ಮರುವಿವಾಹವಾದ ವಿಧವೆಗೆ ಪರಿಹಾರ ನಿರಾಕರಿಸಲು ಯಾವುದೇ ಕಾರಣವಿಲ್ಲ: ಹೈಕೋರ್ಟ್ ಆದೇಶ

ಮುಂಬೈ: ವಿಧವೆ ಮರುವಿವಾಹವಾದ ಕಾರಣಕ್ಕೆ ಎಂವಿಎ ಅಡಿಯಲ್ಲಿ ಪರಿಹಾರವನ್ನು ನಿರಾಕರಿಸಲು ಯಾವುದೇ ಕಾರಣವಿಲ್ಲ’ ಎಂದು ಬಾಂಬೆ ಹೈಕೋರ್ಟ್ ಹೇಳಿದೆ.

ಮೋಟಾರು ವಾಹನ ಕಾಯ್ದೆ(ಎಂವಿಎ) ಅಡಿಯಲ್ಲಿ ವಿಧವೆಯ ಮರುವಿವಾಹವು ಅವಳ ಪರಿಹಾರವನ್ನು ನಿರಾಕರಿಸಲು ಕಾರಣವಾಗುವುದಿಲ್ಲ ಎಂದು ಬಾಂಬೆ ಹೈಕೋರ್ಟ್ ಇತ್ತೀಚೆಗೆ ಗಮನಿಸಿದೆ.

ಇಫ್ಕೋ ಟೋಕಿಯೊ ಜನರಲ್ ಇನ್ಶೂರೆನ್ಸ್ ಕಂಪನಿಯು ಭಾಗ್ಯಶ್ರೀ ಗಾಯಕ್ವಾಡ್ ಎಂಬ ಮಹಿಳೆ ಮರುಮದುವೆಯಾಗಿದ್ದು, ಆದ್ದರಿಂದ ಆಕೆಯ ಮೊದಲ ಪತಿ ಸಾವಿನ ಪರಿಹಾರವನ್ನು ನೀಡಬಾರದು ಎಂದು ಪ್ರತಿಪಾದಿಸಿತ್ತು. ಇದನ್ನು ಕೋರ್ಟ್ ಒಪ್ಪಿಲ್ಲ.

ಮೇ 15, 2010 ರಂದು, ಭಾಗ್ಯಶ್ರೀ ಪತಿ ಗಣೇಶ್ ಗಾಯಕವಾಡ ಅವರು ಸಖಾರಾಮ್ ಗಾಯಕವಾಡ ಅವರೊಂದಿಗೆ ಮೋಟಾರ್ ಸೈಕಲ್‌ನಲ್ಲಿ ಹೋಗುತ್ತಿದ್ದಾಗ ಅಪಘಾತದಲ್ಲಿ ತೀವ್ರ ಗಾಯಗೊಂಡಿದ್ದು, ಮೆದುಳಿಗೆ ಪೆಟ್ಟು ಬಿದ್ದಿದ್ದು, ಚಿಕಿತ್ಸೆ ವೇಳೆ ಮೃತಪಟ್ಟಿದ್ದಾರೆ. ಘಟನೆಯ ಸಮಯದಲ್ಲಿ ಮೃತರನ್ನು ಭಾಗ್ಯಶ್ರೀ ಕಾನೂನುಬದ್ಧವಾಗಿ ಮದುವೆಯಾಗಿದ್ದರು. ಹಾಗಾಗಿ ಪರಿಹಾರ ನಿರಾಕರಿಸಲು ಸಾಧ್ಯವಿಲ್ಲ ಎಂದು ಕೋರ್ಟ್ ಹೇಳಿದೆ.

ನ್ಯಾಯಮೂರ್ತಿ ಎಸ್.ಜಿ.ಡಿಗೆ ಅವರ ಏಕಸದಸ್ಯ ಪೀಠವು ಮಾರ್ಚ್ 3 ರಂದು ತನ್ನ ಆದೇಶದಲ್ಲಿ, ಅಪಘಾತದ ಸಮಯದಲ್ಲಿ, ಅವರು ಮೃತರ ಕಾನೂನುಬದ್ಧವಾಗಿ ವಿವಾಹವಾದ ಪತ್ನಿಯಾಗಿದ್ದು, ಪರಿಹಾರದ ಅರ್ಹತೆಗೆ ಸಾಕಷ್ಟು ಆಧಾರವಾಗಿದೆ ಎಂದು ಹೇಳಿದೆ.

ಮೋಟಾರು ಅಪಘಾತ ಕ್ಲೇಮ್ಸ್ ಟ್ರಿಬ್ಯೂನಲ್(ಎಂಎಸಿಟಿ) ಆದೇಶದ ವಿರುದ್ಧದ ಮೇಲ್ಮನವಿಯನ್ನು ವಜಾಗೊಳಿಸಿದ ನ್ಯಾಯಮೂರ್ತಿ ಎಸ್.ಜಿ.ಡಿಗೆ, ಮೃತ ಪತಿಯ ಪರಿಹಾರವನ್ನು ಪಡೆಯಲು ವಿಧವೆಯು ಜೀವಿತಾವಧಿಯಲ್ಲಿ ಅಥವಾ ಪರಿಹಾರವನ್ನು ಪಡೆಯುವವರೆಗೆ ವಿಧವೆಯಾಗಿರಬೇಕು ಎಂದು ಯಾರೂ ನಿರೀಕ್ಷಿಸಲಾಗುವುದಿಲ್ಲ ಎಂದು ಹೇಳಿದ್ದಾರೆ.

