ಕ್ಯಾಮೆರಾಗಳು ಸುಳ್ಳು ಹೇಳುತ್ತವೆಯೇ? ಎಂದು ಕೇಳಿದರೆ ಹೆಚ್ಚಿನವರು ಇಲ್ಲ ಎಂದೇ ಉತ್ತರಿಸುತ್ತಾರೆ. ಆದರೆ, ಬ್ರೆಜಿಲ್ನ ಜಲಪಾತವೊಂದರಲ್ಲಿ ಸೆರೆಯಾಗಿರುವ ಈ ದೃಶ್ಯ ಮಾತ್ರ ನೋಡುಗರಲ್ಲಿ ಇಂತಹದ್ದೊಂದು ಪ್ರಶ್ನೆ ಹುಟ್ಟುಹಾಕುವಂತೆ ಮಾಡಿದೆ. ಜಲಪಾತದ ಭೋರ್ಗರೆವ ನೀರಿನ ನಡುವೆ ಮನುಷ್ಯನ ಹೋಲಿಕೆಯ ನಿಗೂಢ ಆಕೃತಿಯೊಂದು ಕಾಣಿಸಿಕೊಂಡು ಅಷ್ಟೇ ವೇಗವಾಗಿ ಮಾಯವಾಗಿರುವುದು ಈಗ ಇಂಟರ್ನೆಟ್ ಲೋಕದಲ್ಲಿ ಭಾರಿ ಸಂಚಲನ ಮೂಡಿಸಿದೆ.
ಏನಿದು ಘಟನೆ? ರಿಯೊ ಡಿ ಜನೈರೊ ಬಳಿಯ ಜಲಪಾತಕ್ಕೆ ಪ್ರವಾಸ ಹೋಗಿದ್ದ ಮಹಿಳೆಯೊಬ್ಬರು ಜಲಪಾತದ ಸೌಂದರ್ಯವನ್ನು ತನ್ನ ಕ್ಯಾಮೆರಾದಲ್ಲಿ ಸೆರೆಹಿಡಿಯುತ್ತಿದ್ದರು. ಈ ವೇಳೆ ಜಲಪಾತದ ನೀರಿನ ಅಡಿಯಿಂದ ಮನುಷ್ಯನಂತಹ ನೆರಳಿನ ಆಕೃತಿಯೊಂದು ಎದ್ದು ಬರುವಂತೆ ಕಂಡಿದೆ. ಈ ಆಕೃತಿಯು ಕೆಲವು ಸೆಕೆಂಡುಗಳ ಕಾಲ ಅಲ್ಲೇ ನಿಂತು ನಂತರ ಇದ್ದಕ್ಕಿದ್ದಂತೆ ಕಣ್ಮರೆಯಾಗಿದೆ. ಈ ವಿಡಿಯೋ ಸೋಷಿಯಲ್ ಮೀಡಿಯಾದಲ್ಲಿ ವೈರಲ್ ಆಗುತ್ತಲೇ ನೆಟ್ಟಿಗರು ಭಯಭೀತರಾಗಿದ್ದಾರೆ.
ನೆಟ್ಟಿಗರ ವಿಭಿನ್ನ ವಿಶ್ಲೇಷಣೆ: ಈ ವಿಡಿಯೋ ಕಂಡು ಅನೇಕರು ತಮ್ಮದೇ ಆದ ಸಿದ್ಧಾಂತಗಳನ್ನು ಮಂಡಿಸುತ್ತಿದ್ದಾರೆ. “ಇದು ಯಾವುದೋ ಬೇರೆ ಲೋಕದ ಜೀವಿ” ಎಂದು ಕೆಲವರು ಹೇಳಿದರೆ, “ದಕ್ಷಿಣ ಅಮೆರಿಕಾದಲ್ಲಿ ಇವುಗಳನ್ನು ‘ಡುವೆಂಡೆ’ (ನೆರಳಿನ ಭೂತ) ಎಂದು ಕರೆಯುತ್ತಾರೆ, ಇವು ಮನುಷ್ಯರ ಕಣ್ಣಿಗೆ ಕಾಣಿಸಿಕೊಳ್ಳುತ್ತವೆ” ಎಂದು ಇನ್ನು ಕೆಲವರು ಅಭಿಪ್ರಾಯಪಟ್ಟಿದ್ದಾರೆ. ಈ ದೃಶ್ಯವು 2011ರಲ್ಲಿ ಜಪಾನ್ನಲ್ಲಿ ಸಂಭವಿಸಿದ ಸುನಾಮಿ ವೇಳೆ ಕಂಡುಬಂದಿದ್ದ ಕೆಲವು ನಿಗೂಢ ಆಕೃತಿಗಳನ್ನು ನೆನಪಿಸುತ್ತಿದೆ ಎಂದು ಕೂಡ ಕೆಲವು ಬಳಕೆದಾರರು ಕಾಮೆಂಟ್ ಮಾಡಿದ್ದಾರೆ.
ವಿಜ್ಞಾನದ ಉತ್ತರವೇನು? ಇದು ಅಲೌಕಿಕ ಶಕ್ತಿ ಎಂದು ನಂಬಲು ಹಲವರು ಸಿದ್ಧರಿಲ್ಲ. “ಜಲಪಾತದ ವೇಗಕ್ಕೆ ಬಿದ್ದ ಮರದ ದಿಮ್ಮಿ ಅಥವಾ ಯಾವುದೋ ದೊಡ್ಡ ಕಲ್ಲು ನೀರಿನ ಹರಿವನ್ನು ಕ್ಷಣಕಾಲ ತಡೆದಾಗ ಇಂತಹ ಆಕೃತಿ ನಿರ್ಮಾಣವಾಗುವುದು ಸಾಮಾನ್ಯ. ಇದು ಕೇವಲ ಬೆಳಕು ಮತ್ತು ನೀರಿನ ಹರಿವಿನ ಮ್ಯಾಜಿಕ್” ಎಂದು ವಿವರಿಸುವ ವರ್ಗವೂ ಇದೆ. ಇನ್ನು ಕೆಲವರು ತಮಾಷೆಯಾಗಿ “ಇದು ಅಕ್ವಾಮ್ಯಾನ್ ಅಥವಾ ಬ್ಯಾಟ್ಮ್ಯಾನ್ ಇರಬೇಕು” ಎಂದು ಕಾಲೆಳೆದಿದ್ದಾರೆ.
ಈ ವಿಡಿಯೋ ಎಷ್ಟೇ ಭಯಾನಕವಾಗಿ ಕಂಡರೂ, ಇದು ಕಣ್ಣಿನ ಭ್ರಮೆಯೋ ಅಥವಾ ಅತೀಂದ್ರಿಯ ಶಕ್ತಿಯೋ ಎಂಬುದು ಮಾತ್ರ ಇಂದಿಗೂ ಒಂದು ಬಗೆಹರಿಯದ ರಹಸ್ಯವಾಗಿಯೇ ಉಳಿದಿದೆ.
