ಕಳೆದ ಕೆಲವು ದಶಕಗಳಲ್ಲಿ ತಂತ್ರಜ್ಞಾನ ವೇಗವಾಗಿ ಮುಂದುವರೆದಿದ್ದು, ಅದರ ಫಲವಾಗಿ ಚೀನಾ ಈಗ ದಶಕಗಳವರೆಗೆ ಕೆಲಸ ಮಾಡುವ ಸಾಮರ್ಥ್ಯವಿರುವ ನಾಣ್ಯದ ಗಾತ್ರದ, ಪರಿಸರ ಸ್ನೇಹಿ ನ್ಯೂಕ್ಲಿಯರ್ ಬ್ಯಾಟರಿಯನ್ನು ಅಭಿವೃದ್ಧಿಪಡಿಸಿದೆ. ಇದು ಚೀನಾಕ್ಕೆ ಒಂದು ಪ್ರಮುಖ ತಾಂತ್ರಿಕ ಮೈಲಿಗಲ್ಲಾಗಿದೆ.
ಪೀಕಿಂಗ್ನ ಬೆಟಾವೋಲ್ಟ್ ನ್ಯೂ ಎನರ್ಜಿ ಟೆಕ್ನಾಲಜಿ (Beijing Betavolt New Energy Technology) ಕಂಪನಿಯು ಈ ಬ್ಯಾಟರಿಯನ್ನು ಅಭಿವೃದ್ಧಿಪಡಿಸಿದ್ದು, ಇದಕ್ಕೆ BV100 ಎಂದು ಹೆಸರಿಡಲಾಗಿದೆ. ಇದರ ಅತ್ಯಂತ ಗಮನಾರ್ಹ ವೈಶಿಷ್ಟ್ಯವೆಂದರೆ, ಇದನ್ನು 50 ವರ್ಷಗಳವರೆಗೆ ರೀಚಾರ್ಜ್ ಮಾಡುವ ಅಗತ್ಯವಿಲ್ಲದೆ ಕಾರ್ಯನಿರ್ವಹಿಸಬಲ್ಲದು.
BV100 ಹೇಗೆ ಕೆಲಸ ಮಾಡುತ್ತದೆ?
BV100 ಬ್ಯಾಟರಿಯು ‘ನಿಕ್ಕಲ್-63’ (Nickel-63) ಎಂಬ ವಿಕಿರಣಶೀಲ ವಸ್ತುವನ್ನು ಬಳಸುತ್ತದೆ. ಈ ವಸ್ತುವಿನ ಕಣಗಳು ಕಾಲಾನಂತರದಲ್ಲಿ ತಾಮ್ರವಾಗಿ ನಿಧಾನವಾಗಿ ಕೊಳೆಯುತ್ತವೆ. ಈ ಪ್ರಕ್ರಿಯೆಯಲ್ಲಿ ಬಿಡುಗಡೆಯಾಗುವ ‘ಬೀಟಾ ಕಣಗಳನ್ನು’ ಚೀನಾದ ನಾಲ್ಕನೇ ತಲೆಮಾರಿನ ವಜ್ರ ಸೆಮಿಕಂಡಕ್ಟರ್ ತಂತ್ರಜ್ಞಾನವನ್ನು ಬಳಸಿ ವಿದ್ಯುತ್ ಆಗಿ ಪರಿವರ್ತಿಸಲಾಗುತ್ತದೆ.
- ಶಕ್ತಿ: ಪ್ರಸ್ತುತ, ಈ ಬ್ಯಾಟರಿ 3 ವೋಲ್ಟ್ಗಳಲ್ಲಿ ಸುಮಾರು 100 ಮೈಕ್ರೋವ್ಯಾಟ್ಗಳಷ್ಟು ವಿದ್ಯುತ್ ಅನ್ನು ಒದಗಿಸುತ್ತದೆ, ಇದು ಸಣ್ಣ ಎಲೆಕ್ಟ್ರಾನಿಕ್ ಸಾಧನಗಳನ್ನು ನಿರ್ವಹಿಸಲು ಸಾಕು.
- ಮುಂದಿನ ಯೋಜನೆ: ಕಂಪನಿಯು ಶೀಘ್ರದಲ್ಲೇ 1-ವ್ಯಾಟ್ ಸಾಮರ್ಥ್ಯದ ಹೆಚ್ಚು ಶಕ್ತಿಶಾಲಿ ಆವೃತ್ತಿಯನ್ನು ಬಿಡುಗಡೆ ಮಾಡುವ ಯೋಜನೆಗಳನ್ನು ಘೋಷಿಸಿದೆ.
