ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿರುವ ಒಂದೇ ಒಂದು ನೃತ್ಯದ ವಿಡಿಯೋ ಇಡೀ ಇಂಟರ್ನೆಟ್ ಜಗತ್ತನ್ನು ಎರಡು ಬಣಗಳನ್ನಾಗಿ ವಿಂಗಡಿಸಿದೆ. ಬಾಲ ಕಲಾವಿದರ ಜನಪ್ರಿಯತೆ, ಇಂದಿನ ಪೋಷಕರ ಪಾಲನೆ ಮತ್ತು ಸಾಮಾಜಿಕ ಮಾಧ್ಯಮಗಳಲ್ಲಿ ಅಪ್ರಾಪ್ತರನ್ನು ವಯಸ್ಕರಂತೆ ಬಿಂಬಿಸುತ್ತಿರುವ ವಿಚಾರದ ಕುರಿತು ನೆಟಿಜನ್ಸ್ ನಡುವೆ ದೊಡ್ಡ ಮಟ್ಟದ ಚರ್ಚೆ ಮತ್ತು ವಾಗ್ವಾದಕ್ಕೆ ಈ ವಿಡಿಯೋ ಕಾರಣವಾಗಿದೆ.
ಬಾಲಿವುಡ್ನ ದಿಗ್ಗಜ ನಟಿ ಮಾಧುರಿ ದೀಕ್ಷಿತ್ ಅವರ ನೃತ್ಯ ಶೈಲಿ, ಹಾವಭಾವ ಹಾಗೂ ಆತ್ಮವಿಶ್ವಾಸವನ್ನು ಯಥಾವತ್ತಾಗಿ ನಕಲು ಮಾಡುವ ಮೂಲಕ ‘ಮಿನಿ ಮಾಧುರಿ’ ಎಂದೇ ಹೆಸರಾಗಿರುವ ಬಾಲಕಿ ಬರ್ಕತ್ ಅರೋರಾ ಅವರ ಡ್ಯಾನ್ಸ್ ವಿಡಿಯೋವೊಂದನ್ನು ಎಕ್ಸ್ (ಟ್ವಿಟರ್) ಖಾತೆಯಲ್ಲಿ ಹಂಚಿಕೊಳ್ಳಲಾಗಿತ್ತು. ಕೇವಲ ಎರಡು ವರ್ಷ ವಯಸ್ಸಿನವಳಿದ್ದಾಗ ೫೦೦ ಜನರ ಮುಂದೆ ಪ್ರದರ್ಶನ ನೀಡಿ ಸೈ ಎನಿಸಿಕೊಂಡಿದ್ದ ಈ ಪುಟ್ಟ ಬಾಲಕಿಯ ನೃತ್ಯ ಪ್ರತಿಭೆ ಅದ್ಭುತವಾಗಿದೆ. ಆದರೆ, “ಇದಕ್ಕಿಂತ ಅತ್ಯುತ್ತಮವಾದ ನೃತ್ಯವನ್ನು ತೋರಿಸಿ” ಎಂಬ ಶೀರ್ಷಿಕೆಯೊಂದಿಗೆ ಈ ವಿಡಿಯೋ ಪೋಸ್ಟ್ ಆದ ಬೆನ್ನಲ್ಲೇ ಕಮೆಂಟ್ ಬಾಕ್ಸ್ನಲ್ಲಿ ಪರ-ವಿರೋಧದ ಸುನಾಮಿಯೇ ಎದ್ದಿದೆ.
ಬಾಲ್ಯದ ಮುಗ್ಧತೆ ಮರೆಯಾಗುತ್ತಿದೆ ಎಂದ ವಿಮರ್ಶಕರು ಬಾಲಕಿಯ ಅದ್ಭುತ ಪ್ರತಿಭೆಯನ್ನು ಲಕ್ಷಾಂತರ ಜನರು ಮೆಚ್ಚಿಕೊಂಡಿದ್ದರೂ, ಒಂದು ದೊಡ್ಡ ವರ್ಗದ ಜನರು ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಇಂದಿನ ಡ್ಯಾನ್ಸ್ ಕ್ಲಬ್ಗಳಲ್ಲಿ ಮಕ್ಕಳಿಗೆ ಕಲಿಸುವ ನೃತ್ಯದ ನಡಾವಳಿಗಳು ಮತ್ತು ವಯಸ್ಕರ ತರಹದ ಮುಖದ ಹಾವಭಾವಗಳು ಎಲ್ಲೆ ಮೀರುತ್ತಿವೆ ಎಂದು ಅವರು ಕಳವಳ ವ್ಯಕ್ತಪಡಿಸಿದ್ದಾರೆ. ಮಕ್ಕಳನ್ನು ಮಿನಿ-ವಯಸ್ಕರಂತೆ ಬಿಂಬಿಸುತ್ತಿರುವ ಪೋಷಕರು ಮತ್ತು ನೃತ್ಯ ಶಿಕ್ಷಕರ ವಿರುದ್ಧ ನೆಟಿಜನ್ಸ್ ಆಕ್ರೋಶ ಹೊರಹಾಕಿದ್ದಾರೆ.
