ಬೆಂಗಳೂರು: ದೇಶದ ಕೋಟ್ಯಂತರ ಉದ್ಯೋಗಿಗಳಿಗೆ ಕೇಂದ್ರ ಸರ್ಕಾರದಿಂದ ಭರ್ಜರಿ ಸಿಹಿ ಸುದ್ದಿ ಸಿಕ್ಕಿದೆ. ನೌಕರರ ಭವಿಷ್ಯ ನಿಧಿ ಸಂಘಟನೆ (EPFO) 2025-26ರ ಆರ್ಥಿಕ ವರ್ಷಕ್ಕೆ ಅನುಮೋದಿಸಲಾದ ಶೇ. 8.25 ರಷ್ಟು ವಾರ್ಷಿಕ ಬಡ್ಡಿದರವನ್ನು ಚಂದಾದಾರರ ಖಾತೆಗಳಿಗೆ ಜಮೆ ಮಾಡಲು ಅಧಿಕೃತವಾಗಿ ಚಾಲನೆ ನೀಡಿದೆ. ಜುಲೈ 15, 2026 ರಿಂದಲೇ ಚಂದಾದಾರರ ಪಿಎಫ್ ಖಾತೆಗಳಲ್ಲಿ ಬಡ್ಡಿಯ ಹಣ ಪ್ರತಿಫಲಿಸಲು ಆರಂಭಿಸಿದೆ ಎಂದು ತಿಳಿದುಬಂದಿದೆ.
ಕೇಂದ್ರ ಕಾರ್ಮಿಕ ಮತ್ತು ಉದ್ಯೋಗ ಸಚಿವ ಮನ್ಸುಖ್ ಮಾಂಡವಿಯಾ ಅವರು ಇತ್ತೀಚೆಗೆ ತಿಳಿಸಿದಂತೆ, ಸುಮಾರು 34 ಕೋಟಿ ಚಂದಾದಾರರ ಖಾತೆಗಳಿಗೆ ಒಟ್ಟು 1.44 ಲಕ್ಷ ಕೋಟಿ ರೂಪಾಯಿಗಳ ಬಡ್ಡಿ ಹಣವನ್ನು ಇಪಿಎಫ್ಒ ಪ್ರಕ್ರಿಯೆಗೊಳಿಸುತ್ತಿದೆ. ಇತ್ತೀಚೆಗಷ್ಟೇ ಇಪಿಎಫ್ಒ ತನ್ನ ಸಂಪೂರ್ಣ ಡೇಟಾಬೇಸ್ ಅನ್ನು ಕೇಂದ್ರೀಕೃತ ಡಿಜಿಟಲ್ ಪ್ಲಾಟ್ಫಾರ್ಮ್ ಗೆ ಯಶಸ್ವಿಯಾಗಿ ಸ್ಥಳಾಂತರಿಸಿದ ನಂತರ ನಡೆಯುತ್ತಿರುವ ಮೊದಲ ಬೃಹತ್ ಬಡ್ಡಿ ಜಮೆ ಪ್ರಕ್ರಿಯೆ ಇದಾಗಿದೆ.
ನಿಮ್ಮ ಖಾತೆಗೆ ಬಡ್ಡಿ ಜಮೆಯಾಗಿದೆಯೇ? ಚೆಕ್ ಮಾಡುವುದು ಹೇಗೆ?
