ಗೋವಾದಲ್ಲಿ ನಡೆದ ಥಾರ್ ಕಾರು ಅಪಘಾತ ಭಾರೀ ಚರ್ಚೆಗೆ ಕಾರಣವಾಗಿದೆ. ಅಪಘಾತದ ಸಮಯದಲ್ಲಿ ಮಹೀಂದ್ರಾ ಥಾರ್ ಕಾರನ್ನು ದೆಹಲಿ ಮೂಲದ ಓಡಿಸುತ್ತಿದ್ದ ಎಂಬುದು ಖಚಿತವಾಗಿದೆ. ಆದರೆ ಆತ ಕುಡಿದು ವಾಹನ ಓಡುಸುತ್ತಿದ್ದ ಎಂಬುದು ಈಗ ಚರ್ಚೆಯ ವಿಚಾರ.
ಗೋವಾ ಪೊಲೀಸ ಪ್ರಕಾರ ಈ ಭೀಕರ ಅಪಘಾತದಲ್ಲಿ ಓರ್ವ ವೃದ್ಧ ಮೃತಪಟ್ಟಿದ್ದಾರೆ. ಮಹೀಂದ್ರಾ ಥಾರ್ ಓಡಿಸುತ್ತಿದ್ದ ಆರೋಪಿಯನ್ನು ಈಗಾಗಲೇ ಬಂಧಿಸಲಾಗಿದೆ. ಬಂಧಿತನಾಗಿರುವ ದೆಹಲಿ ಮೂಲದ ಯುವಕ ವಾಹನ ಚಾಲನೆ ಮಾಡುವಾಗ ಮದ್ಯದ ಅಮಲಿನಲ್ಲಿ ಇರಲಿಲ್ಲ ಎಂದು ಪೊಲೀಸರು ಖಚಿತಪಡಿಸಿದ್ದಾರೆ.
ಪ್ರತ್ಯಕ್ಷದರ್ಶಿಗಳ ಮಾಹಿತಿ ಪ್ರಕಾರ ಅಪಘಾತ ನಡೆದ ಸಮಯದಲ್ಲಿ ಮಹೀಂದ್ರಾ ಥಾರ್ ಕಾರನ್ನು ಮಹಿಳೆ ಓಡಿಸುತ್ತಿದ್ದಳು. ಆದರೆ ಪೊಲೀಸರ ಮಾಹಿತಿ ಪ್ರಕಾರ ಆರೋಪಿ ಶೌರ್ಯ ಗೋಯಲ್ ಬಂಧಿಸಲಾಗಿದೆ.
ಕಾರು ಅತೀ ವೇಗವಾಗಿ ಚಲಿಸುತ್ತಿದ್ದಾಗ ಆತನ ಜೊತೆ ಸ್ನೇಹಿತೆ ಸಹ ಕಾರಿನಲ್ಲಿದ್ದಳು. ಆಕೆ ಸಹ ದೆಹಲಿ ಮೂಲದವಳು. ಈಗಾಗಲೇ ಗೋಯಲ್ನನ್ನು ಬಂಧಿಸಿದ್ದು, ಘಟನೆಯ ಸಮಯದಲ್ಲಿ ಆತ ಯಾವುದೇ ಅಮಲು ಪದಾರ್ಥಗಳನ್ನು ಸೇವಿಸಿರಲಿಲ್ಲ ಎಂಬುದು ಪ್ರಾಥಮಿಕ ತನಿಖೆಯಿಂದ ತಿಳಿದುಬಂದಿದೆ.
ಈ ಅಪಘಾತ ಗೋವಾದ ಅಸಗಾವೊದ ಹ್ಯಾಪಿ ಬಾರ್ ಜಂಕ್ಷನ್ ಸಮೀಪ ಸೋಮವಾರ ನಡೆದಿದೆ. ಘಟನೆಯಲ್ಲಿ ಭೋಪಾಲ್ ಮೂಲದ ಭಗತ್ ಶರ್ಮಾ (65) ಎಂಬುವವರು ಮೃತಪಟ್ಟಿದ್ದಾರೆ.
