ಬೆಂಗಳೂರು: ರಾಜ್ಯದಲ್ಲಿ ಅಕ್ಕಿ ಬೆಲೆ ದಿನೇ ದಿನೇ ಗಗನಕ್ಕೇರುತ್ತಿದ್ದು, ಚಿಲ್ಲರೆ ಮಾರಾಟ ಮಳಿಗೆಗಳಲ್ಲಿ ಒಂದು ಕೆಜಿ ಅಕ್ಕಿ ದರ 100 ರೂಪಾಯಿ ಸಮೀಪಕ್ಕೆ ಬಂದಿದೆ.
ಸ್ಟೀಮ್ ರೈಸ್ ಸಗಟು ದರ ಕೆಜಿಗೆ 65 ರಿಂದ 70 ರೂ., ಚಿಲ್ಲರೆ ದರ 75 ರಿಂದ 80 ರೂ. ಇದೆ.
ಸೋನಾ ಮಸೂರಿ ಸಗಟು ದರ ಕೆಜಿಗೆ 75 ರಿಂದ 85 ರೂ., ಚಿಲ್ಲರೆ ದರ 90 ರಿಂದ 95 ರೂ.ಇದೆ
ಜೀರಾ ರೈಸ್ ಸಗಟು ದರ 85 ರಿಂದ 90 ರೂ., ಚಿಲ್ಲರೆ ದರ 95 ರಿಂದ 100 ರೂ.ಗೆ ತಲುಪಿದೆ.
ಜನರು ಅತಿ ಹೆಚ್ಚಾಗಿ ಬಳಕೆ ಮಾಡುವ ಸೋನಾಮಸೂರಿ ರಾ ರೈಸ್ ದರ ಕೆಜಿಗೆ 95 ರೂಪಾಯಿಗೆ ತಲುಪಿದೆ. ಕಳೆದ 20 ದಿನಗಳ ಅವಧಿಯಲ್ಲಿ ಅಕ್ಕಿ ದರ ಭಾರಿ ಏರುಗತಿಯಲ್ಲಿ ಸಾಗಿದೆ. ಬೆಲೆಏರಿಕೆಯಿಂದ ಜನಸಾಮಾನ್ಯರು ತತ್ತರಿಸಿದ್ದಾರೆ. ಸಗಟು ವ್ಯಾಪಾರಿಗಳು ಪ್ರತಿ ದಿನ ಏರಿಕೆ ಮಾಡುವುದನ್ನು ಕಂಡು ಚಿಲ್ಲರೆ ವ್ಯಾಪಾರಿಗಳೇ ಕಂಗಾಲಾಗಿದ್ದಾರೆ.
ಗ್ರಾಹಕರನ್ನು ಕಳೆದುಕೊಳ್ಳಲು ಬಯಸದ ಕೆಲವು ಅಂಗಡಿಯವರು ಲಾಭದ ಪ್ರಮಾಣ ಕಡಿಮೆ ಮಾಡಿಕೊಂಡು ಅಕ್ಕಿ ಮಾರಾಟ ಮಾಡುತ್ತಿದ್ದು, ಮತ್ತೆ ಕೆಲವರು ಸಗಟು ದರಕ್ಕಿಂತ ಕನಿಷ್ಠ ಕೆಜಿಗೆ 10 ರೂಪಾಯಿವರೆಗೆ ಏರಿಕೆ ಮಾಡಿದ್ದಾರೆ.
ತುಂಗಭದ್ರಾ ಜಲಾಶಯದ ಅಚ್ಚುಕಟ್ಟು ಪ್ರದೇಶದಲ್ಲಿ 2026ನೇ ಸಾಲಿನ ಬೇಸಿಗೆಯಲ್ಲಿ ಕ್ರಸ್ಟ್ ಗೇಟ್ ಅಳವಡಿಕೆ ಕಾರಣದಿಂದ ರಾಯಚೂರು, ಕೊಪ್ಪಳ, ಬಳ್ಳಾರಿ ಭಾಗದಲ್ಲಿ ಭತ್ತ ಬೆಳೆದಿರಲಿಲ್ಲ. ಅದರ ಹಿಂದಿನ ಮುಂಗಾರು ಹಂಗಾಮಿನಲ್ಲಿಯೂ ನಿರೀಕ್ಷೆಯಷ್ಟು ಭತ್ತ ಬೆಳೆದಿರಲಿಲ್ಲ. ರಾಜ್ಯದಲ್ಲಿ ಬೆಳೆದ ಭತ್ತವನ್ನು ಹೊರ ರಾಜ್ಯಗಳಿಗೆ ಹೆಚ್ಚಿನ ಪ್ರಮಾಣದಲ್ಲಿ ಮಾರಾಟ ಮಾಡಲಾಗಿದೆ. ಈ ಕಾರಣದಿಂದ ಭತ್ತದ ತೀವ್ರ ಕೊರತೆಯಾಗಿ ಅಕ್ಕಿ ದರ ಏರಿಕೆಯಾಗುತ್ತಿದೆ ಎನ್ನಲಾಗಿದೆ.
