ಇಂದಿನ ದಿನಗಳಲ್ಲಿ ಉದ್ಯೋಗಕ್ಕೆ ಯಾವುದೇ ಗ್ಯಾರಂಟಿ ಇಲ್ಲದಂತಾಗಿದೆ. ಇದ್ದಕ್ಕಿದ್ದಂತೆ ಕೆಲಸ ಕಳೆದುಕೊಳ್ಳುವ ಪರಿಸ್ಥಿತಿ ನಿರ್ಮಾಣವಾಗಿದೆ. ಉದ್ಯೋಗ ಯಾವಾಗ ಇರುತ್ತದೋ ಅಥವಾ ಯಾವಾಗ ಹೋಗುತ್ತದೋ ತಿಳಿಯದಂತಾಗಿದೆ. ಈ ಹಿಂದೆ ಕೋವಿಡ್ ಬಿಕ್ಕಟ್ಟಿನ ಸಮಯದಲ್ಲಿ ದೊಡ್ಡ ದೊಡ್ಡ ಕಂಪನಿಗಳು ಸಹ ಭಾರಿ ಸಂಖ್ಯೆಯಲ್ಲಿ ಉದ್ಯೋಗಿಗಳನ್ನು ವಜಾಗೊಳಿಸಿದ್ದವು. ಸಣ್ಣ ಸಂಸ್ಥೆಗಳಂತೂ ಸಂಪೂರ್ಣವಾಗಿ ಮುಚ್ಚಿಹೋದವು. ಕೋವಿಡ್ ನಂತರ ಚೇತರಿಸಿಕೊಂಡಂತೆ ಕಂಡ ಮಾರುಕಟ್ಟೆ, ಈಗ ಮತ್ತೆ ಆರ್ಥಿಕ ಹಿಂಜರಿತದ ಭೀತಿಯಿಂದಾಗಿ ಬದಲಾಗಿದೆ. ದೈತ್ಯ ಟೆಕ್ ಕಂಪನಿಗಳು ಪುನರ್ವ್ಯವಸ್ಥೀಕರಣದ ಹೆಸರಿನಲ್ಲಿ ಮತ್ತೆ ಲೇಆಫ್ಗಳನ್ನು ಘೋಷಿಸುತ್ತಿವೆ.
ಇತ್ತೀಚಿನ ದಿನಗಳಲ್ಲಿ ಕೃತಕ ಬುದ್ಧಿಮತ್ತೆ (AI) ಕ್ರಾಂತಿ ಸೃಷ್ಟಿಸುತ್ತಿದೆ. AI ಆಗಮನದಿಂದ ಮಾನವ ಹಸ್ತಕ್ಷೇಪವಿಲ್ಲದ ವಲಯಗಳಲ್ಲಿ ಕಂಪನಿಗಳು ಉದ್ಯೋಗಿಗಳನ್ನು ತೆಗೆದುಹಾಕುತ್ತಿವೆ. ಕಂಪನಿಗಳು ವೆಚ್ಚ ತಗ್ಗಿಸಲು ಮತ್ತು ಸಾಮರ್ಥ್ಯ ಹೆಚ್ಚಿಸಿಕೊಳ್ಳಲು AI ಮೇಲೆ ಹೂಡಿಕೆ ಮಾಡುತ್ತಿವೆ. ಅಮೆಜಾನ್, ಮೈಕ್ರೋಸಾಫ್ಟ್, ಗೂಗಲ್ ಮತ್ತು ಆಪಲ್ ಸೇರಿದಂತೆ ಅನೇಕ ಐಟಿ ಸಂಸ್ಥೆಗಳು ಇದೇ ಹಾದಿಯಲ್ಲಿವೆ.