ಮೃತ ವ್ಯಕ್ತಿಯು ರಜೆ ಹಿನ್ನಲೆಯಲ್ಲಿ ಗೋವಾಕ್ಕೆ ಪ್ರವಾಸ ಬಂದಿದ್ದರು. ಅವರು ಹ್ಯುಂಡೈ i20 ಕಾರಿನಲ್ಲಿ ಒಬ್ಬ ಮಹಿಳೆ ಮತ್ತು 5 ವರ್ಷದ ಮಗುವಿನೊಂದಿಗೆ ಪ್ರಯಾಣಿಸುತ್ತಿದ್ದಾಗ, ಥಾರ್ ಕಾರು ಬಂದು ಬಲವಾಗಿ ಡಿಕ್ಕಿ ಹೊಡೆದಿದೆ.
ಪೊಲೀಸರು ಈಗಾಗಲೇ ಎಫ್ಐಆರ್ ದಾಖಲು ಮಾಡಿದ್ದು, ಶೌರ್ಯ ಗೋಯಲ್ ಪ್ರಮುಖ ಆರೋಪಿ. ಆತ ಮಾಪುಸಾದಿಂದ ಅಂಜುನಾ ಕಡೆಗೆ ಬಾಡಿಗೆಗೆ ಎಸ್ಯುವಿ ಕಾರಿನಲ್ಲಿ ಸಂಚಾರವನ್ನು ಮಾಡುತ್ತಿದ್ದ.
ಎರಡು ಕಾರುಗಳ ಅಪಘಾತದ ತೀವ್ರತೆಗೆ ಎರಡೂ ವಾಹನ ಜಖಂಗೊಂಡಿವೆ. ಅಪಘಾತ ಸಂಭವಿಸಿದ ತಕ್ಷಣವೇ ಭಗತ್ ಶರ್ಮಾ ಅವರನ್ನು ಮಾಪುಸಾದ ಜಿಲ್ಲಾ ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ, ಅವರು ಮೃತಪಟ್ಟಿರುವುದಾಗಿ ವೈದ್ಯರು ಘೋಷಿಸಿದರು. ಶರ್ಮಾ ಅವರೊಂದಿಗೆ ಪ್ರಯಾಣಿಸುತ್ತಿದ್ದ ಇತರ ಇಬ್ಬರು ಪ್ರಯಾಣಿಕರಿಗೆ ಸಣ್ಣಪುಟ್ಟ ಗಾಯಗಳಾಗಿವೆ.
ಆರಂಭದಲ್ಲಿ ಮಹಿಳೆಯೊಬ್ಬರು ಥಾರ್ ಕಾರನ್ನು ಚಲಾಯಿಸುತ್ತಿದ್ದರು. ಆದರೆ, ಅಪಘಾತ ಸಂಭವಿಸಿದ ಕೂಡಲೇ ಆಕೆ ಪ್ರಯಾಣಿಕರ ಸೀಟಿಗೆ ಬದಲಾದಳು ಎಂದು ಪ್ರತ್ಯಕ್ಷದರ್ಶಿಗಳು ಹೇಳಿದ್ದು, ಅಪಘಾತದ ಕುರಿತು ಗೊಂದಲಕ್ಕೆ ಕಾರಣವಾಗಿತ್ತು.
ಪೊಲೀಸರು ಬಾಡಿಗೆಗೆ ಪಡೆದಿದ್ದ ಥಾರ್ ವಾಹನವನ್ನು ವಶಪಡಿಸಿಕೊಂಡಿದ್ದಾರೆ. ಅತಿ ವೇಗವಾಗಿ ಮತ್ತು ಅಜಾಗರೂಕತೆಯಿಂದ ಚಾಲನೆ ಮಾಡಿ ಸಾವು ಉಂಟುಮಾಡಿದ ಆರೋಪದಡಿ ಪ್ರಕರಣವನ್ನು ದಾಖಲಿಸಿಕೊಳ್ಳಲಾಗಿದೆ.
