ಕೇಂದ್ರ ಬಜೆಟ್ 2026-27 ಭಾನುವಾರ ಮಂಡನೆಯಾಗಲಿದೆ. ಕೇಂದ್ರ ಹಣಕಾಸು ಮತ್ತು ಕಾರ್ಪೊರೇಟ್ ವ್ಯವಹಾರಗಳ ಸಚಿವೆ ನಿರ್ಮಲಾ ಸೀತಾರಾಮನ್ ಬಜೆಟ್ ಮಂಡಿಸಲಿದ್ದು, ಉದ್ಯೋಗ ಕ್ಷೇತ್ರದ ಕುರಿತು ಅದರಲ್ಲೂ ಕೌಶಲ್ಯ ಮತ್ತು ಉದ್ಯೋಗದ ಕುರಿತು ಹಲವು ನಿರೀಕ್ಷೆಗಳಿವೆ.
ಭಾರತ ತನ್ನನ್ನು ವಿಶ್ವದ ಪ್ರತಿಭೆಯ ಕಾರ್ಖಾನೆ ಎಂದು ಕರೆದುಕೊಳ್ಳುತ್ತದೆ. ವೇಗವಾಗಿ ಬೆಳೆಯುತ್ತಿರುವ ಡಿಜಿಟಲ್ ಆರ್ಥಿಕತೆ ಮತ್ತು ಕೃತಕ ಬುದ್ಧಿಮತ್ತೆ, ತಂತ್ರಜ್ಞಾನ ಸೇವೆಗಳು ಮತ್ತು ಜಾಗತಿಕ ಸಾಮರ್ಥ್ಯ ಕೇಂದ್ರಗಳಲ್ಲಿ ಉದ್ಯೋಗ ಪಡೆಯುವುದು ಸವಾಲಾಗಿದೆ.
ಉದ್ಯೋಗದಾತರು ಯಾವ ರೀತಿಯ ಪ್ರತಿಭೆಗಳನ್ನು ನಿರೀಕ್ಷೆ ಮಾಡುತ್ತಾರೆ?. ಯಾವ ಯಾವ ಕೌಶಲ್ಯಗಳು ಅಗತ್ಯ ಎಂಬುದು ಈಗ ಕ್ಷಣ ಕ್ಷಣಕ್ಕೆ ಬದಲಾಗುತ್ತಿದೆ. ಕೇಂದ್ರ ಬಜೆಟ್ 2026 ಉದ್ಯೋಗದಾತರು ಮತ್ತು ಹೊಸ ಉದ್ಯೋಗ ಹುಡುತ್ತಿರುವ ಅಭ್ಯರ್ಥಿಗಳ ನಡುವಿನ ಅಂತರವನ್ನು ಕಡಿಮೆ ಮಾಡಲಿದೆ ಎಂದು ನಿರೀಕ್ಷಿಸಲಾಗಿದೆ.
ಉದ್ಯಮದಾರರು ತರಬೇತಿ ನೀಡುವುದಕ್ಕಿಂತ ಹೆಚ್ಚಿನದನ್ನು ಅಭ್ಯರ್ಥಿಗಳು ಬಯಸುತ್ತಿದ್ದಾರೆ. ಜಾಗತಿಕವಾಗಿ ಕೃತಕ ಬುದ್ಧಿಮತ್ತೆಯ ಮೇಲೆ ಹೆಚ್ಚಿನ ಅವಲಂಬನೆ ಆಗುತ್ತಿರುವ ಸಂದರ್ಭದಲ್ಲಿ ಭಾರತದ ಮುಂದಿನ ನಡೆ, ಕೌಶಲ್ಯ ತರಬೇತಿ ಹೇಗಿರಬೇಕು? ಇದಕ್ಕೆ ಉದ್ಯೋಗದಾತರ ಸಹಕಾರ ಹೇಗೆ? ಎಂಬುದು ಬಜೆಟ್ನಲ್ಲಿ ಅನಾವರಣವಾಗುವ ನಿರೀಕ್ಷೆ ಇದೆ.
