ಇಂದಿನ ಧಾವಂತದ ಬದುಕಿನಲ್ಲಿ ಅನೇಕರು ಮೊಬೈಲ್ ಫೋನ್ಗೆ ಎಷ್ಟು ಅಂಟಿಕೊಂಡಿದ್ದಾರೆ ಎಂದರೆ, ಊಟ ಮಾಡುವಾಗಲೂ ಫೋನ್ ನೋಡುವುದನ್ನು ಬಿಡುವುದಿಲ್ಲ. ಆದರೆ ಈ ಅಭ್ಯಾಸವು ಆರೋಗ್ಯದ ಮೇಲೆ ಗಂಭೀರ ಪರಿಣಾಮ ಬೀರಬಹುದು ಎಂದು ಆರೋಗ್ಯ ತಜ್ಞರು ಎಚ್ಚರಿಸುತ್ತಿದ್ದಾರೆ.
ಮೊಬೈಲ್ ಫೋನ್ಗಳು, ಲ್ಯಾಪ್ಟಾಪ್ಗಳು ಮತ್ತು ಟಿವಿಗಳು ನಮ್ಮ ದೈನಂದಿನ ಜೀವನದ ಅವಿಭಾಜ್ಯ ಅಂಗವಾಗಿವೆ. ಆಫೀಸ್ನಲ್ಲಿ ಲ್ಯಾಪ್ಟಾಪ್ ಸ್ಕ್ರೀನ್, ಮನೆಯಲ್ಲಿ ಟಿವಿ ಸ್ಕ್ರೀನ್, ಮತ್ತು ಹೋದಲ್ಲೆಲ್ಲಾ ಮೊಬೈಲ್ ಸ್ಕ್ರೀನ್ ನಮ್ಮನ್ನು ಸುತ್ತುವರೆದಿವೆ. ಮಲ್ಟಿಟಾಸ್ಕಿಂಗ್ ಯುಗದಲ್ಲಿ ಇವು ಅನಿವಾರ್ಯ ಎಂಬಂತಾಗಿವೆ. ಕೆಲಸದ ಒತ್ತಡ, ಮನರಂಜನೆಗಾಗಿ ಗಂಟೆಗಟ್ಟಲೆ ವೆಬ್ ಸೀರೀಸ್ ನೋಡುವುದು ಅಥವಾ ಡೆಡ್ಲೈನ್ ಒತ್ತಡದಿಂದಾಗಿ ಅನೇಕರು ಊಟ ಮಾಡುವಾಗಲೂ ಫೋನ್ ಅಥವಾ ಲ್ಯಾಪ್ಟಾಪ್ ಬಿಡುತ್ತಿಲ್ಲ. ಆದರೆ ಈ ಅಭ್ಯಾಸವು ಆರೋಗ್ಯದ ಮೇಲೆ ತೀವ್ರ ದುಷ್ಪರಿಣಾಮ ಬೀರುತ್ತದೆ ಎಂದು ವೈದ್ಯರು ಮತ್ತು ತಜ್ಞರು ಎಚ್ಚರಿಸುತ್ತಿದ್ದಾರೆ.
