ದೇಶಾದ್ಯಂತ ಕುತೂಹಲ ಮೂಡಿಸಿರುವ ‘ಜನಗಣತಿ 2027’ ಪ್ರಕ್ರಿಯೆಯಲ್ಲಿ ಮಹತ್ವದ ಹೆಜ್ಜೆ ಇಡಲಾಗಿದೆ. ಜನಸಂಖ್ಯೆ ಗಣತಿ (Population Enumeration)ಯ ಎರಡನೇ ಹಂತದ ಭಾಗವಾಗಿ ಜನರನ್ನು ಕೇಳಲಾಗುವ 40 ಪ್ರಶ್ನೆಗಳ ಸಂಪೂರ್ಣ ಪಟ್ಟಿಯನ್ನು ಕೇಂದ್ರ ಸರ್ಕಾರ ಶುಕ್ರವಾರ ಗೆಜೆಟ್ ಅಧಿಸೂಚನೆ ಮೂಲಕ ಪ್ರಕಟಿಸಿದೆ.
ಈ ಬಾರಿ ಜನಗಣತಿಯಲ್ಲಿ ಭಾರತದ ಇತಿಹಾಸದಲ್ಲೇ ಮೊದಲ ಬಾರಿಗೆ ಸಮಗ್ರ ಜಾತಿ ಗಣತಿ ನಡೆಸಲಾಗುತ್ತಿರುವುದು ವಿಶೇಷ ಮಹತ್ವ ಪಡೆದುಕೊಂಡಿದೆ.
ರಿಜಿಸ್ಟ್ರಾರ್ ಜನರಲ್ ಆದೇಶ.. ಹೊಸ ಪ್ರಶ್ನೆಗಳು
ಕೇಂದ್ರ ರಿಜಿಸ್ಟ್ರಾರ್ ಜನರಲ್ ಮತ್ತು ಜನಗಣತಿ ಆಯುಕ್ತ ಮೃತ್ಯುಂಜಯ್ ಕುಮಾರ್ ನಾರಾಯಣ್ ಈ ಸಂಬಂಧ ಆದೇಶ ಹೊರಡಿಸಿದ್ದಾರೆ. ಜನಗಣತಿ ಕಾಯ್ದೆ 1948ರ ಸೆಕ್ಷನ್ 8(1)ರ ಅಡಿಯಲ್ಲಿ ನೀಡಲಾಗಿರುವ ಅಧಿಕಾರದೊಂದಿಗೆ ಅಧಿಕಾರಿಗಳು ಪ್ರತಿ ಮನೆಗೆ ತೆರಳಿ ಮಾಹಿತಿ ಸಂಗ್ರಹಿಸಲಿದ್ದಾರೆ ಎಂದು ಆದೇಶದಲ್ಲಿ ತಿಳಿಸಲಾಗಿದೆ.
ಈ ಬಾರಿ ಜನಗಣತಿಯಲ್ಲಿ ಹಿಂದೆಂದೂ ಇಲ್ಲದ ರೀತಿಯಲ್ಲಿ ಕೆಲವು ಹೊಸ ಅಂಶಗಳನ್ನು ಸೇರಿಸಲಾಗಿದೆ. ಪರಿಶಿಷ್ಟ ಜಾತಿ (SC), ಪರಿಶಿಷ್ಟ ಪಂಗಡ (ST) ವಿವರಗಳ ಜೊತೆಗೆ ವ್ಯಕ್ತಿಯು ಯಾವ ಜಾತಿಗೆ ಸೇರಿದವರು ಎಂಬುದನ್ನು ನೇರವಾಗಿ ದಾಖಲಿಸುವ ಅವಕಾಶ ಕಲ್ಪಿಸಲಾಗಿದೆ.
ಇದರ ಜೊತೆಗೆ ಡಿಜಿಟಲ್ ಸಾಕ್ಷರತೆ, ಕೋವಿಡ್-19 ಲಸಿಕೆ ಪಡೆದ ಸ್ಥಳ, ಬ್ಯಾಂಕ್ ಖಾತೆಗಳ ಸಂಖ್ಯೆ, ಆಧಾರ್, ಪಾಸ್‌ಪೋರ್ಟ್, ಡ್ರೈವಿಂಗ್ ಲೈಸೆನ್ಸ್ ಲಭ್ಯತೆ ಸೇರಿದಂತೆ ಹಲವು ಮಾಹಿತಿಗಳನ್ನು ಕೂಡ ಈ ಪಟ್ಟಿಯಲ್ಲಿ ಸೇರಿಸಲಾಗಿದೆ.
