ಬೆಂಗಳೂರಿನಲ್ಲಿ ಬಂಗಾರದ ಬೆಲೆ ಈಗ ಅಕ್ಷರಶಃ ಗಗನಮುಖಿಯಾಗಿದೆ 10 ಗ್ರಾಂ ಚಿನ್ನದ ದರ ₹1.22 ಲಕ್ಷದ ಗಡಿ ದಾಟಿ ಜನಸಾಮಾನ್ಯರ ಕಣ್ಣು ಕೆಂಪಾಗಿಸಿದೆ. ಬೆಲೆ ಏರಿಕೆಯ ಈ ರಾಕೆಟ್ ವೇಗ ಕಂಡು ಹೌಹಾರಿರುವ ಜನರಲ್ಲಿ ಈಗ ಒಂದೇ ಪ್ರಶ್ನೆ ಬಂಗಾರದ ಈ ಬೆಲೆಯನ್ನು ಅಸಲಿಗೆ ಫಿಕ್ಸ್ ಮಾಡೋರು ಯಾರು? ಕೇಂದ್ರ ಸರ್ಕಾರವೋ ಅಥವಾ ರಿಸರ್ವ್ ಬ್ಯಾಂಕೋ? ಈ ನಿಗೂಢ ಪ್ರಶ್ನೆಯ ಹಿಂದಿರುವ ರೋಚಕ ಸತ್ಯ ಮತ್ತು ಜಾಗತಿಕ ಮಾರುಕಟ್ಟೆಯ ಇನ್ಸೈಡ್ ಸ್ಟೋರಿ ಇಲ್ಲಿದೆ ನೋಡಿ
1.ಇದೊಂದು ಗ್ಲೋಬಲ್ ಗೇಮ್: ಯಾರೂ ಒಬ್ಬರು ಮಾಲೀಕರಲ್ಲ
ಚಿನ್ನದ ಬೆಲೆ ಎನ್ನುವುದು ಕೇವಲ ಒಬ್ಬ ತಯಾರಕ ಅಥವಾ ಮಾರಾಟಗಾರ ನಿರ್ಧರಿಸುವ ವಸ್ತುವಲ್ಲ. ಇದರ ಹಿಂದೆ ಲಂಡನ್ ಮತ್ತು ನ್ಯೂಯಾರ್ಕ್ನ ಬೃಹತ್ ಹಣಕಾಸು ಸಂಸ್ಥೆಗಳು, ಬ್ಯಾಂಕುಗಳು ಮತ್ತು ಅತ್ಯಾಧುನಿಕ ಅಲ್ಗಾರಿದಮ್ಗಳು (Algorithms) ಕೆಲಸ ಮಾಡುತ್ತವೆ.
ಬೆಲೆ ನಿರ್ಧಾರದ ಮೂರು ಮುಖಗಳು:
ಸ್ಪಾಟ್ ಬೆಲೆ (Spot Price): ನಾವು ಅಂಗಡಿಯಲ್ಲಿ ಖರೀದಿಸುವ ಕ್ಷಣದ ಬೆಲೆ. ಇದು ಡಿಮ್ಯಾಂಡ್ ಮತ್ತು ಸಪ್ಲೈ ಮೇಲೆ ಪ್ರತಿ ನಿಮಿಷವೂ ಬದಲಾಗುತ್ತದೆ.
LBMA ಬೆಲೆ: ಲಂಡನ್ ಬುಲಿಯನ್ ಮಾರ್ಕೆಟ್ ಅಸೋಸಿಯೇಷನ್ ದಿನಕ್ಕೆ ಎರಡು ಬಾರಿ ಎಲೆಕ್ಟ್ರಾನಿಕ್ ಹರಾಜಿನ ಮೂಲಕ ಒಂದು ಸರಾಸರಿ ಬೆಲೆ ಫಿಕ್ಸ್ ಮಾಡುತ್ತದೆ.
ಫ್ಯೂಚರ್ಸ್ ಬೆಲೆ (Futures): ಭವಿಷ್ಯದ ಖರೀದಿಗಳ ಮೇಲೆ ಇಂದೇ ಬೆಲೆ ಲಾಕ್ ಮಾಡುವ ತಂತ್ರವಿದು.
2.ಬೆಲೆ ನಿರ್ಧರಿಸುವ ‘ವಿಚಿತ್ರ ಪದ್ಧತಿ’ ಗೊತ್ತೇ?
