ಫೆಬ್ರವರಿ 1 ರಂದು ಕೇಂದ್ರ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಕೇಂದ್ರ ಬಜೆಟ್ 2026 ಅನ್ನು ಮಂಡಿಸಲಿದ್ದಾರೆ. ಕಳೆದ ವರ್ಷದ ಬಜೆಟ್ನಲ್ಲಿ ಹೊಸ ತೆರಿಗೆ ಪದ್ಧತಿಯಡಿ (New Tax Regime) 12 ಲಕ್ಷ ರೂಪಾಯಿವರೆಗಿನ ಆದಾಯವನ್ನು ತೆರಿಗೆ ಮುಕ್ತಗೊಳಿಸುವ ಮೂಲಕ ಸರ್ಕಾರ ದೊಡ್ಡ ಸಮಾಧಾನ ನೀಡಿತ್ತು. ಆದರೆ, ಈ ಬಾರಿ ಈ ಮಿತಿಯನ್ನು 17 ಲಕ್ಷ ರೂಪಾಯಿಗೆ ಏರಿಸುವ ಸಾಧ್ಯತೆ ಇದೆ ಎಂದು ತಜ್ಞರು ಅಂದಾಜಿಸಿದ್ದಾರೆ.
ಬಜೆಟ್ 2026 ರಲ್ಲಿ ನಿರೀಕ್ಷಿಸಲಾದ 5 ಪ್ರಮುಖ ಬದಲಾವಣೆಗಳು ಇಲ್ಲಿವೆ:
೧. ತೆರಿಗೆ ಮುಕ್ತ ಆದಾಯ ಮಿತಿ ಏರಿಕೆ:
ಪ್ರಸ್ತುತ ಹೊಸ ತೆರಿಗೆ ಪದ್ಧತಿಯಡಿ 12 ಲಕ್ಷ ರೂಪಾಯಿವರೆಗೆ ತೆರಿಗೆ ಇಲ್ಲ. ಒಂದು ವೇಳೆ ಸ್ಟ್ಯಾಂಡರ್ಡ್ ಡಿಡಕ್ಷನ್ ಮತ್ತು ಇತರ ವಿನಾಯಿತಿಗಳನ್ನು ಹೆಚ್ಚಿಸಿದರೆ, ಈ ಮಿತಿಯು 17 ಲಕ್ಷ ರೂಪಾಯಿವರೆಗೆ ತಲುಪಬಹುದು. ಇದು ಮಧ್ಯಮ ವರ್ಗದ ಮತ್ತು ಸಂಬಳ ಪಡೆಯುವ ನೌಕರರಿಗೆ ದೊಡ್ಡ ಉಳಿತಾಯ ತರಲಿದೆ.
೨. ಸ್ಟ್ಯಾಂಡರ್ಡ್ ಡಿಡಕ್ಷನ್ (Standard Deduction) ಹೆಚ್ಚಳ:
ಕಳೆದ ಬಜೆಟ್ನಲ್ಲಿ ಸ್ಟ್ಯಾಂಡರ್ಡ್ ಡಿಡಕ್ಷನ್ ಅನ್ನು 50,000 ರೂ.ನಿಂದ 75,000 ರೂ.ಗೆ ಹೆಚ್ಚಿಸಲಾಗಿತ್ತು. ಏರುತ್ತಿರುವ ಹಣದುಬ್ಬರವನ್ನು ಗಮನದಲ್ಲಿಟ್ಟುಕೊಂಡು, ಈ ಮಿತಿಯನ್ನು 1 ಲಕ್ಷ ರೂ. ಅಥವಾ 1.25 ಲಕ್ಷ ರೂ.ಗೆ ಏರಿಸುವಂತೆ ತಜ್ಞರು ಶಿಫಾರಸು ಮಾಡಿದ್ದಾರೆ.