ಜನಗಣತಿ 2027: ಕೇಳಲಾಗುವ 40 ಪ್ರಶ್ನೆಗಳ ಸಂಪೂರ್ಣ ವಿವರ
ಜನಸಂಖ್ಯೆ ಗಣತಿಯ ಭಾಗವಾಗಿ ಗಣತಿದಾರರು ನಾಗರಿಕರನ್ನು ಕೇಳಲಿರುವ 40 ಪ್ರಶ್ನೆಗಳ ಪಟ್ಟಿ ಇಲ್ಲಿದೆ.
- ವ್ಯಕ್ತಿಯ ಹೆಸರು
- ಕುಟುಂಬದ ಮುಖ್ಯಸ್ಥರೊಂದಿಗೆ ಸಂಬಂಧ
- ಲಿಂಗ
- ಜನ್ಮ ದಿನಾಂಕ ಮತ್ತು ವಯಸ್ಸು
- ಪ್ರಸ್ತುತ ವೈವಾಹಿಕ ಸ್ಥಿತಿ
- ವಿವಾಹವಾದಾಗಿನ ವಯಸ್ಸು
- ಜೀವನ ಸಂಗಾತಿಯ ಹೆಸರು
- ಪೌರತ್ವ (ಸ್ವಯಂ ಘೋಷಣೆಯ ಆಧಾರದ ಮೇಲೆ)
- ಧರ್ಮ
- ಪರಿಶಿಷ್ಟ ಜಾತಿ (SC) / ಪರಿಶಿಷ್ಟ ಪಂಗಡ (ST) / ಜಾತಿ
- ತಂದೆಯ ವಿವರಗಳು
- ತಾಯಿಯ ವಿವರಗಳು
- ಅಂಗವೈಕಲ್ಯದ ವಿವರಗಳು
- ಮಾತೃಭಾಷೆ ಮತ್ತು ತಿಳಿದಿರುವ ಇತರ ಭಾಷೆಗಳು
- ಸಾಕ್ಷರತೆ ಮತ್ತು ಡಿಜಿಟಲ್ ಸಾಕ್ಷರತೆಯ ಸ್ಥಿತಿ
- ಶಿಕ್ಷಣ ಸಂಸ್ಥೆಗೆ ಹಾಜರಾಗುತ್ತಿರುವ ಸ್ಥಿತಿ
- ಗರಿಷ್ಠ ಶೈಕ್ಷಣಿಕ ಅರ್ಹತೆ ಮತ್ತು ಓದಿದ ವಿಷಯಗಳ ವಿಭಾಗಗಳು
- ಕಳೆದ ವರ್ಷ ಕೈಗೊಂಡ ಕೆಲಸ / ಉದ್ಯೋಗ
- ಆರ್ಥಿಕ ಚಟುವಟಿಕೆಯ ವರ್ಗ
- ವೃತ್ತಿ
- ಕೈಗಾರಿಕೆ, ವ್ಯಾಪಾರ ಅಥವಾ ಸೇವೆಯ ಸ್ವರೂಪ
- ಕಾರ್ಮಿಕರ ವರ್ಗ
- ಆರ್ಥಿಕೇತರ ಚಟುವಟಿಕೆಗಳು (ಉದ್ಯೋಗವಿಲ್ಲದವರು, ಅಲ್ಪ ಉದ್ಯೋಗದಲ್ಲಿರುವವರಿಗಾಗಿ)
- ಕೆಲಸ ಹುಡುಕುತ್ತಿದ್ದೀರಾ / ಕೆಲಸ ಮಾಡಲು ಸಿದ್ಧರಿದ್ದೀರಾ?
