ಜಪಾನ್ ಮತ್ತು ದಕ್ಷಿಣ ಕೊರಿಯಾದಂತಹ ಪೂರ್ವ ಏಷ್ಯಾದ ದೇಶಗಳಲ್ಲಿ ಒಂಟಿತನ ಹೋಗಲಾಡಿಸಲು ಬಾಡಿಗೆ ಸಂಗಾತಿಗಳನ್ನು ಪಡೆಯುವ ಪರಿಕಲ್ಪನೆ ಸಾಮಾನ್ಯವಾಗಿದೆ. ಈ ಹಿಂದೆ ದೇಶದ ರಾಜಧಾನಿ ದೆಹಲಿಯಲ್ಲಿಯೂ ಬಾಡಿಗೆ ಗೆಳೆಯರ ಪರಿಕಲ್ಪನೆ ಭಾರಿ ಸುದ್ದಿಯಾಗಿತ್ತು. ಆದರೆ ಇದೀಗ ಸಾಂಪ್ರದಾಯಿಕ ನವರಾತ್ರಿ ಹಬ್ಬದ ಹೊಸ್ತಿಲಿನಲ್ಲಿ ಗುಜರಾತ್ ರಾಜ್ಯದಲ್ಲಿ ಇಂತಹದ್ದೇ ಒಂದು ವಿಚಿತ್ರ ವಿದ್ಯಮಾನ ಬೆಳಕಿಗೆ ಬಂದಿದ್ದು, ಗರ್ಬಾ ನೃತ್ಯಕ್ಕೆ ಬಾಡಿಗೆ ಸಂಗಾತಿಯನ್ನು ಒದಗಿಸುವ ಜಾಹೀರಾತುಗಳು ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕವಾಗಿ ಹರಿದಾಡುತ್ತಿವೆ.
ನವರಾತ್ರಿ ಹಬ್ಬದ ಸಂದರ್ಭದಲ್ಲಿ ಗುಜರಾತಿನ ಸಾಂಪ್ರದಾಯಿಕ ಹಾಗೂ ಭಕ್ತಿಪೂರ್ವಕ ಗರ್ಬಾ ನೃತ್ಯ ಅತ್ಯಂತ ವಿಜೃಂಭಣೆಯಿಂದ ನಡೆಯುತ್ತದೆ. ಇದನ್ನೇ ಬಂಡವಾಳ ಮಾಡಿಕೊಂಡಿರುವ ಕೆಲವರು, ಸಾಮಾಜಿಕ ಜಾಲತಾಣಗಳಲ್ಲಿ ಗರ್ಬಾ ನೃತ್ಯಕ್ಕೆ ಬಾಡಿಗೆ ಸಂಗಾತಿಗಳನ್ನು ನೀಡುವುದಾಗಿ ಆಕರ್ಷಕ ಪೋಸ್ಟ್‌ಗಳನ್ನು ಹಂಚಿಕೊಂಡಿದ್ದಾರೆ. ಬೆಳ್ಳಿ, ಚಿನ್ನ ಮತ್ತು ಪ್ಲಾಟಿನಂ ಎಂಬ ಮೂರು ಹಂತಗಳ ಪ್ಯಾಕೇಜ್‌ಗಳನ್ನು ಇದರಲ್ಲಿ ಘೋಷಿಸಲಾಗಿದ್ದು, 1,000 ರೂಪಾಯಿಯಿಂದ 2,000 ರೂಪಾಯಿಗಳ ವರೆಗೆ ದರ ನಿಗದಿಪಡಿಸಲಾಗಿದೆ.