ಎಐ ವಲಯದಲ್ಲಿ ಭಾರತವು ಈಗಾಗಲೇ ಶೇಕಡ 16ರಷ್ಟು ಪಾಲನ್ನು ಹೊಂದಿದೆ. ಆದರೂ ಶೇಕಡ 25ಕ್ಕಿಂತ ಕಡಿಮೆ ಪದವೀಧರರು ಸುಧಾರಿತ ಡಿಜಿಟಲ್ ಮತ್ತು ಕೃತಕ ಬುದ್ಧಿಮತ್ತೆಯ ಕೌಶಲ್ಯಗಳಿಗೆ ಸಿದ್ಧರಾಗಿದ್ದಾರೆ ಎಂದು ಅನೇಕ ಉದ್ಯಮ ವರದಿಗಳು ಹೇಳಿವೆ.
ಫ್ಯೂಚರ್ಸ್ನ ಸಂಸ್ಥಾಪಕ ಮತ್ತು ಸಿಇಓ ರಾಘವ್ ಗುಪ್ತಾ,, “ಶಿಕ್ಷಣ ಮತ್ತು ಉದ್ಯೋಗದ ನಡುವಿನ ಅಂತರವನ್ನು ನಿರ್ಲಕ್ಷಿಸುವುದು ಕಷ್ಟವಾಗುತ್ತಿದೆ. ವಿಶೇಷವಾಗಿ ಕಂಪನಿಗಳು ಕೃತಕ ಬುದ್ಧಿಮತ್ತೆಯ ನೇತೃತ್ವದ ಕಾರ್ಯಾಚರಣೆಗಳು, ಯಾಂತ್ರೀಕೃತಗೊಂಡ ಮತ್ತು ಜಾಗತಿಕ ವಿತರಣಾ ಮಾದರಿಗಳಿಗೆ ವೇಗವಾಗಿ ಹೋಗುತ್ತಿರುವಾಗ. ಪದವಿಗಳು ಮತ್ತು ಕೌಶಲ್ಯಗಳು ಮುಖ್ಯವಾಗುತ್ತದೆ” ಎಂದು ಹೇಳಿದ್ದಾರೆ.
“ಕೃತಕ ಬುದ್ಧಿಮತ್ತೆಯ ನೇತೃತ್ವದ ಯುಗದಲ್ಲಿ ಉದ್ಯಮಗಳು ಎದುರಿಸುತ್ತಿರುವ ಅತ್ಯಂತ ಒತ್ತಡದ ಸವಾಲುಗಳಲ್ಲಿ ಒಂದು ಕೌಶಲ್ಯ ಹೊಂದಿದವರ ಆಯ್ಕೆಯಾಗಿದೆ. ಭವಿಷ್ಯದ ಸಿದ್ಧ, ಅನ್ವಯಿಕ ಕೌಶಲ್ಯಗಳನ್ನು ಹೊಂದಿರುವ ಪ್ರತಿಭೆಗಳ ಕೊರತೆ ಇದೆ” ಎಂದು ತಿಳಿಸಿದ್ದಾರೆ.
ಭಾರತದ ಉದ್ಯೋಗ ಕ್ಷೇತ್ರದ ಅತಿದೊಡ್ಡ ತಪ್ಪು ಕಲ್ಪನೆ ಎಂದರೆ ಪದವಿ ಉದ್ಯೋಗ ಪಡೆಯಲು ಸಾಕಾಗುತ್ತದೆ ಎಂಬುದು. ಆದರೆ ಈ ಊಹೆ ತಪ್ಪು, ಭಾರತದಲ್ಲಿ ಪದವಿ ಜೊತೆಗೆ ಕೌಶಲ್ಯದ ಅಗತ್ಯವಿದೆ. ಎಐ ತಂತ್ರಜ್ಞಾನ, ಆರೋಗ್ಯ ಸೇವೆಗಳು, ಜಿಸಿಸಿ ಮತ್ತು ಹೈಬ್ರಿಡ್ ಕಾರ್ಯಸ್ಥಳಗಳಲ್ಲಿ ಸಂವಹನ ನಡೆಸಲು ಸಾಧ್ಯವಾಗುವ ರೀತಿಯಲ್ಲಿ ವೃತ್ತಿ ಕೌಶಲ್ಯ ಪಡೆಯಬೇಕಿದೆ.
