ಬೆಂಗಳೂರು ನಗರದಲ್ಲಿ ಆಸ್ತಿ ತೆರಿಗೆ ಸಂಗ್ರಹ ಬಹಳ ಸವಾಲಿನ ಕೆಲಸವಾಗಿದೆ. ಆಸ್ತಿ ತೆರಿಗೆ ಪಾವತಿಗೆ ಸಂಬಂಧಿಸಿದಂತೆ ಅನೇಕ ಕ್ರಮಗಳನ್ನು ಜಾರಿಗೊಳಿಸಿದರೂ, ರಿಯಾಯಿತಿ ನೀಡಿದರೂ ಸಹ ಸರಿಯಾಗಿ ತೆರಿಗೆ ಸಂಗ್ರಹವಾಗುತ್ತಿಲ್ಲ.
ಈಗ ಗ್ರೇಟರ್ ಬೆಂಗಳೂರು ಅಥಾರಿಟಿ (ಜಿಬಿಎ) ಅಧಿಕಾರಿಗಳು ಆಸ್ತಿ ತೆರಿಗೆ ಸಂಗ್ರಹ ತೀವ್ರಗೊಳಿಸಿದ್ದಾರೆ. ಆದರೆ ಈ ಕಾರ್ಯಾಚರಣೆಯಲ್ಲಿ ನಗರದಾದ್ಯಂತ ಕಟ್ಟಡದ ವಿಸ್ತೀರ್ಣವನ್ನು ವಾಸ್ತವಕ್ಕಿಂತ ಕಡಿಮೆ ತೋರಿಸಿರುವುದು ದೊಡ್ಡ ಮಟ್ಟದಲ್ಲಿ ಪತ್ತೆಯಾಗಿದೆ.
ತೆರಿಗೆ ವಸೂಲಾತಿಯನ್ನು ಚುರುಕುಗೊಳಿಸಲು ಮತ್ತು ಸರಿಯಾದ ತೆರಿಗೆ ಪಾವತಿ ಖಚಿತಪಡಿಸಿಕೊಳ್ಳಲು ಜಿಬಿಎ ಹತ್ತಾರು ಸಾವಿರ ಮರುಪರಿಶೀಲನಾ ನೋಟಿಸ್ಗಳನ್ನು ಜಾರಿಗೊಳಿಸುವ ಮೂಲಕ ವ್ಯವಸ್ಥಿತವಾಗಿ ಕ್ರಮ ಕೈಗೊಳ್ಳಲು ಮುಂದಾಗಿದೆ.
ಮಾರ್ಗದರ್ಶಿ ಮಾಹಿತಿ ವ್ಯವಸ್ಥೆ (ಜಿಐಎಸ್), ಡ್ರೋನ್ ಕಣ್ಗಾವಲು ಮತ್ತು ಜಿಪಿಎಸ್ (ಜಿಪಿಎಸ್) ಆಧಾರಿತ ತಪಾಸಣೆಗಳ ಮೂಲಕ ತಂತ್ರಜ್ಞಾನವನ್ನು ಬಳಸಿಕೊಂಡು, ಅಧಿಕಾರಿಗಳ ತಂಡಗಳು ಆಸ್ತಿ ಮಾಲೀಕರು ಘೋಷಿಸಿದ ವಿಸ್ತೀರ್ಣ ಮತ್ತು ವಾಸ್ತವಿಕ ಅಳತೆಗಳ ನಡುವಿನ ವ್ಯತ್ಯಾಸಗಳನ್ನು ಪತ್ತೆ ಹಚ್ಚುತ್ತಿವೆ.
ಕೆಂಗೇರಿಯ ಒಂದು ಪ್ರಕರಣದಲ್ಲಿ ನೋಟಿಸ್ ನೀಡಲಾಗಿತ್ತು. ಮೂಲತಃ 2,800 ಚದರ ಅಡಿ ಎಂದು ವರದಿ ಮಾಡಲಾಗಿದ್ದ ವಸತಿ ಆಸ್ತಿಯನ್ನು ಮರುಪರಿಶೀಲಿಸಿದಾಗ ಅದು 5,458 ಚದರ ಅಡಿ ಇರುವುದು ಪತ್ತೆಯಾಗಿದೆ.
ದಂಡ ಮತ್ತು ಬಡ್ಡಿಯನ್ನು ಒಳಗೊಂಡಂತೆ ಮರುಪರಿಶೀಲಿಸಿದ ತೆರಿಗೆಯ ಮೊತ್ತವು ಮೂಲ ತೆರಿಗೆಗಿಂತ ನಾಲ್ಕು ಪಟ್ಟು ಹೆಚ್ಚು ಹೆಚ್ಚಾಗಿದೆ. ಆಸ್ತಿ ವಿವರಗಳನ್ನು ಕಡಿಮೆ ತೋರಿಸುವುದರಿಂದ ಎದುರಾಗಬಹುದಾದ ಆರ್ಥಿಕ ಪರಿಣಾಮಗಳನ್ನು ಈ ಪ್ರಕರಣ ಎತ್ತಿ ತೋರಿಸುತ್ತದೆ.