ಮೊದಲ ಹಂತದ 1,000 ರೂಪಾಯಿ ವೆಚ್ಚದಲ್ಲಿ 2 ಗಂಟೆಗಳ ಕಾಲ ಗರ್ಬಾ ಆಡುವುದು, ಒಂದೇ ರೀತಿಯ ಉಡುಪು ಧರಿಸುವುದು ಹಾಗೂ ಸೆಲ್ಫಿ ಕ್ಲಿಕ್ಕಿಸಿಕೊಳ್ಳುವ ಕೊಡುಗೆಗಳನ್ನು ನೀಡಲಾಗಿದೆ. ಎರಡನೇ ಹಂತದ 1,500 ರೂಪಾಯಿ ಪ್ಯಾಕೇಜ್‌ನಲ್ಲಿ 4 ಗಂಟೆಗಳ ನೃತ್ಯದ ಜೊತೆಗೆ ಸಾಮಾಜಿಕ ಜಾಲತಾಣಗಳಿಗೆ ಬೇಕಾದ ವಿಡಿಯೋ, ಛಾಯಾಚಿತ್ರಗಳು ಹಾಗೂ ಸ್ನೇಹಿತರ ಮುಂದೆ ಸುಳ್ಳು ಕಥೆ ಹೇಳುವ ಸೌಲಭ್ಯ ಸೇರಿಸಲಾಗಿದೆ. ಇನ್ನು ಮೂರನೇ ಹಂತದ 2,000 ರೂಪಾಯಿ ಪ್ಯಾಕೇಜ್‌ನಲ್ಲಿ ದಿನವಿಡೀ ನೃತ್ಯ, ನೃತ್ಯದ ನಂತರ ಸುರಕ್ಷಿತವಾಗಿ ಮನೆ ತಲುಪಿಸುವುದು ಮುಂತಾದ ಸೇವೆಗಳನ್ನು ನಮೂದಿಸಲಾಗಿದೆ.
ಈ ಪೋಸ್ಟ್‌ಗಳು ವ್ಯಾಪಕವಾಗಿ ವೈರಲ್ ಆಗುತ್ತಿದ್ದಂತೆ ಎಚ್ಚೆತ್ತುಕೊಂಡಿರುವ ಸೈಬರ್ ಅಪರಾಧ ತನಿಖಾ ದಳ, ಸಾರ್ವಜನಿಕರಿಗೆ ಕಠಿಣ ಎಚ್ಚರಿಕೆ ನೀಡಿದೆ. ಇಂತಹ ಜಾಹೀರಾತುಗಳ ಹಿಂದೆ ಆನ್‌ಲೈನ್ ವಂಚನೆ ಅಥವಾ ಸಾರ್ವಜನಿಕರ ಖಾಸಗಿ ಮಾಹಿತಿಯನ್ನು ಕದಿಯುವ ದುರುದ್ದೇಶ ಅಡಗಿದೆಯೇ ಎಂಬ ಕುರಿತು ಸಮಗ್ರ ತನಿಖೆ ನಡೆಸಲಾಗುತ್ತಿದೆ ಎಂದು ಸೈಬರ್ ವಿಭಾಗದ ಉಪ ಪೊಲೀಸ್ ಆಯುಕ್ತರು ಸ್ಪಷ್ಟಪಡಿಸಿದ್ದಾರೆ.
ಮುಂಗಡ ಹಣ ಪಾವತಿಸಲು ಬರುವ ಅಜ್ಞಾತ ಲಿಂಕ್‌ಗಳು ಅಥವಾ ಛಾಯಾಚಿತ್ರಗಳ ಜೊತೆ ಬರುವ ಕಡತಗಳ ಬಗ್ಗೆ ಜನರು ಎಚ್ಚರಿಕೆಯಿಂದ ಇರಬೇಕು. ಈ ಕೊಂಡಿಗಳ ಮೂಲಕ ಮೊಬೈಲ್ ಸಂದೇಶಗಳು ಹಾಗೂ ಬ್ಯಾಂಕ್ ಖಾತೆಗಳನ್ನು ಹ್ಯಾಕ್ ಮಾಡುವ ಸಾಧ್ಯತೆ ದಟ್ಟವಾಗಿದೆ. ಇಂತಹ ಯಾವುದೇ ಅನುಮಾನಾಸ್ಪದ ಚಟುವಟಿಕೆಗಳು ಅಥವಾ ವಂಚನೆಗಳು ಕಂಡುಬಂದಲ್ಲಿ ತಕ್ಷಣವೇ ಸಮೀಪದ ಪೊಲೀಸ್ ಠಾಣೆಯನ್ನು ಸಂಪರ್ಕಿಸಬೇಕೆಂದು ಅಧಿಕಾರಿಗಳು ಸಾರ್ವಜನಿಕರಿಗೆ ತಿಳಿಸಿದ್ದಾರೆ.