ಪದವೀಧರರು ವೃತ್ತಿಪರ ಪರಿಸರಕ್ಕೆ ಬಂದಾಗ ಸವಾಲು ಎದುರಾಗುತ್ತದೆ. ಸಂವಹನ, ತಂಡದ ಕೆಲಸ ಮತ್ತು ಕೆಲಸದ ಸ್ಥಳದ ನಿರೀಕ್ಷೆಗಳನ್ನು ಅರ್ಥಮಾಡಿಕೊಳ್ಳಲು ಅನೇಕರು ಹೆಣಗಾಡುತ್ತಾರೆ. ಸಾಂಪ್ರದಾಯಿಕ ಪಠ್ಯಕ್ರಮದಲ್ಲಿ ಕೌಶಲ್ಯಗಳು ಇರುವುದು ವಿರಳವಾಗಿದೆ. ಆದ್ದರಿಂದ ಕೇವಲ ಪದವಿ ಸಾಕಾಗುವುದಿಲ್ಲ.
ಬಜೆಟ್ ನಿರೀಕ್ಷೆಗಳು: 2026ರ ಬಜೆಟ್ ಈ ಅಸಮತೋಲನವನ್ನು ಸರಿಪಡಿಸಲು ಒಂದು ಅವಕಾಶವಾಗಿದೆ. ಬಜೆಟ್ನಲ್ಲಿ ಕೌಶಲ್ಯ ಆಧಾರಿತ ಉದ್ಯೋಗ ರಚನೆಯನ್ನು ಬಲಪಡಿಸಲು ಒಂದು ಅವಕಾಶವಿದೆ. ತರಬೇತಿಯನ್ನು ಮೀರಿ ಉದ್ಯೋಗದ ಕೌಶಲ್ಯಗಳ ಪ್ರಮಾಣೀಕರಣ, ಜಾಗತಿಕವಾಗಿ ಉದ್ಯೋಗದಾತರ ನಿರೀಕ್ಷೆಗಳಿಗೆ ಹೊಂದಿಕೆಯಾಗುವಂತೆ ಕೌಶಲ್ಯ ರೂಪಿಸಲು ಬಜೆಟ್ನಲ್ಲಿ ಘೋಷಣೆಗಳನ್ನು ನಿರೀಕ್ಷೆ ಮಾಡಲಾಗಿದೆ.
ಭಾರತದ ನಿರುದ್ಯೋಗ ದರವು ಶೇಕಡಾ 5ರಷ್ಟು ಸ್ಥಿರವಾಗಿದೆ. ತಂತ್ರಜ್ಞಾನದಲ್ಲಿನ ಕೌಶಲ್ಯದ ಅಂತರವನ್ನು ಕಡಿಮೆ ಮಾಡುವುದು ಮತ್ತು ಉದ್ಯೋಗ ಸೃಷ್ಟಿಯನ್ನು ವೇಗಗೊಳಿಸಲು ಉದಯೋನ್ಮುಖ ವಲಯಗಳು ಅತ್ಯಗತ್ಯ. ವೇಗವಾಗಿ ಬೆಳೆಯುತ್ತಿರುವ ವಲಯಗಳಲ್ಲಿ, ಕಂಪನಿಗಳು ನೇಮಕ ಮಾಡಿಕೊಳ್ಳಲು ಸಿದ್ಧವಾಗಿರುತ್ತವೆ, ಆದರೆ ಅಭ್ಯರ್ಥಿಗಳಿಗೆ ಅಲ್ಲಿನ ಉದ್ಯೋಗದ ನಿರೀಕ್ಷೆಗಳನ್ನು ಪೂರೈಸಲು ಸಾಧ್ಯವಾಗುತ್ತಿಲ್ಲ.
ಬಜೆಟ್ನಲ್ಲಿ ಅಪ್ರೆಂಟಿಶಿಪ್ಗಳ ಮೇಲೆ ಹೆಚ್ಚು ಗಮನ ಹರಿಸಬೇಕು. ಯುವಜನರಿಗೆ ಕಲಿಯುವ ಆಸಕ್ತಿ ಹೆಚ್ಚಿರುತ್ತದೆ. ಅಲ್ಪಾವಧಿಯ ತರಬೇತಿ ಕಾರ್ಯಕ್ರಮಗಳು, ನೈಜ ಕೆಲಸದ ಸ್ಥಳಗಳಲ್ಲಿ ತರಬೇತಿ ನೀಡುವುದು ಅವರ ಕೌಶಲ್ಯಗಳನ್ನು ಅಭಿವೃದ್ಧಿಪಡಿಸಲು ಸಹಾಯ ಮಾಡುತ್ತವೆ.