UPS ಕಂಪನಿಯಿಂದ 30 ಸಾವಿರ ಉದ್ಯೋಗಿಗಳ ವಜಾ: ಅಮೆಜಾನ್ ಇತ್ತೀಚೆಗೆ 30 ಸಾವಿರ ಮಂದಿಯನ್ನು ವಜಾಗೊಳಿಸುವ ಪ್ರಕ್ರಿಯೆಯಲ್ಲಿ ಅಕ್ಟೋಬರ್ನಲ್ಲಿ 14 ಸಾವಿರ ಮತ್ತು ಈಗ 16 ಸಾವಿರ ಮಂದಿಯನ್ನು ತೆಗೆದುಹಾಕಿದೆ. ಈಗ ಇದೇ ಹಾದಿಯಲ್ಲಿ ಅಂತರಾಷ್ಟ್ರೀಯ ಲಾಜಿಸ್ಟಿಕ್ಸ್ ಸಂಸ್ಥೆ UPS (United Parcel Service) ಕೂಡ 30,000 ಉದ್ಯೋಗಿಗಳನ್ನು ವಜಾಗೊಳಿಸುವುದಾಗಿ ಘೋಷಿಸಿ ಆಘಾತ ನೀಡಿದೆ. ಅಮೆಜಾನ್ನಿಂದ ಆರ್ಡರ್ಗಳು ಕಡಿಮೆಯಾದ ಕಾರಣ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದು ಅದು ತಿಳಿಸಿದೆ. ಕಳೆದ ಅಕ್ಟೋಬರ್ನಲ್ಲಿಯೂ ಈ ಕಂಪನಿ 34,000 ಮಂದಿಯನ್ನು ವಜಾ ಮಾಡಿತ್ತು. ನಷ್ಟದಿಂದ ಪಾರಾಗಲು ಮತ್ತು ಸುಮಾರು 24 ಕಟ್ಟಡಗಳನ್ನು ಮುಚ್ಚಲು ಕಂಪನಿ ಮುಂದಾಗಿದೆ.
ಲೇ ಆಫ್ಗೆ ಪ್ರಮುಖ ಕಾರಣಗಳು:
- AI ಮತ್ತು ಕ್ಲೌಡ್ ಕಂಪ್ಯೂಟಿಂಗ್: ಸಾಂಪ್ರದಾಯಿಕ ಕೋಡಿಂಗ್ ಮತ್ತು ಡೇಟಾ ಎಂಟ್ರಿ ಕೆಲಸಗಳನ್ನು ಈಗ AI ತಂತ್ರಜ್ಞಾನವೇ ಮಾಡುತ್ತಿರುವುದರಿಂದ, ಅಂತಹ ವಿಭಾಗಗಳಲ್ಲಿ ಕೆಲಸ ಮಾಡುವ ಉದ್ಯೋಗಿಗಳ ಅಗತ್ಯವಿಲ್ಲ ಎಂದು ಕಂಪನಿ ಭಾವಿಸಿದೆ.
- ಆರ್ಥಿಕ ಮಂದಗತಿ: ಜಾಗತಿಕ ಮಾರುಕಟ್ಟೆಯಲ್ಲಿ ಕ್ಲೈಂಟ್ಗಳಿಂದ ಹೊಸ ಪ್ರಾಜೆಕ್ಟ್ಗಳ ಸಂಖ್ಯೆ ಕಡಿಮೆಯಾಗಿರುವುದು ಕಂಪನಿಯ ಆದಾಯದ ಮೇಲೆ ಹೊಡೆತ ಬಿದ್ದಿದೆ.
- ಕಾರ್ಯಾಚರಣೆ ವೆಚ್ಚ: ಲಾಭದ ಪ್ರಮಾಣವನ್ನು ಕಾಯ್ದುಕೊಳ್ಳಲು ಆಡಳಿತಾತ್ಮಕ ವೆಚ್ಚಗಳನ್ನು ತಗ್ಗಿಸುವುದು ಕಂಪನಿಗೆ ಅನಿವಾರ್ಯವಾಗಿದೆ.
ಉದ್ಯೋಗಿಗಳ ಆತಂಕ: ಈ ಸುದ್ದಿಯು ಭಾರತೀಯ ಐಟಿ ವಲಯದಲ್ಲೂ ಸಂಚಲನ ಮೂಡಿಸಿದೆ, ಏಕೆಂದರೆ ಈ ಕಂಪನಿಯು ಬೆಂಗಳೂರು ಮತ್ತು ಹೈದರಾಬಾದ್ನಲ್ಲಿ ದೊಡ್ಡ ಕಚೇರಿಗಳನ್ನು ಹೊಂದಿದೆ. “ಪರ್ಫಾರ್ಮೆನ್ಸ್ ರಿವ್ಯೂ” (Performance Review) ಹೆಸರಿನಲ್ಲಿ ಈ ವಜಾ ಪ್ರಕ್ರಿಯೆ ನಡೆಯುವ ಸಾಧ್ಯತೆ ಇದೆ ಎಂದು ಆಂತರಿಕ ಮೂಲಗಳು ತಿಳಿಸಿವೆ. ಈಗಾಗಲೇ ಅನೇಕ ಉದ್ಯೋಗಿಗಳು ಲಿಂಕ್ಡ್ಇನ್ನಂತಹ ವೇದಿಕೆಗಳಲ್ಲಿ ತಮ್ಮ ಆತಂಕವನ್ನು ವ್ಯಕ್ತಪಡಿಸುತ್ತಿದ್ದಾರೆ.
