ಬುಡಕಟ್ಟು ಮಹಿಳೆಯಿಂದ ಕಾಲು ತೊಳೆಸಿಕೊಂಡ ಬಿಜೆಪಿ ಶಾಸಕನ ಪುತ್ರ ; ಹುಟ್ಟುಹಬ್ಬದ ಸಂಭ್ರಮದಲ್ಲಿ ಪಾದಪೂಜೆ ವಿವಾದ !

ಬಿಜೆಪಿ ಶಾಸಕ ಹಾಗೂ ಮಾಜಿ ಐಪಿಎಸ್ ಅಧಿಕಾರಿ ರಾಜೇಶ್ ಕುಮಾರ್ ಅವರ 34 ವರ್ಷದ ಪುತ್ರ ರಿತ್ವಿಕ್ ಕುಮಾರ್ ಅವರ ಹುಟ್ಟುಹಬ್ಬದ ಆಚರಣೆಯ ವೇಳೆ, ಬುಡಕಟ್ಟು (ಆದಿವಾಸಿ) ಮಹಿಳೆಯೊಬ್ಬರು ಅವರ ಪಾದಗಳನ್ನು ನೀರಿನಿಂದ ತೊಳೆದ ಘಟನೆಯ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ಭಾರಿ ಕೋಲಾಹಲ ಸೃಷ್ಟಿಸಿದೆ. ಪಶ್ಚಿಮ ಬಂಗಾಳದ ಉತ್ತರ 24 ಪರಗಣ ಜಿಲ್ಲೆಯ ಶ್ಯಾಮನಗರದ ಕೌಗಾಚಿ ಎಂಬಲ್ಲಿ ನಡೆದ ಈ ಘಟನೆಯು ಇದೀಗ ರಾಜ್ಯದಲ್ಲಿ ತೀವ್ರ ಸಾಮಾಜಿಕ ಮತ್ತು ರಾಜಕೀಯ ಸಮರಕ್ಕೆ ನಾಂದಿ ಹಾಡಿದೆ.

ಸಾಮಾಜಿಕ ಸಮಾನತೆ ಮತ್ತು ಪರಿಶಿಷ್ಟ ಪಂಗಡಗಳ (ST) ಸಬಲೀಕರಣದ ಬಗ್ಗೆ ಮಾತನಾಡುವ ಬಿಜೆಪಿ ಮುಖಂಡರ ಮನೆಯವರೇ ಈ ರೀತಿ ಬುಡಕಟ್ಟು ಮಹಿಳೆಯ ಕೈಯಿಂದ ಪಾದ ತೊಳಿಸಿಕೊಂಡಿರುವುದು ತೀವ್ರ ಟೀಕೆಗೆ ಗುರಿಯಾಗಿದೆ.

ವೈರಲ್ ವಿಡಿಯೋದಲ್ಲಿ ಏನಿದೆ ?

ವೈರಲ್ ಆಗಿರುವ ವಿಡಿಯೋ ತುಣುಕಿನಲ್ಲಿ, ರಿತ್ವಿಕ್ ಕುಮಾರ್ ಸುರೋಲಿಯಾ ಅವರ ಹುಟ್ಟುಹಬ್ಬದ ಅಂಗವಾಗಿ ಏರ್ಪಡಿಸಲಾಗಿದ್ದ ಸಾರ್ವಜನಿಕ ಕಾರ್ಯಕ್ರಮದಲ್ಲಿ ಆದಿವಾಸಿ ಮಹಿಳೆಯೊಬ್ಬರು ರಿತ್ವಿಕ್ ಅವರ ಪಾದಗಳನ್ನು ನೀರಿನಿಂದ ತೊಳೆಯುತ್ತಿರುವುದು ಹಾಗೂ ಹಣೆಗೆ ತಿಲಕವಿಡುತ್ತಿರುವುದು ಕಾಣಿಸುತ್ತದೆ. ಈ ವಿಡಿಯೋವನ್ನು ಸಿಪಿಎಂ ಸೇರಿದಂತೆ ವಿರೋಧ ಪಕ್ಷಗಳ ಮುಖಂಡರು ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡು ಕಟುವಾಗಿ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ.

