ 24 ಕ್ಯಾರೆಟ್ ಚಿನ್ನದ ದರದಲ್ಲಿ ಬರೋಬ್ಬರಿ ₹1,500 ವರೆಗೆ ಭರ್ಜರಿ ಇಳಿಕೆಯಾಗಿದ್ದು, ಇಂದು ಮಂಗಳವಾರ ಬೆಲೆ ತಟಸ್ಥವಾಗಿದೆ.

ಬೆಂಗಳೂರು ಸೇರಿದಂತೆ ದಕ್ಷಿಣ ಭಾರತದ ಇಂದಿನ ದರಗಳು (10 ಗ್ರಾಂ):

ದಕ್ಷಿಣ ಭಾರತದ ಪ್ರಮುಖ ಬುಲಿಯನ್ ಮಾರುಕಟ್ಟೆಗಳಾದ ಬೆಂಗಳೂರು ಹಾಗೂ ಹೈದರಾಬಾದ್‌ನಲ್ಲಿ ಇಂದಿನ ಚಿನ್ನದ ದರಗಳು ಈ ಕೆಳಗಿನಂತಿವೆ:

24 ಕ್ಯಾರೆಟ್ ಚಿನ್ನ (ಅಪರಂಜಿ – 99.9% ಶುದ್ಧತೆ): ಪ್ರತಿ 10 ಗ್ರಾಂಗೆ ಯಾವುದೇ ಬದಲಾವಣೆಯಾಗದೆ ₹1,56,220 ರ ಮಟ್ಟದಲ್ಲಿ ವಹಿವಾಟು ನಡೆಸುತ್ತಿದೆ. (1 ಗ್ರಾಂಗೆ ₹15,622).

22 ಕ್ಯಾರೆಟ್ ಚಿನ್ನ (ಆಭರಣದ ಚಿನ್ನ): ಪ್ರತಿ 10 ಗ್ರಾಂಗೆ ಯಾವುದೇ ಬದಲಾವಣೆಯಿಲ್ಲದೆ ₹1,43,200 ರ ದರದಲ್ಲಿ ಸ್ಥಿರವಾಗಿದೆ. (1 ಗ್ರಾಂಗೆ ₹14,320).

ಕೆಜಿ ಬೆಳ್ಳಿ ಬೆಲೆ ಎಷ್ಟು?

ಚಿನ್ನದ ದರದಲ್ಲಿ ಸಣ್ಣ ಪ್ರಮಾಣದ ಏರಿಳಿತಗಳು ಕಂಡುಬರುತ್ತಿದ್ದರೂ, ಬೆಳ್ಳಿ ದರ ಮಾತ್ರ ಕಳೆದ ನಾಲ್ಕು ವಹಿವಾಟು ಅವಧಿಗಳಿಂದ ಸಂಪೂರ್ಣ ತಟಸ್ಥವಾಗಿದೆ. ಕೆಲವು ದಿನಗಳ ಹಿಂದಷ್ಟೇ ಇತಿಹಾಸದಲ್ಲೇ ಮೊದಲ ಬಾರಿಗೆ ಪ್ರತಿ ಕೆಜಿಗೆ ₹3 ಲಕ್ಷದ ದಾಖಲೆಯ ಗಡಿ ದಾಟಿದ್ದ ಬೆಳ್ಳಿ, ಈಗ ಮತ್ತೆ ಕೊಂಚ ಹಿನ್ನಡೆ ಕಾಯ್ದುಕೊಂಡಿದೆ. ಪ್ರಸ್ತುತ ದೇಶೀಯ ಮಾರುಕಟ್ಟೆಯಲ್ಲಿ ಪ್ರತಿ ಕೆಜಿ ಬೆಳ್ಳಿ ದರ ₹2,80,000 (₹2.8 ಲಕ್ಷ) ನಂತೆ ಮುಂದುವರಿದಿದೆ. (1 ಗ್ರಾಂ ಬೆಳ್ಳಿಗೆ ₹280).

ಜಾಗತಿಕ ಮಾರುಕಟ್ಟೆಯಲ್ಲಿ ಏನಾಗ್ತಿದೆ? ಮುಂದಿನ ವಾರ ದರ ಏರಲಿದೆಯಾ?

ಅಂತಾರಾಷ್ಟ್ರಿಯ ಮಾರುಕಟ್ಟೆಯಲ್ಲಿ ಇಂದಿನ ಸ್ಪಾಟ್ ಗೋಲ್ಡ್ (Spot Gold) ದರದಲ್ಲಿ ಸ್ವಲ್ಪ ಚೇತರಿಕೆ ಕಂಡುಬಂದಿದೆ. ಜಾಗತಿಕವಾಗಿ ಚಿನ್ನದ ಬೆಲೆಯು ಔನ್ಸ್‌ಗೆ 41 ಡಾಲರ್‌ನಷ್ಟು ಹೆಚ್ಚಳವಾಗುವ ಮೂಲಕ 4,519 ಡಾಲರ್ ಮಟ್ಟಕ್ಕೆ ತಲುಪಿದೆ. ಅದೇ ರೀತಿ, ಸ್ಪಾಟ್ ಬೆಳ್ಳಿಯ ದರವು ಶೇ. 1.19 ರಷ್ಟು ವೃದ್ಧಿಯಾಗಿ ಔನ್ಸ್‌ಗೆ 75.88 ಡಾಲರ್ ತಲುಪಿದೆ.

ಅಮೆರಿಕದ ಮುಂಬರುವ ಉದ್ಯೋಗ ದತ್ತಾಂಶ (Job Data) ಮತ್ತು ಪಶ್ಚಿಮ ಏಷ್ಯಾದಲ್ಲಿನ ರಾಜಕೀಯ ಬೆಳವಣಿಗೆಗಳು ಈ ವಾರದ ಚಿನ್ನ ಬೆಳ್ಳಿ ದರವನ್ನು ನಿರ್ಧರಿಸಲಿವೆ. ಜಾಗತಿಕ ಮಾರುಕಟ್ಟೆಯ ಈ ಸಣ್ಣ ಏರಿಕೆಯ ಪ್ರಭಾವ ಮುಂದಿನ ದಿನಗಳಲ್ಲಿ ಸ್ಥಳೀಯ ಮಾರುಕಟ್ಟೆಯ ಮೇಲೂ ಬಿದ್ದು, ಬೆಲೆ ಮತ್ತೆ ಏರಿಕೆಯಾಗುವ ಸಾಧ್ಯತೆ ಇರುವುದರಿಂದ, ಸದ್ಯಕ್ಕೆ ದರ ಸ್ಥಿರವಾಗಿರುವಾಗಲೇ ಚಿನ್ನ ಖರೀದಿಸುವುದು ಜಾಣತನದ ಕ್ರಮ ಎನ್ನುತ್ತಾರೆ ಮಾರುಕಟ್ಟೆ ತಜ್ಞರು.