ಹಿರಿಯ ಅಧಿಕಾರಿಯೊಬ್ಬರ ಮಾಹಿತಿ ಪ್ರಕಾರ ತಂತ್ರಜ್ಞಾನ ಆಧಾರಿತ ಈ ಯೋಜನೆಯು ನಿಖರವಾದ ಆಸ್ತಿಯ ವಿವರ ಸಂಗ್ರಹ ಮಾಡುತ್ತದೆ. ಡಿಜಿಟಲ್ ಮ್ಯಾಪಿಂಗ್ ಮತ್ತು ಸ್ಥಳದಲ್ಲೇ ನಡೆಸುವ ಭೌತಿಕ ತಪಾಸಣೆ ಸರಿಯಾದ ತೆರಿಗೆ ವಸೂಲಿಗೆ ಸಹಾಯಕವಾಗಿದೆ.
ಪ್ರತಿ ತಪಾಸಣೆಯನ್ನು ಗುಣಮಟ್ಟ ನಿಯಂತ್ರಣ ವ್ಯವಸ್ಥೆಯ ಮೂಲಕ ಮರುಪರಿಶೀಲಿಸಲಾಗುತ್ತದೆ ಮತ್ತು ವ್ಯತ್ಯಾಸಗಳು ದೃಢಪಟ್ಟರೆ ಸ್ವಯಂಚಾಲಿತವಾಗಿ ಕಾನೂನು ನೋಟಿಸ್ಗಳನ್ನು ಜಾರಿಯಾಗುವಂತೆ ಮಾಡಲಾಗಿದೆ.
ನಾಗರಿಕರು ಎಸ್ಎಂಎಸ್ ಸೇರಿದಂತೆ ವಿವಿಧ ಮಾಧ್ಯಮಗಳ ಮೂಲಕ ನೋಟಿಸ್ ಪಡೆಯಲಿದ್ದಾರೆ. ನೋಟಿಸ್ ಬಂದ 15 ದಿನಗಳ ಒಳಗಾಗಿ ಆನ್ಲೈನ್ ಮೂಲಕ ಪ್ರತಿಕ್ರಿಯಿಸಲು ಅಥವಾ ಮರುಪರಿಶೀಲಿಸಿದ ತೆರಿಗೆಯನ್ನು ತಕ್ಷಣವೇ ಪಾವತಿಸಲು ಅವರಿಗೆ ಅವಕಾಶ ನೀಡಲಾಗಿದೆ.
ಈ ಕಾರ್ಯಾಚರಣೆ ಆರಂಭಿಕ ಹಂತಗಳಲ್ಲಿಯೇ 23,000ಕ್ಕೂ ಹೆಚ್ಚು ಆಸ್ತಿಗಳಲ್ಲಿ ತಪ್ಪು ಮಾಹಿತಿ ಇರುವುದು ಪತ್ತೆಯಾಗಿದ್ದು, ಇದರಿಂದ ಸುಮಾರು ರೂ. 688 ಕೋಟಿಗೂ ಅಧಿಕ ಆಸ್ತಿ ತೆರಿಗೆ ವಸೂಲಿ ಮಾಡಬೇಕಿದೆ ಎಂದು ಅಂದಾಜಿಸಲಾಗಿದೆ.
ಪ್ರತಿದಿನ ಆಸ್ತಿಗಳ ಸ್ಥಳ ತಪಾಸಣೆ ನಡೆಸಲಾಗುತ್ತಿದ್ದು ತಪ್ಪು ಮಾಹಿತಿ ಇದ್ದರೆ ಸರಿಪಡಿಸಲಾಗುತ್ತಿದೆ. ಇದು ಕೇವಲ ಆಸ್ತಿ ತೆರಿಗೆ ಸಂಗ್ರಹಕ್ಕೆ ಮಾತ್ರವಲ್ಲ ನಗರದ ಉತ್ತಮ ಆಡಳಿತಕ್ಕೆ ಅನುಕೂಲವಾಗಲಿದೆ.
ತಜ್ಞರ ಪ್ರಕಾರ ಇಂತಹ ಕಠಿಣ ಕ್ರಮ ಅನಿವಾರ್ಯವಾಗಿದೆ. ಆಸ್ತಿ ನೋಂದಣಿ, ಆಸ್ತಿ ತೆರಿಗೆಯಲ್ಲಿ ವ್ಯತ್ಯಾಸಗಳು ಕಂಡುಬರುವಂತಿಲ್ಲ. ಇಂತಹ ಕ್ರಮ ನಗರದ ಆದಾಯ ಸಂಗ್ರಹದ ಬಗ್ಗೆ ಖಚಿತವಾದ ಮಾಹಿತಿಯನ್ನು ನೀಡುತ್ತದೆ. ರಿಯಲ್ ಎಸ್ಟೇಟ್ ವ್ಯವಹಾರ ನಡೆಸುವವರು ಮಾಡುವ ವಂಚನೆಯನ್ನು ತಪ್ಪಿಸುತ್ತದೆ.
ಜಿಬಿಎ ಅಧಿಕಾರಿಗಳು ಈ ಕಾರ್ಯಾಚರಣೆಯನ್ನು ಎಲ್ಲಾ ವಾರ್ಡ್ಗಳಿಗೂ ವಿಸ್ತರಿಸುವ ಆಚಲೋಚನೆಯಲ್ಲಿದ್ದಾರೆ. ಈ ಮೂಲಕ ಆಸ್ತಿ ಮಾಲೀಕರಿಗೆ ಪಾರದರ್ಶಕವಾಗಿ ತೆರಿಗೆ ಪಾವತಿ ಮಾಡಿ ಎಂಬ ಸಂದೇಶವನ್ನು ಸ್ಪಷ್ಟವಾಗಿ ರವಾನೆ ಮಾಡಲಾಗುತ್ತಿದೆ.