ಆದರೆ, ಇದಕ್ಕೆ ಪ್ರತಿಯಾಗಿ ಬಿಜೆಪಿಯ ಬೆಂಬಲಿಗರು ಹಂಚಿಕೊಂಡಿರುವ ಪೂರ್ಣ ಪ್ರಮಾಣದ ವಿಡಿಯೋದಲ್ಲಿ, ಮಹಿಳೆ ಪಾದ ತೊಳೆದ ತಕ್ಷಣವೇ ರಿತ್ವಿಕ್ ಅವರು ಆಕೆಯ ಕಾಲಿಗೆ ಬಿದ್ದು ನಮಸ್ಕರಿಸಿ ಆಶೀರ್ವಾದ ಪಡೆದುಕೊಳ್ಳುವ ದೃಶ್ಯವೂ ದಾಖಲಾಗಿದೆ.

ಶಾಸಕನ ಪುತ್ರ ನೀಡಿದ ಸ್ಪಷ್ಟನೆ ಏನು ?

ಘಟನೆ ವಿವಾದಕ್ಕೀಡಾಗುತ್ತಿದ್ದಂತೆ ಸ್ವತಃ ರಿತ್ವಿಕ್ ಕುಮಾರ್ ಸ್ಪಷ್ಟನೆ ನೀಡಿದ್ದು, ಎರಡೂ ವಿಡಿಯೋಗಳು ನೈಜವಾದವು ಎಂದಿದ್ದಾರೆ. “ನನ್ನ ಹುಟ್ಟುಹಬ್ಬದ ಅಂಗವಾಗಿ ಕೌಗಾಚಿಯ ಆದಿವಾಸಿ ಪಾರಾದಲ್ಲಿ ಸಾಮಾಜಿಕ ಸಂಪರ್ಕ ಕಾರ್ಯಕ್ರಮವನ್ನು ಹಮ್ಮಿಕೊಳ್ಳಲಾಗಿತ್ತು. ಈ ವೇಳೆ ಆ ಮಹಿಳೆ ಇದ್ದಕ್ಕಿದ್ದಂತೆ ಬಂದು ನನ್ನ ಪಾದ ತೊಳೆಯಲು ಆರಂಭಿಸಿದರು. ಇದು ಮೊದಲೇ ಯೋಜಿಸಿದ್ದಲ್ಲ. ಆಕೆಯ ಸಂಪ್ರದಾಯದ ಪ್ರಕಾರ ಆಕೆ ಹಾಗೆ ಮಾಡಿದರೂ, ನನ್ನ ಮನಸ್ಸಾಕ್ಷಿಗೆ ಅದು ಒಪ್ಪಿಗೆಯಾಗಲಿಲ್ಲ. ಸ್ಥಳದಲ್ಲೇ ಆಕೆಗೆ ‘ಬೇಡ’ ಎಂದು ಹೇಳಿ ಅವಮಾನಿಸುವುದು ಸರಿಯಲ್ಲ ಎಂದು ಸುಮ್ಮನಾದೆ. ಆಕೆ ಪಾದ ತೊಳೆದ ತಕ್ಷಣವೇ ನಾನು ಗೌರವದಿಂದ ಆಕೆಯ ಪಾದಗಳನ್ನು ಮುಟ್ಟಿ ನಮಸ್ಕರಿಸಿದೆ. ಆದರೆ, ಈ ಘಟನೆಯಿಂದ ನನ್ನ ಮತ್ತು ಪಕ್ಷದ ಬಗ್ಗೆ ತಪ್ಪು ಸಂದೇಶ ರವಾನೆಯಾಗಿರುವುದು ಬೇಸರ ತಂದಿದೆ,” ಎಂದು ಅವರು ಹೇಳಿದ್ದಾರೆ.

