ಹೆದ್ದಾರಿಯಲ್ಲಿ ಕೊಳಕು ಟಾಯ್ಲೆಟ್ ಕಂಡ್ರೆ ಸುಮ್ಮನಿರಬೇಡಿ! ಫೋಟೋ ಕಳುಹಿಸಿದ್ರೆ FASTag ಖಾತೆಗೆ ₹1,000 ರಿವಾರ್ಡ್

ರಾಷ್ಟ್ರೀಯ ಹೆದ್ದಾರಿಯಲ್ಲಿ ಪ್ರಯಾಣಿಸುವವರಿಗೆ ಕೇಂದ್ರ ಸರ್ಕಾರದಿಂದ ಗುಡ್‌ನ್ಯೂಸ್‌ ಸಿಕ್ಕಿದೆ. ಉಚಿತವಾಗಿ FASTag ಖಾತೆಗೆ ₹1,000 ರೀಚಾರ್ಜ್ ಪಡೆಯುವ ಅವಕಾಶವನ್ನು ನೀಡಲಾಗಿದೆ. ಕೇವಲ ಒಂದು ಫೋಟೋ ಕಳುಹಿಸುವ ಮೂಲಕ ಈ ಬಹುಮಾನ ಪಡೆಯಬಹುದು. ಈಗಾಗಲೇ ಹಲವರು ಈ ಪ್ರಯೋಜನ ಪಡೆದುಕೊಂಡಿದ್ದಾರೆ. ಹಾಗಾದರೆ ಇದನ್ನು ಪಡೆಯುವುದು ಹೇಗೆ ಎಂಬುದನ್ನು ನೋಡೋಣ.

ಪ್ರಯಾಣಿಕರಿಗೆ ನ್ಯಾಷನಲ್ ಹೈವೇಸ್ ಅಥಾರಿಟಿ ಆಫ್ ಇಂಡಿಯಾ (NHAI) ಸಿಹಿಸುದ್ದಿ ನೀಡಿದೆ. ₹1,000 ಮೌಲ್ಯದ FASTag ರೀಚಾರ್ಜ್ ಅನ್ನು ಉಚಿತವಾಗಿ ಪಡೆಯುವ ಅವಕಾಶ ಕಲ್ಪಿಸಿದೆ. ಇದಕ್ಕಾಗಿ NHAI ವಿಶೇಷ ಅಭಿಯಾನವನ್ನು ಘೋಷಿಸಿದೆ. ಈ ಚಾಲೆಂಜ್‌ನಲ್ಲಿ ಭಾಗವಹಿಸುವ ಮೂಲಕ ಉಚಿತವಾಗಿ ₹1,000 FASTag ರೀಚಾರ್ಜ್ ಪಡೆಯಬಹುದು. ಇದಕ್ಕಾಗಿ ದೊಡ್ಡ ಕೆಲಸವನ್ನೇನೂ ಮಾಡಬೇಕಿಲ್ಲ. ಕೇವಲ ಒಂದು ಸಣ್ಣ ಕೆಲಸ ಮಾಡಿದರೆ ಸಾಕು, ಈ ರಿವಾರ್ಡ್ ನಿಮ್ಮದಾಗಲಿದೆ.

NHAI ಈ ಹಿಂದೆ ‘ಕ್ಲೀನ್ ಟಾಯ್ಲೆಟ್ ಪಿಕ್ಚರ್ ಚಾಲೆಂಜ್’ ಎಂಬ ವಿಶೇಷ ಅಭಿಯಾನವನ್ನು ಆರಂಭಿಸಿತ್ತು. ಇದೀಗ ಈ ಅಭಿಯಾನವನ್ನು ಮುಂದಿನ ವರ್ಷದ ಜೂನ್ 30ರವರೆಗೆ ವಿಸ್ತರಿಸಲು NHAI ನಿರ್ಧರಿಸಿದೆ. ಈವರೆಗೆ ಈ ಅಭಿಯಾನದ ಮೂಲಕ 429 ಪ್ರಯಾಣಿಕರು ಉಚಿತವಾಗಿ ₹1,000 FASTag ರೀಚಾರ್ಜ್ ಪಡೆದಿದ್ದಾರೆ. ಹಾಗಾದರೆ ಈ ರಿವಾರ್ಡ್ ಪಡೆಯುವುದು ಹೇಗೆ? ನಿಯಮಗಳೇನು? ಇಲ್ಲಿದೆ ಮಾಹಿತಿ.

