ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (NHAI) ಹೆದ್ದಾರಿ ಪ್ರಯಾಣಿಕರಿಗೆ ಡಿಜಿಟಲ್ ಸೇವೆಗಳನ್ನು ಮತ್ತಷ್ಟು ಸುಲಭಗೊಳಿಸಿದೆ. ಇದುವರೆಗೆ ಟೋಲ್ ಪ್ಲಾಜಾಗಳಿಗೆ ನೇರವಾಗಿ ತೆರಳಿ ಪಡೆಯಬೇಕಾಗಿದ್ದ ಫಾಸ್ಟ್‌ಟ್ಯಾಗ್ ಲೋಕಲ್ ಮಾಸಿಕ ಪಾಸ್ ಸೌಲಭ್ಯವನ್ನು ಇನ್ನು ಮುಂದೆ ಆನ್‌ಲೈನ್‌ನಲ್ಲೇ ಪಡೆಯುವ ವ್ಯವಸ್ಥೆ ಮಾಡಲಾಗಿದೆ.
ಈ ಸೇವೆಯನ್ನು ದೇಶಾದ್ಯಂತ ಸುಮಾರು 121 ಟೋಲ್ ಪ್ಲಾಜಾಗಳಿಗೆ ವಿಸ್ತರಿಸಲಾಗುತ್ತಿದೆ ಎಂದು ಕೇಂದ್ರ ರಸ್ತೆ ಸಾರಿಗೆ ಮತ್ತು ಹೆದ್ದಾರಿ ಸಚಿವಾಲಯ ಅಧಿಕೃತ ಪ್ರಕಟಣೆಯಲ್ಲಿ ತಿಳಿಸಿದೆ.
‘ರಾಜ್‌ಮಾರ್ಗ್ ಯಾತ್ರಾ’ ಆ್ಯಪ್ ಮೂಲಕ ಆನ್‌ಲೈನ್ ಅರ್ಜಿ
ಈ ಹೊಸ ವ್ಯವಸ್ಥೆಯ ಮೂಲಕ ಅರ್ಹ ವಾಹನ ಮಾಲೀಕರು ತಮ್ಮ ಮೊಬೈಲ್‌ನಲ್ಲಿರುವ ‘ರಾಜ್‌ಮಾರ್ಗ್ ಯಾತ್ರಾ’ ಆ್ಯಪ್ ಮೂಲಕ ನೇರವಾಗಿ ಲೋಕಲ್ ಪಾಸ್‌ಗೆ ಅರ್ಜಿ ಸಲ್ಲಿಸಬಹುದು. ಇದರಿಂದ ಪ್ರತಿ ತಿಂಗಳು ಪಾಸ್ ನವೀಕರಣ ಅಥವಾ ಹೊಸ ಪಾಸ್ ಪಡೆಯಲು ಟೋಲ್ ಪ್ಲಾಜಾಗಳಿಗೆ ನೇರವಾಗಿ ತೆರಳುವ ಅಗತ್ಯ ಇರುವುದಿಲ್ಲ.
ಯಾವುದೇ ಭೌತಿಕ ದಾಖಲೆಗಳನ್ನು ಸಲ್ಲಿಸುವ ಅಗತ್ಯವೂ ಇರುವುದಿಲ್ಲ. ಟೋಲ್ ನಿರ್ವಹಣೆಯಲ್ಲಿ ಪಾರದರ್ಶಕತೆ ಹೆಚ್ಚಿಸಲು ತಂತ್ರಜ್ಞಾನವನ್ನು ಬಳಸಲಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಈ ಡಿಜಿಟಲ್ ಲೋಕಲ್ ಪಾಸ್ ವ್ಯವಸ್ಥೆಯನ್ನು ಮೊದಲಿಗೆ ಜುಲೈ 2026ರಲ್ಲಿ ದೆಹಲಿಯ ಅರ್ಬನ್ ಎಕ್ಸ್‌ಟೆನ್ಶನ್ ರೋಡ್-2ರ ಮುಂಡ್ಕಾ-ಬಕ್ಕರ್‌ವಾಲಾ ಟೋಲ್ ಪ್ಲಾಜಾದಲ್ಲಿ ಪ್ರಾಯೋಗಿಕವಾಗಿ ಆರಂಭಿಸಲಾಗಿತ್ತು. ಅಲ್ಲಿ ದೊರೆತ ಯಶಸ್ಸಿನ ಆಧಾರದ ಮೇಲೆ ಇದೀಗ ದೇಶಾದ್ಯಂತ 121ಕ್ಕೂ ಹೆಚ್ಚು ಟೋಲ್ ಪ್ಲಾಜಾಗಳಿಗೆ ವಿಸ್ತರಿಸಲಾಗಿದೆ. ಮುಂದಿನ ದಿನಗಳಲ್ಲಿ ಇನ್ನಷ್ಟು ಟೋಲ್ ಪ್ಲಾಜಾಗಳಲ್ಲೂ ಈ ಸೌಲಭ್ಯ ಲಭ್ಯವಾಗಲಿದೆ.