ಗಮನ ಬೇರೆಡೆಗೆ ಹಾಗೂ ಅತಿಯಾದ ಆಹಾರ ಸೇವನೆ:
ಊಟ ಮಾಡುವಾಗ ಮೊಬೈಲ್ ಸ್ಕ್ರಾಲ್ ಮಾಡುವುದು ಅಥವಾ ಟಿವಿ ನೋಡುವುದರಿಂದ ನಿಮ್ಮ ಗಮನ ಬೇರೆಡೆಗೆ ಹರಿಯುತ್ತದೆ. ಇದರಿಂದ ನೀವು ಇಷ್ಟಪಟ್ಟು ಆಹಾರ ಸೇವಿಸುವುದರಿಂದ ವಂಚಿತರಾಗುತ್ತೀರಿ. ವಾಸ್ತವವಾಗಿ, ಹೊಟ್ಟೆ ತುಂಬಿದೆ ಎಂಬ ಸಂಕೇತ ಮೆದುಳಿಗೆ ತಲುಪಲು ಸುಮಾರು 20 ನಿಮಿಷಗಳು ಬೇಕಾಗುತ್ತದೆ. ಹೊಟ್ಟೆ ತುಂಬಿದಾಗ ಕೊಬ್ಬಿನ ಅಂಗಾಂಶಗಳಿಂದ ಬಿಡುಗಡೆಯಾಗುವ ಹಾರ್ಮೋನ್ ಈ ಸಂಕೇತವನ್ನು ನೀಡುತ್ತದೆ. ನೀವು ಗಡಿಬಿಡಿಯಲ್ಲಿ ತಿಂದಾಗ ಅಥವಾ ಏನು ತಿನ್ನುತ್ತಿದ್ದೇವೆ ಎಂಬ ಗಮನವಿಲ್ಲದಿದ್ದಾಗ, ಈ ಸಂಕೇತ ಸರಿಯಾಗಿ ತಲುಪದೆ ಅಗತ್ಯಕ್ಕಿಂತ ಹೆಚ್ಚು ಕ್ಯಾಲೊರಿಗಳನ್ನು ಸೇವಿಸುತ್ತೀರಿ. ಇದು ನಿಮ್ಮ ಮೆಮೊರಿ ಬ್ಯಾಂಕ್ನಲ್ಲಿ “ಎಷ್ಟು ತಿಂದೆವು” ಎಂಬ ದಾಖಲೆ ಉಳಿಸದ ಕಾರಣ ‘ಮೈಂಡ್ಲೆಸ್ ಈಟಿಂಗ್’ (ಗಮನವಿಲ್ಲದೆ ತಿನ್ನುವುದು) ಗೆ ದಾರಿ ಮಾಡಿಕೊಡುತ್ತದೆ. ಭಾರತದಲ್ಲಿ ನಡೆದ ಸಂಶೋಧನೆಯೊಂದರ ಪ್ರಕಾರ, ಹೆಚ್ಚು ಸ್ಕ್ರೀನ್ ಟೈಮ್ ಎಂದರೆ ಹೆಚ್ಚು ಫಾಸ್ಟ್ ಫುಡ್ ಸೇವನೆ ಎಂದೂ ತಿಳಿದುಬಂದಿದೆ.
ತೀವ್ರ ಆರೋಗ್ಯ ಸಮಸ್ಯೆಗಳು:
ಟಿವಿ ಅಥವಾ ಮೊಬೈಲ್ ನೋಡುತ್ತಾ ತಿನ್ನುವುದರಿಂದ ನಾವು ಯಾವ ಭಂಗಿಯಲ್ಲಿ ಕುಳಿತು ತಿನ್ನುತ್ತಿದ್ದೇವೆ ಎಂಬ ಅರಿವು ಇರುವುದಿಲ್ಲ. ಇದರಿಂದ ಅಜೀರ್ಣ, ತೂಕ ಹೆಚ್ಚಾಗುವುದು, ರಕ್ತದೊತ್ತಡ ಮತ್ತು ಸಕ್ಕರೆ ಕಾಯಿಲೆ (ಡಯಾಬಿಟಿಸ್) ಅಪಾಯ ಹೆಚ್ಚಾಗುತ್ತದೆ ಎಂದು ತಜ್ಞರು ಹೇಳುತ್ತಾರೆ. ಫಾಸ್ಟ್ ಫುಡ್ ತಿನ್ನುವಾಗ ಗಮನ ಬೇರೆಡೆ ಇದ್ದರೆ ಇನ್ಸುಲಿನ್ ಬಿಡುಗಡೆಯಾಗುತ್ತದೆ, ಇದು ಸ್ವಲ್ಪ ಸಮಯದ ನಂತರ ಮತ್ತೆ ಹಸಿವನ್ನುಂಟು ಮಾಡುತ್ತದೆ. ಈ ರೀತಿ ಪದೇ ಪದೇ ತಿನ್ನುವ ಚಕ್ರದಿಂದ ತೂಕ ಹೆಚ್ಚಾಗುವುದು ಖಚಿತ.
