ಪತ್ನಿ ಮೇಲೆ ಹಲ್ಲೆ ಮಾಡಿ ಮಗುವನ್ನು ಹತ್ಯೆಗೈದು ನಾಪತ್ತೆಯಾಗಿದ್ದ ಕಾನ್ಸ್ಟೇಬಲ್ 6 ದಿನಗಳ ನಂತರ ಶವವಾಗಿ ಪತ್ತೆಯಾಗಿದ್ದಾರೆ. ಈ ಘಟನೆಯು ಉತ್ತರ ಪ್ರದೇಶದ ಬಂದಾ (Banda) ಜಿಲ್ಲೆಯಲ್ಲಿ ನಡೆದಿದೆ.
ಪೊಲೀಸ್ ಕಾನ್ಸ್ಟೇಬಲ್ ಆಗಿದ್ದ ಗೌರವ್ ಯಾದವ್ ಎಂಬುವವರು ತಮ್ಮ ಪತ್ನಿ ಶಿವಾನಿ ಮತ್ತು ಪುಟ್ಟ ಮಗಳ ಮೇಲೆ ರೊಟ್ಟಿ ಮಾಡುವ ಹಂಚಿನಿಂದ (Tawa) ತೀವ್ರವಾಗಿ ಹಲ್ಲೆ ನಡೆಸಿದ್ದರು. ಕೌಟುಂಬಿಕ ಕಲಹದ ಹಿನ್ನೆಲೆಯಲ್ಲಿ ಈ ಘಟನೆ ನಡೆದಿತ್ತು.
ಕಳೆದ ಜನವರಿ 14 ರಂದು ಗೌರವ್ ಯಾದವ್ ತನ್ನ ಪತ್ನಿ ಮತ್ತು ಮಗಳ ಮೇಲೆ ಹಲ್ಲೆ ನಡೆಸಿದ್ದರು. ಈ ದಾಳಿಯಲ್ಲಿ ಮಗಳು ಮೃತಪಟ್ಟರೆ, ಪತ್ನಿ ಶಿವಾನಿ ಗಂಭೀರವಾಗಿ ಗಾಯಗೊಂಡು ಆಸ್ಪತ್ರೆ ಸೇರಿದ್ದರು.
ಈ ಕೃತ್ಯ ಎಸಗಿದ ನಂತರ ಗೌರವ್ ಯಾದವ್ ನಾಪತ್ತೆಯಾಗಿದ್ದರು. ಪೊಲೀಸರಿಗೆ ಯಮುನಾ ನದಿಯ ದಡದಲ್ಲಿ ಅವರ ಮೊಬೈಲ್ ಮತ್ತು ಬಟ್ಟೆಗಳು ಪತ್ತೆಯಾಗಿದ್ದವು.ಘಟನೆ ನಡೆದ 6 ದಿನಗಳ ನಂತರ, ಅಂದರೆ ಸೋಮವಾರ ಸಂಜೆ, ಗೌರವ್ ಯಾದವ್ ಅವರ ಶವ ಯಮುನಾ ನದಿಯಲ್ಲಿ ಪತ್ತೆಯಾಗಿದೆ. ಅವರು ನದಿಗೆ ಜಿಗಿದು ಆತ್ಮಹತ್ಯೆ ಮಾಡಿಕೊಂಡಿರುವುದು ತಿಳಿದುಬಂದಿದೆ.
ಆಡಿಯೋ ವೈರಲ್: ಸಾವಿಗೂ ಮುನ್ನ ಗೌರವ್ ಯಾದವ್ ಅವರು ತಮ್ಮ ಸಹೋದರನಿಗೆ ಕರೆ ಮಾಡಿ ಕೃತ್ಯದ ಬಗ್ಗೆ ಮಾಹಿತಿ ನೀಡಿದ್ದ ಆಡಿಯೋ ಈಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಆಡಿಯೋದಲ್ಲಿ ಅವರು, “ನಾನು ಹಂಚಿನಿಂದ ಹೊಡೆದುಬಿಟ್ಟೆ” ಎಂದು ತಪ್ಪೊಪ್ಪಿಗೆ ನೀಡಿದ್ದಾರೆ ಎನ್ನಲಾಗಿದೆ.ಗೌರವ್ ಯಾದವ್ ಅವರು ಮೂಲತಃ ಫರೂಕಾಬಾದ್ ಜಿಲ್ಲೆಯ ನಿವಾಸಿಯಾಗಿದ್ದು, ಬಂದಾ ಜಿಲ್ಲೆಯಲ್ಲಿ ಡಯಲ್ 112 ಪೊಲೀಸ್ ವಾಹನದ ಚಾಲಕರಾಗಿ ಕೆಲಸ ಮಾಡುತ್ತಿದ್ದರು.
