- ಭಯೋತ್ಪಾದನೆಯ ವಿರುದ್ಧದ ಹೋರಾಟವನ್ನು ಮತ್ತಷ್ಟು ಬಲಪಡಿಸುವ ಉದ್ದೇಶದಿಂದ ಕೇಂದ್ರ ಸರ್ಕಾರ ಮಹತ್ವದ ಕ್ರಮ ಕೈಗೊಂಡಿದೆ. ಶನಿವಾರ ಪಾಕಿಸ್ತಾನದಲ್ಲಿ ನೆಲೆಸಿರುವ ಜೈಶ್-ಎ-ಮೊಹಮ್ಮದ್ (JeM) ಮತ್ತು ಲಷ್ಕರ್-ಎ-ತೊಯ್ಬಾ (LeT) ಸಂಘಟನೆಗಳಿಗೆ ಸೇರಿದ 23 ಉಗ್ರರನ್ನು ಅಧಿಕೃತವಾಗಿ ‘ಭಯೋತ್ಪಾದಕರು’ ಎಂದು ಘೋಷಿಸಿದೆ.ಗೃಹ ಸಚಿವಾಲಯ ಹೊರಡಿಸಿದ ಅಧಿಸೂಚನೆಯ ಪ್ರಕಾರ, ಈ ಎಲ್ಲರು ಜಮ್ಮು-ಕಾಶ್ಮೀರದಲ್ಲಿ ಉಗ್ರರ ನೇಮಕಾತಿ, ಗಡಿ ನುಸುಳಿಕೆ, ತರಬೇತಿ, ಡ್ರೋನ್ ಮೂಲಕ ಶಸ್ತ್ರಾಸ್ತ್ರ ಪೂರೈಕೆ ಹಾಗೂ ಉಗ್ರ ದಾಳಿಗಳ ಸಂಚು ರೂಪಿಸುವ ಚಟುವಟಿಕೆಗಳಲ್ಲಿ ಭಾಗಿಯಾಗಿದ್ದರು.
- ಈ ಕ್ರಮವನ್ನು, ಗಡಿ ಆಚೆಯಿಂದ ಕಾರ್ಯನಿರ್ವಹಿಸುತ್ತಿರುವ ಉಗ್ರ ಜಾಲಗಳು, ಡ್ರೋನ್ ಮೂಲಕ ಶಸ್ತ್ರಾಸ್ತ್ರ ಪೂರೈಕೆ ಮತ್ತು ಸಾಮಾಜಿಕ ಜಾಲತಾಣಗಳ ಮೂಲಕ ನಡೆಯುತ್ತಿರುವ ಉಗ್ರರ ನೇಮಕಾತಿ ಚಟುವಟಿಕೆಗಳ ಮೇಲೆ ಭದ್ರತಾ ಸಂಸ್ಥೆಗಳು ಕಟ್ಟುನಿಟ್ಟಿನ ನಿಗಾ ವಹಿಸಿರುವ ಸಂದರ್ಭದಲ್ಲಿ ಕೈಗೊಳ್ಳಲಾಗಿದೆ.
- UAPA ಅಡಿಯಲ್ಲಿ ಉಗ್ರರೆಂದು ಘೋಷಣೆ
- ಕೇಂದ್ರ ಸರ್ಕಾರ ಕಾನೂನುಬಾಹಿರ ಚಟುವಟಿಕೆಗಳ ತಡೆ ಕಾಯ್ದೆ (UAPA) ಅಡಿಯಲ್ಲಿ ಈ 23 ಮಂದಿಯನ್ನು ಭಯೋತ್ಪಾದಕರಾಗಿ ಘೋಷಿಸಿದೆ.ಅವರ ಹೆಸರುಗಳನ್ನು UAPAಯ ನಾಲ್ಕನೇ ಅನುಸೂಚಿಗೆ (Fourth Schedule) ಸೇರಿಸಲಾಗಿದೆ. ಇವರಲ್ಲಿ ಬಹುತೇಕರು ಜೈಶ್-ಎ-ಮೊಹಮ್ಮದ್ ಮತ್ತು ಲಷ್ಕರ್-ಎ-ತೊಯ್ಬಾ ಸಂಘಟನೆಗಳಿಗೆ ಸೇರಿದವರಾಗಿದ್ದು, ಪಾಕಿಸ್ತಾನ ಅಥವಾ ಪಾಕಿಸ್ತಾನ ಆಕ್ರಮಿತ ಕಾಶ್ಮೀರ (PoK)ದಲ್ಲಿ ನೆಲೆಸಿದ್ದಾರೆ.
