ಚೀನಾ ಎಂದರೆ ಗಗನಚುಂಬಿ ಕಟ್ಟಡಗಳು, ಅತ್ಯಾಧುನಿಕ ತಂತ್ರಜ್ಞಾನ ಮತ್ತು ರೊಬೊಟ್ಗಳ ಲೋಕ ಎಂಬುದು ಎಲ್ಲರಿಗೂ ತಿಳಿದಿದೆ. ಆದರೆ, ಅಭಿವೃದ್ಧಿಯ ಹೆಸರಿನಲ್ಲಿ ಇಡೀ ನಗರವೇ ಬದಲಾದರೂ, ಕೆಲವು ಮನೆಗಳು ಮಾತ್ರ ತಮ್ಮ ಜಾಗ ಬಿಟ್ಟು ಅಲುಗಾಡುವುದಿಲ್ಲ. ಇಂತಹ ಮನೆಗಳನ್ನು ಚೀನಾದಲ್ಲಿ ‘ನೈಲ್ ಹೌಸ್’ (Nail House) ಅಥವಾ ‘ಡಿಂಗ್ಜಿಹು’ ಎಂದು ಕರೆಯಲಾಗುತ್ತದೆ. ಅಂದರೆ, ಗೋಡೆಗೆ ಹೊಡೆದ ಮೊಳೆಯಂತೆ ಗಟ್ಟಿಯಾಗಿ ನಿಂತಿರುವ ಮನೆ ಎಂದರ್ಥ.
ಏನಿದು ನೈಲ್ ಹೌಸ್? ಸರ್ಕಾರ ಅಥವಾ ಖಾಸಗಿ ಬಿಲ್ಡರ್ಗಳು ದೊಡ್ಡ ಯೋಜನೆಗಳಿಗಾಗಿ ಜಾಗ ಕೇಳಿದಾಗ, ಕೆಲವು ಮಾಲೀಕರು ನೀಡಲಾಗುವ ಪರಿಹಾರ ಧನಕ್ಕೆ ಒಪ್ಪದೆ ಅಥವಾ ತಮ್ಮ ಭಾವನಾತ್ಮಕ ಸಂಬಂಧದ ಕಾರಣದಿಂದ ಮನೆಯನ್ನು ಮಾರಾಟ ಮಾಡಲು ನಿರಾಕರಿಸುತ್ತಾರೆ. ಅಂತಹ ಸಂದರ್ಭದಲ್ಲಿ ಚೀನಾದ ಎಂಜಿನಿಯರ್ಗಳು ಮನೆಯನ್ನು ಕೆಡವದೆ, ಅದರ ಸುತ್ತಲೇ ರಸ್ತೆ ಅಥವಾ ಸೇತುವೆಗಳನ್ನು ನಿರ್ಮಿಸುತ್ತಾರೆ.
ವೈರಲ್ ವಿಡಿಯೋದಲ್ಲಿ ಏನಿದೆ? ಇತ್ತೀಚೆಗೆ ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ವಿಡಿಯೋವೊಂದರಲ್ಲಿ, ಜನನಿಬಿಡ ಹೆದ್ದಾರಿಯ ನಡುವೆ ಒಂದು ಪುಟ್ಟ ಮನೆ ಇರುವುದನ್ನು ಕಾಣಬಹುದು. ಬೃಹತ್ ಅಪಾರ್ಟ್ಮೆಂಟ್ಗಳು ಮತ್ತು ಪಾರ್ಕಿಂಗ್ ಲಾಟ್ಗಳ ನಡುವೆ ಈ ಮನೆ ವಿಚಿತ್ರವಾಗಿ ಗೋಚರಿಸುತ್ತದೆ. ಮನೆ ಮಾಲೀಕ ಜಾಗ ಬಿಟ್ಟುಕೊಡದ ಕಾರಣ, ಎಂಜಿನಿಯರ್ಗಳು ರಸ್ತೆಯನ್ನು ಆ ಮನೆಯ ಸುತ್ತಲೇ ತಿರುವು ನೀಡಿ ನಿರ್ಮಿಸಿದ್ದಾರೆ!
ಮಾಲೀಕನ ಪಶ್ಚಾತ್ತಾಪ: ಜಿಯಾಂಗ್ಸಿಯ ಅಂತಹದ್ದೇ ಒಂದು ‘ನೈಲ್ ಹೌಸ್’ ಮಾಲೀಕ ಯೇ ಯುಶೌ ಎಂಬುವವರು ಈಗ ತಮ್ಮ ನಿರ್ಧಾರಕ್ಕೆ ಪಶ್ಚಾತ್ತಾಪ ಪಡುತ್ತಿದ್ದಾರೆ. 2022ರಲ್ಲಿ ಸರ್ಕಾರ ಅವರಿಗೆ ಸುಮಾರು 1.9 ಕೋಟಿ ರೂಪಾಯಿ ಪರಿಹಾರ ಮತ್ತು ಎರಡು ಪರ್ಯಾಯ ಜಾಗಗಳನ್ನು ನೀಡುವುದಾಗಿ ಹೇಳಿತ್ತು. ಆದರೆ ಅವರು ಹೆಚ್ಚಿನ ಹಣಕ್ಕಾಗಿ ಹಠ ಹಿಡಿದು ಒಪ್ಪಿರಲಿಲ್ಲ. ಇಂದು ಅವರ ಮನೆಯ ಸುತ್ತ ನಾಲ್ಕು ಪಥಗಳ ಹೆದ್ದಾರಿ ನಿರ್ಮಾಣವಾಗಿದೆ. ಧೂಳು, ವಾಹನಗಳ ಶಬ್ದ ಮತ್ತು ಅಪಾಯಕಾರಿ ಸ್ಥಿತಿಯ ನಡುವೆ ವಾಸಿಸುವುದು ಅವರಿಗೆ ನರಕದಂತಾಗಿದೆ.
ಸೋಷಿಯಲ್ ಮೀಡಿಯಾ ಪ್ರತಿಕ್ರಿಯೆ: ಈ ವಿಡಿಯೋ ಕಂಡು ನೆಟ್ಟಿಗರು ಮಿಶ್ರ ಪ್ರತಿಕ್ರಿಯೆ ನೀಡುತ್ತಿದ್ದಾರೆ. “ಇದು ನಿಜವಾದ ಸ್ವಾತಂತ್ರ್ಯ, ಮಾಲೀಕನ ಹಕ್ಕನ್ನು ಗೌರವಿಸಲಾಗಿದೆ” ಎಂದು ಕೆಲವರು ಮೆಚ್ಚುಗೆ ವ್ಯಕ್ತಪಡಿಸಿದರೆ, “ಅಭಿವೃದ್ಧಿಯ ನಡುವೆ ಇಂತಹ ಹಠಮಾರಿತನ ಆ ಮನೆ ಮಾಲೀಕನಿಗೇ ಮುಳುವಾಗುತ್ತದೆ” ಎಂದು ಇನ್ನು ಕೆಲವರು ಅಭಿಪ್ರಾಯಪಟ್ಟಿದ್ದಾರೆ.