- ಕೆಲಸದ ಸ್ಥಳಕ್ಕೆ ಪ್ರಯಾಣಿಸುವ ವಿಧಾನ
- ಜನ್ಮಸ್ಥಳ
- ಕೊನೆಯದಾಗಿ ವಾಸವಿದ್ದ ಪ್ರದೇಶ
- ವಲಸೆಗೆ ಕಾರಣ
- ಪ್ರಸ್ತುತ ಗ್ರಾಮ / ಪಟ್ಟಣದಲ್ಲಿ ವಾಸಿಸುತ್ತಿರುವ ಅವಧಿ
- ಶಾಶ್ವತ ನಿವಾಸದ ವಿಳಾಸ
- ಪ್ರಸ್ತುತ ಜೀವಂತವಾಗಿರುವ ಮಕ್ಕಳ ಸಂಖ್ಯೆ (ವಿವಾಹಿತ, ವಿಧವೆ, ವಿಚ್ಛೇದಿತ ಅಥವಾ ಪ್ರತ್ಯೇಕವಾಗಿ ವಾಸಿಸುತ್ತಿರುವ ಮಹಿಳೆಯರಿಗೆ ಮಾತ್ರ)
- ಒಟ್ಟು ಜನ್ಮ ನೀಡಿದ ಮಕ್ಕಳ ಸಂಖ್ಯೆ (ವಿವಾಹಿತ, ವಿಧವೆ, ವಿಚ್ಛೇದಿತ ಅಥವಾ ಪ್ರತ್ಯೇಕವಾಗಿ ವಾಸಿಸುತ್ತಿರುವ ಮಹಿಳೆಯರಿಗೆ ಮಾತ್ರ)
- ಕಳೆದ ಒಂದು ವರ್ಷದಲ್ಲಿ ಜನ್ಮ ನೀಡಿದ ಮಕ್ಕಳ ಸಂಖ್ಯೆ (ಪ್ರಸ್ತುತ ವಿವಾಹ ಬಂಧದಲ್ಲಿರುವ ಮಹಿಳೆಯರಿಗೆ ಮಾತ್ರ)
- ಕೋವಿಡ್-19 ಲಸಿಕೆ ಪಡೆದ ಸ್ಥಳ
- ಹೊಂದಿರುವ ಒಟ್ಟು ಬ್ಯಾಂಕ್ ಖಾತೆಗಳ ಸಂಖ್ಯೆ
- ಮೊಬೈಲ್ ಸಂಖ್ಯೆ (ಲಭ್ಯತೆಯ ಆಧಾರದ ಮೇಲೆ)
- ಆಧಾರ್ ಸಂಖ್ಯೆ (ಲಭ್ಯತೆಯ ಆಧಾರದ ಮೇಲೆ)
- ಮತದಾರರ ಗುರುತಿನ ಚೀಟಿ ಸಂಖ್ಯೆ (ಲಭ್ಯತೆಯ ಆಧಾರದ ಮೇಲೆ)
- ಪಾಸ್‌ಪೋರ್ಟ್ ಸಂಖ್ಯೆ (ಭಾರತೀಯ ಪಾಸ್‌ಪೋರ್ಟ್ ಹೊಂದಿರುವವರಿಗೆ)
- ಡ್ರೈವಿಂಗ್ ಲೈಸೆನ್ಸ್ ಲಭ್ಯತೆ
ಎರಡು ಹಂತಗಳಲ್ಲಿ ಜನಗಣತಿ ಪ್ರಕ್ರಿಯೆ
ಕಳೆದ ವರ್ಷ ಡಿಸೆಂಬರ್‌ನಲ್ಲಿ ಕೇಂದ್ರ ಸಚಿವ ಸಂಪುಟವು ‘ಜನಗಣತಿ 2027’ ಪ್ರಸ್ತಾವನೆಗೆ ಅನುಮೋದನೆ ನೀಡಿತ್ತು. ಈ ಬೃಹತ್ ಪ್ರಕ್ರಿಯೆಯನ್ನು ಎರಡು ಪ್ರಮುಖ ಹಂತಗಳಲ್ಲಿ ನಡೆಸಲಾಗುತ್ತಿದೆ.
ಮೊದಲ ಹಂತ – ಮನೆಗಳ ಪಟ್ಟಿ ನೋಂದಣಿ, ಗೃಹ ಗಣತಿ (ಏಪ್ರಿಲ್ – ಸೆಪ್ಟೆಂಬರ್ 2026):
ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳ ಅನುಕೂಲಕ್ಕೆ ಅನುಗುಣವಾಗಿ 30 ದಿನಗಳ ಕಾಲ ಈ ಪ್ರಕ್ರಿಯೆ ನಡೆಯಲಿದೆ. ಇದಕ್ಕೂ ಮುನ್ನ 15 ದಿನಗಳ ಕಾಲ ನಾಗರಿಕರು ಸ್ವತಃ ತಮ್ಮ ವಿವರಗಳನ್ನು ಆನ್‌ಲೈನ್ ಮೂಲಕ ನೋಂದಾಯಿಸಿಕೊಳ್ಳುವ ‘ಸೆಲ್ಫ್ ಎನ್ಯೂಮರೇಷನ್’ ಸೌಲಭ್ಯ ಲಭ್ಯವಿರಲಿದೆ.
ಈ ಹಂತದಲ್ಲಿ ವಾಸದ ಮನೆಗಳ ಪರಿಸ್ಥಿತಿ, ಸೌಲಭ್ಯಗಳು ಮತ್ತು ಆಸ್ತಿಗಳ ವಿವರಗಳನ್ನು ಸಂಗ್ರಹಿಸಲಾಗುತ್ತದೆ.
