ನವದೆಹಲಿ: ಚಿನ್ನದ ಶುದ್ಧತೆಯನ್ನು ಅಳೆಯಲು ಬಳಸುವ ‘ಹಾಲ್‌ಮಾರ್ಕ್’ (Hallmarking) ವ್ಯವಸ್ಥೆಯು ಈಗ ಶೀಘ್ರದಲ್ಲೇ ಬೆಳ್ಳಿ ಆಭರಣಗಳಿಗೂ ಅನ್ವಯವಾಗಲಿದೆ. ಮಾರುಕಟ್ಟೆಯಲ್ಲಿ ಬೆಳ್ಳಿಯ ಬೆಲೆ ಗಗನಕ್ಕೇರುತ್ತಿರುವ ಬೆನ್ನಲ್ಲೇ, ಗ್ರಾಹಕರಿಗೆ ಮೋಸವಾಗದಂತೆ ತಡೆಯಲು ಕೇಂದ್ರ ಸರ್ಕಾರ ಈ ಮಹತ್ವದ ಕ್ರಮಕ್ಕೆ ಮುಂದಾಗಿದೆ.ಚಿನ್ನದ ಶುದ್ಧತೆಯನ್ನು ಅಳೆಯಲು ಬಳಸುವ ಹಾಲ್‌ಮಾರ್ಕ್ (Hallmarking) ವ್ಯವಸ್ಥೆಯನ್ನು ಈಗ ಬೆಳ್ಳಿಗೂ ಕಡ್ಡಾಯಗೊಳಿಸಲು ಭಾರತೀಯ ಮಾನಕ ಬ್ಯೂರೋ (BIS) ಸಿದ್ಧತೆ ನಡೆಸುತ್ತಿದೆ
ಏನಿದು ಹೊಸ ಯೋಜನೆ?
ಬಿಐಎಸ್ (BIS) ಮಹಾನಿರ್ದೇಶಕ ಸಂಜಯ್ ಗಾರ್ಗ್ ಅವರ ಪ್ರಕಾರ, ಮೊದಲು ದೊಡ್ಡ ಪ್ರಮಾಣದ ಆಭರಣ ತಯಾರಕರೊಂದಿಗೆ ಈ ಪೈಲಟ್ ಯೋಜನೆಯನ್ನು ಜಾರಿಗೆ ತರಲಾಗುವುದು. ಈ ಅವಧಿಯಲ್ಲಿ ಆಯ್ದ ಜಿಲ್ಲೆಗಳಲ್ಲಿ ಬೆಳ್ಳಿಯ ಶುದ್ಧತೆ ಪರೀಕ್ಷಿಸುವ ಮತ್ತು ಪ್ರಮಾಣೀಕರಿಸುವ ಮೂಲಸೌಕರ್ಯಗಳನ್ನು ಬಲಪಡಿಸಲಾಗುತ್ತದೆ.
HUID ಕಡ್ಡಾಯ: ಸೆಪ್ಟೆಂಬರ್ 2025 ರಿಂದ, ಹಾಲ್‌ಮಾರ್ಕ್ ಮಾಡಲಾದ ಪ್ರತಿಯೊಂದು ಬೆಳ್ಳಿ ವಸ್ತುವಿನ ಮೇಲೆ ಆರು ಅಂಕಿಯ ಅಕ್ಷರಸಂಖ್ಯೆಯ (Alphanumeric) HUID ಕೋಡ್ ಇರುವುದು ಕಡ್ಡಾಯ. ಇದನ್ನು ಬಳಸಿ ಗ್ರಾಹಕರು ‘BIS Care’ ಆಪ್ ಮೂಲಕ ಆಭರಣದ ಶುದ್ಧತೆ ಮತ್ತು ಜುವೆಲ್ಲರ್ ಮಾಹಿತಿಯನ್ನು ಪತ್ತೆಹಚ್ಚಬಹುದು.
ಗ್ರಾಹಕ ವ್ಯವಹಾರಗಳ ಸಚಿವಾಲಯದ ಅಂಕಿಅಂಶಗಳ ಪ್ರಕಾರ, ಡಿಸೆಂಬರ್ 31, 2025 ರವರೆಗೆ ಈಗಾಗಲೇ 23 ಲಕ್ಷಕ್ಕೂ ಹೆಚ್ಚು ಬೆಳ್ಳಿ ವಸ್ತುಗಳಿಗೆ HUID ಸಹಿತ ಹಾಲ್‌ಮಾರ್ಕ್ ಮಾಡಲಾಗಿದೆ.