ಗ್ರಾಹಕರಿಗೆ ಅಚ್ಚರಿ ಎನಿಸಬಹುದು, ಆದರೆ ಇಂದಿನ ಚಿನ್ನದ ಬೆಲೆಯನ್ನು ಮುಂದಿನ ತಿಂಗಳು ನಡೆಯಲಿರುವ ವಹಿವಾಟಿನ ಅಂದಾಜಿನ ಮೇಲೆ ಡಿಸೈಡ್ ಮಾಡಲಾಗುತ್ತದೆ. ಮಾರುಕಟ್ಟೆಯಲ್ಲಿ ಹೂಡಿಕೆದಾರರಿಗೆ ಚಿನ್ನದ ಮೇಲೆ ಎಷ್ಟು ವಿಶ್ವಾಸವಿದೆ ಎಂಬುದನ್ನು ಆಧರಿಸಿ ಈ ಲೆಕ್ಕಾಚಾರ ನಡೆಯುತ್ತದೆ. ಈಗ ಈ ಕೆಲಸವನ್ನೆಲ್ಲಾ ಮನುಷ್ಯರಿಗಿಂತ ಹೆಚ್ಚಾಗಿ ಕಂಪ್ಯೂಟರ್ ಅಲ್ಗಾರಿದಮ್ಗಳೇ ಮಾಡುತ್ತಿವೆ.
3.ಭಾರತದಲ್ಲಿ ರೇಟ್ ಹೇಗೆ ಫಿಕ್ಸ್ ಆಗುತ್ತೆ?
ಭಾರತದಲ್ಲಿ ಚಿನ್ನದ ಬೆಲೆಯನ್ನು ಕೇಂದ್ರ ಸರ್ಕಾರ ಅಥವಾ RBI ನಿರ್ಧರಿಸುವುದಿಲ್ಲ. ಅದರ ಬದಲಾಗಿ ‘ಭಾರತೀಯ ಬುಲಿಯನ್ ಮತ್ತು ಜ್ಯುವೆಲ್ಲರ್ಸ್ ಅಸೋಸಿಯೇಷನ್ (IBJA) ಪ್ರಮುಖ ಪಾತ್ರ ವಹಿಸುತ್ತದೆ.
ಮೊದಲು ಅಂತಾರಾಷ್ಟ್ರೀಯ ದರವನ್ನು ಭಾರತೀಯ ರೂಪಾಯಿಗೆ ಪರಿವರ್ತಿಸಲಾಗುತ್ತದೆ.
ನಂತರ ಅದಕ್ಕೆ ಆಮದು ಸುಂಕ (Import Duty) ಮತ್ತು GST ಸೇರಿಸಲಾಗುತ್ತದೆ.
ಸ್ಥಳೀಯ ಸಾರಿಗೆ ವೆಚ್ಚ ಮತ್ತು ತೆರಿಗೆಗಳ ಆಧಾರದ ಮೇಲೆ ಬೆಂಗಳೂರು, ಮುಂಬೈ ಅಥವಾ ದೆಹಲಿಯಲ್ಲಿ ಬೆಲೆಗಳು ಸ್ವಲ್ಪ ವ್ಯತ್ಯಾಸವಾಗುತ್ತವೆ.
4.ಬೆಲೆ ಏರಿಕೆಗೆ ಅಸಲಿ ಕಾರಣಗಳೇನು?
ಡಾಲರ್ ಮೌಲ್ಯ: ಯುಎಸ್ ಡಾಲರ್ ಕುಸಿದರೆ, ಚಿನ್ನದ ಬೆಲೆ ಏರುತ್ತದೆ.
ಯುದ್ಧ ಮತ್ತು ಉದ್ವಿಗ್ನತೆ: ಉಕ್ರೇನ್ ಅಥವಾ ಮಧ್ಯಪ್ರಾಚ್ಯದಲ್ಲಿ ಯುದ್ಧದಂತಹ ವಾತಾವರಣವಿದ್ದರೆ ಹೂಡಿಕೆದಾರರು ಚಿನ್ನದ ಮೊರೆ ಹೋಗುತ್ತಾರೆ, ಆಗ ಬೆಲೆ ಹೆಚ್ಚಾಗುತ್ತದೆ.
ಹಣದುಬ್ಬರ: ಹಣದ ಮೌಲ್ಯ ಕುಸಿಯುತ್ತಿರುವಾಗ ಜನರು ಚಿನ್ನವನ್ನು ಸುರಕ್ಷಿತ ತಾಣ ಎಂದು ನಂಬುತ್ತಾರೆ.
ಹಬ್ಬದ ಸೀಸನ್: ಭಾರತದಲ್ಲಿ ಮದುವೆ ಮತ್ತು ಹಬ್ಬಗಳ ಕಾಲದಲ್ಲಿ ಬೇಡಿಕೆ ಹೆಚ್ಚಾಗಿ ಬೆಲೆ ಏರುತ್ತದೆ.