೩. ಮನೆ ಮತ್ತು ಶಿಕ್ಷಣ ಸಾಲದ ಮೇಲೆ ವಿನಾಯಿತಿ:
ಹೊಸ ತೆರಿಗೆ ಪದ್ಧತಿಯನ್ನು ಹೆಚ್ಚು ಆಕರ್ಷಕವಾಗಿಸಲು, ಹಳೆಯ ಪದ್ಧತಿಯಂತೆ ಮನೆ ಸಾಲದ ಬಡ್ಡಿ (2 ಲಕ್ಷ ರೂ.ವರೆಗೆ) ಮತ್ತು ಶಿಕ್ಷಣ ಸಾಲದ ಮೇಲೆ ವಿನಾಯಿತಿ ನೀಡುವ ಬೇಡಿಕೆ ಜೋರಾಗಿದೆ. ಇದು ಮನೆ ಖರೀದಿದಾರರಿಗೆ ಮತ್ತು ಪೋಷಕರಿಗೆ ವರದಾನವಾಗಲಿದೆ.
೪. ಆರೋಗ್ಯ ವಿಮೆ ಮತ್ತು ಹೆಚ್ಆರ್ಎ (HRA):
ಪ್ರಸ್ತುತ ಹೊಸ ಪದ್ಧತಿಯಲ್ಲಿ ಮನೆ ಬಾಡಿಗೆ ಭತ್ಯೆ (HRA) ಮತ್ತು ಆರೋಗ್ಯ ವಿಮೆಯ ಮೇಲೆ ರಿಯಾಯಿತಿ ಇಲ್ಲ. ಹೆಚ್ಚುತ್ತಿರುವ ವೈದ್ಯಕೀಯ ವೆಚ್ಚಗಳನ್ನು ಪರಿಗಣಿಸಿ, ಆರೋಗ್ಯ ವಿಮೆಯ ಮೇಲಿನ ಪ್ರೀಮಿಯಂಗೆ ಕನಿಷ್ಠ 50,000 ರೂ.ವರೆಗೆ ಡಿಡಕ್ಷನ್ ನೀಡುವ ನಿರೀಕ್ಷೆಯಿದೆ.
೫. ಹೂಡಿಕೆದಾರರಿಗೆ ಉತ್ತೇಜನ:
ಷೇರು ಮಾರುಕಟ್ಟೆಯಲ್ಲಿ ಹೂಡಿಕೆಯನ್ನು ಪ್ರೋತ್ಸಾಹಿಸಲು, ದೀರ್ಘಕಾಲದ ಬಂಡವಾಳ ಲಾಭದ (LTCG) ತೆರಿಗೆ ವಿನಾಯಿತಿ ಮಿತಿಯನ್ನು 1 ಲಕ್ಷ ರೂ.ನಿಂದ 1.3 ಲಕ್ಷ ರೂ.ಗೆ ಏರಿಸುವ ಸಾಧ್ಯತೆಯಿದೆ.
ಲೆಕ್ಕಾಚಾರ ಹೇಗೆ? (17 ಲಕ್ಷ ರೂ.ವರೆಗೆ ತೆರಿಗೆ ಮುಕ್ತ):
ಒಂದು ವೇಳೆ ಸರ್ಕಾರ ಈ ಕೆಳಗಿನ ಪ್ರಸ್ತಾಪಗಳನ್ನು ಒಪ್ಪಿಕೊಂಡರೆ:
ಅಸ್ತಿತ್ವದಲ್ಲಿರುವ ತೆರಿಗೆ ಮುಕ್ತ ಮಿತಿ: 12 ಲಕ್ಷ ರೂ.
ಸ್ಟ್ಯಾಂಡರ್ಡ್ ಡಿಡಕ್ಷನ್: 1 ಲಕ್ಷ ರೂ.
ಮನೆ ಸಾಲದ ಬಡ್ಡಿ ಮತ್ತು ಅಸಲು: 3.5 ಲಕ್ಷ ರೂ.
ಆರೋಗ್ಯ ವಿಮೆ: 50,000 ರೂ.
ಒಟ್ಟು ತೆರಿಗೆ ಮುಕ್ತ ಆದಾಯ: 17 ಲಕ್ಷ ರೂ.
