ಭಾರತದಾದ್ಯಂತ ಚೈತ್ರ ನವರಾತ್ರಿಯ ಸಡಗರ ಮನೆಮಾಡಿದೆ. ಮಾರ್ಚ್ 19ರಿಂದ ಆರಂಭವಾಗಿರುವ ಈ ಒಂಬತ್ತು ದಿನಗಳ ಸಂಭ್ರಮವು ಮಾರ್ಚ್ 27ರಂದು ರಾಮನವಮಿಯೊಂದಿಗೆ ಮುಕ್ತಾಯಗೊಳ್ಳಲಿದೆ. ದೇವಿಯ ಆರಾಧನೆಯ ಈ ಪವಿತ್ರ ದಿನಗಳಲ್ಲಿ ಅನೇಕ ಭಕ್ತರು ಉಪವಾಸ ವ್ರತವನ್ನು ಆಚರಿಸುತ್ತಾರೆ. ಉಪವಾಸದ ಸಮಯದಲ್ಲಿ ಸಾತ್ವಿಕ ಆಹಾರ ಪದ್ಧತಿಯನ್ನು ಅನುಸರಿಸುವುದು ಭಾರತೀಯ ಪರಂಪರೆ.
ನವರಾತ್ರಿ ಉಪವಾಸದ ಸಂದರ್ಭದಲ್ಲಿ ಧಾನ್ಯಗಳು, ಬೇಳೆಕಾಳುಗಳು, ಈರುಳ್ಳಿ ಮತ್ತು ಬೆಳ್ಳುಳ್ಳಿಯನ್ನು ಬಳಸುವಂತಿಲ್ಲ. ಕೇವಲ ಸಾತ್ವಿಕ ಆಹಾರಗಳನ್ನು ಮಾತ್ರ ಸೇವಿಸಬೇಕಾಗುತ್ತದೆ. ಸಾಮಾನ್ಯವಾಗಿ ಉಪವಾಸವೆಂದರೆ ಕೇವಲ ಹಣ್ಣುಗಳು ಅಥವಾ ಸಾಬೂದಾನಕ್ಕೆ ಸೀಮಿತ ಎಂಬ ಭಾವನೆ ಅನೇಕರಲ್ಲಿದೆ. ಆದರೆ ಉಪವಾಸದ ಸಮಯದಲ್ಲಿ ನಿಮ್ಮ ಶಕ್ತಿಯನ್ನು ಕಾಯ್ದುಕೊಳ್ಳಲು ಮತ್ತು ದೇಹಕ್ಕೆ ಪೋಷಕಾಂಶಗಳನ್ನು ಒದಗಿಸಲು ಈ ಕೆಳಗಿನ ಏಳು ತರಕಾರಿಗಳನ್ನು ಧೈರ್ಯವಾಗಿ ಬಳಸಬಹುದು.
ಗೆಡ್ಡೆಗೆಣಸುಗಳ ವರ್ಗಕ್ಕೆ ಸೇರಿದ ಆಲೂಗಡ್ಡೆ ಉಪವಾಸದ ಸಮಯದಲ್ಲಿ ಅತಿ ಹೆಚ್ಚು ಬಳಕೆಯಾಗುವ ತರಕಾರಿ. ಇದು ದೇಹಕ್ಕೆ ತಕ್ಷಣದ ಶಕ್ತಿಯನ್ನು ನೀಡುತ್ತದೆ. ಆಲೂಗಡ್ಡೆ ಪಲ್ಯ, ರಾಯಿತ ಅಥವಾ ಹಲ್ವಾ ಮಾಡಿ ಸೇವಿಸಬಹುದು. ಹಾಗೆಯೇ ಅರಬಿ ಅಥವಾ ಕೆಸುವಿನ ಗೆಡ್ಡೆ ಕೂಡ ಉತ್ತಮ ಆಯ್ಕೆ. ಇದರಲ್ಲಿ ಕಾರ್ಬೋಹೈಡ್ರೇಟ್ ಸಮೃದ್ಧವಾಗಿದ್ದು, ದೀರ್ಘಕಾಲ ಹೊಟ್ಟೆ ತುಂಬಿರುವಂತೆ ಮಾಡುತ್ತದೆ.
