ಮುಂಬೈ- ನಟ ಸುಶಾಂತ್ ಸಿಂಗ್ ರಜಪೂತ್ ಅವರ ಮಾಜಿ ಮ್ಯಾನೇಜರ್ ದಿಶಾ ಸಾಲಿಯನ್ ಅವರ 2020ರ ಸಾವಿನ ಪ್ರಕರಣಕ್ಕೆ ಆರು ವರ್ಷಗಳ ಬಳಿಕ ಮಹತ್ವದ ತಿರುವು ಸಿಕ್ಕಿದೆ. ದಿಶಾ ಸಾಲಿಯನ್ ಸಾವಿನ ಕುರಿತು ಎಫ್ಐಆರ್ ದಾಖಲಿಸಿ, ಸಮಗ್ರ ತನಿಖೆ ನಡೆಸುವಂತೆ ಕೇಂದ್ರ ತನಿಖಾ ದಳ (CBI)ಗೆ ಬಾಂಬೆ ಹೈಕೋರ್ಟ್ ಬುಧವಾರ ನಿರ್ದೇಶನ ನೀಡಿದೆ.
ಪ್ರಕರಣಕ್ಕೆ ಸಂಬಂಧಿಸಿದ ಎಲ್ಲ ದಾಖಲೆಗಳನ್ನು ಮುಂಬೈ ಪೊಲೀಸರು ಸಿಬಿಐಗೆ ಹಸ್ತಾಂತರಿಸಬೇಕು ಎಂದು ನ್ಯಾಯಾಲಯ ಸೂಚಿಸಿದೆ.
ನ್ಯಾಯಮೂರ್ತಿಗಳಾದ ಸಾರಂಗ್ ಕೊತ್ವಾಲ್ ಮತ್ತು ರಂಜಿತ್ಸಿಂಹ ರಾಜ ಭೋನ್ಸಾಲೆ ಅವರ ಪೀಠವು ಈ ಆದೇಶ ನೀಡಿದೆ. ದಿಶಾ ಅವರ ತಂದೆ ಸತೀಶ್ ಸಾಲಿಯನ್ ಸಲ್ಲಿಸಿದ್ದ ಅರ್ಜಿಯ ವಿಚಾರಣೆ ಬಳಿಕ ನ್ಯಾಯಾಲಯ ಈ ಮಹತ್ವದ ನಿರ್ದೇಶನ ನೀಡಿದೆ. ತನಿಖೆಗಾಗಿ ಸಿಬಿಐ ಹಿರಿಯ ಅಧಿಕಾರಿಯನ್ನು ನೇಮಿಸಬೇಕು, ಸತೀಶ್ ಸಾಲಿಯನ್ ಅವರ ಹೇಳಿಕೆಯನ್ನು ದಾಖಲಿಸಬೇಕು ಹಾಗೂ ಪ್ರಕರಣದ ಎಲ್ಲ ಆಯಾಮಗಳನ್ನು ಪರಿಶೀಲಿಸಬೇಕು ಎಂದು ನ್ಯಾಯಾಲಯ ತಿಳಿಸಿದೆ.
2020ರ ಜೂನ್ 8ರಂದು ನಡೆದಿದ್ದೇನು?
2020ರ ಜೂನ್ 8ರಂದು ನಡೆದಿದ್ದೇನು?
ದಿಶಾ ಸಾಲಿಯನ್ ಅವರು 2020ರ ಜೂನ್ 8ರಂದು ಮುಂಬೈನ ಮಲಾಡ್ ಪ್ರದೇಶದ ವಸತಿ ಕಟ್ಟಡದ 14ನೇ ಮಹಡಿಯಿಂದ ಬಿದ್ದು ಮೃತಪಟ್ಟಿದ್ದರು. ಆ ಸಮಯದಲ್ಲಿ ಮುಂಬೈ ಪೊಲೀಸರು ಪ್ರಕರಣದಲ್ಲಿ Accidental Death Report (ADR) ದಾಖಲಿಸಿದ್ದರು. ಈ ಘಟನೆ ನಡೆದ ಕೆಲವೇ ದಿನಗಳ ಬಳಿಕ, ಜೂನ್ 14ರಂದು ನಟ ಸುಶಾಂತ್ ಸಿಂಗ್ ರಜಪೂತ್ ಅವರು ಮುಂಬೈನ ಬಾಂದ್ರಾ ನಿವಾಸದಲ್ಲಿ ಶವವಾಗಿ ಪತ್ತೆಯಾಗಿದ್ದರು.