- ಸೂಚನೆ: ಸದ್ಯಕ್ಕೆ ಈ ಬ್ಯಾಟರಿ ಕಡಿಮೆ ಪ್ರಮಾಣದ ಶಕ್ತಿಯನ್ನು ಉತ್ಪಾದಿಸುವುದರಿಂದ ಸ್ಮಾರ್ಟ್ಫೋನ್ಗಳು ಅಥವಾ ಕ್ಯಾಮೆರಾಗಳಂತಹ ಸಾಧನಗಳನ್ನು ಚಾರ್ಜ್ ಮಾಡಲು ಸಾಧ್ಯವಿಲ್ಲ.
ಲಿಥಿಯಂ ಬ್ಯಾಟರಿಗಳಿಗಿಂತ ಹೇಗೆ ಭಿನ್ನ?
ಸಾಂಪ್ರದಾಯಿಕ ಲಿಥಿಯಂ ಬ್ಯಾಟರಿಗಳಿಗೆ ಹೋಲಿಸಿದರೆ, BV100 ಹಲವಾರು ಪ್ರಯೋಜನಗಳನ್ನು ನೀಡುತ್ತದೆ:
- ಶೇಖರಣೆ: ಇದು ಲಿಥಿಯಂ ಬ್ಯಾಟರಿಗಳಿಗಿಂತ ಸುಮಾರು 100 ಪಟ್ಟು ಹೆಚ್ಚು ಶಕ್ತಿಯನ್ನು ಸಂಗ್ರಹಿಸಬಲ್ಲದು.
- ತಾಪಮಾನ: ಇದನ್ನು -60°C ನಿಂದ 120°C ವರೆಗಿನ ವಿಪರೀತ ತಾಪಮಾನದಲ್ಲಿಯೂ ನಿರ್ವಹಿಸಬಹುದು.
- ಸುರಕ್ಷತೆ: ಬೆಂಕಿ ಅಥವಾ ಸ್ಫೋಟದ ಅಪಾಯವಿಲ್ಲ.
- ಪರಿಸರ ಸ್ನೇಹಿ: ಲಿಥಿಯಂ ಬ್ಯಾಟರಿಗಳಂತೆ ಮರುಬಳಕೆಯ ಅಗತ್ಯವಿಲ್ಲ; ಇದು ನೈಸರ್ಗಿಕವಾಗಿ ತಾಮ್ರವಾಗಿ ಪರಿವರ್ತನೆಗೊಳ್ಳುತ್ತದೆ.
- ದೀರ್ಘಕಾಲದ ಬಾಳಿಕೆ: ಇದು ಯಾವುದೇ ನಿರ್ವಹಣೆ (Maintenance) ಇಲ್ಲದೆ ದೀರ್ಘಾವಧಿಯ ಬಳಕೆಗೆ ವಿನ್ಯಾಸಗೊಳಿಸಲಾಗಿದೆ.
ನ್ಯೂಕ್ಲಿಯರ್ ಬ್ಯಾಟರಿಯ ಬಳಕೆ ಎಲ್ಲಿ?
ಈ ತಂತ್ರಜ್ಞಾನದ ಸಂಭಾವ್ಯ ಬಳಕೆಗಳು ಅತ್ಯಂತ ವಿಸ್ತಾರವಾಗಿವೆ ಎಂದು ಬೆಟಾವೋಲ್ಟ್ ಕಂಪನಿ ಹೇಳಿದೆ:
- ವೈದ್ಯಕೀಯ: ಪೇಸ್ಮೇಕರ್ಗಳು ಮತ್ತು ಕೃತಕ ಹೃದಯಗಳಂತಹ ವೈದ್ಯಕೀಯ ಸಾಧನಗಳಿಗೆ ಜೀವಿತಾವಧಿಯವರೆಗೆ ವಿದ್ಯುತ್ ಒದಗಿಸಬಹುದು, ಅವುಗಳನ್ನು ಬದಲಾಯಿಸುವ ಅಗತ್ಯವಿಲ್ಲ.
- ವಾಯುಯಾನ: ದಶಕಗಳವರೆಗೆ ನಿರಂತರವಾಗಿ ಕಾರ್ಯನಿರ್ವಹಿಸಬೇಕಾದ ಬಾಹ್ಯಾಕಾಶ ಯೋಜನೆಗಳು, ಉಪಗ್ರಹಗಳು ಮತ್ತು ವಾಯುಯಾನ ವ್ಯವಸ್ಥೆಗಳಿಗೆ ಇದು ಸೂಕ್ತವಾಗಿದೆ.
- ಇತರೆ: ಈ ತಂತ್ರಜ್ಞಾನವು ಡ್ರೋನ್ಗಳು ಸೇರಿದಂತೆ ಹಲವು ಸಾಧನಗಳು ನಿಯಮಿತ ಚಾರ್ಜಿಂಗ್ ಇಲ್ಲದೆ ದೀರ್ಘಕಾಲ ಹಾರಲು ಅಥವಾ ಕೆಲಸ ಮಾಡಲು ಅನುವು ಮಾಡಿಕೊಡುತ್ತದೆ.