ಹೆಂಡತಿ ಮತ್ತು ಮಗುವಿನ ಮೇಲೆ ಹಲ್ಲೆ
ಘಟನೆಯ ನಂತರ ಗೌರವ್ ತನ್ನ ಕುಟುಂಬ ಸದಸ್ಯರೊಂದಿಗೆ ಫೋನ್‌ನಲ್ಲಿ ಮಾತನಾಡಿದ್ದನು. ಈಗ ಅದರ ಆಡಿಯೋ ವೈರಲ್ ಆಗುತ್ತಿದೆ. ಆಡಿಯೋದಲ್ಲಿ ಗೌರವ್, “ನಮ್ಮಿಂದ ದೊಡ್ಡ ತಪ್ಪಾಗಿದೆ. ಇಂದು ಶಿವಾನಿ ಜೊತೆ ಜಗಳವಾಯಿತು. ಅವಳು ನಮ್ಮನ್ನು ಪ್ರಚೋದಿಸುತ್ತಲೇ ಇದ್ದಳು. ಹಲವಾರು ಬಾರಿ ಪ್ರಚೋದಿಸಿದಳು. ನಮ್ಮ ಸಮವಸ್ತ್ರವನ್ನೂ (ಯೂನಿಫಾರ್ಮ್) ಹರಿದು ಹಾಕಿದಳು. ಇದರ ನಂತರ ನಾವು ಶಿವಾನಿಯ ತಲೆಯ ಮೇಲೆ ಬಲವಾಗಿ ಹೊಡೆದೆವು. ನಮಗೆ ಈಜಲು ಬರುವುದಿಲ್ಲ. ನಾವು ಈಗ ಹೋಗುತ್ತಿದ್ದೇವೆ” ಎಂದು ಹೇಳುತ್ತಿದ್ದಾನೆ. ಈ ವೇಳೆ ಗೌರವ್ ತನ್ನ ಪೋಷಕರಲ್ಲಿ ಕ್ಷಮೆಯನ್ನೂ ಕೇಳುತ್ತಿರುವುದು ಕೇಳಿಬಂದಿದೆ. ಈ ಆಡಿಯೋ ಗೌರವ್ ನದಿಗೆ ಹಾರುವ ಮೊದಲಿಗಿನದ್ದು ಎಂದು ನಂಬಲಾಗಿದೆ.
ಶಿವಾನಿ ಕುಟುಂಬದಿಂದ ಕ್ರಮ
ಘಟನೆಯ ನಂತರ ಶಿವಾನಿ ಕಾನ್ಪುರದಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದು, ಆಕೆಯ ಸ್ಥಿತಿ ಗಂಭೀರವಾಗಿದೆ. ಈ ಪ್ರಕರಣದಲ್ಲಿ ಶಿವಾನಿಯ ಕುಟುಂಬಸ್ಥರು ಗೌರವ್ ಕುಟುಂಬದವರ ವಿರುದ್ಧ ವರದಕ್ಷಿಣೆ ಹತ್ಯೆ (ಡೌರಿ ಡೆತ್) ಕೇಸ್ ದಾಖಲಿಸಿದ್ದಾರೆ. ಕುಟುಂಬದ 7 ಸದಸ್ಯರ ವಿರುದ್ಧ ಈ ಕೇಸ್ ದಾಖಲಾಗಿದೆ. ಸದ್ಯ ಪೊಲೀಸ್ ತನಿಖೆ ನಡೆಯುತ್ತಿದೆ.
ಡಿಎಸ್ಪಿ ಸೌರಭ್ ಸಿಂಗ್ ಹೇಳಿಕೆ
ಈ ಪ್ರಕರಣದ ಬಗ್ಗೆ ಡಿಎಸ್ಪಿ (DSP) ಸೌರಭ್ ಸಿಂಗ್ ಮಾತನಾಡಿ, “ಪೊಲೀಸ್ ಇಲಾಖೆಯಲ್ಲಿ ಕೆಲಸ ಮಾಡುತ್ತಿದ್ದ ಗೌರವ್ ಯಾದವ್, ಜನವರಿ 14 ರಂದು ಕೌಟುಂಬಿಕ ಕಲಹದ ಹಿನ್ನೆಲೆಯಲ್ಲಿ ತನ್ನ ಹೆಂಡತಿ ಮತ್ತು ಮಗುವಿನ ಮೇಲೆ ಪ್ರಾಣಾಂತಿಕ ಹಲ್ಲೆ ನಡೆಸಿದ್ದನು. ಮಗು ಮೃತಪಟ್ಟಿದ್ದು, ಹೆಂಡತಿಗೆ ಕಾನ್ಪುರದಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ. ಇಂದು ಕಾನ್‌ ಸ್ಟೇಬಲ್‌ ಶವ ಯಮುನಾ ನದಿಯಲ್ಲಿ ಪತ್ತೆಯಾಗಿದೆ. ಶವವನ್ನು ವಶಕ್ಕೆ ಪಡೆದು ಮರಣೋತ್ತರ ಪರೀಕ್ಷೆಗೆ ಕಳುಹಿಸಲಾಗಿದೆ. ಪ್ರಕರಣದ ತನಿಖೆ ಮುಂದುವರಿದಿದೆ,” ಎಂದು ತಿಳಿಸಿದ್ದಾರೆ.
