ತಂದೆ ಮತ್ತು ಮಗಳ ನಡುವಿನ ಬಂಧದ ಬಗ್ಗೆ ಎಷ್ಟು ಹೇಳಿದರೂ ಕಡಿಮೆಯೇ. ತಂದೆಗೆ ತನ್ನ ಮಗಳು ಒಬ್ಬ ವಿಶೇಷ ವ್ಯಕ್ತಿಯಾದರೆ, ಮಗಳಿಗೆ ತಂದೆಯೇ ಮೊದಲ ಹಿರೋ. ಮಗಳಿಗೆ ಯಾವುದೇ ಸಣ್ಣ ಸಮಸ್ಯೆ ಎದುರಾದರೂ, ತಂದೆ ತನ್ನ ಸರ್ವಶಕ್ತಿಯಿಂದ ಅವಳನ್ನು ರಕ್ಷಿಸಲು ಸಿದ್ಧನಿರುತ್ತಾನೆ. ತಂದೆ ತನ್ನ ಮಗಳನ್ನು ಅಪಾರವಾಗಿ ಪ್ರೀತಿಸುತ್ತಾನೆ. ಆದರೆ, ಮಗಳ ವಿಷಯದಲ್ಲಿ ತಂದೆ ಹೇಗಿರಬೇಕು ಎಂಬುದನ್ನು ಆಚಾರ್ಯ ಚಾಣಕ್ಯರು ವಿವರವಾಗಿ ತಿಳಿಸಿದ್ದಾರೆ.
ಆಚಾರ್ಯ ಚಾಣಕ್ಯರು ಕೇವಲ ಒಬ್ಬ ಶ್ರೇಷ್ಠ ರಾಜತಾಂತ್ರಿಕ ಮಾತ್ರವಲ್ಲ, ಮನುಷ್ಯನ ಜೀವನದ ಪ್ರತಿಯೊಂದು ಮಗ್ಗುಲನ್ನು ಆಳವಾಗಿ ಪರಿಶೀಲಿಸಿದ ತತ್ವಜ್ಞಾನಿಯೂ ಹೌದು. ಹಾಗಾಗಿಯೇ ಅವರು ರಚಿಸಿದ ‘ಚಾಣಕ್ಯ ನೀತಿ’ ಇಂದಿಗೂ ಜನರ ಜೀವನಕ್ಕೆ ದಾರಿದೀಪವಾಗಿದೆ. ಕೌಟುಂಬಿಕ ಸಂಬಂಧಗಳ ವಿಷಯದಲ್ಲಿ, ಅದರಲ್ಲೂ ವಿಶೇಷವಾಗಿ ತಂದೆ-ಮಗಳ ಬಂಧದ ಬಗ್ಗೆ ಅವರು ನೀಡಿರುವ ವಿಚಾರಗಳು ಬಹಳ ಮುಖ್ಯವಾದವು. ಈ ಬಂಧವು ಕೇವಲ ಪವಿತ್ರವಾದುದು ಮಾತ್ರವಲ್ಲದೆ ಅತ್ಯಂತ ಬಲವಾದುದು ಎಂದು ಚಾಣಕ್ಯರು ನಂಬಿದ್ದರು. ಆದರೆ ಈ ಅನುಬಂಧವು ಜೀವನಪೂರ್ತಿ ಮಧುರವಾಗಿರಬೇಕೆಂದರೆ ತಂದೆಯು ಕೆಲವು ವಿಷಯಗಳಲ್ಲಿ ಜಾಗರೂಕರಾಗಿರಬೇಕು ಎಂದು ಅವರು ಸೂಚಿಸಿದ್ದಾರೆ.
