ಬೆಂಗಳೂರು: ಕೆಲಸದಿಂದ ತೆಗೆದಿದ್ದಕ್ಕೆ ಸೇಡು ತೀರಿಸಿಕೊಳ್ಳಲು ಹೋಗಿ ತಂದೆ ಮತ್ತು ಮಗ ಈಗ ಜೈಲು ಪಾಲಾಗಿದ್ದಾರೆ. ಬೆಂಗಳೂರಿನ ನಾಗವಾರದಲ್ಲಿ ನಡೆದ ಈ ಸಿನಿಮೀಯ ಮಾದರಿಯ ಕಳವು ಪ್ರಕರಣ ಈಗ ಎಲ್ಲರ ಹುಬ್ಬೇರಿಸುವಂತೆ ಮಾಡಿದೆ.
ಎಂ. ಮಂಜುನಾಥ್ ಮತ್ತು ಪುತ್ರ ಹೇಮಂತ್ (ನಾಗವಾರದ ಟಿ. ಚೆನ್ನಯ್ಯ ಲೇಔಟ್ ನಿವಾಸಿಗಳು) ಆರೋಪಿಗಳು ಎಂದು ಗುರುತಿಸಲಾಗಿದೆ. ಹೆಚ್.ಬಿ.ಆರ್ ಲೇಔಟ್‌ನಲ್ಲಿರುವ ‘‘ನಿತೇಶ್ ಕಂಪ್ಯೂಟರ್ಸ್ ‘. ನಲ್ಲಿ ಈ ಕಳ್ಳತನ ನಡೆದಿದೆ. ಸುಮಾರು ₹80 ಲಕ್ಷ ಮೌಲ್ಯದ ಲ್ಯಾಪ್‌ಟಾಪ್ ಬಿಡಿಭಾಗಗಳು ಮತ್ತು ಹಾರ್ಡ್ ಡಿಸ್ಕ್‌ಗಳನ್ನು ಇವರು ಕದ್ದಿದ್ದರು. ಗೋವಿಂದಪುರ ಠಾಣೆ ಇನ್ಸ್‌ಪೆಕ್ಟರ್ ಕಿರಣ್ ನೇತೃತ್ವದ ತಂಡ ಈ ಪ್ರಕರಣ ಕಾರ್ಯಾಚರಣೆ ನಡೆಸಿದ್ದಾರೆ.
ಆರೋಪಿ ಹೇಮಂತ್ ಈ ಹಿಂದೆ ನಿತೇಶ್ ಕಂಪ್ಯೂಟರ್ಸ್‌ನಲ್ಲಿ ಕೆಲಸ ಮಾಡುತ್ತಿದ್ದ. ಆದರೆ ಹಣಕಾಸಿನ ವಿಚಾರವಾಗಿ ಮಾಲೀಕ ರಫು ಅವರೊಂದಿಗೆ ಗಲಾಟೆಯಾಗಿ, ಹೇಮಂತ್‌ನನ್ನು ಕೆಲಸದಿಂದ ತೆಗೆದುಹಾಕಲಾಗಿತ್ತು. ಇದರಿಂದ ಆಕ್ರೋಶಗೊಂಡ ಹೇಮಂತ್, ಮಾಲೀಕನಿಗೆ ದೊಡ್ಡ ಮಟ್ಟದ ಆರ್ಥಿಕ ಹೊಡೆತ ನೀಡಲು ತನ್ನ ತಂದೆಯ ಜೊತೆಗೂಡಿ ಸ್ಕೆಚ್ ಹಾಕಿದ್ದ.
ವೇಷ ಮರೆಸುವಿಕೆ : ಗುರುತು ಸಿಗಬಾರದೆಂದು ತಂದೆ-ಮಗ ಇಬ್ಬರೂ ಬುರ್ಖಾಧರಿಸಿ ಕಳ್ಳತನಕ್ಕೆ ಇಳಿದಿದ್ದರು.ಮಾರ್ಚ್ 13ರ ತಡರಾತ್ರಿ ಅಂಗಡಿಯ ಶಟರ್ ಬೀಗ ಮುರಿದು ಒಳನುಗ್ಗಿದ ಇವರು, ಬೆಲೆಬಾಳುವ ಲ್ಯಾಪ್‌ಟಾಪ್ ಬಿಡಿಭಾಗಗಳನ್ನು ಲೂಟಿ ಮಾಡಿದ್ದರು.ಕೇವಲ ಹಣಕ್ಕಾಗಿ ಮಾತ್ರವಲ್ಲದೆ, ತನ್ನನ್ನು ಕೆಲಸದಿಂದ ತೆಗೆದ ಮಾಲೀಕನಿಗೆ ಬುದ್ಧಿ ಕಲಿಸುವುದೇ ಇವರ ಮುಖ್ಯ ಉದ್ದೇಶವಾಗಿತ್ತು.
ಪೊಲೀಸರ ಕಾರ್ಯಾಚರಣೆ
ಕಳ್ಳತನದ ದೂರು ದಾಖಲಾದ ಕೂಡಲೇ ಕಾರ್ಯಪ್ರವೃತ್ತರಾದ ಗೋವಿಂದಪುರ ಪೊಲೀಸರು ಜಾಲ ಬೀಸಿದ್ದರು.ಸುಮಾರು 30ಕ್ಕೂ ಹೆಚ್ಚು ಸಿಸಿಟಿವಿ ಕ್ಯಾಮೆರಾಗಳ ದೃಶ್ಯಾವಳಿಗಳನ್ನು ಪರಿಶೀಲಿಸಲಾಯಿತು.ಬುರ್ಖಾ ಧರಿಸಿದ್ದರೂ ಸಹ, ಆರೋಪಿಗಳ ನಡಿಗೆ ಮತ್ತು ಕೆಲವು ಚಹರೆಗಳ ಆಧಾರದ ಮೇಲೆ ಪೊಲೀಸರು ಬೆನ್ನಟ್ಟಿ ತಂದೆ-ಮಗನನ್ನು ವಶಕ್ಕೆ ಪಡೆದರು.ಸದ್ಯ ಕಳುವಾದ ₹80 ಲಕ್ಷ ಮೌಲ್ಯದ ವಸ್ತುಗಳನ್ನು ಜಪ್ತಿ ಮಾಡಲಾಗಿದ್ದು, ಇಬ್ಬರೂ ಆರೋಪಿಗಳು ಈಗ ಕಂಬಿ ಎಣಿಸುತ್ತಿದ್ದಾರೆ. : ಸೇಡು ಯಾವತ್ತೂ ಮನುಷ್ಯನನ್ನು ತಪ್ಪು ಹಾದಿಗೆ ಎಳೆಯುತ್ತದೆ ಎಂಬುದಕ್ಕೆ ಈ ಘಟನೆಯೇ ಸಾಕ್ಷಿ.
