ಆಸ್ಟ್ರೇಲಿಯಾದ ಮಾಜಿ ವೇಗದ ಬೌಲರ್ ಬ್ರೆಟ್ ಲೀ ಈಗ ತಮ್ಮ ಬದುಕಿನ ಹೊಸ ಅಧ್ಯಾಯವನ್ನು ಆರಂಭಿಸಿದ್ದಾರೆ. ದಶಕಗಳ ಕಾಲ ಆಸ್ಟ್ರೇಲಿಯಾದ ಪರವಾಗಿ ಕ್ರಿಕೆಟ್ ಮೈದಾನದಲ್ಲಿ ಮಿಂಚಿದ್ದ ಲೀ, ಈಗ ತಮ್ಮ ಕುಟುಂಬದೊಂದಿಗೆ ದುಬೈಗೆ ವಾಸ್ತವ್ಯ ಬದಲಿಸಿದ್ದಾರೆ. ಇನ್ನು ಮುಂದೆ ತಮಗೆ ‘ದುಬೈ’ ಹೊಸ ಮನೆ ಎಂದು ಅವರು ಸಾಮಾಜಿಕ ಜಾಲತಾಣಗಳಲ್ಲಿ ಭಾವನಾತ್ಮಕವಾಗಿ ಹಂಚಿಕೊಂಡಿದ್ದಾರೆ.
ಕೆಲಸದ ನಿಮಿತ್ತ ಬಂದವರು ಇಲ್ಲೇ ಉಳಿದರು ಆರಂಭದಲ್ಲಿ ಕೇವಲ ಕೆಲಸದ ನಿಮಿತ್ತ ಅಲ್ಪಾವಧಿಗೆ ದುಬೈಗೆ ಭೇಟಿ ನೀಡುತ್ತಿದ್ದ ಬ್ರೆಟ್ ಲೀ ಅವರಿಗೆ, ಅಲ್ಲಿನ ವಾತಾವರಣ ಮತ್ತು ಜೀವನಶೈಲಿ ಅತೀವವಾಗಿ ಇಷ್ಟವಾಯಿತು. ಅಲ್ಲಿ ಸಿಗುವ ಹೊಸ ಅವಕಾಶಗಳು, ಪ್ರಶಾಂತವಾದ ಕುಟುಂಬದ ಸಮಯ ಮತ್ತು ಸರಿಸಾಟಿಯಿಲ್ಲದ ಜೀವನಶೈಲಿಯಿಂದಾಗಿ ಅವರು ಈ ನಿರ್ಧಾರ ಕೈಗೊಂಡಿದ್ದಾರೆ. “ಆಸ್ಟ್ರೇಲಿಯಾ ಯಾವಾಗಲೂ ನನ್ನ ಹೃದಯದಲ್ಲಿ ವಿಶೇಷ ಸ್ಥಾನ ಪಡೆದಿರುತ್ತದೆ, ಆದರೆ ದುಬೈನ ಶಕ್ತಿ ಮತ್ತು ಮಹತ್ವಾಕಾಂಕ್ಷೆ ನಮಗೆ ಹೊಸ ಉತ್ಸಾಹ ನೀಡಿದೆ” ಎಂದು ಅವರು ಬರೆದುಕೊಂಡಿದ್ದಾರೆ.
ಮಕ್ಕಳ ಶಿಕ್ಷಣ ಮತ್ತು ಕ್ರೀಡೆಗೆ ಉತ್ತಮ ಅವಕಾಶ ದುಬೈನಲ್ಲಿ ನೆಲೆಸಲು ಪ್ರಮುಖ ಕಾರಣಗಳಲ್ಲಿ ಅಲ್ಲಿನ ಶಿಕ್ಷಣ ವ್ಯವಸ್ಥೆಯೂ ಒಂದು ಎಂದು ಬ್ರೆಟ್ ಲೀ ತಿಳಿಸಿದ್ದಾರೆ. “ನನ್ನ ಮಕ್ಕಳು ಇಲ್ಲಿನ ವಾತಾವರಣಕ್ಕೆ ಚೆನ್ನಾಗಿ ಹೊಂದಿಕೊಂಡಿದ್ದಾರೆ. ಇಲ್ಲಿನ ಶಾಲೆಗಳು ಅದ್ಭುತವಾಗಿವೆ ಮತ್ತು ಎಲ್ಲೆಡೆ ಕ್ರೀಡೆಗೆ ಹೆಚ್ಚಿನ ಪ್ರಾಮುಖ್ಯತೆ ನೀಡಲಾಗುತ್ತದೆ. ಇದು ಯುವ ಕುಟುಂಬಗಳಿಗೆ ನೆಲೆಸಲು ಅತ್ಯುತ್ತಮವಾದ ಸ್ಥಳ” ಎಂದು ಅವರು ಮೆಚ್ಚುಗೆ ವ್ಯಕ್ತಪಡಿಸಿದ್ದಾರೆ.
ಅಭಿಮಾನಿಗಳ ಹಾರೈಕೆ ಇನ್ಸ್ಟಾಗ್ರಾಮ್ನಲ್ಲಿ ಬ್ರೆಟ್ ಲೀ ಅವರು ದುಬೈ ಜೀವನದ ಕೆಲವು ಫೋಟೋ ಮತ್ತು ವಿಡಿಯೋಗಳನ್ನು ಹಂಚಿಕೊಂಡಿದ್ದಾರೆ. ಇದರಲ್ಲಿ ಅವರು ತಮ್ಮ ಮಕ್ಕಳೊಂದಿಗೆ ಒಂಟೆ ಸವಾರಿ ಮಾಡುತ್ತಿರುವುದು ಮತ್ತು ದುಬೈನ ಪ್ರಮುಖ ಉದ್ಯಮಿಗಳೊಂದಿಗೆ ಕಾಣಿಸಿಕೊಂಡಿರುವುದು ಕಂಡುಬಂದಿದೆ. ಈ ಪೋಸ್ಟ್ ಗೆ ಅವರ ಅಭಿಮಾನಿಗಳು ಭಾರಿ ಬೆಂಬಲ ಸೂಚಿಸಿದ್ದಾರೆ. “ನೀವು ಮತ್ತು ನಿಮ್ಮ ಕುಟುಂಬ ಸಂತೋಷವಾಗಿರುವುದನ್ನು ನೋಡಿ ನಮಗೆ ಖುಷಿಯಾಗಿದೆ, ನೀವು ಎಲ್ಲಿಯೇ ಇದ್ದರೂ ನಮ್ಮ ಬೆಂಬಲ ನಿಮಗಿರುತ್ತದೆ” ಎಂದು ಅಭಿಮಾನಿಯೊಬ್ಬರು ಕಾಮೆಂಟ್ ಮಾಡಿದ್ದಾರೆ.
ಕ್ರಿಕೆಟ್ ಮೈದಾನದಲ್ಲಿ ಬ್ಯಾಟರ್ಗಳನ್ನು ನಡುಗಿಸುತ್ತಿದ್ದ ಈ ವೇಗಿ, ಈಗ ದುಬೈನ ಶಾಂತಿಯುತ ಬದುಕಿನಲ್ಲಿ ತಮ್ಮ ಮುಂದಿನ ಭವಿಷ್ಯವನ್ನು ಕಂಡುಕೊಂಡಿದ್ದಾರೆ.
https://www.instagram.com/p/DUVdETHEsHt/?utm_source=ig_web_copy_link
