ಫಾಸ್ಟಾಗ್ ವ್ಯವಸ್ಥೆಯಲ್ಲಿ ಪಾರದರ್ಶಕತೆ ತರಲು ಮತ್ತು ಟೋಲ್ ಸಂಗ್ರಹದಲ್ಲಿನ ಅಕ್ರಮಗಳನ್ನು ತಡೆಯಲು ಕೇಂದ್ರ ಸರ್ಕಾರ ಹಾಗೂ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (NHAI) ಕಠಿಣ ಕ್ರಮಗಳನ್ನು ಕೈಗೊಳ್ಳುತ್ತಿದೆ. ವಾಹನದ ನೋಂದಣಿ ಸಂಖ್ಯೆ (Registration Number) ಮತ್ತು ಫಾಸ್ಟಾಗ್ ನಡುವೆ ವ್ಯತ್ಯಾಸವಿದ್ದರೆ ಅಂತಹ ಫಾಸ್ಟಾಗ್ಗಳನ್ನು ನಿರ್ಬಂಧಿಸಲು ನಿರ್ಧರಿಸಲಾಗಿದೆ.
ಫಾಸ್ಟಾಗ್ (FASTag) ಬಳಕೆದಾರರಿಗೆ ಕೇಂದ್ರ ಸರ್ಕಾರ ಮತ್ತು ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ (NHAI) ಬಿಗ್ ಶಾಕ್ ನೀಡಿದೆ. ಟೋಲ್ ಸಂಗ್ರಹ ವ್ಯವಸ್ಥೆಯಲ್ಲಿ ಪಾರದರ್ಶಕತೆ ತರಲು ಮತ್ತು ದತ್ತಾಂಶದ ವ್ಯತ್ಯಾಸಗಳನ್ನು ತಡೆಯಲು ಹೊಸ ನಿಯಮವನ್ನು ಜಾರಿಗೆ ತರಲಾಗಿದ್ದು, ವಾಹನದ ನೋಂದಣಿ ಸಂಖ್ಯೆ (Vehicle Registration Number) ಮತ್ತು ಫಾಸ್ಟಾಗ್ ಮಾಹಿತಿಯಲ್ಲಿ ವ್ಯತ್ಯಾಸವಿದ್ದರೆ ಅಂತಹ ಫಾಸ್ಟಾಗ್ಗಳನ್ನು ತಕ್ಷಣವೇ ಬ್ಲಾಕ್ಲಿಸ್ಟ್ಗೆ ಸೇರಿಸಲು ಸೂಚಿಸಲಾಗಿದೆ. ಅಕ್ರಮಗಳನ್ನು ತಡೆಯಲು ಹಾಗೂ ಮುಂಬರುವ ‘ಮಲ್ಟಿ ಲೈನ್ ಫ್ರೀ ಫ್ಲೋ ಟೋಲಿಂಗ್’ ವ್ಯವಸ್ಥೆಗೆ ಸಿದ್ಧತೆ ನಡೆಸಲು ಕೇಂದ್ರ ಈ ಕಠಿಣ ಕ್ರಮಕ್ಕೆ ಮುಂದಾಗಿದೆ.
ಹೊಸ ನಿಯಮ ಏನು ಹೇಳುತ್ತದೆ?
ನಿಮ್ಮ ವಾಹನದ ನೋಂದಣಿ ಸಂಖ್ಯೆಯು ಫಾಸ್ಟಾಗ್ನಲ್ಲಿರುವ ಮಾಹಿತಿಯೊಂದಿಗೆ ಕಡ್ಡಾಯವಾಗಿ ಹೊಂದಾಣಿಕೆಯಾಗಬೇಕು. ಈ ಕುರಿತು ಎನ್ಹೆಚ್ಎಐ (NHAI) ಎಲ್ಲಾ ಬ್ಯಾಂಕಿಂಗ್ ಸಂಸ್ಥೆಗಳಿಗೆ ಮಹತ್ವದ ಸೂಚನೆಗಳನ್ನು ನೀಡಿದೆ:
- ಪರಿಶೀಲನೆ ಕಡ್ಡಾಯ: ಫಾಸ್ಟಾಗ್ ವಿತರಿಸುವ ಬ್ಯಾಂಕುಗಳು ತಕ್ಷಣವೇ ವಾಹನ ನೋಂದಣಿ ಸಂಖ್ಯೆಗಳನ್ನು ಧೃಢೀಕರಿಸಬೇಕು.
- ಬ್ಲಾಕ್ಲಿಸ್ಟ್: ಒಂದು ವೇಳೆ ವಾಹನದ ಸಂಖ್ಯೆ ಮತ್ತು ಫಾಸ್ಟಾಗ್ ಸಂಖ್ಯೆ ಬೇರೆ ಬೇರೆಯಾಗಿದ್ದರೆ, ಅಂತಹ ಫಾಸ್ಟಾಗ್ಗಳನ್ನು ಇ-ಆಕ್ಟಿವ್ (Inactive) ಮಾಡಿ ಬ್ಲಾಕ್ಲಿಸ್ಟ್ಗೆ ಸೇರಿಸಲಾಗುತ್ತದೆ.
