ನೈಸರ್ಗಿಕ ಹೊಳಪು ಮತ್ತು ಚರ್ಮದ ಸಮಸ್ಯೆಗಳ ನಿವಾರಣೆಗೆ ಮನೆಯಲ್ಲೇ ತಯಾರಿಸುವ ಫೇಸ್ ಪ್ಯಾಕ್‌ಗಳು (DIY Face Packs) ಹೆಚ್ಚು ಜನಪ್ರಿಯವಾಗಿವೆ. ಆದರೆ, ಅಡುಗೆ ಮನೆಯಲ್ಲಿ ಸಿಗುವ ಎಲ್ಲಾ ಪದಾರ್ಥಗಳು ಮುಖಕ್ಕೆ ಸುರಕ್ಷಿತವಲ್ಲ. ಚರ್ಮದ ಕಾಂತಿಗಾಗಿ ಯಾವ ಪದಾರ್ಥಗಳನ್ನು ಬಳಸಬೇಕು ಮತ್ತು ಯಾವುದನ್ನು ತಪ್ಪಿಸಬೇಕು ಎಂಬ ಬಗ್ಗೆ ಕಾಸ್ಮೆಟಾಲಜಿಸ್ಟ್ ಪೂಜಾ ನಾಗದೇವ್ ಮಹತ್ವದ ಮಾಹಿತಿ ನೀಡಿದ್ದಾರೆ.
ಬಳಸಬಹುದಾದ 5 ಪ್ರಮುಖ ಪದಾರ್ಥಗಳು:
- ಜೇನುತುಪ್ಪ: ಇದು ಚರ್ಮದಲ್ಲಿ ತೇವಾಂಶವನ್ನು ಹಿಡಿದಿಟ್ಟುಕೊಳ್ಳುತ್ತದೆ. ಇದರಲ್ಲಿರುವ ಸೂಕ್ಷ್ಮಾಣು ವಿರೋಧಿ ಗುಣವು ಮೊಡವೆ ಮುಕ್ತ ಚರ್ಮಕ್ಕೆ ಸಹಕಾರಿ.
- ಮೊಸರು: ಇದರಲ್ಲಿರುವ ಲ್ಯಾಕ್ಟಿಕ್ ಆಮ್ಲವು ನೈಸರ್ಗಿಕ ಎಕ್ಸ್‌ಫೋಲಿಯಂಟ್ ಆಗಿ ಕೆಲಸ ಮಾಡುತ್ತದೆ. ಇದು ಚರ್ಮಕ್ಕೆ ಕಾಂತಿ ನೀಡುವ ಜೊತೆಗೆ ಹೈಡ್ರೇಟ್ ಆಗಿರಿಸುತ್ತದೆ.
- ಓಟ್ಸ್: ಇದು ಚರ್ಮದ ಉರಿಯೂತವನ್ನು ಕಡಿಮೆ ಮಾಡುತ್ತದೆ. ಒಣ ಚರ್ಮ ಅಥವಾ ಸೂಕ್ಷ್ಮ ಚರ್ಮ ಹೊಂದಿರುವವರಿಗೆ ಇದು ಅತ್ಯುತ್ತಮ.
- ಅರಿಶಿನ: ಉರಿಯೂತ ಶಮನಕಾರಿ ಗುಣ ಹೊಂದಿರುವ ಅರಿಶಿನವು ಚರ್ಮಕ್ಕೆ ನೈಸರ್ಗಿಕ ಹೊಳಪು ನೀಡುತ್ತದೆ. ಇದನ್ನು ಮೊಸರು ಅಥವಾ ಜೇನುತುಪ್ಪದೊಂದಿಗೆ ಬೆರೆಸಿ ಹಚ್ಚುವುದು ಒಳ್ಳೆಯದು.
- ಅಲೋವೆರಾ: ಕೆಂಪಾದ ಚರ್ಮ ಅಥವಾ ಮೊಡವೆ ಪೀಡಿತ ಚರ್ಮಕ್ಕೆ ಇದು ತಂಪಾದ ಅನುಭವ ನೀಡುವುದಲ್ಲದೆ ಹೈಡ್ರೇಶನ್ ಹೆಚ್ಚಿಸುತ್ತದೆ.
ಯಾವ ಪದಾರ್ಥಗಳಿಂದ ದೂರವಿರಬೇಕು? ಮುಖದ ಚರ್ಮಕ್ಕೆ ನೇರವಾಗಿ ಲಿಂಬೆ ರಸ ಹಚ್ಚುವುದು ಅಪಾಯಕಾರಿ. ಇದರಲ್ಲಿರುವ ಆಸಿಡ್ ಅಂಶವು ಚರ್ಮದ ಮೇಲೆ ಸುಟ್ಟ ಗಾಯ ಅಥವಾ ಕಿರಿಕಿರಿ ಉಂಟುಮಾಡಬಹುದು. ಹಾಗೆಯೇ ಬೇಕಿಂಗ್ ಸೋಡಾ, ಟೂತ್‌ಪೇಸ್ಟ್ ಮತ್ತು ಅತಿಯಾದ ಎಸೆನ್ಷಿಯಲ್ ಆಯಿಲ್ಗಳ ಬಳಕೆ ಚರ್ಮದ ನೈಸರ್ಗಿಕ ಪಿಹೆಚ್ (pH) ಮಟ್ಟವನ್ನು ಹಾಳುಗೆಡವಿ ಅಲರ್ಜಿಗೆ ಕಾರಣವಾಗಬಹುದು.
ಸುರಕ್ಷತೆಗಾಗಿ ತಜ್ಞರ ಸಲಹೆಗಳು: ಯಾವುದೇ ಹೊಸ ಪದಾರ್ಥವನ್ನು ಮುಖಕ್ಕೆ ಹಚ್ಚುವ ಮುನ್ನ ಕೈ ಅಥವಾ ಕುತ್ತಿಗೆಯ ಮೇಲೆ ‘ಪ್ಯಾಚ್ ಟೆಸ್ಟ್’ ಮಾಡುವುದು ಅವಶ್ಯಕ. ಫೇಸ್ ಪ್ಯಾಕ್‌ಗಳನ್ನು ವಾರಕ್ಕೆ ಒಂದೆರಡು ಬಾರಿ ಮಾತ್ರ ಬಳಸಬೇಕು ಮತ್ತು ಪ್ಯಾಕ್ ತೊಳೆದ ನಂತರ ಮೃದುವಾದ ಮಾಯಿಶ್ಚರೈಸರ್ ಹಚ್ಚುವುದನ್ನು ಮರೆಯಬಾರದು.