- ಹಫೀಜ್ ಸಯೀದ್ನ ಆಪ್ತ ಸಹಚರರೂ ಪಟ್ಟಿಯಲ್ಲಿ
- ಈ ಪಟ್ಟಿಯಲ್ಲಿ ಲಷ್ಕರ್ ಮುಖ್ಯಸ್ಥ ಹಫೀಜ್ ಮೊಹಮ್ಮದ್ ಸಯೀದ್ ಅವರ ಮೂವರು ಆಪ್ತ ಸಹಚರರೂ ಸೇರಿದ್ದಾರೆ.ಗೃಹ ಸಚಿವಾಲಯದ ಪ್ರಕಾರ, ಇವರು ಭಾರತದಲ್ಲಿ ಉಗ್ರ ಚಟುವಟಿಕೆಗಳನ್ನು ನಡೆಸುವುದು ಹಾಗೂ ಯುವಕರನ್ನು ಉಗ್ರವಾದದತ್ತ ಸೆಳೆಯುವಲ್ಲಿ ನೇರವಾಗಿ ತೊಡಗಿಸಿಕೊಂಡಿದ್ದರು.
- 54 ವರ್ಷದ ರಾಣಾ ಇಫ್ತಿಖಾರ್ – ವಿವಿಧ ಜಿಹಾದಿ ಸಂಘಟನೆಗಳ ನಡುವೆ ಸಮನ್ವಯ ಸಾಧಿಸಿ ಯುವಕರನ್ನು ಉಗ್ರ ಚಟುವಟಿಕೆಗಳಿಗೆ ಪ್ರೇರೇಪಿಸುತ್ತಿದ್ದ.
- 52 ವರ್ಷದ ಅಬ್ದುಲ್ ರಊಫ್ – ಲಷ್ಕರ್ ಹಾಗೂ ಜಮಾತ್-ಉದ್-ದವಾ ಸಂಘಟನೆಗಳಿಗೆ ಸಂಬಂಧ ಹೊಂದಿದ್ದು, ಉಗ್ರ ಚಟುವಟಿಕೆಗಳಿಗೆ ಹಣ ಸಂಗ್ರಹಿಸಿ, ಸಂಚು ರೂಪಿಸುತ್ತಿದ್ದ. ಇವನು ನೇರವಾಗಿ ಹಫೀಜ್ ಸಯೀದ್ನ ನಿರ್ದೇಶನದಲ್ಲಿ ಕಾರ್ಯನಿರ್ವಹಿಸುತ್ತಿದ್ದ.
- 51 ವರ್ಷದ ಹಫೀಜ್ ಖಾಲಿದ್ ವಲೀದ್ – ಹಲವು ಉಗ್ರ ದಾಳಿಗಳ ಪ್ರಮುಖ ಸಂಚುಕೋರನಾಗಿದ್ದು, ಹಫೀಜ್ ಸಯೀದ್ನ ಭದ್ರತೆಯಲ್ಲೇ ಕಾರ್ಯನಿರ್ವಹಿಸುತ್ತಿದ್ದ.
- ನಾಗ್ರೋಟಾ ಮತ್ತು ಸುಂಜ್ವಾನ್ ದಾಳಿಗಳ ಸಂಪರ್ಕ
- ಪಟ್ಟಿಯಲ್ಲಿರುವ ಮೂರು ಉಗ್ರರು 2016ರ ನಾಗ್ರೋಟಾ ಸೇನಾ ಶಿಬಿರದ ದಾಳಿಗೆ ಸಂಬಂಧ ಹೊಂದಿದ್ದಾರೆ ಎಂದು ಸರ್ಕಾರ ತಿಳಿಸಿದೆ. ಇನ್ನಿಬ್ಬರು 2018ರ ಸುಂಜ್ವಾನ್ ಸೇನಾ ಶಿಬಿರದ ದಾಳಿಗೆ ಸಂಬಂಧಪಟ್ಟಿದ್ದಾರೆ.