ವಿಪಕ್ಷಗಳ ತೀವ್ರ ಆಕ್ರೋಶ:

ಸಿಪಿಎಂ ಮುಖಂಡೆ ಗಾರ್ಗಿ ಚಟರ್ಜಿ ಈ ಘಟನೆಯನ್ನು ತೀವ್ರವಾಗಿ ಖಂಡಿಸಿದ್ದು, “ಶಾಸಕರೊಬ್ಬರ ಮಗನ ಕಾಲನ್ನು ಬುಡಕಟ್ಟು ಮಹಿಳೆ ತೊಳೆಯುತ್ತಿರುವುದು ಅತ್ಯಂತ ಆಘಾತಕಾರಿ ಸಂಗತಿ. ಅವರ ತಂದೆ ಚುನಾವಣೆಯಲ್ಲಿ ಗೆದ್ದು ಶಾಸಕರಾಗಿದ್ದಾರೆಯೇ ವಿನಃ ಅವರ ಕಾಲು ತೊಳೆಯುವ ಸಂಸ್ಕೃತಿ ಬಂಗಾಳದಲ್ಲಿ ಎಂದೂ ಕಂಡಿಲ್ಲ. ಆಕೆ ಪಾದ ತೊಳೆದ ನಂತರ ಈತ ಕಾಲಿಗೆ ಬಿದ್ದಿರಬಹುದು, ಆದರೆ ಅದರಿಂದ ಮಾಡಿದ ತಪ್ಪು ಸರಿಹೋಗುವುದಿಲ್ಲ. ಇದು ಬುಡಕಟ್ಟು ಮತ್ತು ದಲಿತ ಸಮುದಾಯಗಳ ಬಗ್ಗೆ ಬಿಜೆಪಿಯ ಅಸಲಿ ಮನಸ್ಥಿತಿಯನ್ನು ಬಿಂಬಿಸುತ್ತದೆ,” ಎಂದು ವಾಗ್ದಾಳಿ ನಡೆಸಿದ್ದಾರೆ.

ಸಂಘಟನೆಗಳ ಆಕ್ಷೇಪ:

ಆರ್‌ಎಸ್‌ಎಸ್‌ ಅಂಗಸಂಸ್ಥೆಯಾದ ‘ವನವಾಸಿ ಕಲ್ಯಾಣ ಆಶ್ರಮ’ದ ಹಿರಿಯ ಪದಾಧಿಕಾರಿಯೊಬ್ಬರು ಘಟನೆಗೆ ವಿಷಾದ ವ್ಯಕ್ತಪಡಿಸಿದ್ದು, “ಇದು ಅತ್ಯಂತ ದುರದೃಷ್ಟಕರ ಘಟನೆ. ಹಿಂದೂ ಸಮಾಜ ಮತ್ತು ವನವಾಸಿ ಬಂಧುಗಳ ನಡುವಿನ ಅಂತರವನ್ನು ಕಡಿಮೆ ಮಾಡುವ ನಮ್ಮ ಮೂಲ ಧ್ಯೇಯಕ್ಕೆ ಇಂತಹ ಘಟನೆಗಳು ಹಿನ್ನಡೆ ತರುತ್ತವೆ. ಇದನ್ನು ತಪ್ಪಿಸಬೇಕಿತ್ತು,” ಎಂದು ಅಭಿಪ್ರಾಯಪಟ್ಟಿದ್ದಾರೆ.

ಇತ್ತ ಪ್ರಮುಖ ಬುಡಕಟ್ಟು ಸಂಘಟನೆಯಾದ ‘ದಿಶಾಮ್ ಆದಿವಾಸಿ ಗಾಂವ್ತಾ’ ಅಧ್ಯಕ್ಷ ರಾಬಿನ್ ಸೊರೇನ್ ಮಾತನಾಡಿ, “ವಿಶೇಷ ಅತಿಥಿಗಳಿಗೆ ಗೌರವಾರ್ಥವಾಗಿ ಪಾದ ತೊಳೆಯುವ ಸಂಪ್ರದಾಯ ನಮ್ಮ ಸಮುದಾಯದವರ ನಡುವೆ ಮಾತ್ರ ಚಾಲ್ತಿಯಲ್ಲಿದೆ ಹೊರತು, ಹೊರಗಿನ ವ್ಯಕ್ತಿಗಳಿಗೆ ಇಂತಹ ಆಚರಣೆ ಮಾಡುವ ಪದ್ಧತಿ ಇಲ್ಲ,” ಎಂದು ಸ್ಪಷ್ಟಪಡಿಸಿದ್ದಾರೆ.