ಮಾನಸಿಕ ಒತ್ತಡ ಮತ್ತು ಸ್ವಚ್ಛತೆಯ ಕೊರತೆ
• ಮಾನಸಿಕ ಒತ್ತಡ: ಮೊಬೈಲ್ನಲ್ಲಿ ಯಾವುದಾದರೂ ನಕಾರಾತ್ಮಕ ವಿಷಯಗಳನ್ನು ನೋಡಿದಾಗ ನೀವು ಒತ್ತಡಕ್ಕೆ ಒಳಗಾಗಬಹುದು, ಇದು ಕೂಡ ಅತಿಯಾದ ತಿನ್ನುವಿಕೆಗೆ ಕಾರಣವಾಗುತ್ತದೆ. ಪಕ್ಕದಲ್ಲಿರುವವರ ಜೊತೆ ಮಾತನಾಡದೆ ಫೋನ್ನಲ್ಲಿ ಮುಳುಗುವುದು ಸಾಮಾಜಿಕ ಸಂಪರ್ಕವನ್ನು ಕಡಿತಗೊಳಿಸುತ್ತದೆ.
• ಸ್ವಚ್ಛತೆ: ಮೊಬೈಲ್ ಫೋನ್ಗಳ ಮೇಲೆ ಅಸಂಖ್ಯಾತ ಬ್ಯಾಕ್ಟೀರಿಯಾಗಳಿರುತ್ತವೆ. ಊಟ ಮಾಡುವಾಗ ಪದೇ ಪದೇ ಫೋನ್ ಮುಟ್ಟುವುದರಿಂದ ಆ ಬ್ಯಾಕ್ಟೀರಿಯಾಗಳು ಕೈಗಳ ಮೂಲಕ ಆಹಾರ ಸೇರಿ ಅನಾರೋಗ್ಯಕ್ಕೆ ಕಾರಣವಾಗಬಹುದು.
ಒಂದು ಸಂಶೋಧನೆಯ ಪ್ರಕಾರ, ಸ್ಮಾರ್ಟ್ಫೋನ್ ಬಳಸುವಾಗ ಒಂದು ಕೈ ಬ್ಯುಸಿ ಇರುವುದರಿಂದ ತಿನ್ನುವ ವೇಗ ಕಡಿಮೆಯಾಗುತ್ತದೆ. ಇದು ಟಿವಿ ನೋಡುವುದಕ್ಕೆ ಹೋಲಿಸಿದರೆ ಸ್ವಲ್ಪ ಕಡಿಮೆ ತಿನ್ನಲು ಸಹಕಾರಿ ಎನ್ನಲಾಗಿದ್ದರೂ, ‘ಮೈಂಡ್ಲೆಸ್ ಈಟಿಂಗ್’ ಅಪಾಯ ಮಾತ್ರ ಹಾಗೆಯೇ ಇರುತ್ತದೆ. ಏಕೆಂದರೆ ಆಹಾರದ ಮೇಲಿನ ನಿಮ್ಮ ಏಕಾಗ್ರತೆ ಅಲ್ಲಿ ಇರುವುದಿಲ್ಲ.