- ಮುಫ್ತಿ ಮೊಹಮ್ಮದ್ ಅಸ್ಗರ್ ಖಾನ್ ಅಲಿಯಾಸ್ ಅಬು ಸಾದ್ (52) – PoKನ ಅಬ್ಬಾಸ್ಪುರ ನಿವಾಸಿಯಾಗಿದ್ದು, ಜೈಶ್ ಸಂಘಟನೆಯ ಲಾಂಚಿಂಗ್ ಕಮಾಂಡರ್ ಎಂದು ಗುರುತಿಸಲಾಗಿದೆ. 2016ರ ನಾಗ್ರೋಟಾ ದಾಳಿಯ ಪ್ರಮುಖ ಸಂಚುಕೋರರಲ್ಲಿ ಒಬ್ಬನೆಂದು ಆರೋಪಿಸಲಾಗಿದೆ.
- ಹಫೀಜ್ ಅಬ್ದುಲ್ ಶಕೂರ್ (56) – ನಾಗ್ರೋಟಾ ದಾಳಿಯಲ್ಲಿ ಭಾಗಿಯಾಗಿದ್ದು, ಜಮ್ಮು-ಕಾಶ್ಮೀರಕ್ಕೆ ಉಗ್ರರನ್ನು ನುಸುಳಿಸುವ ಕಾರ್ಯದಲ್ಲಿ ತೊಡಗಿದ್ದಾನೆ ಎನ್ನಲಾಗಿದೆ.
- ಅಬ್ದುಲ್ಲಾ ಜೆಹಾದಿ (47) – ನಾಗ್ರೋಟಾ ದಾಳಿಯೊಂದಿಗೆ ಸಂಬಂಧ ಹೊಂದಿದ್ದಾನೆ.
- ಸುಂಜ್ವಾನ್ ದಾಳಿಯ ಆರೋಪಿಗಳು
- ಮಸೂದ್ ಇಲಿಯಾಸ್ ಕಾಶ್ಮೀರಿ ಅಲಿಯಾಸ್ ಮುಫ್ತಿ ಮಸೂದ್ ಇಲಿಯಾಸ್ (41) – PoKನ ರಾವಲಕೋಟ್ ನಿವಾಸಿ. ಜೈಶ್ ಸಂಘಟನೆಯ ಹಿರಿಯ ನಾಯಕನಾಗಿದ್ದು, ಯುವಕರ ನೇಮಕಾತಿ, ತರಬೇತಿ ಮತ್ತು ಭಾರತಕ್ಕೆ ನುಸುಳಿಸುವ ಕೆಲಸದಲ್ಲಿ ತೊಡಗಿದ್ದ. 2022ರ ಏಪ್ರಿಲ್ 22ರಂದು ಜಮ್ಮುವಿನ ಸುಂಜ್ವಾನ್ನಲ್ಲಿ ನಡೆದ ಭದ್ರತಾ ಪಡೆಗಳ ಮೇಲಿನ ದಾಳಿಗೂ ಸಂಬಂಧ ಹೊಂದಿದ್ದಾನೆ.
