ಭಾರತದಲ್ಲಿ ಬುಲೆಟ್ ರೈಲು ಜಾಲದ ವಿಸ್ತರಣೆಯು ವೇಗವನ್ನು ಪಡೆದುಕೊಳ್ಳುತ್ತಿದೆ. 2026-27ನೇ ಸಾಲಿನ ಕೇಂದ್ರ ಬಜೆಟ್‌ನಲ್ಲಿ ಹೊಸ ಹೊಸ ಮಾರ್ಗವನ್ನು ಘೋಷಣೆ ಮಾಡಲಾಗಿದೆ. ಇವುಗಳಲ್ಲಿ ಒಂದು 744 ಕಿ.ಮೀ.ಉದ್ದದ ಚೆನ್ನೈ-ಹೈದರಾಬಾದ್ ಬುಲೆಟ್ ರೈಲು ಕಾರಿಡಾರ್.
ಈ ರೈಲು ಯೋಜನೆ ದಕ್ಷಿಣ ಭಾರತದ ದೀರ್ಘ ಪ್ರಯಾಣದ ಸ್ವರೂಪವನ್ನೇ ಬದಲಿಸಲಿದೆ ಎಂದು ಅಂದಾಜಿಸಲಾಗಿದೆ. ಪ್ರಸ್ತುತ ಈ ಎರಡು ಪ್ರಮುಖ ಮೆಟ್ರೋ ನಗರಗಳ ನಡುವಿನ 10-12 ಗಂಟೆಗಳ ರೈಲು ಪ್ರಯಾಣವನ್ನು ಈ ಕಾರಿಡಾರ್ ಕೇವಲ 2 ರಿಂದ 2.5 ಗಂಟೆಗಳಿಗೆ ಕಡಿತಗೊಳಿಸಲಿದೆ.
ಈ ಬುಲೆಟ್ ರೈಲು ಗಂಟೆಗೆ 320-350 ಕಿ.ಮೀ. ವೇಗದಲ್ಲಿ ಸಾಗುವಂತೆ ವಿನ್ಯಾಸ ಮಾಡಲಾಗುತ್ತದೆ. ಮಹತ್ವಾಕಾಂಕ್ಷೆಯ ಯೋಜನೆಯು ಕೇವಲ ವೇಗದ ಅಂತರ್-ನಗರ ಸಂಚಾರವನ್ನು ಮಾತ್ರವಲ್ಲದೆ, ತಮಿಳುನಾಡು, ಆಂಧ್ರಪ್ರದೇಶ ಮತ್ತು ತೆಲಂಗಾಣ ರಾಜ್ಯಗಳ ನಡುವಿನ ಆರ್ಥಿಕ ಸಂಬಂಧಗಳನ್ನು ಬಲಪಡಿಸುವ ಮೂಲಕ ದಕ್ಷಿಣ ಭಾರತದ ಅಭಿವೃದ್ಧಿಗೆ ಕೊಡುಗೆ ನೀಡಲಿದೆ.
ಮಾರ್ಗದ ವಿವರ: ಈ ಉದ್ದೇಶಿತ ಮಾರ್ಗ ಹೈದರಾಬಾದ್, ಶಂಶಾಬಾದ್, ನಾರ್ಕೆಟ್‌ಪಲ್ಲಿ, ಸೂರ್ಯಪೇಟೆ, ಅಮರಾವತಿ, ಗುಂಟೂರು, ಒಂಗೋಲ್, ನೆಲ್ಲೂರು, ತಿರುಪತಿ ಮತ್ತು ಚೆನ್ನೈ ಸೇರಿದಂತೆ ಹಲವಾರು ಪ್ರಮುಖ ನಗರ ಮತ್ತು ಆರ್ಥಿಕ ಕೇಂದ್ರಗಳನ್ನು ಸಂಪರ್ಕಿಸಲಿದೆ.
ಈ ಕೇಂದ್ರಗಳನ್ನು ಜೋಡಿಸುವುದರಿಂದ ಪ್ರವಾಸೋದ್ಯಮಕ್ಕೆ ಉತ್ತೇಜನ ಸಿಗುವ ಜೊತೆಗೆ ಲಾಜಿಸ್ಟಿಕ್ಸ್, ಸಮಗ್ರ ನಗರಾಭಿವೃದ್ಧಿಗೆ ಬೆಂಬಲ ಸಿಗಲಿದೆ. ಈ ಕಾರಿಡಾರ್‌ನಲ್ಲಿ ಬರುವ ನಿಲ್ದಾಣಗಳು ಆಧುನಿಕ ಪ್ರಯಾಣಿಕ ಸೌಲಭ್ಯಗಳನ್ನು ಹೊಂದಿರಲಿವೆ ಮತ್ತು ಇವುಗಳು ಟ್ರಾನ್ಸಿಟ್-ಓರಿಯಂಟೆಡ್ ಡೆವಲಪ್‌ಮೆಂಟ್ (TOD) ತತ್ವಗಳನ್ನು ಒಳಗೊಂಡಿರುತ್ತವೆ.
