ಹಲವು ವರ್ಷಗಳ ಕಾಲ ವಿದೇಶದಲ್ಲಿ ನೆಲೆಸಿ, ತಾಯ್ನಾಡಿನ ಗೆಳೆಯರನ್ನು ಭೇಟಿಯಾಗುವ ಕ್ಷಣ ಎಂದಿಗೂ ವಿಶೇಷ. ಪುಣೆಯ ಯುವಕನೊಬ್ಬ ಅಮೆರಿಕದಿಂದ ಸುಮಾರು ಎಂಟು ಸಾವಿರ ಮೈಲಿ ದೂರ ಪ್ರಯಾಣಿಸಿ ತನ್ನ ಆಪ್ತ ಸ್ನೇಹಿತನಿಗೆ ನೀಡಿದ ಸರ್ಪ್ರೈಸ್ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ಭಾರೀ ವೈರಲ್ ಆಗುತ್ತಿದೆ. ಮೊದಲ ನೋಟಕ್ಕೆ ಪಕ್ಕದಲ್ಲಿ ಕುಳಿತವನು ತನ್ನ ಸ್ನೇಹಿತನೆಂದು ಗುರುತಿಸಲಾಗದ ಗೆಳೆಯ, ಸತ್ಯ ತಿಳಿಯುತ್ತಿದ್ದಂತೆ ಭಾವಪರವಶನಾದ ದೃಶ್ಯ ನೆಟ್ಟಿಗರ ಕಣ್ಣುಗಳನ್ನು ತೇವಗೊಳಿಸಿದೆ.
ಅಮೆರಿಕದ ಮ್ಯಾಸಚೂಸೆಟ್ಸ್‌ನ ವರ್ಸೆಸ್ಟರ್ ಪಾಲಿಟೆಕ್ನಿಕ್ ಇನ್‌ಸ್ಟಿಟ್ಯೂಟ್‌ನಲ್ಲಿ ವ್ಯಾಸಂಗ ಮಾಡುತ್ತಿರುವ ಎನ್‌ಆರ್‌ಐ ಯುವಕ, ಯಾರಿಗೂ ತಿಳಿಸದೆ ಅಚಾನಕ್ಕಾಗಿ ಪುಣೆಗೆ ಬಂದಿಳಿದಿದ್ದ. ತನ್ನ ಈ ಭೇಟಿಯನ್ನು ನೆನಪಿನಲ್ಲಿ ಉಳಿಯುವಂತೆ ಮಾಡಲು ಇತರ ಸ್ನೇಹಿತರ ಸಹಾಯದಿಂದ ವಿಶೇಷ ಪ್ಲ್ಯಾನ್ ಮಾಡಿದ್ದ.
ಏನಿದು ಘಟನೆ?
ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಳ್ಳಲಾದ ವಿಡಿಯೋವೊಂದರಲ್ಲಿ, ಸ್ನೇಹಿತರೆಲ್ಲರೂ ಉದ್ಯಾನವನವೊಂದರಲ್ಲಿ ಕುಳಿತಿರುವುದು ಕಂಡುಬರುತ್ತದೆ. ಅಮೆರಿಕದಿಂದ ಬಂದ ಗೆಳೆಯ ಮುಖಕ್ಕೆ ಮಾಸ್ಕ್ ಧರಿಸಿ, ತನ್ನ ಆಪ್ತ ಗೆಳೆಯನ ಪಕ್ಕದಲ್ಲೇ ಬಂದು ಕುಳಿತುಕೊಳ್ಳುತ್ತಾನೆ. ತನ್ನ ಪಕ್ಕದಲ್ಲಿ ಯಾರೋ ಅಪರಿಚಿತ ವ್ಯಕ್ತಿ ಬಂದು ಕುಳಿತಿದ್ದಾನೆ ಎಂದು ಭಾವಿಸಿದ ಆ ಗೆಳೆಯ, ಸ್ವಲ್ಪ ಗೊಂದಲಕ್ಕೊಳಗಾಗಿ ಅವನನ್ನು ದಿಟ್ಟಿಸಿ ನೋಡುತ್ತಾನೆ. ಆದರೆ ಮಾಸ್ಕ್ ಧರಿಸಿದ್ದರಿಂದ ಅವನನ್ನು ಗುರುತಿಸಲು ಸಾಧ್ಯವಾಗದೆ ಮುಖ ತಿರುಗಿಸಿಕೊಳ್ಳುತ್ತಾನೆ.
ಕೆಲವೇ ಕ್ಷಣಗಳಲ್ಲಿ ಅಮೆರಿಕದಿಂದ ಬಂದ ಯುವಕ ತನ್ನ ಮುಖದ ಮಾಸ್ಕ್ ತೆಗೆಯುತ್ತಿದ್ದಂತೆ, ಅಲ್ಲಿನ ವಾತಾವರಣವೇ ಬದಲಾಗುತ್ತದೆ. ಪಕ್ಕದಲ್ಲಿದ್ದವನು ಬೇರಾರೂ ಅಲ್ಲ, ವರ್ಷಗಳಿಂದ ದೂರವಿದ್ದ ತನ್ನ ಆಪ್ತ ಗೆಳೆಯ ಎಂದು ತಿಳಿಯುತ್ತಿದ್ದಂತೆ ಆತ ಆನಂದಬಾಷ್ಪ ಸುರಿಸುತ್ತಾ ಓಡಿಹೋಗಿ ಅವನನ್ನು ಬಿಗಿದಪ್ಪಿಕೊಳ್ಳುತ್ತಾನೆ. ಈ ಭಾವನಾತ್ಮಕ ಕ್ಷಣವು ಸ್ನೇಹದ ಗಾಢತೆಯನ್ನು ಜಗತ್ತಿಗೆ ಸಾರುವಂತಿದೆ.
ನೆಟ್ಟಿಗರ ಮೆಚ್ಚುಗೆ
ಇನ್‌ಸ್ಟಾಗ್ರಾಮ್‌ನಲ್ಲಿ ಹಂಚಿಕೊಳ್ಳಲಾದ ಈ ವಿಡಿಯೋಗೆ ಸಾವಿರಾರು ಜನರು ಲೈಕ್ ಒತ್ತಿದ್ದಾರೆ. “ನಿಜವಾದ ಸ್ನೇಹ ಅಂದರೆ ಹೀಗಿರಬೇಕು” ಎಂದು ಒಬ್ಬರು ಕಾಮೆಂಟ್ ಮಾಡಿದ್ದರೆ, ಇನ್ನೊಬ್ಬರು “ನನ್ನ ಗೆಳೆಯರು ಮುಂಬೈನಿಂದ ಪುಣೆಗೆ ಬರಲು ಮೀನಾಮೇಷ ಎಣಿಸುತ್ತಾರೆ, ಆದರೆ ಇವರು ಅಮೆರಿಕದಿಂದಲೇ ಬಂದಿದ್ದಾರೆ” ಎಂದು ತಮಾಷೆಯಾಗಿ ಪ್ರತಿಕ್ರಿಯಿಸಿದ್ದಾರೆ. ಒಟ್ಟಿನಲ್ಲಿ ಈ ಅಪರೂಪದ ಪುನರ್ಮಿಲನವು ಸ್ನೇಹಕ್ಕೆ ಯಾವುದೇ ದೇಶ ಅಥವಾ ದೂರ ಅಡ್ಡಿಯಾಗುವುದಿಲ್ಲ ಎಂಬುದನ್ನು ಸಾಬೀತುಪಡಿಸಿದೆ.