- ಮೊಹಮ್ಮದ್ ಮುಸದ್ದಿಕ್ ಅಲಿಯಾಸ್ ಡಾಕ್ಟರ್/ಹಮ್ಜಾ (38) – ಪಾಕಿಸ್ತಾನದ ನಾರೋವಾಲ್ ಜಿಲ್ಲೆಯ ಶಕರಗಢ ನಿವಾಸಿ. ಜೈಶ್ನ ಪ್ರಮುಖ ನುಸುಳಿಕೆ ಸಂಯೋಜಕನಾಗಿದ್ದು, ಸುಂಜ್ವಾನ್ ದಾಳಿಯಲ್ಲಿ ಭಾಗಿಯಾಗಿದ್ದಾನೆ. ಡ್ರೋನ್ ಮೂಲಕ ಶಸ್ತ್ರಾಸ್ತ್ರ ಮತ್ತು ಸ್ಫೋಟಕಗಳನ್ನು ಗಡಿ ದಾಟಿಸಿ ಕಳುಹಿಸಿದ್ದಾನೆ. ಜೊತೆಗೆ, ಸಾಮಾಜಿಕ ಜಾಲತಾಣಗಳ ಮೂಲಕ ಯುವಕರ ನೇಮಕಾತಿ ನಡೆಸುತ್ತಿದ್ದ ಜೈಶ್ನ ಸೈಬರ್ ವಿಭಾಗವನ್ನೂ ನಿರ್ವಹಿಸುತ್ತಿದ್ದನೆಂದು ಆರೋಪಿಸಲಾಗಿದೆ.
- ಡ್ರೋನ್, ಸೈಬರ್ ಮತ್ತು ಹಣಕಾಸು ಜಾಲದ ವಿರುದ್ಧ ಕ್ರಮಆಧುನಿಕ ತಂತ್ರಜ್ಞಾನ ಬಳಸಿ ಉಗ್ರ ಚಟುವಟಿಕೆ ನಡೆಸುತ್ತಿದ್ದ ಹಲವು ಮಂದಿಯ ಹೆಸರನ್ನೂ ಸರ್ಕಾರ ಪಟ್ಟಿಗೆ ಸೇರಿಸಿದೆ.
- ಮೊಹಮ್ಮದ್ ಶಾಹಿದ್ ಫೈಸಲ್ (40) – ಲಷ್ಕರ್, ಅಲ್-ಖೈದಾ ಮತ್ತು ISIS ಜಾಲಗಳಿಗೆ ಸಂಬಂಧ ಹೊಂದಿದ್ದಾನೆ. ಸಾಮಾಜಿಕ ಜಾಲತಾಣಗಳ ಮೂಲಕ ನೇಮಕಾತಿ ನಡೆಸಿ, ಪಾಕಿಸ್ತಾನದಲ್ಲಿ ಶಸ್ತ್ರಾಸ್ತ್ರ ತರಬೇತಿ ನೀಡಿ, ಉಗ್ರ ಚಟುವಟಿಕೆಗಳಿಗೆ ಹಣ ಸಂಗ್ರಹಿಸುತ್ತಿದ್ದ. ಡೇಟಾ ಎನ್ಕ್ರಿಪ್ಷನ್ ಹಾಗೂ ನಕಲಿ ಗುರುತುಗಳನ್ನು ಬಳಸುವ ತರಬೇತಿಯನ್ನೂ ನೀಡುತ್ತಿದ್ದನೆಂದು ಆರೋಪಿಸಲಾಗಿದೆ.
- ನಜೀರ್ ಅಹ್ಮದ್ ಗುಜ್ಜರ್ (38) – ಡ್ರೋನ್ ಮೂಲಕ ಶಸ್ತ್ರಾಸ್ತ್ರಗಳನ್ನು ಸಾಗಾಟ ಮಾಡುತ್ತಿದ್ದನೆಂದು ಆರೋಪಿಸಲಾಗಿದೆ.
- ವಸೀಮ್ ನೂರ್ ಜಾಟ್ – ಡ್ರೋನ್ ಮೂಲಕ ಶಸ್ತ್ರಾಸ್ತ್ರ ಮತ್ತು ಸ್ಫೋಟಕಗಳನ್ನು ಪೂರೈಸುತ್ತಿದ್ದ.
- ಫಿರ್ದೌಸ್ ಅಹ್ಮದ್ ಭಟ್ – ವಿದೇಶಿ ಉಗ್ರರಿಗೆ ಭಾರತಕ್ಕೆ ಸುರಕ್ಷಿತವಾಗಿ ನುಸುಳಲು ನೆರವಾಗುತ್ತಿದ್ದ.
