ಪಶ್ಚಿಮ ಏಷ್ಯಾದಲ್ಲಿ ನಡೆಯುತ್ತಿರುವ ಸಂಘರ್ಷದ ಹಿನ್ನೆಲೆಯಲ್ಲಿ ಟೊರೆಂಟ್ ಗ್ಯಾಸ್ (Torrent Gas) ಸಂಸ್ಥೆಯು ಸಿಎನ್‌ಜಿ ಬೆಲೆಯನ್ನು ಪ್ರತಿ ಕೆಜಿಗೆ 2.50 ರೂ. ವರೆಗೆ ಹೆಚ್ಚಿಸಿದೆ. ಈ ಬೆಲೆ ಏರಿಕೆಯು ಸಾರ್ವಜನಿಕರು ಮತ್ತು ವಿಶೇಷವಾಗಿ ಆಟೋ ಚಾಲಕರ ಮೇಲೆ ತೀವ್ರ ಪರಿಣಾಮ ಬೀರಿದ್ದು, ಜನರ ಆತಂಕಕ್ಕೆ ಕಾರಣವಾಗಿದೆ.ಜೈಪುರದಲ್ಲಿ ಸಿಎನ್‌ಜಿ ಬೆಲೆಯು ಪ್ರತಿ ಕೆಜಿಗೆ 2.50 ರೂ. ಏರಿಕೆಯಾಗಿದ್ದರೆ, ಪುಣೆಯ ಗ್ರಾಮಾಂತರ ಪ್ರದೇಶಗಳಲ್ಲಿ ಪ್ರತಿ ಕೆಜಿಗೆ 2 ರೂ. ಹೆಚ್ಚಳವಾಗಿದೆ.
ಹೌದು. ದೇಶಾದ್ಯಂತ ಇಂಧನ ಬೆಲೆಗಳ ಏರಿಕೆ ಸಾಮಾನ್ಯ ಜನರಿಗೆ ಬಿಸಿತುಪ್ಪವಾಗಿ ಪರಿಣಮಿಸಿದೆ. ಇರಾನ್ ಯುದ್ಧದ ಭೀತಿಯ ನಡುವೆ ಟೊರೆಂಟ್ ಗ್ಯಾಸ್ ಸಿಎನ್‌ಜಿ ಬೆಲೆಯನ್ನು ಏರಿಕೆ ಮಾಡಿದ್ದು, ಜೈಪುರ ಮತ್ತು ಪುಣೆ ಭಾಗದ ವಾಹನ ಸವಾರರು ತತ್ತರಿಸಿದ್ದಾರೆ. ವಾಣಿಜ್ಯ ಸಿಲಿಂಡರ್ ಹಾಗೂ ವಿಮಾನ ಇಂಧನ ಬೆಲೆ ಏರಿಕೆಯ ಬೆನ್ನಲ್ಲೇ ಸಿಎನ್‌ಜಿ ದರ ಹೆಚ್ಚಳವಾಗಿರುವುದು ಆಟೋ ಚಾಲಕರು ಮತ್ತು ಸಾರಿಗೆ ಉದ್ಯಮದ ಮೇಲೆ ಭೀಕರ ಪರಿಣಾಮ ಬೀರಲಿದೆ.
: ಟೊರೆಂಟ್ ಗ್ಯಾಸ್ ಜೈಪುರದಲ್ಲಿ ಸಿಎನ್‌ಜಿ ದರವನ್ನು 2.50 ರೂ. ಹೆಚ್ಚಿಸಿದೆ. ಇದರಿಂದ ಆಟೋ ಚಾಲಕರ ಆದಾಯಕ್ಕೆ ಕತ್ತರಿ ಬಿದ್ದಿದ್ದು, ಕನಿಷ್ಠ ಜೀವನೋಪಾಯಕ್ಕಾಗಿ ಹೆಚ್ಚಿನ ಅವಧಿಯವರೆಗೆ ಕೆಲಸ ಮಾಡುವಂತಾಗಿದೆ ಎಂದು ಚಾಲಕರು ಅಳಲು ತೋಡಿಕೊಂಡಿದ್ದಾರೆ.ಪುಣೆಯ ಗ್ರಾಮಾಂತರ ಭಾಗಗಳಲ್ಲಿ ಏಪ್ರಿಲ್ 3ರ ಮಧ್ಯರಾತ್ರಿಯಿಂದಲೇ ಹೊಸ ದರಗಳು ಜಾರಿಗೆ ಬಂದಿದ್ದು, ಪ್ರತಿ ಕೆಜಿಗೆ 2 ರೂ. ಏರಿಕೆಯಾಗಿದೆ. ಇದರಿಂದಾಗಿ ಪುಣೆ ಗ್ರಾಮಾಂತರದಲ್ಲಿ ಸಿಎನ್‌ಜಿ ಬೆಲೆ ಈಗ ಪ್ರತಿ ಕೆಜಿಗೆ 94.50 ರೂ. ತಲುಪಿದೆ.
ಬಯೋ-ಸಿಎನ್‌ಜಿ (Bio-CNG) ಏರಿಕೆ: ಪರ್ಯಾಯ ಇಂಧನವಾದ ಬಯೋ-ಸಿಎನ್‌ಜಿ ಬೆಲೆಯೂ ಪ್ರತಿ ಕೆಜಿಗೆ 90 ರೂ. ನಿಂದ 92 ರೂ. ಗೆ ಏರಿಕೆಯಾಗಿದೆ.
ಇಂಧನ ವಲಯದಲ್ಲಿ ಬೆಲೆ ಏರಿಕೆ ಸುನಾಮಿ:
- ವಾಣಿಜ್ಯ ಎಲ್‌ಪಿಜಿ: ಏಪ್ರಿಲ್ 1 ರಿಂದ ವಾಣಿಜ್ಯ ಬಳಕೆಯ ಎಲ್‌ಪಿಜಿ ಸಿಲಿಂಡರ್ ಬೆಲೆ ಗಣನೀಯವಾಗಿ ಏರಿಕೆಯಾಗಿದೆ. ದೆಹಲಿಯಲ್ಲಿ 19 ಕೆಜಿ ವಾಣಿಜ್ಯ ಸಿಲಿಂಡರ್ ಬೆಲೆ 195.50 ರೂ. ಏರಿಕೆಯಾಗಿ 2,078.50 ರೂ. ತಲುಪಿದೆ.
- ವಿಮಾನ ಇಂಧನ (ATF): ವಿಮಾನ ಇಂಧನದ ದರದಲ್ಲೂ ಏರಿಕೆಯಾಗಿದ್ದು, ಇದು ವಿಮಾನ ಪ್ರಯಾಣದ ದರಗಳ ಮೇಲೆ ಪರಿಣಾಮ ಬೀರಬಹುದು.
- ಜಾಗತಿಕ ಕಾರಣಗಳು: ಪಶ್ಚಿಮ ಏಷ್ಯಾದಲ್ಲಿನ ಯುದ್ಧದ ಪರಿಸ್ಥಿತಿ ಮತ್ತು ಹಾರ್ಮುಜ್ ಜಲಸಂಧಿಯಂತಹ ಕಚ್ಚಾ ತೈಲ ಪೂರೈಕೆ ಮಾರ್ಗಗಳಲ್ಲಿ ಉಂಟಾಗಿರುವ ಅಡಚಣೆಗಳು ಈ ಬೆಲೆ ಏರಿಕೆಗೆ ಪ್ರಮುಖ ಕಾರಣಗಳಾಗಿವೆ.