ದಿಶಾ ಸಾಲಿಯನ್ ಮತ್ತು ಸುಶಾಂತ್ ಸಿಂಗ್ ರಜಪೂತ್ ಅವರ ಸಾವುಗಳು ಒಂದೇ ವಾರದ ಅಂತರದಲ್ಲಿ ನಡೆದಿದ್ದರಿಂದ, ಎರಡೂ ಪ್ರಕರಣಗಳ ನಡುವೆ ಸಂಬಂಧವಿದೆಯೇ ಎಂಬ ಕುರಿತು ಹಲವು ವರ್ಷಗಳಿಂದ ಸಾರ್ವಜನಿಕ ವಲಯದಲ್ಲಿ ಚರ್ಚೆ ಮತ್ತು ಊಹಾಪೋಹಗಳು ನಡೆಯುತ್ತಿವೆ. ಆದರೆ ಎರಡೂ ಸಾವುಗಳ ನಡುವೆ ಯಾವುದೇ ಅಪರಾಧಾತ್ಮಕ ಸಂಬಂಧವಿದೆ ಎಂಬುದು ಇದುವರೆಗೆ ನ್ಯಾಯಾಲಯದಿಂದ ದೃಢಪಟ್ಟಿಲ್ಲ.
ತಂದೆಯ ಅರ್ಜಿ ಏನು ಹೇಳಿತ್ತೆ?
ತಂದೆಯ ಅರ್ಜಿ ಏನು ಹೇಳಿತ್ತು?
ದಿಶಾ ಸಾಲಿಯನ್ ಅವರ ತಂದೆ ಸತೀಶ್ ಸಾಲಿಯನ್ ಅವರು ತಮ್ಮ ಮಗಳ ಸಾವಿನ ಕುರಿತು ಮುಂಬೈ ಪೊಲೀಸರ ತನಿಖೆಯಲ್ಲಿ ಲೋಪಗಳಾಗಿವೆ ಎಂದು ಆರೋಪಿಸಿ ಬಾಂಬೆ ಹೈಕೋರ್ಟ್ ಮೊರೆ ಹೋಗಿದ್ದರು. ಅವರು ಪ್ರಕರಣದಲ್ಲಿ ಹೊಸದಾಗಿ ಎಫ್ಐಆರ್ ದಾಖಲಿಸಿ, ಸ್ವತಂತ್ರ ಮತ್ತು ಸಮಗ್ರ ತನಿಖೆ ನಡೆಸಬೇಕೆಂದು ಮನವಿ ಮಾಡಿದ್ದರು. ನಂತರ ಅವರು ತಮ್ಮ ಮಗಳ ಮೇಲೆ ಅತ್ಯಾಚಾರ ನಡೆಸಿ ಕೊಲೆ ಮಾಡಲಾಗಿದೆ ಎಂಬ ಆರೋಪಗಳನ್ನೂ ಅರ್ಜಿಯಲ್ಲಿ ಮುಂದಿಟ್ಟಿದ್ದರು.
ಈ ಆರೋಪಗಳು ಅರ್ಜಿದಾರರ ವಾದಗಳಾಗಿದ್ದು, ನ್ಯಾಯಾಲಯ ಅಥವಾ ಸಿಬಿಐ ಅವುಗಳನ್ನು ಸತ್ಯವೆಂದು ತೀರ್ಮಾನಿಸಿಲ್ಲ ಎಂಬುದು ಗಮನಾರ್ಹ.
ಪೊಲೀಸರ ನಿಲುವು ಏನಾಗಿತ್ತು?
ಪೊಲೀಸರ ನಿಲುವು ಏನಾಗಿತ್ತು?
ಮುಂಬೈ ಪೊಲೀಸರು ಹಿಂದಿನ ವಿಚಾರಣೆಗಳಲ್ಲಿ ದಿಶಾ ಸಾಲಿಯನ್ ಅವರ ಸಾವು ಆತ್ಮಹತ್ಯೆ ಎಂದು ತಿಳಿಸಿದ್ದರು ಮತ್ತು ತಮ್ಮ ತನಿಖೆಯಲ್ಲಿ ಯಾವುದೇ ಅಪರಾಧದ ಪುರಾವೆಗಳು ಸಿಕ್ಕಿಲ್ಲ ಎಂದು ನ್ಯಾಯಾಲಯಕ್ಕೆ ಹೇಳಿದ್ದರು. ಪ್ರಕರಣದಲ್ಲಿ ADR ಮಾತ್ರ ದಾಖಲಾಗಿದ್ದ ಹಿನ್ನೆಲೆಯಲ್ಲಿ, ಕುಟುಂಬದವರು ಕೊಲೆ ಆರೋಪ ಮಾಡುತ್ತಿರುವಾಗಲೂ ಏಕೆ ಎಫ್ಐಆರ್ ದಾಖಲಿಸಲಾಗಿಲ್ಲ ಎಂಬ ಪ್ರಶ್ನೆಯನ್ನು ನ್ಯಾಯಾಲಯದ ಹಿಂದಿನ ವಿಚಾರಣೆಯಲ್ಲಿಯೂ ಎತ್ತಲಾಗಿತ್ತು.