- ಗುಲಾಂ ಫರೀದ್ – ಅಕ್ರಮ ಚಟುವಟಿಕೆಗಳಲ್ಲಿ ತೊಡಗಿ, ಇತರ ಉಗ್ರರಿಗೆ ಶಸ್ತ್ರಾಸ್ತ್ರ ಒದಗಿಸುತ್ತಿದ್ದ.ಹಾರೂನ್ ರಶೀದ್ ಗನಿ – ಯುವಕರನ್ನು ಉಗ್ರ ಸಂಘಟನೆಗಳಿಗೆ ಸೇರಿಸುವ ಕಾರ್ಯದಲ್ಲಿ ತೊಡಗಿದ್ದ.
- ಈ ಕ್ರಮದ ಉದ್ದೇಶವೇನು?
- ಗೃಹ ಸಚಿವಾಲಯದ ಪ್ರಕಾರ, ಡ್ರೋನ್, ಎನ್ಕ್ರಿಪ್ಟೆಡ್ ಸಂವಹನ ಮತ್ತು ಆನ್ಲೈನ್ ನೇಮಕಾತಿಯ ಮೂಲಕ ಜಮ್ಮು-ಕಾಶ್ಮೀರದಲ್ಲಿ ಉಗ್ರ ಚಟುವಟಿಕೆಗಳನ್ನು ಮುಂದುವರಿಸುತ್ತಿರುವ ಗಡಿ ಆಚೆಯ ಜಾಲಗಳ ಮೇಲೆ ಭದ್ರತಾ ಮತ್ತು ತನಿಖಾ ಸಂಸ್ಥೆಗಳು ನಿರಂತರ ನಿಗಾ ಇಟ್ಟಿವೆ.ಈ 23 ಮಂದಿಯನ್ನು UAPA ಅಡಿಯಲ್ಲಿ ಭಯೋತ್ಪಾದಕರಾಗಿ ಘೋಷಿಸುವುದರ ಉದ್ದೇಶ. ಅವರ ಆಸ್ತಿಗಳನ್ನು ಜಪ್ತಿ ಮಾಡುವುದು,ಪ್ರಯಾಣದ ಮೇಲೆ ನಿರ್ಬಂಧ ಹೇರಿಸುವುದು,ಅವರ ಉಗ್ರ ಜಾಲವನ್ನು ಸಂಪೂರ್ಣವಾಗಿ ದುರ್ಬಲಗೊಳಿಸುವುದು. ಕೇಂದ್ರ ಸರ್ಕಾರದ ಅಭಿಪ್ರಾಯದಂತೆ, ಪಾಕಿಸ್ತಾನದಿಂದ ಕಾರ್ಯನಿರ್ವಹಿಸುತ್ತಿರುವ ಈ ಜಾಲಗಳು ಇತ್ತೀಚಿನ ವರ್ಷಗಳಲ್ಲಿ ಡ್ರೋನ್ ಮೂಲಕ ಶಸ್ತ್ರಾಸ್ತ್ರ ಪೂರೈಕೆ ಹಾಗೂ ಸಾಮಾಜಿಕ ಜಾಲತಾಣಗಳ ಮೂಲಕ ಉಗ್ರವಾದವನ್ನು ಹರಡುವ ಹೊಸ ತಂತ್ರಗಳನ್ನು ಅಳವಡಿಸಿಕೊಂಡಿವೆ. ಈ ಘೋಷಣೆಯಿಂದ ಭದ್ರತಾ ಸಂಸ್ಥೆಗಳಿಗೆ ಅವರ ವಿರುದ್ಧ ಇನ್ನಷ್ಟು ಕಠಿಣ ಕಾನೂನು ಕ್ರಮ ಕೈಗೊಳ್ಳಲು ಅವಕಾಶ ದೊರೆಯಲಿದೆ.
ಭಯೋತ್ಪಾದಕರಿಗೆ ಕೇಂದ್ರದ ಬಿಗ್ ಶಾಕ್ : UAPA ಅಡಿಯಲ್ಲಿ 23 ಉಗ್ರರ ಹೆಸರು ಸೇರ್ಪಡೆ
For Latest News Updates, Join Our
Whatsapp Community🚩