ಎರಡನೇ ಹಂತ – ಜನಸಂಖ್ಯೆ ಗಣತಿ (ಫೆಬ್ರವರಿ 2027):
ಪ್ರತಿ ಮನೆಯಲ್ಲಿರುವ ವ್ಯಕ್ತಿಗಳ ಜನಸಂಖ್ಯೆ, ಸಾಮಾಜಿಕ-ಆರ್ಥಿಕ, ಸಾಂಸ್ಕೃತಿಕ, ವಲಸೆ ಹಾಗೂ ಸಂತಾನೋತ್ಪತ್ತಿಗೆ ಸಂಬಂಧಿಸಿದ ವಿವರಗಳನ್ನು ದಾಖಲಿಸಲಾಗುತ್ತದೆ. ಕೇಂದ್ರ ಸರ್ಕಾರದ ನಿರ್ಧಾರದಂತೆ ಈ ಎರಡನೇ ಹಂತದಲ್ಲೇ ಸಮಗ್ರ ಜಾತಿ ಗಣತಿ ಪ್ರಕ್ರಿಯೆಯನ್ನು ಪೂರ್ಣಗೊಳಿಸಲಾಗುತ್ತದೆ.
ಲಡಾಖ್, ಜಮ್ಮು ಮತ್ತು ಕಾಶ್ಮೀರ, ಹಿಮಾಚಲ ಪ್ರದೇಶ ಹಾಗೂ ಉತ್ತರಾಖಂಡ ರಾಜ್ಯಗಳ ಹಿಮಪಾತವಾಗುವ ಪ್ರದೇಶಗಳಲ್ಲಿ ಹವಾಮಾನ ಪರಿಸ್ಥಿತಿಯನ್ನು ಗಮನದಲ್ಲಿಟ್ಟುಕೊಂಡು ಎರಡನೇ ಹಂತವನ್ನು ಮುಂಚಿತವಾಗಿ, ಅಂದರೆ ಸೆಪ್ಟೆಂಬರ್ 2026ರಲ್ಲೇ ನಡೆಸಲಾಗುತ್ತದೆ.
ಇದುವರೆಗೆ ಪೂರ್ಣಗೊಂಡಿರುವ ಪ್ರಗತಿ
ಜನಗಣತಿಗೆ ಸಂಬಂಧಿಸಿದ ಕ್ಷೇತ್ರಮಟ್ಟದ ಬೆಳವಣಿಗೆಗಳ ಕುರಿತು ವಸತಿ ಮತ್ತು ಗೃಹ ವ್ಯವಹಾರಗಳ ರಾಜ್ಯ ಸಚಿವ ನಿತ್ಯಾನಂದ್ ರೈ ಅವರು ರಾಜ್ಯಸಭೆಯಲ್ಲಿ ಮಾಹಿತಿ ನೀಡಿದ್ದಾರೆ.
“ಈಗಾಗಲೇ 31 ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಲ್ಲಿ ಮೊದಲ ಹಂತದ ಮನೆಗಳ ಪಟ್ಟಿ ನೋಂದಣಿ ಪ್ರಕ್ರಿಯೆ ಪೂರ್ಣಗೊಂಡಿದೆ. ಉಳಿದ ರಾಜ್ಯಗಳಲ್ಲಿ ಸೆಪ್ಟೆಂಬರ್ 2026ರ ವೇಳೆಗೆ ಈ ಮೊದಲ ಹಂತವನ್ನು ಪೂರ್ಣಗೊಳಿಸಲಾಗುವುದು” ಎಂದು ಅವರು ತಿಳಿಸಿದ್ದಾರೆ. ಲಡಾಖ್, ಜಮ್ಮು ಮತ್ತು ಕಾಶ್ಮೀರ, ಹಿಮಾಚಲ ಪ್ರದೇಶ ಹಾಗೂ ಉತ್ತರಾಖಂಡದ ಹಿಮಪಾತ ಪ್ರದೇಶಗಳಲ್ಲಿ ಸೆಪ್ಟೆಂಬರ್ 1ರಿಂದ 30, 2026ರವರೆಗೆ ಎರಡನೇ ಹಂತದ ಜನಸಂಖ್ಯೆ ಗಣತಿ ನಡೆಯಲಿದೆ. ಅಕ್ಟೋಬರ್ 1ರಿಂದ 5ರವರೆಗೆ ತಿದ್ದುಪಡಿ ಸುತ್ತು (Revisional Round) ನಡೆಯಲಿದೆ ಎಂದು ಗೆಜೆಟ್ ಅಧಿಸೂಚನೆಯಲ್ಲಿ ಸ್ಪಷ್ಟಪಡಿಸಲಾಗಿದೆ.