ಮೊಬೈಲ್ ನೋಡುತ್ತಾ ಊಟ ಮಾಡುವುದರಿಂದ ಆಗುವ ಅನಾನುಕೂಲಗಳು
• ಅತಿಯಾಗಿ ತಿನ್ನುವುದು (Overeating): ಮೊಬೈಲ್ನಲ್ಲಿ ಮಗ್ನರಾದಾಗ ನಾವು ಎಷ್ಟು ಆಹಾರ ಸೇವಿಸುತ್ತಿದ್ದೇವೆ ಎಂಬ ಅರಿವು ನಮಗಿರುವುದಿಲ್ಲ. ಇದರಿಂದಾಗಿ ಹೊಟ್ಟೆ ತುಂಬಿದ್ದರೂ ಸಹ ನಾವು ಹೆಚ್ಚು ತಿನ್ನುತ್ತೇವೆ, ಇದು ತೂಕ ಹೆಚ್ಚಾಗಲು ಮತ್ತು ಬೊಜ್ಜು ಬರಲು ಕಾರಣವಾಗುತ್ತದೆ.
• ಜೀರ್ಣಕ್ರಿಯೆಯ ಸಮಸ್ಯೆ: ಆಹಾರವನ್ನು ಸರಿಯಾಗಿ ಅಗಿಯದೆ ನುಂಗುವುದರಿಂದ ಅಥವಾ ಗಮನ ಬೇರೆಡೆ ಇದ್ದಾಗ ಜೀರ್ಣಕ್ರಿಯೆಯ ವೇಗ ಕಡಿಮೆಯಾಗುತ್ತದೆ. ಇದು ಗ್ಯಾಸ್ಟ್ರಿಕ್ ಮತ್ತು ಹೊಟ್ಟೆಯ ಉಬ್ಬರದಂತಹ ಸಮಸ್ಯೆಗಳಿಗೆ ದಾರಿ ಮಾಡಿಕೊಡುತ್ತದೆ.
• ಪೋಷಕಾಂಶಗಳ ಕೊರತೆ: ಗಮನವಿಟ್ಟು ಊಟ ಮಾಡದಿದ್ದಾಗ, ಆಹಾರದ ರುಚಿ ಮತ್ತು ಅದರ ಪೌಷ್ಟಿಕಾಂಶದ ಬಗ್ಗೆ ಮೆದುಳಿಗೆ ಸರಿಯಾದ ಸಂಕೇತ ತಲುಪುವುದಿಲ್ಲ. ಇದರಿಂದ ದೇಹಕ್ಕೆ ಅಗತ್ಯವಿರುವ ತೃಪ್ತಿ ಸಿಗುವುದಿಲ್ಲ.
• ಮಕ್ಕಳ ಮೇಲೆ ಪರಿಣಾಮ: ಮಕ್ಕಳಿಗೆ ಮೊಬೈಲ್ ತೋರಿಸುತ್ತಾ ಊಟ ಮಾಡಿಸುವ ಅಭ್ಯಾಸ ಮಾಡಿಸಿದರೆ, ಅವರಿಗೆ ಆಹಾರದ ರುಚಿ ತಿಳಿಯುವುದಿಲ್ಲ ಮತ್ತು ಅವರು ಮೊಬೈಲ್ ಇಲ್ಲದೆ ಊಟ ಮಾಡದಂತಹ ಸ್ಥಿತಿಗೆ ತಲುಪುತ್ತಾರೆ.
ತಜ್ಞರ ಸಲಹೆ
ಊಟ ಮಾಡುವಾಗ ಕನಿಷ್ಠ 15-20 ನಿಮಿಷಗಳ ಕಾಲ ಮೊಬೈಲ್, ಟಿವಿ ಅಥವಾ ಯಾವುದೇ ಎಲೆಕ್ಟ್ರಾನಿಕ್ ಸಾಧನಗಳನ್ನು ಪಕ್ಕಕ್ಕಿಟ್ಟು, ಆಹಾರದ ಮೇಲೆ ಮಾತ್ರ ಗಮನ ಹರಿಸಿ. ಇದು ನಿಮ್ಮ ಜೀರ್ಣಕ್ರಿಯೆಯನ್ನು ಸುಧಾರಿಸುವುದಲ್ಲದೆ, ಮಾನಸಿಕ ನೆಮ್ಮದಿಯನ್ನೂ ನೀಡುತ್ತದೆ.
