ನವದೆಹಲಿ: ಅನುಪಯುಕ್ತ ವಸ್ತುಗಳಿಂದಲೇ ಚಂದ್ರಯಾನ -3 ಕ್ಕೆ ಸಮನಾದ 600 ಕೋಟಿ ರೂ.ಗೂ ಅಧಿಕ ಆದಾಯ ಗಳಿಸಲು ಸರ್ಕಾರ ಮುಂದಾಗಿದೆ. ಪ್ರಧಾನಿ ನರೇಂದ್ರ ಮೋದಿ ನೇತೃತ್ವದ ಸರ್ಕಾರದ ಆದಾಯದ ಹೊಸ ಮಾರ್ಗ ಎಂದು ಇದನ್ನು ಕರೆಯಬಹುದಾಗಿದೆ.
ಚಂದ್ರಯಾನ 3-ಮಿಷನ್ನ ಬಜೆಟ್ಗೆ ಸಮನಾದ ಸುಮಾರು 600 ಕೋಟಿ ರೂ.ಗಳನ್ನು ಕೇಂದ್ರವು ಆಗಸ್ಟ್ ವರೆಗೆ ಗಳಿಸಿದೆ. ಹಳೆಯ ಹಾಳಾದ ಫೈಲ್ ಗಳು, ಕಚೇರಿ ಉಪಕರಣಗಳು ಮತ್ತು ಬಳಕೆಯಲ್ಲಿಲ್ಲದ ವಾಹನಗಳ ರೂಪದಲ್ಲಿ ಸ್ಕ್ರ್ಯಾಪ್ಗಳನ್ನು ಮಾರಾಟ ಮಾಡಿದ ಈ ಗಳಿಕೆ ಅಕ್ಟೋಬರ್ ವೇಳೆಗೆ 1,000 ಕೋಟಿ ರೂ. ದಾಟಬಹುದು.
ಸರ್ಕಾರವು ತನ್ನ ವಿಶೇಷ ಅಭಿಯಾನ 3.0 ಅನ್ನು ಅಕ್ಟೋಬರ್ 2 ರಿಂದ ಅಕ್ಟೋಬರ್ 31 ರವರೆಗೆ ನಡೆಸಲಿದೆ, ಕಳೆದ ವರ್ಷ ಅಕ್ಟೋಬರ್ನಲ್ಲಿ ಇದೇ ರೀತಿಯ ಅಭಿಯಾನದಿಂದ 371 ಕೋಟಿ ರೂ. ಗಳಿಸಿದ್ದರೆ, ಈ ಬಾರಿ ಮೂರನೇ ಆವೃತ್ತಿಯಲ್ಲಿ ಸುಮಾರು 400 ಕೋಟಿ ರೂ. ಆದಾಯವನ್ನು ಗಳಿಸುವ ಗುರಿ ಇದೆ ಎಂದು ಉನ್ನತ ಸರ್ಕಾರಿ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.
ಅಕ್ಟೋಬರ್ 2021 ರಲ್ಲಿ ಮೊದಲ ಅಭಿಯಾನದಿಂದ ಸರ್ಕಾರ 62 ಕೋಟಿ ರೂ. ಗಳಿಸಿದೆ. ನವೆಂಬರ್ನಲ್ಲಿ ಕೊನೆಯ ಅಭಿಯಾನವು ಕೊನೆಗೊಂಡಾಗಿನಿಂದ ಸರ್ಕಾರವು ಸ್ವಚ್ಛತಾ ಅಭಿಯಾನ ನಿರಂತರ ಕೈಗೊಂಡು ಪ್ರತಿ ತಿಂಗಳು ಸುಮಾರು ರೂ 20 ಕೋಟಿ ಗಳಿಸಿದೆ.
ಇದರಿಂದಾಗಿ ಸರ್ಕಾರಿ ಕಚೇರಿಗಳಲ್ಲಿನ ಹಳೆಯ ಬೇಡವಾದ ಫೈಲ್, ಅಲ್ಮೆರಾ, ವಾಹನಗಳು ತೆರವುಗೊಳಿಸಲಾಗಿದ್ದು, ಸರ್ಕಾರಿ ಕಛೇರಿಗಳಲ್ಲಿ ಮುಕ್ತಗೊಳಿಸಲಾದ ಜಾಗದ ಪ್ರಮಾಣವು ಇಲ್ಲಿಯವರೆಗೆ 185 ಲಕ್ಷ ಚದರ ಅಡಿಗಳಷ್ಟು ದೊಡ್ಡದಾಗಿದೆ, ಕಳೆದ ವರ್ಷ ಅಕ್ಟೋಬರ್ನಲ್ಲಿ ವಿಶೇಷ ಅಭಿಯಾನ 2.0 ರ ಸಮಯದಲ್ಲಿ ಈ ಪೈಕಿ ದಾಖಲೆಯ 90 ಲಕ್ಷ ಚದರ ಅಡಿ ಜಾಗವನ್ನು ಮುಕ್ತಗೊಳಿಸಿದ್ದರೆ, ಈ ಅಕ್ಟೋಬರ್ನಲ್ಲಿ ಕನಿಷ್ಠ 100 ಲಕ್ಷ ಚದರ ಅಡಿ ಜಾಗವನ್ನು ಮುಕ್ತಗೊಳಿಸುವುದು ಗುರಿಯಾಗಿದೆ.
ಭಾರತ ಸರ್ಕಾರದ ಎಲ್ಲಾ ಸಚಿವಾಲಯಗಳು ಮತ್ತು ಇಲಾಖೆಗಳು ಅಭಿಯಾನದಲ್ಲಿ ಭಾಗವಹಿಸುತ್ತವೆ. ಪೂರ್ವಸಿದ್ಧತಾ ಹಂತವು ಸೆಪ್ಟೆಂಬರ್ 15 ರಿಂದ ಸೆಪ್ಟೆಂಬರ್ 30 ರವರೆಗೆ ನಡೆಯಲಿದೆ ಮತ್ತು ಅನುಷ್ಠಾನದ ಹಂತವು ಅಕ್ಟೋಬರ್ 2 ರಿಂದ ಅಕ್ಟೋಬರ್ 31 ರವರೆಗೆ ಇರುತ್ತದೆ. ಇದು ಸಚಿವಾಲಯಗಳು ಮತ್ತು ಇಲಾಖೆಗಳ ಎಲ್ಲಾ ಕಚೇರಿಗಳಲ್ಲಿ ಸ್ವಚ್ಛತೆಯ ಶುದ್ಧತ್ವವನ್ನು ಕಲ್ಪಿಸುತ್ತದೆ. ಸಿಬ್ಬಂದಿಗಳ ಖಾತೆ ರಾಜ್ಯ ಸಚಿವ ಡಾ ಜಿತೇಂದ್ರ ಸಿಂಗ್ ಸೆಪ್ಟೆಂಬರ್ 14 ರಂದು ದೆಹಲಿಯಲ್ಲಿ ಅಭಿಯಾನವನ್ನು ಘೋಷಿಸಲಿದ್ದಾರೆ ಎಂದು ಹೇಳಲಾಗಿದೆ.