ಅರ್ಹತೆ ಮತ್ತು ನಿಯಮಗಳು
ಡಿಜಿಟಲ್ ಲೋಕಲ್ ಪಾಸ್ ನಿಯಮಗಳ ಪ್ರಕಾರ, ಸಂಬಂಧಿತ ಟೋಲ್ ಪ್ಲಾಜಾದಿಂದ 20 ಕಿಲೋಮೀಟರ್ ವ್ಯಾಪ್ತಿಯಲ್ಲಿ ವಾಸಿಸುವ ಸ್ಥಳೀಯ ನಿವಾಸಿಗಳು ಮಾತ್ರ ಈ ಪಾಸ್ ಪಡೆಯಲು ಅರ್ಹರಾಗಿರುತ್ತಾರೆ.
ಪಾಸ್ ಪಡೆದ ವಾಹನ ಮಾಲೀಕರು ನಿಯಮಗಳಿಗೆ ಒಳಪಟ್ಟು ಸಂಬಂಧಿತ ಟೋಲ್ ಪ್ಲಾಜಾ ಮೂಲಕ ತಿಂಗಳಲ್ಲಿ ಎಷ್ಟು ಬಾರಿ ಬೇಕಾದರೂ ಪ್ರಯಾಣಿಸಬಹುದು. ಸ್ಥಳೀಯ ನಿವಾಸಿಗಳಿಗೆ ಟೋಲ್ ಶುಲ್ಕದಲ್ಲಿ ಸಿಗುವ ವಿನಾಯಿತಿ ಅಥವಾ ರಿಯಾಯಿತಿಗಳು ಈ ಪಾಸ್ ಮೂಲಕ ಸುಲಭವಾಗಿ ಅನ್ವಯವಾಗುತ್ತವೆ.
GIS, DigiLocker ಮೂಲಕ ತಕ್ಷಣ ಪರಿಶೀಲನೆ
ಹಿಂದೆ ಲೋಕಲ್ ಪಾಸ್ ಪಡೆಯಲು ನಿವಾಸದ ದಾಖಲೆಗಳು ಹಾಗೂ ವಾಹನದ ದಾಖಲೆಗಳನ್ನು ತೆಗೆದುಕೊಂಡು ಟೋಲ್ ಪ್ಲಾಜಾ ಕಚೇರಿಗಳಿಗೆ ತೆರಳಬೇಕಾಗಿತ್ತು. ಆದರೆ ಹೊಸ ವ್ಯವಸ್ಥೆಯಲ್ಲಿ DigiLocker ಮತ್ತು VAHANನಂತಹ ಸರ್ಕಾರಿ ಡಿಜಿಟಲ್ ವೇದಿಕೆಗಳ ಮೂಲಕ ಮಾಹಿತಿಯನ್ನು ಸ್ವಯಂಚಾಲಿತವಾಗಿ ಪರಿಶೀಲಿಸಲಾಗುತ್ತದೆ.
ವಾಹನ ಮಾಲೀಕರ ನಿವಾಸದ ವಿಳಾಸ, ವಾಹನದ ವಿವರಗಳು ಮತ್ತು ಅದಕ್ಕೆ ಲಿಂಕ್ ಆಗಿರುವ ಫಾಸ್ಟ್‌ಟ್ಯಾಗ್ ಖಾತೆಯನ್ನು ವ್ಯವಸ್ಥೆಯೇ ಸ್ವಯಂಚಾಲಿತವಾಗಿ ಪರಿಶೀಲಿಸುತ್ತದೆ.
ಅಷ್ಟೇ ಅಲ್ಲದೆ, ಅರ್ಜಿದಾರರ ಮನೆ ಟೋಲ್ ಪ್ಲಾಜಾದಿಂದ 20 ಕಿಲೋಮೀಟರ್ ವ್ಯಾಪ್ತಿಯಲ್ಲಿದೆಯೇ ಎಂಬುದನ್ನು GIS ತಂತ್ರಜ್ಞಾನದ ಮೂಲಕ ನಿಖರವಾಗಿ ಖಚಿತಪಡಿಸಲಾಗುತ್ತದೆ. ಇದರಿಂದ ಮಾನವ ಹಸ್ತಕ್ಷೇಪ ಕಡಿಮೆಯಾಗುವುದರ ಜೊತೆಗೆ ಸ್ಥಳೀಯ ಪ್ರಯಾಣಿಕರಿಗೆ ಸೇವೆಗಳು ವೇಗವಾಗಿ ದೊರೆಯಲಿವೆ.