1) ಮಗಳ ನಿರ್ಧಾರಗಳಲ್ಲಿ ಅತಿಯಾದ ಹಸ್ತಕ್ಷೇಪ ಬೇಡ
ಪ್ರತಿಯೊಬ್ಬ ವ್ಯಕ್ತಿಗೂ ತನ್ನ ಜೀವನದ ಬಗ್ಗೆ ನಿರ್ಧಾರ ತೆಗೆದುಕೊಳ್ಳುವ ಹಕ್ಕಿರಬೇಕು. ಅದೇ ರೀತಿ ಮಗಳಿಗೂ ತನ್ನ ಅಭಿಪ್ರಾಯಗಳನ್ನು ವ್ಯಕ್ತಪಡಿಸಲು ಮತ್ತು ನಿರ್ಧಾರಗಳನ್ನು ತೆಗೆದುಕೊಳ್ಳಲು ಸ್ವಾತಂತ್ರ್ಯ ನೀಡಬೇಕು. ವೃತ್ತಿಜೀವನ (Career) ಮತ್ತು ವಿವಾಹದಂತಹ ಪ್ರಮುಖ ವಿಷಯಗಳಲ್ಲಿ ತಂದೆಯು ಮಾರ್ಗದರ್ಶನ ನೀಡಬೇಕೇ ಹೊರತು ಅವಳ ಸ್ವತಂತ್ರಕ್ಕೆ ಅಡ್ಡಿಯಾಗಬಾರದು. ಸರಿಯಾದದ್ದು ಮತ್ತು ತಪ್ಪು ಯಾವುದು ಎಂದು ವಿವರಿಸಿ, ಆಯ್ಕೆ ಮಾಡುವ ಅವಕಾಶವನ್ನು ನೀಡುವುದು ಒಬ್ಬ ಬುದ್ಧಿವಂತ ತಂದೆಯ ಲಕ್ಷಣ.
2) ಮಗ ಮತ್ತು ಮಗಳ ನಡುವೆ ತಾರತಮ್ಯ ಮಾಡಬೇಡಿ
ಚಾಣಕ್ಯ ನೀತಿಯ ಪ್ರಕಾರ ಮಕ್ಕಳ ನಡುವೆ ತಾರತಮ್ಯ ಮಾಡುವುದು ತಪ್ಪು. ಮಗನಿಗೇ ಹೆಚ್ಚು ಪ್ರಾಧಾನ್ಯತೆ ನೀಡಿ, ಮಗಳನ್ನು ನಿರ್ಲಕ್ಷಿಸಿದರೆ ಅವಳ ಮನಸ್ಸಿನಲ್ಲಿ ಕೀಳರಿಮೆ ಮೂಡುತ್ತದೆ. ಆದ್ದರಿಂದ ಇಬ್ಬರಿಗೂ ಸಮಾನವಾದ ಪ್ರೀತಿ, ಗೌರವ ಮತ್ತು ಅವಕಾಶಗಳನ್ನು ನೀಡಬೇಕು. ಆಗ ಮಾತ್ರ ಮಗಳು ಕೂಡ ಒಬ್ಬ ಸಮರ್ಥ ವ್ಯಕ್ತಿಯಾಗಿ ಬೆಳೆಯಲು ಸಾಧ್ಯವಾಗುತ್ತದೆ.
3) ಮಗಳ ಸುರಕ್ಷತೆಗೆ ಆದ್ಯತೆ ನೀಡಿ
ಕುಟುಂಬದ ಸುರಕ್ಷತೆ, ಅದರಲ್ಲೂ ವಿಶೇಷವಾಗಿ ಮಹಿಳೆಯರ ಸುರಕ್ಷತೆಯು ತಂದೆಯ ಪ್ರಮುಖ ಜವಾಬ್ದಾರಿ ಎಂದು ಚಾಣಕ್ಯರು ಹೇಳಿದ್ದಾರೆ. ಮನೆಯ ಒಳಗೂ ಮತ್ತು ಹೊರಗೂ ಮಗಳಿಗೆ ಸುರಕ್ಷಿತ ವಾತಾವರಣವನ್ನು ಕಲ್ಪಿಸಿಕೊಡಬೇಕು. ಅವಳಿಗೆ ಆತ್ಮರಕ್ಷಣೆಯ ಕಲೆಗಳನ್ನು ಕಲಿಸುವುದರ ಜೊತೆಗೆ, ಅವಳ ಜೀವನಶೈಲಿಯ ಬಗ್ಗೆ ಅರಿವು ಹೊಂದಿರಬೇಕು. ಸುರಕ್ಷತೆಯೊಂದಿಗೆ ಅವಳು ಸ್ವತಂತ್ರವಾಗಿ ಬೆಳೆಯಲು ಸಹಕರಿಸುವುದು ಮುಖ್ಯ.