ಗಾಯಕ್ವಾಡ್ ಅವರ ಪತಿ ಅಪಘಾತದಲ್ಲಿ ಸಾವನ್ನಪ್ಪಿದಾಗ ಕೇವಲ 19 ವರ್ಷ ವಯಸ್ಸಿನವರಾಗಿದ್ದರು ಎಂಬ ಅಂಶವನ್ನು ನ್ಯಾಯಾಧೀಶರು ಗಮನಿಸಿದರು. ಇದಲ್ಲದೆ ಗಂಡನ ಮರಣದ ನಂತರ, ಪರಿಹಾರವನ್ನು ಪಡೆಯಲು ಮರುಮದುವೆಯನ್ನು ನಿಷೇಧಿಸಲಾಗುವುದಿಲ್ಲ ಎಂದು ಹೇಳಿದ್ದಾರೆ.

ಮೋಟಾರು ವಾಹನ ಕಾಯ್ದೆಯ ಸೆಕ್ಷನ್ 166 ರ ಪ್ರಕಾರ ಮೃತರ ಎಲ್ಲಾ ಅಥವಾ ಯಾವುದೇ ಕಾನೂನು ಪ್ರತಿನಿಧಿಗಳು ಪರಿಹಾರಕ್ಕಾಗಿ ಅರ್ಜಿ ಸಲ್ಲಿಸಬಹುದು ಮತ್ತು ಆದ್ದರಿಂದ ಅಪಘಾತದ ನಂತರ ಪತ್ನಿ ಸಲ್ಲಿಸಿದ ಪರಿಹಾರದ ಅರ್ಜಿ ಕಾನೂನುಬದ್ಧವಾಗಿದೆ ಎಂದು ಹೈಕೋರ್ಟ್ ಹೇಳಿದೆ.

ಭಾಗ್ಯಶ್ರೀ ಗಾಯಕ್ವಾಡ್ ಅವರು ಪರಿಹಾರಕ್ಕಾಗಿ ಅರ್ಜಿ ಸಲ್ಲಿಸಿದ್ದರೂ, ವಿಚಾರಣೆ ಬಾಕಿ ಉಳಿದಿತ್ತು. ಇಫ್ಕೋ ಟೋಕಿಯೊ 10.89 ಲಕ್ಷ ರೂಪಾಯಿಗಳ ಪರಿಹಾರವನ್ನು ಪಾವತಿಸಲು ಹೊಣೆಗಾರರಾಗಿದ್ದಾರೆ ಎಂದು ಪುಣೆಯ ಮೋಟಾರು ಅಪಘಾತ ಕ್ಲೈಮ್ಸ್ ಟ್ರಿಬ್ಯೂನಲ್ ಹೇಳಿದೆ. ಅಷ್ಟರಲ್ಲಿ ಆಕೆ ಮತ್ತೆ ಮದುವೆಯಾದಳು. ವಿಮಾ ಕಂಪನಿಯು ಹೈಕೋರ್ಟ್‌ನ ಮುಂದೆ ಇದನ್ನು ಪ್ರಶ್ನಿಸಿ ಆಕೆ ಮರುಮದುವೆಯಾಗಿದ್ದಾಳೆ ಎಂಬ ಅಂಶವನ್ನು ಎತ್ತಿ ತೋರಿಸಿದೆ.

ವಿಮಾ ಕಂಪನಿಯ ಕ್ಲೈಮ್‌ಗಳನ್ನು ಆಲಿಸಿದ ನಂತರ, ಹಕ್ಕುದಾರರನ್ನು ಪ್ರತಿನಿಧಿಸುವ ವಕೀಲರು ಯಾವುದೇ ರೀತಿಯ ಪರವಾನಗಿ ಉಲ್ಲಂಘನೆಯಾಗಿದೆ ಎಂದು ಸಾಬೀತುಪಡಿಸಲು ಯಾವುದೇ ಪುರಾವೆಗಳಿಲ್ಲ ಎಂದು ಹೇಳಿದರು. ಇದಲ್ಲದೆ, ಗಣೇಶ್ ನಿಧನರಾದಾಗ, ಅವರ ಪತ್ನಿ ವಿಧವೆಯಾಗಿದ್ದರು ಮತ್ತು ನಂತರ, ಅವರು ಹಕ್ಕು ಅರ್ಜಿಯನ್ನು ಸಲ್ಲಿಸಿದರು, ಆದ್ದರಿಂದ, ಆಕೆಗೆ ಪರಿಹಾರವನ್ನು ನಿರಾಕರಿಸಲು ಮರುಮದುವೆ ಕಾರಣವಾಗುವುದಿಲ್ಲ ಎಂದು ಹೇಳಿದ್ದಾರೆ.