ಹೆದ್ದಾರಿಯಲ್ಲಿ ಈ ಒಂದು ಕೆಲಸ ಮಾಡಿದರೆ ಸಾಕು!

ನೀವು ರಾಷ್ಟ್ರೀಯ ಹೆದ್ದಾರಿಯಲ್ಲಿ ಪ್ರಯಾಣಿಸುವಾಗ ಟೋಲ್ ಪ್ಲಾಜಾಗಳ ಬಳಿ ಇರುವ ಶೌಚಾಲಯಗಳು ಕೊಳಕಾಗಿರುವುದನ್ನು ಗಮನಿಸಿದ್ದೀರಾ? ಶೌಚಾಲಯ ಸ್ವಚ್ಛವಾಗಿಲ್ಲದಿರುವುದು ಅಥವಾ ಕಸದಿಂದ ತುಂಬಿರುವುದು ಕಂಡುಬಂದರೆ, ಅದರ ಫೋಟೋ ತೆಗೆದು ದೂರು ಸಲ್ಲಿಸಿದರೆ ಸಾಕು. ನಿಮಗೆ ₹1,000 FASTag ರೀಚಾರ್ಜ್ ನೀಡಲಾಗುತ್ತದೆ.

ಅಧಿಕಾರಿಗಳು ನೀವು ಕಳುಹಿಸಿದ ಫೋಟೋವನ್ನು ಪರಿಶೀಲಿಸಿ ದೃಢಪಡಿಸಿದ ಬಳಿಕ ರಿವಾರ್ಡ್ ಮೊತ್ತವನ್ನು FASTag ಖಾತೆಗೆ ಜಮೆ ಮಾಡಲಾಗುತ್ತದೆ.

ಒಂದು ವಾಹನದ ನೋಂದಣಿ ಸಂಖ್ಯೆಗೆ ಈ ಅಭಿಯಾನದಡಿ ಒಮ್ಮೆ ಮಾತ್ರ ₹1,000 ರೀಚಾರ್ಜ್ ಪಡೆಯಲು ಅವಕಾಶವಿದೆ. ಒಮ್ಮೆ ರಿವಾರ್ಡ್ ಪಡೆದ ಬಳಿಕ ಅದೇ ವಾಹನದ ಮೂಲಕ ಮತ್ತೊಮ್ಮೆ ಪಡೆಯಲು ಸಾಧ್ಯವಿಲ್ಲ. ಈ ರೀಚಾರ್ಜ್ ಅನ್ನು ಬೇರೆಯವರಿಗೆ ವರ್ಗಾಯಿಸಲು ಅಥವಾ ನಗದಾಗಿ ಪರಿವರ್ತಿಸಲು ಸಾಧ್ಯವಿಲ್ಲ.

ಒಂದೇ ಶೌಚಾಲಯಕ್ಕೆ ಸಂಬಂಧಿಸಿದಂತೆ ಹಲವು ದೂರುಗಳು ಬಂದರೆ, ಮೊದಲಿಗೆ ದೂರು ಸಲ್ಲಿಸಿದ ವ್ಯಕ್ತಿಗೆ ರಿವಾರ್ಡ್ ನೀಡಲಾಗುತ್ತದೆ.

ಆ್ಯಪ್ ಮೂಲಕ ದೂರು ಸಲ್ಲಿಸುವುದು ಹೇಗೆ?

• ಕೇಂದ್ರ ಸರ್ಕಾರದ ‘ರಾಜ್‌ಮಾರ್ಗ್ ಯಾತ್ರಾ’ (Rajmarg Yatra) ಆ್ಯಪ್ ಅನ್ನು ಗೂಗಲ್ ಪ್ಲೇ ಸ್ಟೋರ್‌ನಿಂದ ಡೌನ್‌ಲೋಡ್ ಮಾಡಿಕೊಳ್ಳಬೇಕು.