4) ಶಿಕ್ಷಣದ ವಿಷಯದಲ್ಲಿ ನಿರ್ಲಕ್ಷ್ಯ ಬೇಡ
ಶಿಕ್ಷಣವನ್ನು ಜೀವನದ ಮೂಲಸ್ತಂಭ ಎಂದು ಭಾವಿಸಿದ ಚಾಣಕ್ಯರು, ಮಗಳ ಶಿಕ್ಷಣದ ಮೇಲೆಯೂ ಸಮಾನ ಗಮನ ಹರಿಸುವುದು ಅತ್ಯಗತ್ಯ ಎಂದು ಹೇಳಿದ್ದಾರೆ. ಸುಶಿಕ್ಷಿತ ಮಹಿಳೆಯು ಒಂದು ಕುಟುಂಬಕ್ಕೆ ಮತ್ತು ಸಮಾಜಕ್ಕೆ ಸರಿಯಾದ ದಿಕ್ಸೂಚಿಯಾಗಬಲ್ಲಳು. ಆದ್ದರಿಂದ ಅವಳ ಆಸಕ್ತಿಗಳನ್ನು ಗುರುತಿಸಿ, ಅಭಿವೃದ್ಧಿ ಹೊಂದಲು ಸೂಕ್ತ ಅವಕಾಶಗಳನ್ನು ಕಲ್ಪಿಸಿಕೊಡಬೇಕು.
5) ಭಾವನಾತ್ಮಕ ಬೆಂಬಲದ ಅವಶ್ಯಕತೆ
ಆರ್ಥಿಕ ಮತ್ತು ದೈಹಿಕ ಸುರಕ್ಷತೆಯ ಜೊತೆಗೆ ಭಾವನಾತ್ಮಕ ಬೆಂಬಲವೂ ಮಗಳಿಗೆ ಬಹಳ ಮುಖ್ಯ. ಅವಳ ಭಾವನೆಗಳನ್ನು ಗೌರವಿಸುವುದು ಮತ್ತು ಅವಳ ಮಾತುಗಳನ್ನು ಆಲಿಸುವುದು ತಂದೆಯ ಜವಾಬ್ದಾರಿ. ಕಷ್ಟದ ಸಮಯದಲ್ಲಿ ತಂದೆ ತನ್ನ ಜೊತೆಗಿದ್ದಾನೆ ಎನ್ನುವ ನಂಬಿಕೆ ಮಗಳಿಗೆ ಬಂದರೆ, ಅವಳು ಯಾವುದೇ ಸವಾಲನ್ನು ಧೈರ್ಯವಾಗಿ ಎದುರಿಸುತ್ತಾಳೆ.
ಈ ರೀತಿಯಾಗಿ ಚಾಣಕ್ಯ ನೀತಿಯ ಪ್ರಕಾರ, ತಂದೆಯು ತನ್ನ ಮಗಳೊಂದಿಗೆ ಸಹಾನುಭೂತಿ, ಸಮಾನತೆ ಮತ್ತು ಸರಿಯಾದ ಮಾರ್ಗದರ್ಶನವನ್ನು ಹೊಂದಿರುವ ಸಂಬಂಧವನ್ನು ಬೆಳೆಸಿಕೊಂಡರೆ, ಆ ಬಂಧವು ಜೀವನಪೂರ್ತಿ ಸಂತೋಷಕರವಾಗಿರುತ್ತದೆ.
