ನವದೆಹಲಿ : ಹಾರ್ಮುಜ್ ಜಲಸಂಧಿ ಮುಚ್ಚಲ್ಪಟ್ಟ ನಂತರ ಉಂಟಾದ ಜಾಗತಿಕ ಇಂಧನ ಬಿಕ್ಕಟ್ಟಿನ ನಡುವೆಯೂ ಭಾರತದ ಕೈಗಾರಿಕಾ ಚಟುವಟಿಕೆಗಳಿಗೆ ಹಿನ್ನಡೆಯಾಗದಂತೆ ಕೇಂದ್ರ ಸರ್ಕಾರ ಮಾಸ್ಟರ್ ಪ್ಲಾನ್ ರೂಪಿಸಿದೆ. ರಾಜ್ಯಗಳಿಗೆ ನೀಡುವ ವಾಣಿಜ್ಯ ಎಲ್ಪಿಜಿ ಕೋಟಾವನ್ನು ಶೇ.70ಕ್ಕೆ ಏರಿಕೆ ಮಾಡುವ ಮೂಲಕ ಉಕ್ಕು ಮತ್ತು ಆಟೋಮೊಬೈಲ್ ಕ್ಷೇತ್ರಗಳಿಗೆ ಹೊಸ ಚೈತನ್ಯ ನೀಡಿದೆ. ಇಂಧನ ಬೆಲೆ ಏರಿಕೆ ಮತ್ತು ಲಭ್ಯತೆಯ ಕೊರತೆಯಿಂದ ಕಂಗೆಟ್ಟಿದ್ದ ಉದ್ಯಮ ವಲಯಕ್ಕೆ ಈ ನಿರ್ಧಾರ ದೊಡ್ಡ ರಿಲೀಫ್ ನೀಡಲಿದೆ.
ಜಾಗತಿಕ ಇಂಧನ ಸವಾಲುಗಳ ನಡುವೆ ದೇಶದ ಪ್ರಮುಖ ಕೈಗಾರಿಕೆಗಳ ಮೇಲಿನ ಒತ್ತಡವನ್ನು ಕಡಿಮೆ ಮಾಡುವ ಉದ್ದೇಶದಿಂದ ಭಾರತ ಸರ್ಕಾರವು ರಾಜ್ಯಗಳಿಗೆ ನೀಡುವ ವಾಣಿಜ್ಯ ಎಲ್ಪಿಜಿ (LPG) ಹಂಚಿಕೆಯನ್ನು ಬಿಕ್ಕಟ್ಟುಪೂರ್ವ ಮಟ್ಟದ ಶೇ.70ಕ್ಕೆ ಹೆಚ್ಚಿಸಿದೆ.
ಕೈಗಾರಿಕೆಗಳಿಗೆ ಆಸರೆ: ಕೇಂದ್ರ ಸಚಿವ ಹರ್ದೀಪ್ ಸಿಂಗ್ ಪುರಿ ಅವರು ಈ ನಿರ್ಧಾರವನ್ನು ಪ್ರಕಟಿಸಿದ್ದು, ಇದು ಉಕ್ಕು (Steel), ಆಟೋಮೊಬೈಲ್ ಮತ್ತು ಜವಳಿ (Textile) ಸೇರಿದಂತೆ ಹೆಚ್ಚಿನ ಕಾರ್ಮಿಕರನ್ನು ಅವಲಂಬಿಸಿರುವ ಕೈಗಾರಿಕೆಗಳಿಗೆ ದೊಡ್ಡ ಮಟ್ಟದ ಬೆಂಬಲ ನೀಡಲಿದೆ ಎಂದು ತಿಳಿಸಿದ್ದಾರೆ. ಪೈಪ್ಡ್ ನ್ಯಾಚುರಲ್ ಗ್ಯಾಸ್ (PNG) ಬಳಸಲು ಸಾಧ್ಯವಾಗದ ಕೈಗಾರಿಕೆಗಳಿಗೆ ಈ ಹಂಚಿಕೆಯಲ್ಲಿ ಆದ್ಯತೆ ನೀಡಲಾಗುವುದು.
ಇಂಧನ ಭದ್ರತೆ: ಎಕ್ಸ್ (X) ನಲ್ಲಿ ಪೋಸ್ಟ್ ಮಾಡಿರುವ ಸಚಿವರು, “ವಿಶ್ವದ ಹಲವು ದೇಶಗಳು ಇಂಧನ ಉಳಿತಾಯಕ್ಕಾಗಿ ಆಡ್-ಈವನ್ ಯೋಜನೆ, ವಾರಕ್ಕೆ ನಾಲ್ಕು ದಿನದ ಕೆಲಸದಂತಹ ಕಠಿಣ ಕ್ರಮಗಳನ್ನು ಅನುಸರಿಸುತ್ತಿವೆ. ಆದರೆ ಭಾರತವು ತನ್ನ ನಾಗರಿಕರಿಗೆ ಇಂಧನ ಭದ್ರತೆ ಮತ್ತು ಲಭ್ಯತೆಯನ್ನು ಖಚಿತಪಡಿಸುತ್ತಿದೆ” ಎಂದು ಹೇಳಿದ್ದಾರೆ.
ಹೆಚ್ಚುವರಿ ಹಂಚಿಕೆ: ಈ ಮೊದಲು ಶೇ.50ರಷ್ಟಿದ್ದ ಹಂಚಿಕೆಯನ್ನು ಈಗ ಶೇ.20ರಷ್ಟು ಹೆಚ್ಚಿಸಲಾಗಿದ್ದು, ಒಟ್ಟು ಪೂರೈಕೆ ಶೇ.70ಕ್ಕೆ ತಲುಪಿದೆ. ಈ ಕುರಿತು ನೀರಜ್ ಮಿತ್ತಲ್ ಅವರು ಎಲ್ಲಾ ರಾಜ್ಯಗಳು ಮತ್ತು ಕೇಂದ್ರಾಡಳಿತ ಪ್ರದೇಶಗಳಿಗೆ ಪತ್ರ ಬರೆದು ಮಾಹಿತಿ ನೀಡಿದ್ದಾರೆ.
ವಿಶೇಷ ಆದ್ಯತೆ: ವಿಶೇಷವಾಗಿ ಬಿಸಿ ಮಾಡುವ ಪ್ರಕ್ರಿಯೆಗಾಗಿ ಎಲ್ಪಿಜಿ ಮೇಲೆ ಅವಲಂಬಿತವಾಗಿರುವ ಡೈ (Dye), ರಾಸಾಯನಿಕ ಮತ್ತು ಪ್ಲಾಸ್ಟಿಕ್ ಕೈಗಾರಿಕೆಗಳಿಗೆ ಈ ಹಂಚಿಕೆಯಲ್ಲಿ ಹೆಚ್ಚಿನ ಮಹತ್ವ ನೀಡಲಾಗುವುದು.