ಸಿಹಿಕುಂಬಳಕಾಯಿ ಅಥವಾ ಸೀಗುಂಬಳ ಕೂಡ ನವರಾತ್ರಿಯ ವಿಶೇಷ ತರಕಾರಿ. ಇದನ್ನು ಬೆಲ್ಲ ಮತ್ತು ಸೈಂಧವ ಲವಣ ಬಳಸಿ ಸಿಹಿ ಪಲ್ಯದಂತೆ ತಯಾರಿಸಬಹುದು. ಇದು ಜೀರ್ಣಕ್ರಿಯೆಗೆ ಸುಲಭ ಮತ್ತು ರುಚಿಕರವಾಗಿರುತ್ತದೆ. ಇನ್ನು ದೇಹವನ್ನು ತಂಪಾಗಿರಿಸಲು ಮತ್ತು ಹೈಡ್ರೇಟ್ ಆಗಿರಲು ಸೋರೆಕಾಯಿ ಅತ್ಯುತ್ತಮ. ಸೋರೆಕಾಯಿ ಪಲ್ಯ ಅಥವಾ ಇದರ ಹಲ್ವಾ ಉಪವಾಸದ ಸಮಯದಲ್ಲಿ ದೇಹಕ್ಕೆ ಹಿತ ನೀಡುತ್ತದೆ.
ಬೇಸಿಗೆಯ ಈ ಸಮಯದಲ್ಲಿ ನವರಾತ್ರಿ ಬಂದಿರುವುದರಿಂದ ಸೌತೆಕಾಯಿ ಬಳಕೆಯೂ ಅನಿವಾರ್ಯ. ಸೌತೆಕಾಯಿಯನ್ನು ಸಲಾಡ್ ರೂಪದಲ್ಲಿ ಅಥವಾ ಮೊಸರಿನೊಂದಿಗೆ ರಾಯಿತ ಮಾಡಿ ಸೇವಿಸುವುದರಿಂದ ದೇಹದಲ್ಲಿ ನೀರಿನಂಶ ಕಡಿಮೆಯಾಗದಂತೆ ನೋಡಿಕೊಳ್ಳಬಹುದು. ಸಿಹಿ ಗೆಣಸು ಕೂಡ ಉಪವಾಸದ ಅವಧಿಯಲ್ಲಿ ಅತ್ಯಂತ ಪೌಷ್ಟಿಕ ಆಹಾರವಾಗಿದೆ. ಇದನ್ನು ಬೇಯಿಸಿ ಅಥವಾ ಹುರಿದು ಚಾಟ್ ರೂಪದಲ್ಲಿ ಸೇವಿಸಬಹುದು.
ಕೊನೆಯದಾಗಿ ಬೀಟ್‌ರೂಟ್ ಅಥವಾ ಕೆಂಪು ಗೆಡ್ಡೆಯನ್ನು ಕೂಡ ನಿಮ್ಮ ಆಹಾರ ಪಟ್ಟಿಯಲ್ಲಿ ಸೇರಿಸಿಕೊಳ್ಳಬಹುದು. ಇದು ರಕ್ತಹೀನತೆಯನ್ನು ತಡೆಯಲು ಮತ್ತು ರೋಗನಿರೋಧಕ ಶಕ್ತಿ ಹೆಚ್ಚಿಸಲು ಸಹಕಾರಿ. ಬೀಟ್‌ರೂಟ್ ಜ್ಯೂಸ್ ಅಥವಾ ಪನೀರ್ ಜೊತೆ ಸೇರಿಸಿ ಟಿಕ್ಕಿಗಳನ್ನು ತಯಾರಿಸಿ ಸವಿಯಬಹುದು. ಈ ಸಾತ್ವಿಕ ತರಕಾರಿಗಳು ನಿಮ್ಮ ಉಪವಾಸದ ದಿನಗಳನ್ನು ಕೇವಲ ಭಕ್ತಿಯಿಂದಲ್ಲದೆ, ಆರೋಗ್ಯಪೂರ್ಣವಾಗಿಯೂ ಇರುವಂತೆ ಮಾಡುತ್ತವೆ.
