ಪಂದ್ಯ ಆರಂಭಕ್ಕೂ ಮುನ್ನ ನಡಯುತ್ತಿದ್ದ ಅಭ್ಯಾಸದ ವೇಳೆ ಇಂಗ್ಲೆಂಡ್‌ನ ಮಾಜಿ ಫುಟ್‌ಬಾಲ್ ಆಟಗಾರ ಆಂಡ್ರೋಸ್ ಟೌನ್‌ಸೆಂಡ್ ಭೀಕರ ಅಪಘಾತದಿಂದ ಕೂದಲೆಳೆ ಅಂತರದಲ್ಲಿ ಪಾರಾಗಿದ್ದಾರೆ. ಗ್ರೌಂಡ್ ರೋಲರ್ (ಪಿಚ್ ರೋಲರ್) ವಾಹನವೊಂದು ಅವರ ಮೇಲೆ ಹರಿದರೂ ಯಾವುದೇ ಗಂಭೀರ ಗಾಯಗಳಿಲ್ಲದೆ ಪಾರಾಗಿರುವುದು ಪವಾಡದಂತೆ ಕಂಡುಬಂದಿದೆ.
ಥೈಲ್ಯಾಂಡ್‌ನಲ್ಲಿ ನಡೆದ ಪಿಟಿ ಪ್ರಚುಆಪ್ ಮತ್ತು ಪಟ್ಟಾನಿ ಎಫ್‌ಸಿ ತಂಡಗಳ ನಡುವಿನ ಪಂದ್ಯಕ್ಕೂ ಮುನ್ನ ಈ ವಿಚಿತ್ರ ಘಟನೆ ಸಂಭವಿಸಿದೆ. ಮೈ hisದಾನದಲ್ಲಿ ಅಭ್ಯಾಸ ನಿರತರಾಗಿದ್ದ ಟೌನ್‌ಸೆಂಡ್ ಗಾಳಿಯಲ್ಲಿ ಹಾರಿ ಚೆಂಡನ್ನು ಬ್ಯಾಕ್‌ಹೀಲ್ ಮಾಡಲು ಯತ್ನಿಸುತ್ತಿದ್ದರು. ಈ ವೇಳೆ ಹಿಂದಿನಿಂದ ಬಂದ ಭಾರೀ ತೂಕದ ಪಿಚ್ ರೋಲರ್ ವಾಹನ ಅವರಿಗೆ ಡಿಕ್ಕಿ ಹೊಡೆದಿದೆ.
ಡಿಕ್ಕಿಯ ರಭಸಕ್ಕೆ ನೆಲಕ್ಕೆ ಬಿದ್ದ ಟೌನ್‌ಸೆಂಡ್ ಅವರ ಮೇಲೆ ರೋಲರ್ ಹರಿದಂತೆ ವೀಡಿಯೊದಲ್ಲಿ ಕಂಡುಬರುತ್ತದೆ. ಕೂಡಲೇ ಜಾಗರೂಕರಾದ ರೋಲರ್ ಚಾಲಕ, ವಾಹನವನ್ನು ಪಕ್ಕಕ್ಕೆ ಚಲಾಯಿಸಿ ಆಟಗಾರನನ್ನು ಪಾರು ಮಾಡಿದ್ದಾನೆ. ಘಟನೆಯ ತೀವ್ರತೆ ಕಂಡು ಮೈದಾನದಲ್ಲಿದ್ದ ಸಹ ಆಟಗಾರರು ಹಾಗೂ ಸಿಬ್ಬಂದಿ ಆತಂಕಗೊಂಡಿದ್ದರು.
ಆದರೆ, ಈ ಭಯಾನಕ ಘಟನೆಯ ನಂತರವೂ ಆಂಡ್ರೋಸ್ ಟೌನ್‌ಸೆಂಡ್ ಎದ್ದು ನಡೆದುಕೊಂಡು ಹೋಗಿದ್ದು, ಪಂದ್ಯಕ್ಕೆ ಸಿದ್ಧರಾಗಿದ್ದಾರೆ. ಅಷ್ಟೇ ಅಲ್ಲದೆ ಪಂದ್ಯದ 93ನೇ ನಿಮಿಷದಲ್ಲಿ ಬದಲಿ ಆಟಗಾರನಾಗಿ ಮೈದಾನಕ್ಕಿಳಿದು ಪಂದ್ಯದಲ್ಲೂ ಭಾಗವಹಿಸಿದ್ದಾರೆ.
ಟೋಟೆನ್‌ಹ್ಯಾಮ್ ಹಾಟ್ಸ್‌ಪರ್, ಕ್ರಿಸ್ಟಲ್ ಪ್ಯಾಲೇಸ್ ಮತ್ತು ಎವರ್ಟನ್‌ನಂತಹ ಪ್ರಸಿದ್ಧ ಕ್ಲಬ್‌ಗಳ ಪರ ಆಡಿರುವ ಇಂಗ್ಲೆಂಡ್‌ನ ಮಾಜಿ ವಿಂಗರ್ ಟೌನ್‌ಸೆಂಡ್ ಅವರ ಈ ಅಪಘಾತದ ದೃಶ್ಯಗಳು ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ವೈರಲ್ ಆಗುತ್ತಿವೆ.
