ನೈನಿತಾಲ್: ಗಿರಿಧಾಮಗಳಲ್ಲಿ ಮೈಕೊರೆಯುವ ಚಳಿ ಇರುವುದು ಸಾಮಾನ್ಯ. ಇಂತಹ ಚಳಿಯಿಂದ ರಕ್ಷಿಸಿಕೊಳ್ಳಲು ಉತ್ತರ ಪ್ರದೇಶ ಮೂಲದ ಟ್ಯಾಕ್ಸಿ ಚಾಲಕ ಮನೀಶ್ ಗಂಧರ್ ಎಂಬುವವರು ತಮ್ಮ ಕಾರಿನೊಳಗೆ ಕೆಂಡದ ಒಲೆಯನ್ನು ಹಚ್ಚಿಕೊಂಡಿದ್ದರು. ಕಾರಿನ ಗಾಜುಗಳನ್ನು ಪೂರ್ತಿಯಾಗಿ ಮುಚ್ಚಿ ಮಲಗಿದ್ದರಿಂದ, ಒಲೆಯಿಂದ ಹೊರಬಂದ ವಿಷಕಾರಿ ಇಂಗಾಲದ ಮಾನಾಕ್ಸೈಡ್ (Carbon Monoxide) ಅನಿಲವನ್ನು ಸೇವಿಸಿ ಅವರು ನಿದ್ರೆಯಲ್ಲೇ ಸಾವನ್ನಪ್ಪಿದ್ದಾರೆ.
ಕಿಟಕಿ ಒಡೆದು ಶವ ಹೊರತೆಗೆದ ಪೊಲೀಸರು ರಸ್ತೆಯ ಬದಿಯಲ್ಲಿ ನಿಂತಿದ್ದ ಕಾರಿನ ಗಾಜುಗಳು ಪೂರ್ತಿ ಮುಚ್ಚಲ್ಪಟ್ಟಿದ್ದವು. ಒಳಗೆ ಚಾಲಕ ಯಾವುದೇ ಚಲನೆಯಿಲ್ಲದೆ ಮಲಗಿರುವುದನ್ನು ಕಂಡು ಸಾರ್ವಜನಿಕರು ಪೊಲೀಸರಿಗೆ ಮಾಹಿತಿ ನೀಡಿದ್ದರು. ಸ್ಥಳಕ್ಕೆ ಆಗಮಿಸಿದ ಪೊಲೀಸ್ ಅಧಿಕಾರಿಯೊಬ್ಬರು ಸುತ್ತಿಗೆಯಂತಹ ಉಪಕರಣದಿಂದ ಕಾರಿನ ಗಾಜನ್ನು ಒಡೆದು ಬಾಗಿಲು ತೆರೆದಿದ್ದಾರೆ. ಕಾರಿನ ಹಿಂಬದಿಯ ಸೀಟಿನಲ್ಲಿ ಚಾಲಕ ಹೊದಿಕೆಯನ್ನು ಪೂರ್ತಿಯಾಗಿ ಹೊದ್ದುಕೊಂಡು ಮಲಗಿದ್ದ ಸ್ಥಿತಿಯಲ್ಲಿ ಪತ್ತೆಯಾಗಿದ್ದಾರೆ. ತಕ್ಷಣವೇ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಯಿತಾದರೂ, ಅವರು ಈಗಾಗಲೇ ಮೃತಪಟ್ಟಿದ್ದಾರೆ ಎಂದು ವೈದ್ಯರು ಘೋಷಿಸಿದ್ದಾರೆ.
ಮೌನ ಕೊಲೆಗಾರ ಕಾರ್ಬನ್ ಮಾನಾಕ್ಸೈಡ್ ಮೃತ ಚಾಲಕ ಮನೀಶ್ ಉತ್ತರ ಪ್ರದೇಶದ ಮಥುರಾ ಜಿಲ್ಲೆಯವರು ಎಂದು ಗುರುತಿಸಲಾಗಿದೆ. ಪ್ರಾಥಮಿಕ ತನಿಖೆಯ ಪ್ರಕಾರ, ಮುಚ್ಚಿದ ಜಾಗದಲ್ಲಿ ಕೆಂಡದ ಒಲೆಯನ್ನು ಉರಿಸಿದಾಗ ಅಲ್ಲಿ ಆಮ್ಲಜನಕದ ಕೊರತೆ ಉಂಟಾಗುತ್ತದೆ ಮತ್ತು ಕಾರ್ಬನ್ ಮಾನಾಕ್ಸೈಡ್ ಎಂಬ ವಿಷಕಾರಿ ಅನಿಲ ಬಿಡುಗಡೆಯಾಗುತ್ತದೆ. ಈ ಅನಿಲಕ್ಕೆ ಯಾವುದೇ ಬಣ್ಣ ಅಥವಾ ವಾಸನೆ ಇಲ್ಲದ ಕಾರಣ, ಮಲಗಿರುವ ವ್ಯಕ್ತಿಗೆ ತಾನು ವಿಷಕಾರಿ ಗಾಳಿ ಸೇವಿಸುತ್ತಿದ್ದೇನೆ ಎಂಬ ಅರಿವೇ ಆಗುವುದಿಲ್ಲ. ಇದು ನೇರವಾಗಿ ರಕ್ತದಲ್ಲಿನ ಹಿಮೋಗ್ಲೋಬಿನ್ ಸೇರಿ ಆಮ್ಲಜನಕದ ಪೂರೈಕೆಯನ್ನು ಸ್ಥಗಿತಗೊಳಿಸಿ ಪ್ರಾಣಹಾನಿ ಉಂಟುಮಾಡುತ್ತದೆ.
ಪೊಲೀಸರ ಎಚ್ಚರಿಕೆ ಚಳಿಗಾಲದಲ್ಲಿ ಜನರು ಬೆಂಕಿ ಅಥವಾ ಕೆಂಡದ ಒಲೆಗಳನ್ನು ಬಳಸುವಾಗ ಅತ್ಯಂತ ಜಾಗರೂಕರಾಗಿರಬೇಕು. ವಿಶೇಷವಾಗಿ ಕಾರಿನಂತಹ ಸಣ್ಣ ಮತ್ತು ಮುಚ್ಚಿದ ಜಾಗಗಳಲ್ಲಿ ಇಂತಹ ವಸ್ತುಗಳನ್ನು ಬಳಸಲೇಬಾರದು ಎಂದು ಪೊಲೀಸರು ಎಚ್ಚರಿಕೆ ನೀಡಿದ್ದಾರೆ. ಈ ಘಟನೆಯು ಪ್ರವಾಸಿಗರು ಮತ್ತು ಚಾಲಕರಲ್ಲಿ ಭೀತಿ ಮೂಡಿಸಿದ್ದು, ಜಾಗೃತಿ ಮೂಡಿಸುವ ಉದ್ದೇಶದಿಂದ ವಿಡಿಯೋ ಹಂಚಿಕೊಳ್ಳಲಾಗುತ್ತಿದೆ.