ಸವಾಲುಗಳೇನು?: ಚಿನ್ನಕ್ಕೆ ಹೋಲಿಸಿದರೆ ಬೆಳ್ಳಿಯ ಹಾಲ್‌ಮಾರ್ಕಿಂಗ್ ಪ್ರಕ್ರಿಯೆ ಸ್ವಲ್ಪ ಸಂಕೀರ್ಣ ಮತ್ತು ದಣಿವು ತರುವ ಕೆಲಸವಾಗಿದೆ. ಹೀಗಾಗಿ, ಮೂಲಸೌಕರ್ಯಗಳು ಪೂರ್ಣ ಪ್ರಮಾಣದಲ್ಲಿ ಸಿದ್ಧವಾದ ನಂತರವಷ್ಟೇ ಹಂತ ಹಂತವಾಗಿ ಇದನ್ನು ಕಡ್ಡಾಯಗೊಳಿಸಲಾಗುತ್ತದೆ.
ನಿಮ್ಮ ಹಳೆಯ ಬೆಳ್ಳಿಗೂ ಹಾಕಿಸಬಹುದು ಹಾಲ್‌ಮಾರ್ಕ್
ಒಂದು ವೇಳೆ ನಿಮ್ಮ ಮನೆಯಲ್ಲಿ ಈಗಾಗಲೇ ಬೆಳ್ಳಿ ಆಭರಣಗಳಿದ್ದು, ಅವುಗಳಿಗೆ ಹಾಲ್‌ಮಾರ್ಕ್ ಇಲ್ಲವೆಂದರೆ ಚಿಂತಿಸುವ ಅಗತ್ಯವಿಲ್ಲ. ಸರ್ಕಾರ ಇದಕ್ಕೂ ಅವಕಾಶ ನೀಡಿದೆ:
ನಿಮ್ಮ ಸಮೀಪದ ಬಿಐಎಸ್ ಮಾನ್ಯತೆ ಪಡೆದ ಅಸ್ಸಾಯಿಂಗ್ ಅಂಡ್ ಹಾಲ್‌ಮಾರ್ಕಿಂಗ್ ಸೆಂಟರ್ (AHC) ಗೆ ಭೇಟಿ ನೀಡಿ.
ಅಲ್ಲಿ ನಿಮ್ಮ ಬೆಳ್ಳಿ ವಸ್ತುವಿನ ಶುದ್ಧತೆಯನ್ನು ಪರೀಕ್ಷಿಸಲು ನೀಡಬಹುದು.
ಪ್ರತಿ ವಸ್ತುವಿನ ಪರೀಕ್ಷೆಗೆ ಸರ್ಕಾರ ಕೇವಲ 45 ರೂಪಾಯಿ ಶುಲ್ಕ ನಿಗದಿಪಡಿಸಿದೆ.
ಪರೀಕ್ಷೆ ಯಶಸ್ವಿಯಾದ ನಂತರ ಆ ವಸ್ತುವಿನ ಮೇಲೆ 6 ಅಂಕಿಗಳ HUID ನಂಬರ್ ಮತ್ತು BIS ಲೋಗೋ ಮುದ್ರಿಸಲಾಗುತ್ತದೆ.
ಜಗತ್ತಿನಲ್ಲೇ ಬೆಳ್ಳಿಯನ್ನು ಅತಿ ಹೆಚ್ಚು ಬಳಸುವ ದೇಶಗಳಲ್ಲಿ ಭಾರತವೂ ಒಂದು. ಭಾರತದ ವಾರ್ಷಿಕ ಬೇಡಿಕೆ ಸುಮಾರು 5,000 ರಿಂದ 7,000 ಟನ್ ಇದೆ. ಆದರೆ ನಮ್ಮ ದೇಶದ ಉತ್ಪಾದನೆ ಇದರ ಸಣ್ಣ ಭಾಗವನ್ನಷ್ಟೇ ಪೂರೈಸುತ್ತಿದೆ. ಆಭರಣ ಮತ್ತು ಬೆಳ್ಳಿಯ ಸಾಮಾನುಗಳೇ ಭಾರತದ ಪ್ರಮುಖ ಬಳಕೆಯ ಮೂಲಗಳಾಗಿವೆ.