ಚಂದಾದಾರರು ತಮ್ಮ ಖಾತೆಗೆ ಬಡ್ಡಿ ಹಣ ಬಂದಿದೆಯೇ ಇಲ್ಲವೇ ಎಂಬುದನ್ನು ಪರಿಶೀಲಿಸಲು ಇಪಿಎಫ್ಒ ಹಲವು ಸುಲಭ ಮಾರ್ಗಗಳನ್ನು ಒದಗಿಸಿದೆ:
ಇಪಿಎಫ್ಒ ಮೆಂಬರ್ ಪೋರ್ಟಲ್
ಚಂದಾದಾರರು ತಮ್ಮ 12 ಅಂಕಿಯ ಯುಎಎನ್ (UAN-Universal Account Number), ಪಾಸ್ವರ್ಡ್ ಮತ್ತು ಕ್ಯಾಪ್ಚಾ ಬಳಸಿ ಇಪಿಎಫ್ಒ ಪಾಸ್ಬುಕ್ ಪೋರ್ಟಲ್ಗೆ ಲಾಗಿನ್ ಆಗಬೇಕು. ಆಧಾರ್ ಲಿಂಕ್ ಆಗಿರುವ ಮೊಬೈಲ್ ಸಂಖ್ಯೆಗೆ ಬರುವ ಒಟಿಪಿ (OTP) ದೃಢೀಕರಣದ ನಂತರ, ‘ಪಾಸ್ಬುಕ್ ಲೈಟ್’ ಮೂಲಕ ನವೀಕರಿಸಿದ ಬ್ಯಾಲೆನ್ಸ್ ವೀಕ್ಷಿಸಬಹುದು.
ಉಮಂಗ್ ಆ್ಯಪ್ (UMANG App):
ಮೊಬೈಲ್ನಲ್ಲಿ ಉಮಂಗ್ ಆ್ಯಪ್ ಡೌನ್ಲೋಡ್ ಮಾಡಿ, ಲಾಗಿನ್ ಆದ ಬಳಿಕ ನಿಮ್ಮ UAN ಅನ್ನು ಲಿಂಕ್ ಮಾಡುವ ಮೂಲಕ ಪಿಎಫ್ ಬ್ಯಾಲೆನ್ಸ್, ಇತ್ತೀಚಿನ ವಂತಿಗೆಗಳು ಹಾಗೂ ಕ್ಲೈಮ್ಗಳ ಸ್ಥಿತಿಯನ್ನು ಸುಲಭವಾಗಿ ಟ್ರ್ಯಾಕ್ ಮಾಡಬಹುದು.
ಎಸ್ಎಂಎಸ್ (SMS) ಸೇವೆ:
UAN ಸಕ್ರಿಯಗೊಳಿಸಿರುವ ಸದಸ್ಯರು ತಮ್ಮ ನೋಂದಾಯಿತ ಮೊಬೈಲ್ ಸಂಖ್ಯೆಯಿಂದ 7738299899 ಸಂಖ್ಯೆಗೆ ‘EPFOHO UAN’ ಎಂದು ಟೈಪ್ ಮಾಡಿ ಎಸ್ಎಂಎಸ್ ಕಳುಹಿಸುವ ಮೂಲಕ ತಮ್ಮ ಇತ್ತೀಚಿನ ಪಿಎಫ್ ಬ್ಯಾಲೆನ್ಸ್ ಅನ್ನು ಕ್ಷಣಾರ್ಧದಲ್ಲಿ ಪಡೆಯಬಹುದು.
ಬಡ್ಡಿ ಜಮೆ ತಡವಾದರೆ ಹಣ ನಷ್ಟವಾಗುತ್ತಾ?
ಇಪಿಎಫ್ ಯೋಜನೆ 1952 ರ ಪ್ಯಾರಾಗ್ರಾಫ್ 60 ರ ಅನ್ವಯ, ಬಡ್ಡಿಯನ್ನು ಪ್ರತಿ ತಿಂಗಳ ರನ್ನಿಂಗ್ ಬ್ಯಾಲೆನ್ಸ್ ಆಧಾರದ ಮೇಲೆ ಲೆಕ್ಕಹಾಕಲಾಗುತ್ತದೆ. ಪಾಸ್ಬುಕ್ನಲ್ಲಿ ಬಡ್ಡಿಯ ಹಣ ತಡವಾಗಿ ಕಾಣಿಸಿಕೊಂಡರೂ ಸಹ ಚಂದಾದಾರರಿಗೆ ಯಾವುದೇ ರೀತಿಯ ಆರ್ಥಿಕ ನಷ್ಟವಾಗುವುದಿಲ್ಲ. ಬಾಕಿ ಇರುವ ಸಂಪೂರ್ಣ ಬಡ್ಡಿ ಮೊತ್ತವನ್ನು ನಿಯಮಾನುಸಾರ ಖಾತೆಗೆ ಸೇರಿಸಲಾಗುತ್ತದೆ ಎಂದು ಇಪಿಎಫ್ಒ ಸ್ಪಷ್ಟಪಡಿಸಿದೆ.