- ದೂರುಗಳ ಹಿನ್ನೆಲೆ: ಟೋಲ್ ಪ್ಲಾಜಾಗಳಲ್ಲಿ ಸ್ಕ್ಯಾನ್ ಮಾಡುವಾಗ ವಾಹನದ ನಂಬರ್ ಮತ್ತು ಫಾಸ್ಟಾಗ್ ರೀಡರ್ ಮಾಹಿತಿಯಲ್ಲಿ ವ್ಯತ್ಯಾಸ ಕಂಡುಬರುತ್ತಿರುವ ಹಿನ್ನೆಲೆಯಲ್ಲಿ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ.
ಬ್ಯಾಂಕುಗಳಿಗೆ ಕಠಿಣ ಸೂಚನೆ
ಟೋಲ್ ಪಾವತಿ ವ್ಯವಸ್ಥೆಯಲ್ಲಿನ ದತ್ತಾಂಶದ ನಿಖರತೆಯನ್ನು ಹೆಚ್ಚಿಸಲು ಕೇಂದ್ರ ಈ ಕ್ರಮ ಕೈಗೊಂಡಿದೆ. ಫಾಸ್ಟಾಗ್ ಯಾವ ವಾಹನದ ಸಂಖ್ಯೆಯ ಮೇಲೆ ನೋಂದಣಿಯಾಗಿದೆಯೋ, ಅದೇ ವಾಹನಕ್ಕೆ ಅದನ್ನು ಬಳಸಲಾಗುತ್ತಿದೆಯೇ ಅಥವಾ ಬೇರೆ ವಾಹನಕ್ಕೆ ಬಳಸಲಾಗುತ್ತಿದೆಯೇ ಎಂಬುದನ್ನು ಪರಿಶೀಲಿಸಲು ಬ್ಯಾಂಕುಗಳಿಗೆ ಸೂಚಿಸಲಾಗಿದೆ. ಟೋಲ್ ಶುಲ್ಕದಲ್ಲಿ ನಡೆಯುವ ಅಕ್ರಮಗಳನ್ನು (Tampering) ತಡೆಯುವುದು ಇದರ ಮುಖ್ಯ ಉದ್ದೇಶವಾಗಿದೆ.
ಮುಂದಿನ ದಿನಗಳಲ್ಲಿ ಜಾರಿಗೆ ಬರಲಿರುವ ‘ಮಲ್ಟಿ ಲೈನ್ ಫ್ರೀ ಫ್ಲೋ ಟೋಲಿಂಗ್’ (Multi-lane Free Flow Tolling) ವ್ಯವಸ್ಥೆಗಾಗಿ ವಾಹನ ನೋಂದಣಿ ಸಂಖ್ಯೆ (VRN) ಮತ್ತು ಫಾಸ್ಟಾಗ್ ಮ್ಯಾಪಿಂಗ್ ನಿಖರವಾಗಿರುವುದು ಅತ್ಯಗತ್ಯ ಎಂದು ಎನ್ಹೆಚ್ಎಐ ಸ್ಪಷ್ಟಪಡಿಸಿದೆ.
ಈ ತಿಂಗಳಿನಿಂದ ಜಾರಿಗೆ ಬಂದ ಪ್ರಮುಖ ಬದಲಾವಣೆಗಳು:
- ನಗದು ಪಾವತಿ ಬಂದ್: ಏಪ್ರಿಲ್ 10ರಿಂದ ಟೋಲ್ ಪ್ಲಾಜಾಗಳಲ್ಲಿ ನಗದು ಪಾವತಿಯನ್ನು ಸಂಪೂರ್ಣವಾಗಿ ಸ್ಥಗಿತಗೊಳಿಸಲಾಗಿದೆ. ಕೇವಲ ಫಾಸ್ಟಾಗ್ ಅಥವಾ ಯುಪಿಐ (UPI) ಮೂಲಕ ಮಾತ್ರ ಪಾವತಿಗೆ ಅವಕಾಶವಿದೆ.
- ಇ-ನೋಟಿಸ್ ಮತ್ತು ದಂಡ: ಟೋಲ್ ಪಾವತಿಸದೆ ತಪ್ಪಿಸಿಕೊಂಡರೆ ಇ-ನೋಟಿಸ್ ಕಳುಹಿಸುವುದರ ಜೊತೆಗೆ ಭಾರೀ ದಂಡ ವಿಧಿಸಲಾಗುತ್ತದೆ.
- ಅತಿಯಾದ ಭಾರ (Overload): ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ನಿಗದಿತ ಮಿತಿಗಿಂತ ಹೆಚ್ಚು ಭಾರ ಹೊತ್ತೊಯ್ಯುವ ವಾಹನಗಳಿಗೆ 4 ಪಟ್ಟು ಅಧಿಕ ದಂಡ ವಿಧಿಸಲು ನಿರ್ಧರಿಸಲಾಗಿದೆ.
ಗಮನಿಸಿ: ನಿಮ್ಮ ಫಾಸ್ಟಾಗ್ ಸರಿಯಾದ ವಾಹನ ಸಂಖ್ಯೆಗೆ ಲಿಂಕ್ ಆಗಿದೆಯೇ ಎಂಬುದನ್ನು ಒಮ್ಮೆ ಪರಿಶೀಲಿಸಿಕೊಳ್ಳುವುದು ಉತ್ತಮ, ಇಲ್ಲದಿದ್ದರೆ ಪ್ರಯಾಣದ ಸಮಯದಲ್ಲಿ ತೊಂದರೆ ಎದುರಾಗಬಹುದು.