ಕಾರಿಡಾರ್ ಚೆನ್ನೈನ ಉತ್ಪಾದನಾ ಮತ್ತು ಬಂದರು ಆಧಾರಿತ ಕೈಗಾರಿಕೆಗಳು, ಹೈದರಾಬಾದ್‌ನ ಐಟಿ ಮತ್ತು ಫಾರ್ಮಾಸ್ಯುಟಿಕಲ್ ಶಕ್ತಿ, ಹಾಗೂ ಅಮರಾವತಿ ಮತ್ತು ಗುಂಟೂರಿನ ಆಡಳಿತಾತ್ಮಕ-ಆರ್ಥಿಕ ಕೇಂದ್ರಗಳನ್ನು ಸಂಪರ್ಕಿಸುವ ಮೂಲಕ ದಕ್ಷಿಣ ಭಾರತದ ಆರ್ಥಿಕತೆಯನ್ನು ರೂಪಿಸುವಲ್ಲಿ ನಿರ್ಣಾಯಕ ಪಾತ್ರ ವಹಿಸಲಿದೆ ಎಂದು ತಜ್ಞರು ಅಭಿಪ್ರಾಯಪಟ್ಟಿದ್ದಾರೆ.
ಅರ್ಬನ್ ಇನ್ಫ್ರಾ ಗ್ರೂಪ್‌ನ ಎಂಡಿ ಮತ್ತು ಸಿಇಒ ಮಮತಾ ಶಾ ಪ್ರಕಾರ, ಬುಲೆಟ್ ರೈಲನ್ನು ಮಲ್ಟಿ-ಮೋಡಲ್ ಸಾರಿಗೆ ವ್ಯವಸ್ಥೆಗಳೊಂದಿಗೆ ಸಂಯೋಜಿಸುವುದರಿಂದ ಆರ್ಥಿಕ ಪ್ರಯೋಜನಗಳು ಹೆಚ್ಚಾಗಲಿವೆ ಮತ್ತು ಸುಸ್ಥಿರ ಪ್ರಾದೇಶಿಕ ಬೆಳವಣಿಗೆಗೆ ಬೆಂಬಲ ಸಿಗಲಿದೆ.
ಈ ಯೋಜನೆಯು ಮುಂಬೈ-ಅಹಮದಾಬಾದ್ ಹೈ-ಸ್ಪೀಡ್ ರೈಲು ವ್ಯವಸ್ಥೆಯಂತೆಯೇ ಜಪಾನಿನ ಶಿಂಕನ್ಸೆನ್ ಶೈಲಿಯ ತಂತ್ರಜ್ಞಾನವನ್ನು ಅಳವಡಿಸಿಕೊಳ್ಳಲಿದೆ. ಇದು ಪ್ರತ್ಯೇಕ ಹಳಿಗಳು, ಸುಧಾರಿತ ಸಿಗ್ನಲಿಂಗ್, ಗ್ರೇಡ್-ಬೇರ್ಪಡಿಸಿದ ಜೋಡಣೆಗಳು ಮತ್ತು ಅತ್ಯಾಧುನಿಕ ಸುರಕ್ಷತಾ ವ್ಯವಸ್ಥೆಗಳನ್ನು ಹೊಂದಿರಲಿದೆ. ಈ ವೈಶಿಷ್ಟ್ಯಗಳು ತಡೆರಹಿತ ಕಾರ್ಯಾಚರಣೆ ಮತ್ತು ವಿಶ್ವದರ್ಜೆಯ ಪ್ರಯಾಣಿಕರ ಅನುಭವವನ್ನು ಖಚಿತಪಡಿಸುತ್ತವೆ.
ಪ್ರಾಥಮಿಕ ಹಂತದ ಕೆಲಸಗಳು ಈಗಾಗಲೇ ನಡೆಯುತ್ತಿವೆ. ಕಾರ್ಯಸಾಧ್ಯತೆಯ ಅಧ್ಯಯನಗಳು, ಅಲೈನ್‌ಮೆಂಟ್ ಸಮೀಕ್ಷೆಗಳು ಮತ್ತು ವಿವರವಾದ ಯೋಜನಾ ವರದಿಯನ್ನು ಪೂರ್ಣಗೊಳಿಸಿ ಮುಂದಿನ ಅನುಮೋದನೆಗಾಗಿ ಆಯಾ ರಾಜ್ಯ ಸರ್ಕಾರಗಳಿಗೆ ಸಲ್ಲಿಸಲಾಗಿದೆ.
ಒಮ್ಮೆ ಕಾರ್ಯಾಚರಣೆ ಆರಂಭಗೊಂಡರೆ, ಚೆನ್ನೈ-ಹೈದರಾಬಾದ್ ಬುಲೆಟ್ ರೈಲು ಕಾರಿಡಾರ್ ಆರ್ಥಿಕ ಏಕೀಕರಣವನ್ನು ವೇಗಗೊಳಿಸುವ ಮತ್ತು ದಕ್ಷಿಣ ಭಾರತದ ಲಕ್ಷಾಂತರ ಪ್ರಯಾಣಿಕರಿಗೆ ವೇಗದ, ಸುರಕ್ಷಿತ ಮತ್ತು ದಕ್ಷ ಸಂಚಾರದ ಆಯ್ಕೆಯನ್ನು ನೀಡಲಿದೆ.