ದಿಶಾ ಅವರ ಕುಟುಂಬಕ್ಕೆ ಮರಣೋತ್ತರ ಪರೀಕ್ಷೆ ವರದಿ ಮತ್ತು ADRನ ಪ್ರತಿಗಳನ್ನು ಹಲವು ವರ್ಷಗಳಾದರೂ ನೀಡಲಾಗಿಲ್ಲ ಎಂಬ ಅಂಶವೂ ಹಿಂದಿನ ವಿಚಾರಣೆಗಳಲ್ಲಿ ನ್ಯಾಯಾಲಯದ ಗಮನಕ್ಕೆ ಬಂದಿತ್ತು.
ಹೈಕೋರ್ಟ್ನ ನಿರ್ದೇಶನವೇನು?
ಹೈಕೋರ್ಟ್ನ ನಿರ್ದೇಶನವೇನು?
ಪ್ರಕರಣಕ್ಕೆ ಸಂಬಂಧಿಸಿದ ಎಫ್ಐಆರ್ ದಾಖಲಿಸಬೇಕು.ದಿಶಾ ಅವರ ತಂದೆ ಸತೀಶ್ ಸಾಲಿಯನ್ ಅವರ ಹೇಳಿಕೆ ದಾಖಲಿಸಬೇಕು.ಹಿರಿಯ ಅಧಿಕಾರಿಯ ನೇತೃತ್ವದಲ್ಲಿ ತನಿಖೆ ನಡೆಸಬೇಕು.ಮುಂಬೈ ಪೊಲೀಸರ ಬಳಿಯಿರುವ ಪ್ರಕರಣದ ದಾಖಲೆಗಳನ್ನು ವಶಕ್ಕೆ ಪಡೆಯಬೇಕು.ದಿಶಾ ಅವರ ಸಾವಿಗೆ ಕಾರಣವಾದ ಎಲ್ಲಾ ಪರಿಸ್ಥಿತಿಗಳು ಮತ್ತು ಅಂಶಗಳನ್ನು ತನಿಖೆ ಮಾಡಬೇಕು ಎಂದು ನ್ಯಾಯಾಲಯ ನಿರ್ದೇಶಿಸಿದೆ.
ಅದೇ ವೇಳೆ, ತನಿಖೆಯಲ್ಲಿ ಯಾರ ವಿರುದ್ಧವೂ ಸಾಕಷ್ಟು ಸಾಕ್ಷ್ಯ ಸಿಗದಿದ್ದರೆ ಅವರನ್ನು ಆರೋಪಿಗಳೆಂದು ಪರಿಗಣಿಸಬಾರದು ಎಂದು ನ್ಯಾಯಾಲಯ ಸ್ಪಷ್ಟಪಡಿಸಿದೆ. ತನಿಖೆಯಲ್ಲಿ ಯಾವುದೇ ಅಪರಾಧ ಪತ್ತೆಯಾಗದಿದ್ದರೆ ಸಿಬಿಐ ಸಂಬಂಧಿತ ನ್ಯಾಯಾಲಯದ ಮುಂದೆ ಸೂಕ್ತ ಅಂತಿಮ/ಸಾರಾಂಶ ವರದಿ ಸಲ್ಲಿಸಬಹುದು. ಅಂತಹ ವರದಿಯನ್ನು ಪ್ರಶ್ನಿಸುವ ಅವಕಾಶ ಸತೀಶ್ ಸಾಲಿಯನ್ ಅವರಿಗೆ ಇರುತ್ತದೆ ಎಂದು ಹೈಕೋರ್ಟ್ ತಿಳಿಸಿದೆ.
ಆರು ವರ್ಷಗಳ ಬಳಿಕ ಮತ್ತೆ ತೆರೆದ ತನಿಖೆ
ಆರು ವರ್ಷಗಳ ಬಳಿಕ ಮತ್ತೆ ತೆರೆದ ತನಿಖೆ
2020ರಲ್ಲಿ ಆರಂಭವಾದ ಪ್ರಕರಣವು ಆರು ವರ್ಷಗಳ ಕಾಲ ಹಲವು ಪ್ರಶ್ನೆಗಳು, ಆರೋಪಗಳು ಮತ್ತು ಕಾನೂನು ಹೋರಾಟಗಳ ನಡುವೆ ಸಾಗಿತ್ತು. ಇದೀಗ ಹೈಕೋರ್ಟ್ನ ಆದೇಶದಿಂದ ಪ್ರಕರಣದ ತನಿಖೆ ಹೊಸ ಹಂತಕ್ಕೆ ಪ್ರವೇಶಿಸಿದೆ.
