ಆಧಾರ್ ಪಿವಿಸಿ ಕಾರ್ಡ್ ಆರ್ಡರ್ ಮಾಡುತ್ತಿದ್ದೀರ? ಜನವರಿಯಿಂದ ಹೆಚ್ಚಳವಾಗಿರುವ ಶುಲ್ಕದ ಬಗ್ಗೆ ತಿಳಿಯಿರಿ

ನವದೆಹಲಿ: ಆಧಾರ್ ಕಾರ್ಡ್‌ನ ಬಾಳಿಕೆ ಬರುವ ಪಾಲಿವಿನೈಲ್ ಕ್ಲೋರೈಡ್ (PVC) ಆವೃತ್ತಿಯನ್ನು ಆರ್ಡರ್ ಮಾಡಲು ಇದೀಗ ಹೆಚ್ಚಿನ ಹಣ ಪಾವತಿಸಬೇಕಿದೆ.

ಯುನಿಕ್ ಐಡೆಂಟಿಫಿಕೇಷನ್ ಅಥಾರಿಟಿ ಆಫ್ ಇಂಡಿಯಾ (UIDAI) ಆಧಾರ್ PVC ಕಾರ್ಡ್‌ಗೆ ಹೊಸ ಶುಲ್ಕ ನಿಗದಿಪಡಿಸಿದ್ದು, ಜನವರಿ 1, 2026ರಿಂದ ₹75 (ತೆರಿಗೆ ಮತ್ತು ಡೆಲಿವರಿ ಶುಲ್ಕ ಸೇರಿದಂತೆ) ಪಾವತಿಸಬೇಕಾಗುತ್ತದೆ.

ಇದುವರೆಗೆ ₹50 ಶುಲ್ಕವಿತ್ತು. 2020ರಲ್ಲಿ ಈ ಸೇವೆ ದೇಶಾದ್ಯಂತ ಆರಂಭವಾದ ನಂತರ ಮೊದಲ ಬಾರಿಗೆ ಬೆಲೆ ಹೆಚ್ಚಿಸಲಾಗುತ್ತಿದೆ. ವಸ್ತುಗಳ ಬೆಲೆ, ಪ್ರಿಂಟಿಂಗ್, ಸುರಕ್ಷಿತ ಡೆಲಿವರಿ ಮತ್ತು ಲಾಜಿಸ್ಟಿಕ್ಸ್ ಖರ್ಚು-ವೆಚ್ಚ ಹೆಚ್ಚಳದ ಕಾರಣ ಈ ನಿರ್ಧಾರ ಕೈಗೊಳ್ಳಲಾಗಿದೆ ಎಂದು UIDAI ತಿಳಿಸಿದೆ. ಉನ್ನತ ಗುಣಮಟ್ಟದ ಸೇವೆಯನ್ನು ಮುಂದುವರಿಸಲು ಈ ಹೆಜ್ಜೆ ಅಗತ್ಯ ಎಂದು ಅಧಿಕಾರಿಗಳು ಹೇಳಿದ್ದಾರೆ.

ಆಧಾರ್ PVC ಕಾರ್ಡ್ ವೈಶಿಷ್ಟ್ಯಗಳು:

• ಪಾಕೆಟ್ ಸೈಜ್, ಪ್ಲಾಸ್ಟಿಕ್ ಮೆಟೀರಿಯಲ್‌ನಿಂದ ಮಾಡಿದ ಬಾಳಿಕೆ ಬರುವ ಕಾರ್ಡ್.
• ಸುರಕ್ಷತಾ ವೈಶಿಷ್ಟ್ಯಗಳು: ಟ್ಯಾಂಪರ್-ಪ್ರೂಫ್ QR ಕೋಡ್, ಹಾಲೋಗ್ರಾಮ್ (ಕೆಲವು ಮಾಹಿತಿಗಳ ಪ್ರಕಾರ ಇದೀಗ ತೆಗೆದುಹಾಕಲಾಗಿದೆ), ಮೈಕ್ರೋ ಟೆಕ್ಸ್ಟ್, ಗೋಸ್ಟ್ ಇಮೇಜ್, ಎಂಬಾಸ್ಡ್ ಆಧಾರ್ ಲೋಗೋ ಇತ್ಯಾದಿ.
• ಪೇಪರ್ ಆಧಾರ್, ಇ-ಆಧಾರ್‌ಗೆ ಸಮಾನ ಕಾನೂನು ಮಾನ್ಯತೆ.

ಹೇಗೆ ಆರ್ಡರ್ ಮಾಡಬೇಕು?

myAadhaar ವೆಬ್‌ಸೈಟ್ (myaadhaar.uidai.gov.in) ಅಥವಾ mAadhaar ಮೊಬೈಲ್ ಆಪ್ ಮೂಲಕ ಆನ್‌ಲೈನ್‌ನಲ್ಲಿ ಆರ್ಡರ್ ಮಾಡಬಹುದು. ಆರ್ಡರ್ ಸ್ವೀಕೃತಿಗೊಂಡ ನಂತರ 5 ಕೆಲಸದ ದಿನಗಳಲ್ಲಿ ಸ್ಪೀಡ್ ಪೋಸ್ಟ್ ಮೂಲಕ ಡಿಸ್‌ಪ್ಯಾಚ್ ಮಾಡಲಾಗುತ್ತದೆ. ಡೆಲಿವರಿ ಸಮಯ ಸ್ಥಳಾನುಸಾರ ಬದಲಾಗಬಹುದು.ಈ ಬೆಲೆ ಹೆಚ್ಚಳ myAadhaar ಪೋರ್ಟಲ್ ಮತ್ತು ಆಪ್ ಮೂಲಕ ಮಾಡುವ ಎಲ್ಲ ಹೊಸ ಆರ್ಡರ್‌ಗಳಿಗೆ ಅನ್ವಯಿಸುತ್ತದೆ. ಆಧಾರ್ ಸೇವೆಗಳನ್ನು ಇನ್ನಷ್ಟು ಸುಲಭಗೊಳಿಸುವ ನಿಟ್ಟಲ್ಲಿ UIDAI ನಿರಂತರ ಪ್ರಯತ್ನ ಮುಂದುವರಿದಿದೆ.