ಈ ಬಾರಿ ಇಷ್ಟು ಬೇಗ ಬಡ್ಡಿ ಬರಲು ಕಾರಣವೇನು?
ಕಳೆದ ವರ್ಷಗಳಲ್ಲಿ ಸೆಪ್ಟೆಂಬರ್ ಅಥವಾ ಅಕ್ಟೋಬರ್ ತಿಂಗಳವರೆಗೂ ಎಳೆಯುತ್ತಿದ್ದ ಬಡ್ಡಿ ಜಮೆ ಪ್ರಕ್ರಿಯೆ ಈ ಬಾರಿ ಜುಲೈ ನಲ್ಲೇ ಮುಕ್ತಾಯ ಹಂತ ತಲುಪಲು ಕಾರಣ ಇಪಿಎಫ್ಒ ತಂದಿರುವ ತಾಂತ್ರಿಕ ಕ್ರಾಂತಿ. ಪ್ರಾದೇಶಿಕ ವ್ಯವಸ್ಥೆಗಳ ಬದಲಾಗಿ ಇಡೀ ದೇಶದ ಸದಸ್ಯರ ಡೇಟಾವನ್ನು ಒಂದೇ ವೇದಿಕೆಯಡಿ ತರುವ ‘CITES 2.01’ ಎಂಬ ಸುಧಾರಿತ ಕೇಂದ್ರೀಕೃತ ಐಟಿ ವ್ಯವಸ್ಥೆಯನ್ನು ಅಳವಡಿಸಿರುವುದು ಇದಕ್ಕೆ ಮುಖ್ಯ ಕಾರಣವಾಗಿದೆ. ಸದ್ಯ ಕೆಲವು ಖಾತೆಗಳಲ್ಲಿ ತಪ್ಪುಗಳನ್ನು ತಡೆಯಲು ಕ್ಷೇತ್ರ ಮಟ್ಟದ ಪರಿಶೀಲನೆ ನಡೆಯುತ್ತಿರುವುದರಿಂದ ಕೆಲವರಿಗೆ ಮಾತ್ರ ಸಣ್ಣ ವಿಳಂಬವಾಗುತ್ತಿದೆ.
ಬ್ಯಾಂಕ್ ಸ್ಥಿರ ಠೇವಣಿಗಳಿಗೆ (FD) ಹೋಲಿಸಿದರೆ ಇಪಿಎಫ್ ನೀಡುತ್ತಿರುವ ಶೇ. 8.25 ರಷ್ಟು ಬಡ್ಡಿಯು ಅತ್ಯಂತ ಲಾಭದಾಯಕವಾಗಿದೆ. ಜೊತೆಗೆ ನಿಗದಿತ ಮಿತಿಯವರೆಗಿನ ಇಪಿಎಫ್ ಬಡ್ಡಿಗೆ ಆದಾಯ ತೆರಿಗೆ ವಿನಾಯಿತಿ ಇರುವುದರಿಂದ ಇದು ಇಂದಿಗೂ ಭಾರತದ ಉದ್ಯೋಗಿಗಳಿಗೆ ಅತ್ಯುತ್ತಮ ನಿವೃತ್ತಿ ಉಳಿತಾಯ ಯೋಜನೆಯಾಗಿದೆ.