“ನನ್ನನ್ನು ಹಳೇ ಆಲೋಚನೆಯವನು ಎಂದು ಕರೆದರೂ ಪರವಾಗಿಲ್ಲ, ಆದರೆ ಈ ವಯಸ್ಸಿನಲ್ಲಿ ಮಕ್ಕಳು ಇಂತಹ ನೃತ್ಯ ಮಾಡುವುದು ಸೂಕ್ತವಲ್ಲ. ಬಾಲ್ಯ ಎಂಬುದು ಮೌಲ್ಯಗಳು, ಉತ್ತಮ ನಡತೆಗಳನ್ನು ಕಲಿಯುವ ಮತ್ತು ಮುಗ್ಧತೆಯನ್ನು ಅನುಭವಿಸುವ ಸಮಯ. ಆದರೆ ಇಂದಿನ ದಿನಗಳಲ್ಲಿ ಇದೆಲ್ಲವೂ ಕಾಣೆಯಾಗುತ್ತಿದೆ” ಎಂದು ಬಳಕೆದಾರರೊಬ್ಬರು ಬರೆದಿದ್ದಾರೆ. ಇನ್ನು ಕೆಲವರು, “ಸಾಮಾಜಿಕ ಮಾಧ್ಯಮಗಳಲ್ಲಿ ವೀಕ್ಷಣೆಗಾಗಿ ಮಕ್ಕಳನ್ನು ಈ ರೀತಿ ಬಳಸಿಕೊಳ್ಳುವ ಪೋಷಕರ ವರ್ತನೆ ಖಂಡನೀಯ” ಎಂದು ಕಟುವಾಗಿ ಟೀಕಿಸಿದ್ದಾರೆ.
ಇದು ಕೇವಲ ಪ್ರತಿಭೆ, ನಿಮ್ಮ ಯೋಚನೆ ತಪ್ಪು ಎಂದ ಬೆಂಬಲಿಗರು ಮತ್ತೊಂದೆಡೆ, ಬಾಲಕಿಯ ಬೆಂಬಲಕ್ಕೆ ನಿಂತಿರುವ ನೆಟಿಜನ್ಸ್ನ ಮತ್ತೊಂದು ವರ್ಗವು ವಿಮರ್ಶಕರನ್ನು ತರಾಟೆಗೆ ತೆಗೆದುಕೊಂಡಿದೆ. ಕೇವಲ ಬಾಲಿವುಡ್ ಹಾಡಿಗೆ ಮುಗ್ಧವಾಗಿ ನೃತ್ಯ ಮಾಡುತ್ತಿರುವ ಮಗುವಿನ ಕಲೆಯ ಹಿಂದೆ ವಯಸ್ಕರ ಕೆಟ್ಟ ಯೋಚನೆಗಳನ್ನು ಹುಡುಕುತ್ತಿರುವುದು ತಪ್ಪು ಎಂದು ಅವರು ವಾದಿಸಿದ್ದಾರೆ.
“ವಿಡಿಯೋ ನೋಡಿದಾಗ ಮಗು ಎಷ್ಟು ಚೆನ್ನಾಗಿ ನೃತ್ಯ ಮಾಡುತ್ತದೆ ಎಂದಷ್ಟೇ ನನಗೆ ಅನಿಸಿತು. ಆದರೆ ಕಮೆಂಟ್ ಬಾಕ್ಸ್ ನೋಡಿದಾಗ ಆಶ್ಚರ್ಯವಾಯಿತು” ಎಂದು ಒಬ್ಬರು ಪ್ರತಿಕ್ರಿಯಿಸಿದ್ದಾರೆ. “ಮಗುವಿನ ಕ್ಯೂಟ್ ಆದ ಮುಖದ ಎಕ್ಸ್ಪ್ರೆಶನ್ಗಳನ್ನು ಬೇರೆ ದೃಷ್ಟಿಯಿಂದ ನೋಡುವ ಜನರ ಮನಸ್ಥಿತಿಯೇ ಕೊಳಕಾಗಿದೆ. ಇಲ್ಲಿ ಮಗುವಿನ ನೃತ್ಯದಲ್ಲಿ ಯಾವುದೇ ತಪ್ಪಿಲ್ಲ, ನೋಡುವವರ ದೃಷ್ಟಿಕೋನದಲ್ಲೇ ದೋಷವಿದೆ” ಎಂದು ಬೆಂಬಲಿಗರು ನೈತಿಕ ಪೊಲೀಸ್ಗಿರಿ ಮಾಡುವವರ ವಿರುದ್ಧ ಕಿಡಿಕಾರಿದ್ದಾರೆ. ಸದ್ಯ ಈ ವಿಡಿಯೋ ಸೋಶಿಯಲ್ ಮೀಡಿಯಾದಲ್ಲಿ ಪರ-ವಿರೋಧದ ದೊಡ್ಡ ಚರ್ಚೆಯಾಗಿ ಮುಂದುವರಿದಿದೆ.