• ನಿಮ್ಮ ಮೊಬೈಲ್ ಸಂಖ್ಯೆಯೊಂದಿಗೆ ಆ್ಯಪ್‌ಗೆ ಲಾಗಿನ್ ಆಗಬೇಕು.

• ಟೋಲ್ ಪ್ಲಾಜಾಗಳ ಬಳಿ ಸ್ವಚ್ಛವಾಗಿಲ್ಲದ ಶೌಚಾಲಯ ಕಂಡುಬಂದರೆ, ಜಿಯೋ-ಟ್ಯಾಗ್ ಮತ್ತು ಟೈಮ್‌ಸ್ಟ್ಯಾಂಪ್ ಹೊಂದಿರುವ ಫೋಟೋಗಳನ್ನು ಅಪ್‌ಲೋಡ್ ಮಾಡಬೇಕು.

• ದೂರು ಸಲ್ಲಿಸುವಾಗ ನಿಮ್ಮ ಹೆಸರು, ಟೋಲ್ ಪ್ಲಾಜಾದ ಸ್ಥಳ, ವಾಹನ ನೋಂದಣಿ ಸಂಖ್ಯೆ ಮತ್ತು ಮೊಬೈಲ್ ಸಂಖ್ಯೆ ಸೇರಿದಂತೆ ಅಗತ್ಯ ಮಾಹಿತಿಯನ್ನು ನೀಡಬೇಕು.

• ನೀವು ಸಲ್ಲಿಸಿದ ಫೋಟೋಗಳನ್ನು ಮೊದಲು ಕೃತಕ ಬುದ್ಧಿಮತ್ತೆ (AI) ಸಹಾಯದಿಂದ ಸ್ಕ್ರೀನಿಂಗ್ ಮಾಡಲಾಗುತ್ತದೆ.

• ನಂತರ ಸಿಬ್ಬಂದಿ ಫೋಟೋವನ್ನು ಹಸ್ತಚಾಲಿತವಾಗಿ ಪರಿಶೀಲಿಸುತ್ತಾರೆ.

• ದೂರು ಮತ್ತು ಫೋಟೋವನ್ನು ದೃಢಪಡಿಸಿದ ಬಳಿಕ, ನಿಮ್ಮ ವಾಹನದ ನೋಂದಣಿ ಸಂಖ್ಯೆಗೆ ಲಿಂಕ್ ಆಗಿರುವ FASTag ಖಾತೆಗೆ ₹1,000 ಜಮೆ ಮಾಡಲಾಗುತ್ತದೆ.

ಈ ಶೌಚಾಲಯಗಳ ಫೋಟೋಗಳಿಗೆ ಮಾತ್ರ ರಿವಾರ್ಡ್!

ಈ ಅಭಿಯಾನವು NHAI ನೇರವಾಗಿ ನಿರ್ವಹಿಸುತ್ತಿರುವ ಶೌಚಾಲಯಗಳಿಗೆ ಮಾತ್ರ ಅನ್ವಯಿಸುತ್ತದೆ. NHAI ವ್ಯಾಪ್ತಿಯಲ್ಲಿರುವ ಶೌಚಾಲಯಗಳ ಸ್ವಚ್ಛತೆಗೆ ಸಂಬಂಧಿಸಿದ ದೂರುಗಳಿಗೆ ಮಾತ್ರ ಈ ರಿವಾರ್ಡ್ ಯೋಜನೆ ಅನ್ವಯವಾಗಲಿದೆ.

ಸಾರ್ವಜನಿಕ ಸ್ಥಳಗಳು, ಪೆಟ್ರೋಲ್ ಬಂಕ್‌ಗಳು, ಧಾಬಾಗಳು ಸೇರಿದಂತೆ ಇತರ ಸ್ಥಳಗಳಲ್ಲಿರುವ ಶೌಚಾಲಯಗಳಿಗೆ ಈ ಯೋಜನೆ ಅನ್ವಯಿಸುವುದಿಲ್ಲ ಎಂದು ಕೇಂದ್ರ ಸರ್ಕಾರ ತಿಳಿಸಿದೆ.